प्रधानमंत्री नरेन्द्र मोदी ह पश्चिम एशिया संकट के बीच विदेशी मुद्रा के बचत बर लोगन मन ले ईंधन बचाय अउ विदेशी उत्पाद के परयोग कम करे के बिनती करे हे। गुजरात के वडोदरा म काली एक जनसभा म प्रधानमंत्री ह पेट्रोल अउ डीजल के उपभोग कम करे अउ वर्क फ्रॉम होम, ऑनलाइन कक्षा अउ वर्चुअल बइठका जइसन कोविड दौर के उपाय अपनाय के अपील दोहरईन।
ऐति, छत्तीसगढ़ के उपमुख्यमंत्री अरूण साव ह घलो पश्चिम एशिया संकट ले उपजे हालात के बीच लोगन मन ले मदद के अपील करे हे।
नीट परीक्षा-रद्द
राष्ट्रीय परीक्षा एजेंसी-एन.टी.ए. ह चिकित्सकीय शिक्षा म दाखिला बर तीन मई के होय नीट-यूजी परीक्षा ल रद्द करे के फैसला लेहे। एन.टी.ए. ह बतईन कि सरकार ह पेपर लीक के आरोप मनके पूरा जांच बर मामला ल केन्द्रीय अन्वेषण ब्यूरो-सीबीआई ल सौंपे के फइसला लेहे। एन.टी.ए. ह किहीन कि परीक्षा बर नवा तारीख अलग ले अधिसूचित करे जाही। पंजीकरण विवरण, उम्मीदवार के जानकारी अउ तीन मई के परीक्षा बर चुने गे परीक्षा केन्द्र वइसने रइही। एजेंसी ह किहीन कि दुबारा परीक्षा बर अउ पंजीकरण कराय के जरूरत नइ पड़य अउ परीक्षा सुल्क घलो नइ लगय।
अंतर्राष्ट्रीय नर्स दिवस
आज अंतर्राष्ट्रीय नर्स दिवस मनाय जात हे। ए मउका म राष्ट्रपति द्रौपदी मुर्मु ह राष्ट्रपति भवन म राखे गे कार्यक्रम म पन्द्रह झिन नर्सिग पेशेवर ले जुड़े नर्सिंग के क्षेत्र म बढ़िया कामकाज बर राष्ट्रीय फ्लोरेंस नाइटिंगेल पुरस्कार दीन। ए पुरस्कार पंजीकृत नर्स, मिडवाइव्स, सहायक नर्स मिडवाइव्स अउ महिला स्वास्थ्य पर्यवेक्षक मन ल दे गीस।
उहें, आज अंतर्राष्ट्रीय नर्स दिवस के मउका म छत्तीसगढ़ म घलो कतकोन कार्यक्रम होवत हे। स्वास्थ्य मंत्री श्याम बिहारी जायसवाल ह रईपुर के डॉक्टर भीमराव अंबेडकर स्मृति चिकित्सालय म राखे गे कार्यक्रम म नर्सिंग संवर्ग के पदनाम म परिवर्तन करे के घोषणा करीन। नर्सिंग सिस्टर मन ल अब सीनियर नर्सिंग ऑफिसर जाने जाही अउ स्टाफ नर्स के नांव नर्सिंग ऑफिसर होही।
सरकार-आदेश
राज्य सासन ह प्रदेस म चरचरावत गर्मी ल देखत स्कूल मन बर गर्मी के छुट्टी घोषित करे जाय के बावजूद कुछेक प्राईवेट स्कूल मन डहार ले ए बेरा कक्षा लगाय जात हे। एला सासन ह गंभीरता ले लेवत अपन आदेस के उल्लंघन माने हे। लोक सिक्षण संचालनालय ह सिक्षा विभाग के जम्मों संयुक्त संचालक अउ जिला सिक्षा अधिकारी मन ल चिट्ठी जारी करके अइसन प्राईवेट स्कूल मनके खिलाफ कार्रवाई करे बर केहे हे।
ए बारे म बिलासपुर उच्च न्यायालय म घलो एक ठिन याचिका दायर करे गे रिहीस, जेला हाईकोर्ट ह संज्ञान म लेहे।
केन्द्रीय राज्यमंत्री-छत्तीसगढ़
केन्द्रीय ग्रामीण विकास राज्यमंत्री कमलेश पासवान ह काली ले छत्तीसगढ़ के दू दिन के दउरा म रइही। अपन प्रवास के दउरान ओमन ग्रामीण विकास मंत्रालय कोति ले चलाय जात आने-आने योजना मनके समीक्षा करही। संगेसंग ग्रामीण विकास ले जुड़े जनप्रतिनिधि, अधिकारी अउ हितग्राही मन ले गोठबात करही। श्री पासवान ह विकसित भारत – जी राम जी अधिनियम ले जुड़े तियारी अउ ग्राम पंचायत मन म चलाय जात ग्रामीण विकास के बारे म घलो जानबा लीहीं। अपन प्रवास के दउरान केन्द्रीय राज्यमंत्री ह स्व-सहायता समूह मनके माईलोगिन अउ आने-आने योजना मनके हितग्राही मन ले गोठबात करही।
मुख्य न्यायाधीश-सिविल कोर्ट
छत्तीसगढ़ उच्च न्यायालय के मुख्य न्यायाधीश रमेश सिन्हा ह आज वीडियो कॉन्फ्रेंसिंग के माध्यम ले गौरेला-पेण्ड्रा-मरवाही जिला के पेंड्रारोड म न्यायिक कर्मचारी मन बर बनाय जात आवासीय परिसर अउ मरवाही म नवा सिविल कोर्ट भवन बनाय के भूमिपूजन करीन। ए मउका म मुख्य न्यायाधीश ह जिला जज अउ लोक निर्माण विभाग के अधिकारी मन ल निरदेस दीन हे कि जम्मों प्रस्तावित काम ल तय करे गे मापदंड के मुताबिक कराय जाय।
चुनाव-ध्वनि विस्तारक यंत्र
प्रदेस म नगर पालिका अउ त्रिस्तरीय पंचायत चुनई के तहत आदर्श आचार संहिता लागू होय के संग लाउड स्पीकर जइसन यंत्र के परयोग बर दिसा-निरदेस जारी करे गेहे। जउन क्षेत्र म चुनई होवइया हे, उहां रतिहा दस बजे ले बिहनिया छह बजे तक लाउड स्पीकर के परयोग उपर रोक लगा दे गेहे। चुनावी सभा अउ प्रचार वाले गाड़ी मन म लाउड स्पीकर लगाय बर सक्षम अधिकारी ले अनुमति लेना जरूरी होही।
सिलेंडर-विस्फोट-मौत
दुरूग जिला के कुम्हारी थाना क्षेत्र म आज संझा सिलेंडर म विस्फोट होय ले एके परिवार के चार झिन लोगन के मउत होगे। एमा डेढ़ साल के एक झिन नोनी घलो सामिल हे।
अतिरिक्त पुलिस अधीक्षक सुखनंदन राठौर ह बतईन कि खपरी रोड स्थित एक ठिन मकान म शॉर्ट सर्किट के सेती आगी लग गीस। आगी के चपेट म आय ले घर म राखे गैस सिलेंडर फट गे अउ आगी पूरा घर म फइल गे। घर म आगी लगे के सेती इहां रहइया परिवार के मनखे मन बाहिर नइ निकल सकीन अउ जिंदा जल गे। पुलिस मामला के जांच करत हे।
तरबूज-मौत
जांजगीर-चांपा जिला के धुरकोट गांव म कलिंदर खाय के बाद एक झिन लइका के मउत अउ तीन झिन आने लइका मनके बीमार होय के मामला आगू आय हे। बीमार लइका मनके इलाज जिला अस्पताल म चलत हे अउ उंखर हालत सामान्य बताय जात हे। प्रसासन ह कलिंदर के सैंपल ल जांच बर भेज देहे। स्वास्थ्य विभाग के टीम ह गांव म लोगन मनके स्वास्थ्य के जांच करत हे।
गांजा-बरामद
रायपुर पुलिस ह ‘‘ऑपरेशन निश्चय‘‘ के तहत गांजा तस्कर मनके खिलाफ बड़का कार्रवाई करे हे। महासमुंद, धमतरी अउ गरियाबंद जिला मन म नाकेबंदी के दउरान फेरी लगाके कपड़ा बेचे के आड़ म करे जात अंतर्राज्यीय तस्करी के खुलासा होय हे। पुलिस ह आरोपी मन ले तीन सौ अटहत्तर किलो ले जादा के गंाजा जब्त करे हे, जेखर भाव बाजार म एक करोड़ अंठानवे लाख रूपिया बताय गेहे। ए कार्रवाई म ग्यारह ठिन गाड़ी जब्त करे गेहे अउ पुलिस ह बारह झिन तस्कर मन ल गिरफ्तार करे हे। ए तस्कर मन ह कपड़ा के ढेर के बीच गांजा रखके ओडिशा ले मध्यप्रदेश जावत रिहीन।
माओवादी-सामग्री बरामद
नारायणपुर जिला म सुरक्षा बल मन ह माओवादी मन डहार ले लुका के राखे गे एक करोड़ रूपिया नगदी के संगेसंग बड़ मात्रा म हथियार, गोला बारूद, विस्फोट जिनीस अउ रोजे काम म अवइया जिनीस बरामद करे हे। जिला के पुलिस अधीक्षक रॉबिन्सन गुरिया ह सुरक्षा बल मन डहार ले करे गे कार्रवाई के जानबा देवत बतईन कि बछर दू हजार पच्चीस-छब्बीस म जिला म दू सौ सत्तर हथियार के रिकवरी होय हे।
प्रधानमंत्री ग्राम सड़क योजना
छत्तीसगढ़ ह प्रधानमंत्री ग्राम सड़क योजना के तहत गांव-गंवई के सड़क मनके बढ़िया रखरखाव म पूरा देस म दूसर स्थान पाय हे। मध्यप्रदेश के सीहोर म राखे गे योजना के रजत जयंती समारोह म केन्द्रीय मंत्री शिवराज सिंह चौहान ह राज्य ल सम्मानित करीन। राज्य कोति ले पंचायत अउ ग्रामीण विकास विभाग के सचिव भीम सिंह अउ प्रमुख अभियंता के.के. कटारे ह पुरस्कार लीन। प्रदेस म अब तक बत्तीस हजार किलोमीटर लंबा आठ हजार ले जादा सड़क मनके नवीनीकरण करे जा चुके हे।
जिला खाद्य अधिकारी-निलंबित
महासमुंद के जिला खाद्य अधिकारी अजय यादव ल गैस चोरी के मामला म निलंबित कर दे गेहे। पाछु नौ मई के ए मामला के खुलासा करत पुलिस ह जिला खाद्य अधिकारी के संगेसंग तीन झिन लोगन मन ल गिरफ्तार करे रिहीन। आरोपी मन ह छह ठिन एलपीजी गैस कैप्सूल टैंकर मन ले गैस चोरी करके ओला अस्सी लाख रूपिया म बेचे रिहीन।
पत्रकारिता मार्तण्ड उत्सव
हिन्दी पत्रकारिता के दू सौ साल पूरा होय के मउका म अवइया तीस मई के रईपुर म ‘‘पत्रकारिता मार्तण्ड उत्सव‘‘ मनाय जाही। ए बारे म रईपुर के प्रेस क्लब के प्रतिनिधिमंडल मन ह मुख्यमंत्री विष्णुदेव साय ले मिलके ओमन ल कार्यक्रम म सामिल होय के नेवता दीन। मुख्यमंत्री ह आयोजन के पोस्टर के विमोचन करीन। ए कार्यक्रम म बड़का पत्रकार, संपादक अउ मीडिया विशेषज्ञ मन सामिल होही।
मौसम
मौसम विभाग ले मिले जानबा के मुताबिक प्रदेस म काली एक-दू जघा म हल्का बरसा होय या गरज-चमक के संग बूंदाबादी होय के संभावना हे। मौसम विज्ञानी ह आकाशवाणी समाचार ल बतईन कि प्रदेस म अवइया चार दिन के दउरान अधिकतम तापमान म दू ले तीन डिग्री सेल्सियस के बढ़ोतरी हो सकथे।