आज दिनभर के खबर ल अपन गुरतुर छत्तीसगढ़ी भाखा म पढ़व

लोकवाणी
मुख्यमंत्री भूपेश बघेल ह किहीन हे कि देस अउ प्रदेस के आर्थिक-सामाजिक समस्या के समाधान समावेसी विकास ले ही होही। श्री बघेल ह आज मासिक रेडियो वार्ता कारीकरम ‘‘लोकवाणी‘‘ के दसवां कड़ी म ‘‘समावेसी विकास-आपकी आस‘‘ बिसय उपर अपन विचार साझा करत ए बात किहीन। मुख्यमंत्री ह किहीन कि महान विभूति मनके न्याय के अवधारणा ले ही हमन ल विकास के छत्तीसगढ़ माॅडल मिले हे। छत्तीसगढ़ सरकार ह किसान मन ल अर्थव्यवस्था के केन्द्र म राखे हे।
मुख्यमंत्री ह किहीन कि सबो झन के आजीविका अउ सुघ्घर आमदनी के बेवस्था करना ही समावेशी विकास के मूलमंत्र हरय अउ हमन ल ए समझना होही कि हरेक परिवार तीर जीये-खाय के साधन राहय।
मासिक रेडियो वार्ता लोकवाणाी म मुख्यमंत्री ह घोषणा करे हे कि राजमेरगढ़ अउ कबीर चबूतरा के प्राकृतिक रूप-रंग अउ एखर ऐतिहासिक महत्तम के सम्मान करत यहां इको रिसार्ट, कैफेटेरिया अउ आने परयटन अधोसंरचना ल बढ़ाय जाही।
मुख्यमंत्री ह अपन रेडियो वार्ता म प्रदेस म कोरोना संकट ले निपटे बर करे जावत प्रयास के घलो जानकारी दीन। ओमन बतईन कि प्रदेस म एखर रोकथाम बर हरेक तरह के उपाय करे जात हे। मुख्यमंत्री ह यहू बतईन कि ए-सिम्टोमेटिक यानि बिना लक्षण वाले मरीज मन ल होम आइसोलेशन के सहुलियत के संगे टेली मेडिसीन-यानि दूरिहा ले पूछताछ परामर्स केन्द्र के माध्यम ले पूरा जानकारी, इलाज बर मार्गदर्शन अउ दवई देके सहुलियत घलो दे गेहे।
नीट-परीक्षा
देसभर म आज मेडिकल स्नातक प्रवेस परीक्षा-नीट के आयोजन करे गीस। कोरोना संक्रमण ले बांचे के जम्मों उपाय भीतरी ए परीक्षा कराय गीस। एखर बर पन्द्रह लाख ले जादा परीक्षा देवइया लइका मन ल एडमिड कार्ड दे गे रिहीस। उहें, छत्तीसगढ़ ह नीट के परीक्षा म सामिल होवइया परीक्षार्थी मन ल परीक्षा केन्द्र तक आय-जाय बर निःसुल्क गाड़ी के बेवस्था करे गे रिहीस।
स्वास्थ्य विभाग-अपील
स्वास्थ्य विभाग ह कोरोना संक्रमण ले बांचे बर सारीरिक अउ समाजिक दूरी के उपाय ले कड़ाई ले पालन करे के संगे जभे ज्यादा जरूरत होय, तभे घर ले बाहिर निकले बर अपील करीन। सार्वजनिक जघा म झन न तो थूके अउ न ही फोकटे बाहिर घुमय। संक्रमण ले बाचे बर घरे भीतरी सुरक्षित राहय।
उहें, कोरोना संक्रमण के कोनो तरह के लक्षण दिखाई देवय त जांच केन्द्र जा के बिना डरराय-घबराय सैंपल देवय। अधिकारी मन बतईन कि कोरोना संक्रमण के रोकथाम बर निकले दिसा-निरदेस ल तोड़इया मन उपर अधिनियम के तहत जुर्माना करे जाही।
स्वास्थ्य मंत्रालय-परामर्श
केन्द्रीय स्वास्थ्य मंत्रालय ह कोरोना महामारी ले स्वस्थ होय लोगन मनके स्वास्थ्य लाभ अउ कल्याण बर कोविड प्रबंधन नियमावली जारी करे हे। एमा बताय गेहे कि बने होय रोगी मन म थकान, बदन दर्द, खांसी-खोखी, गला म खरास अउ सांस ले म तकलीफ वाले लक्षण जारी रहि सकथे। अइसन रोगी मन ल आगू के देखभाल अउ निरोगी होय बर जम्मों प्रयास ल अपनाना जरूरी हे।
ए प्रोटोकाॅल म गरम पानी पीये के संगे सरीर के इम्युनिटी पावर बढ़ईया आयुष दवा ले बर घलो केहे गेहे। उहें, ओमन ल थोरबहुत व्यायाम जइसे योगासान, प्रणायाम अउ ध्यान करे के बात घलो जरूरी बताय गेहे।
कोरोना विजय-रथ
मुख्यमंत्री भूपेश बघेल ह आज अपन निवास जघा ले कोरोना संक्रमण उपर प्रभावी नियंत्रण बर रायपुर सहर अउ गंवई जघा म बड़का जागरूकता कारीकरम के चलत कोरोना विजय रथ ल झंडी देखाके पठोईन। ए मउका म मुख्यमंत्री ह आम जनता ले कोरोना संक्रमण के रोकथाम बर निकले दिसा-निरदेस ल माने के अपील करीन। ओमन लोगन मन ले किहीन कि सबो झिन फिजिकल डिस्टंेसिंग यानि एक-दूसर ले दुरिहा खड़े होय के संगे मास्क लगाय अउ सैनिटाईजर या फेर साबुन ले बीस सेकेंड तक हाथ धोय के संगेसंग भीड़ भीतरी जाय ले बांचे बर किहीन। ए कोरोना विजय रथ ल स्वयंसेवी संस्था मनके सहयोग ले चलाय जाही।
मुख्य सचिव-बैठक
मुख्य सचिव आर.पी. मंडल ह रायपुर के न्यू सर्किट हाउस स्थित स्टेट कमांड अउ कंट्रोल सेंटर म रईपुर जिला म कोरोना के रोकथाम बर करे जावत हे कामकाज के समीक्षा करीन। ए दउरान ओमन कोरोना संक्रमण के तुरते चिन्हारी अउ इलाज उपर जादा ले जादा जोर दीन। उहें, श्री मंडल ह चिकित्सा सुविधा ल घलो बढ़ाय खातिर अधिकारी मन ल निरदेस दीन। एखर बाद मुख्य सचिव ह मेडिकल कालेज रईपुर म बनाय गे स्टेट टेली कंसलटेसन हब म वीडियो कान्फ्रेंसिंग के माध्यम ले आने-आने जिला के अस्पताल म भर्ती मरीज मन ले गोठबात करीन। ए दउरान श्री मंडल ह न्यू सर्किट हाउस म बने कांट्रैक्ट ट्रेसिंग सेंटर, आयुर्वेदिक कालेज अउ इंडोर स्टेडियम स्थित कोविड सेंटर के घलो मुआयना करीन।
संसद-मानसून सत्र
संसद के मानसून सत्र काली ले सुरू होवत हे, जउन ह अवइया महीना के पहिली तारीख तक चलही। कोरोना महामारी के प्रकोप ल धियान म राखत सदन के बइठका म दू पाली म – बिहनिया नौ बजे मंझनिया एक बजे तक अउ मंझनिया तीन बजे ले संझा सात बजे तक राखे जाही। पहिली दिन ल छोड़ के राज्यसभा ह बिहनिया के पारी म बइठका करही अउ लोकसभा के बइठका संझा बेरा होही। सत्र बेरा प्रश्नकाल अउ गैर सरकारी विधेयक मनके बेवस्था ल केंसिल कर दे गेहे। शून्यकाल घलो कमती रइही।
लोकसभा अउ राज्यसभा सचिवालय ले बताय गेहे कि सत्र के दउरान कोनों छुट्टी नइ होही। ए दूनों सदन सनिचर अउ इतवार घलो बइठका करही। कोरोना महामारी ल देखत पहिली बेर रोकथाम के कड़ा उपाय करे गेहे।
मुख्यमंत्री-बैठक
मुख्यमंत्री भूपेश बघेल ह प्रदेस के माओवाद परभावित जिला म चलत विकास काम म तेजी लाय अउ जन-कल्याणकारी योजना मन ल बने ढंग ले लागू के निरदेस दीन। ओमन अपन निवास कार्यालय म राखे गे उच्च स्तरीय बइठका म माओवाद परभावित जिला मन म सुरक्षा कानून अउ व्यवस्था के समीक्षा करीन।
माओवादी-गिरफ्तार/जवान घायल
दंतेवाड़ा जिला म आज सुरक्षा बल मन ह नौ झिन माओवादी ल गिरफ्तार करीन। पुलिस अधीक्षक अभिषेक पल्लव ह बतईन कि कुंआकोंडा थाना क्षेत्र के मैलावाड़ा-मोकपाल के जंगल भीतरी ए माओवादी मन ल पकड़े गीस। एखर मन तीर ले अब्बड़ अकन माओवादी जिनीस बरामद करे गेहे।
उहें, बीजापुर जिला म तोयनार थ