प्रधानमंत्री-सोमनाथ अमृत महोत्सव
प्रधानमंत्री नरेंद्र मोदी काली सोमनाथ मंदिर के जीर्णेध्दार के पचहत्तरवां वर्षगांठ के मउका म राखे गे सोमनाथ अमृत महोत्सव म भाग लिही।
मंदिर म नौ मई ले ही तीन दिनी होमात्मक महारूद्र यज्ञ के आयोजन करे जावत हे, जेमा लगभग सवा लाख आहूति चढ़ाय जावत हे। ए महायज्ञ अभी के वैश्विक परिस्थिति म सांति अउ मानूष कल्याण बर करे जावत हे। अमृत पर्व के मुख्य आकर्षण काली ग्यारा मई के तब होही, जब मंदिर के शिखर म प्रधानमंत्री डहार ले ग्यारा पवित्र तीरथ ले लाय गे जल ले कुंभाभिषेक करे जाही।
सोमनाथ स्वाभिमान पर्व पूरा देस म स्मरणोत्सव के रूप म मनाय जावत हे। एखरे अंतर्गत काली ग्यारा मई के बालोद जिला के ऐतिहासिक अउ पुरातात्विक महत्व के कपिलेश्वर शिव मंदिर म स्मरणोत्सव के आयोजन करे जाही। कलेक्टर दिव्या उमेश मिश्रा ह बतइन कि कपिलेश्वर शिव मंदिर म होवइया ए कारीकरम म श्रध्दा, संस्कृति अउ हमर देस के विरासत के सुघ्घर संगम देखे बर मिलही।
उहें, सोमनाथ स्वाभिमान पर्व म बलरामपुर जिला के ऐतिहासिक स्थल डीपाडीह सामंत सरना म घलो काली स्मरणोत्सव के आयोजन करे जाही। ए कारीकरम नवा पीढ़ी म सांस्कृतिक जागरूकता अउ स्वाभिमान के भावना ल मजबूत करही।
निकाय/पंचायत-चुनाव
प्रदेस म होवइया नगरीय निकाय अउ त्रिस्तरीय पंचायत के आम अउ उप चुनई बर नामांकन के कारज काली ग्यारा मई ले सुरू होही, जेन अट्ठारा मई तक चलही। नामांकन पत्र मनके जांच उन्नीस मई के करे जाही। उम्मीद्वार मन इक्कीस मई तक अपन नांव वापस ले सकही। वोटिंग ह एके चरण म एक जून के होही, जेखर परिणाम चार जून के घोसित करे जाही।
सुनइया मन ल बतादन कि नगरीय निकाय म अध्यक्ष के पांच अउ पार्षद के सतहत्तर पद समेत कुल बयासी पद बर चुनई होही। उहें, त्रिस्तरीय पंचायत म जनपद पंचायत सदस्य के दस, सरपंच के बयासी अउ पंच के एक हजार एक सौ छत्तीस समेत पूरा एक हजार दू सौ अट्ठाईस पद बर चुनई होही।
केंद्रीय गृहमंत्री-बैठक
केंद्रीय गृह मंत्री अमित शाह ह संभावित बाढ़ अउ लू के स्थिति ले निपटे के देस के तियारी के समीक्षा बइठका करीन हे। नई दिल्ली म आज एक बड़का बइठका म श्री शाह सरकारी एजेंसी मनके तियारी के आंकलन करीन, सुरूआती चेतावनी प्रणाली, संसाधन के तैनाती अउ एजेंसी मनके बीच तालमेल के समीक्षा करीन।
गृह मंत्री ह अवइया समय बर करे जावत बाढ़ निवारण उपाय के प्रगति के घलो समीक्षा करीन, जेमा जरूरी ढांचागत परियोजना के बचाव, नदी प्रबंधन पहल अउ पूर्वानुमान म वैज्ञानिक प्रगति सामिल हे। बइठका म जन-जागरूकता, जानमाल के नुकसान ल रोके बर निर्माण, जरूरी राहत समान अउ ईलाज के तियारी बर परयाप्त भंडारण ल पक्का करे उपर गोठबात करे गीस।
सुशासन तिहार
प्रदेस म अभी आयोजित होवत सुशासन तिहार के तहत जघा-जघा समाधान सिविर लगाके लोगन के समस्या ल मउका म ही निराकरण करे जावत हे। इही कड़ी म काली ग्यारा मई सम्मार के रईपुर के शंकर नगर स्थित सिंधु भवन म जन समस्या निवारण सिविर लगाय जाही। एमा बिहनिया ग्यारा बजे ले मंझनिया एक बजे तक आवेदन झोंके जाही।
लोक अदालत
छत्तीसगढ़ म आने-आने न्यायालय म काली लोक अदालत के आयोजन करे गीस। ए दारी के लोक अदालत म सात लाख बयानवे हजार ले जादा मामला के आपसी समझौता ले निराकरण करे गीस। उहें, बावन करोड़ चौदह लाख रूपिया ले जादा के रासि के अवार्ड पारित होइस। लोक अदालत के सुभारंभ छत्तीसगढ़ उच्च न्यायालय के मुख्य न्यायाधीश रमेश सिन्हा ह मंुगेली जिला न्यायालय ले करीन। ए मउका म प्रदेस के सबो जिला वर्चुअल माध्यम ले जुडे़ रिहीस।
ग्रीष्मकालीन शिविर
केंद्रीय शिक्षा मंत्रालय ह गर्मी के छुट्टी म देस के सबो स्कूल मन म भारतीय भाषा ग्रीष्मकालीन सिविर के आयोजन करही। एक हफ्ता के ए सिविर भारतीय भाषा मन म गोठबात के तरीका सीखे, शब्द ल जाने, अपन परिचय देना, असल जिनगी के बातचीत अउ संस्कृति के बड़ई उपर केंद्रित होही। एखर उद्देस्य राष्ट्रीय शिक्षा नीति म समावेसी अउ समान शिक्षा के दृष्टिकोण ल बढ़ावा देना हे।
राष्ट्रीय पंचायत पुरस्कार
केंद्र सरकार ह राष्ट्रीय पंचायत पुरस्कार दू हजार पच्चीस के विजेता मनके घोसना कर देहे। देसभर ले चुने गे बयालिस ठन पंचायत ल ए इनाम दे जाही। पंचायती राज मंत्रालय ह बतइस हे कि पुरस्कार वितरण कारीकरम तीन जून के नई दिल्ली म राखे जाही। मंत्रालय के अनुसार छत्तीसगढ़ के जशपुर जिला के बगीचा तहसील के सरडीह ग्राम पंचायत ल स्वच्छ और हरित पंचायत श्रेणी म देसभर म तीसरइया स्थान मिले हे। मंत्रालय ह बतइस कि विजेता पंचायत मन ल श्रेणी अउ स्तर के आधार म पचास लाख रूपिया ले लेके पांच करोड़ रूपिया तक के वित्तीय प्रोत्साहन मिलही। ए पुरस्कार राष्ट्रीय ग्राम स्वराज अभियान के पंचायत प्रोत्साहन योजना के तहत दे जावत हे।
बकरी ब्रीडिंग और रिसर्च केंद्र
धमतरी जिला के भटगांव ह जल्दीच राज्य के पहिली अत्याधुनिक बकरी ब्रीडिंग और रिसर्च केंद्र बनइया हे। कलेक्टर के पहल म इंहा ‘‘रिसर्च कम इंटीग्रेटेड प्रोडक्शन एडवांसमेंट ब्रीडिंग सेंटर‘‘ स्थापित करे जाही। ए केंद्र म कृत्रिम गर्भाधान, पैथोलॉजी जांच अउ तुरते रोग निदान के सुविधा मिलही। खास-खास नसल के छेरी ल बचाय अउ बढ़ाय बर घलो काम करे जाही। किसनहा अउ युवा मन बर प्रसिक्षण के बेवस्था होही। पहिली चरण म दस ले बारह स्थानीय युवा मन ल रोजगार मिलही अउ पशु सखी मन ल तकनीकी प्रसिक्षण देके ओमन ल आत्मनिर्भर बनाय उपर बिसेस जोर दे जाही।
एसीबी-गिरफ्तार
बिलासपुर के एंटी करप्शन ब्यूरो टीम ह सक्ती जिला के चंद्रपुर थाना म पदस्थ एएसआई एस.एन.मिश्रा ल बीस हजार रूपिया के घूस लेवत रंगे हाथ पकड़े हे। आरोप हे कि एएसआई ह बालपुर के रहइया एक झन मनखे ल कड़ा कारवाई ले बचाय बर चालीस हजार रूपिया के रिस्वत के मांग करे रिहीस।
महिला बंदी-सुविधा
आज मदर्स डे म रईपुर केंद्रीय जेल प्रशासन ह महिला बंदी मन बर वीडियो कॉलिंग के सुविधा सुरू करे हे। ए सुविधा ले अब महिला बंदी मन अपन परिवार अउ वकील ले सीधा वीडियो कॉलिंग ले गोठबात कर सकही। वीडियो कॉलिंग सुविधा बर जेल विभाग अउ बीएसएनएल के बीच अनुबंध होय हे।
उहें, आज जेल परिसर म होय निश्चय कारीकरम म कौसल विकास के प्रसिक्षण पूरा करइया अड़तीस महिला बंदी मन ल प्रमाण पत्र दे गीस। संगेसंग जेल म अपन महतारी मन संग रहत चौदह झन लइका ल विभाग कोति ले खास उपहार घलो दे गीस।महिला और बाल विकास मंत्री लक्ष्मी राजवाड़े ह प्रदेस के जम्मों महतारी मन ल मातृ दिवस के सुभकामना दीन हे।
आईपीएल-मैच
नवा रईपुर के शहीद वीरनारायण अंतरराष्ट्रीय क्रिकेट स्टेडियम म आज रॉयल चैलेंजर्स बेंगलुरू अउ मुंबई इंडियंस के बीच आईपीएल टी-ट्वेंटी क्रिकेट मैच खेले जाही। ए मैच संझा साढ़े सात बजे ले सुरू होही। उहें, तेरह मई बुधवार के रॉयल चैलेंजर्स बेंगलुरू अउ कोलकाता नाइट राइडर्स के बीच मुकाबला होही। दूनों आईपीएल मैच बर प्रशासन ह सुरक्षा के कड़ा तियारी करे हे।
मौसम
मौसम विभाग ह काली ग्यारा मई के प्रदेस के एक-दू जघा म हल्का बरसा होय के संभावना जताय हे। उहें, कुछेक जघा म गरज-चमक के संग हवा गर्रा चले अउ गाज गिरे के चेतावनी देहे। मौसम विभाग के अनुसार उपरी हवा के एक चक्रीय चक्रवाती घेरा ह मन्नार के खाड़ी अउ ओखर ले लगे श्रीलंका के उपर फैले हे। एखर अलावा एक ठन निम्नदाब के क्षेत्र ह दक्षिण-पश्चिम बंगाल के खाड़ी के उपर अवइया अड़तालीस घंटा म बने के संभावना हे। एखरे असर ले काली प्रदेस के कछेक जघा म हल्का बरसा हो सकत हे।