उहें, इक्कीस ले तेईस अगस्त के बीच सर्वोच्च न्यायालय परिसर म विशेष लोक अदालत लगाके लंबा बेरा के मामला सुनवाई करे जाही। पक्षकार मन ल अपन लंबित मामला ल बिसेस लोक अदालत म सामिल करे बर सर्वोच्च न्यायालय के वेबसाइट म इकतीस मई तक गूगल फॉर्म म देना होही।
नगर-निगम पंचायत चुनाव
छत्तीसगढ़ राज्य निर्वाचन आयोग ह नगरीय निकाय अउ त्रिस्तरीय पंचायत के आम अउ उपचुनई के घोसना कर देहे। राज्य निर्वाचन आयुक्त अजय सिंह ह बतइन कि निर्वाचन प्रक्रिया ह ग्यारा मई ले सुरू होही जउन कि चार जून तक चलही। नामांकन पत्र ग्यारा ले अट्ठारा मई तक भरे जाही, जेखर जांच उन्नीस मई के होही अउ नांव वापिस ले के आखिरी तारीख इक्कीस मई राखे गेहे। मतदान ह एके चरण म एक जून के होना हे, जबकि परिणाम चार जून के घोसित करे जाही।
राज्य निर्वाचन आयुक्त ह बतइन कि नगरीय निकाय चुनई ह ईवीएम ले दलीय आधार म अउ पंचायत चुनई ह मत पेटी के माध्यम ले गैर दलीय आधार ले कराय जाही। चुनई वाले जघा म आदर्स आचार संहिता लागू हो गेहे।
जानबा के अनुसार नगरीय निकाय म अध्यक्ष के पांच अउ पार्षद के सतहत्तर समेत कुल बयासी पद बर चुनई होना हे। उहें, त्रिस्तरीय पंचायत म जनपद पंचायत सदस्य के दस, सरपंच के बयासी अउ पंच के एक हजार एक सौ छत्तीस समेत कुल एक हजार दू सौ अट्ठाईस रिक्त पद बर चुनई कराय जाही।
सुशासन-तिहार
राज्य सरकार के सुशासन तिहार के चलत बलौदाबाजार-भाटापारा जिला के ग्राम पंचायत झुमका म जन समस्या निवारण के सिविर के आयोजन होइस। ए सिविर म राजस्व अउ उच्च शिक्षा मंत्री टंकराम वर्मा ह सामिल होइन। ए बेरा म श्री वर्मा ह हितग्राही मन ल ट्रैक्टर के चाबी, अनुदान रासि के चेक, प्रमाण पत्र अउ आने सामग्री भेंट करीन। ए सिविर म तेईस सौ ले जादा आवेदन मिलिस जेमा ले दू सौ बहत्तर आवेदन के मउका म ही निराकरण करे गीस।
जनगणना
छत्तीसगढ़ म अभी मकान सूचीकरण अउ मकान के गिनती के काम चलत हे। इही कड़ी म बलौदाबाजार भाटापारा जिला के कलेक्टर कुलदीप शर्मा ह आज मुंडा गांव म प्रगणक मन कोति ले करे जात जनगणना के काम के निरीक्षण करीन। ओमन ह प्रगणक मन ले मोबाइल लेके खुदे एक झिन मकान मालिक के घर पहुंचिन अउ मकान गणना संबंधित सबो जानकारी लेके डिजिटल गणना ल पूरा करीन।
नगरीय प्रशासन विभाग निर्देश
नगरीय प्रशासन अउ विकास विभाग ह सबो निकाय ल पिये के पानी ले होवत परेसानी ल दूर करे के निरदेस दीन हे। विभाग ह सबो निकाय ल बोरिंग, बोरवेल मन ल एक हफ्ता म जांच करके ठीक करे बर किहीन हे। संगेसंग टूटे पाईप लाइन ल तुरते सुधारे अउ नाली ले होके जाय वाला पाईप लाइन अउ घर के कनेक्सन ल घलो स्थानांतरित करे के निरदेस दीन हे।
मुख्यमंत्री कन्या विवाह योजना
मुख्यमंत्री कन्या विवाह योजना के चलत प्रदेसभर म होय सामूहिक विवाह कारीकरम म तेरह सौ ले जादा जोड़ा मन के बिहाव होइस। ए बिहाव ह राजधानी रईपुर समेत सबो जिला म पारंपरिक रीति-रिवाज के संग करे गीस। मुख्यमंत्री विष्णुदेव साय ह नवविवाहित जोड़ा मन ल बधाई दीन हे। ओमन ह किहीन हे कि ए योजना ह जरूरतमंद परिवार के बड़े चिंता ल दूर करत हे।
विशेष कार्यक्रम
प्रादेशिक समाचार एकांश, आकाशवाणी, रायपुर कोति ले पद्मश्री बर चयनित गोडबोले दंपत्ति ले लेगे बिसेस भेंटवार्ता के प्रसारण काली बिहनिया साढ़े दस बजे ले ग्यारा बजे तक करे जाही। ए कारीकरम के प्रसारण छत्तीसगढ़ के आकाशवाणी के सबो केंद्र ह एके संघरा करही।
अमित शाह-बैठक
केंद्रीय गृहमंत्री अमित शाह ह काली दस मई के नई दिल्ली म देस म संभावित बाढ़ अउ गरमी ले निपटे के तियारी के समीक्षा करही। एमा केंद्र अउ राज्य सरकार के एजेंसी के बीच अच्छा समन्वय, एनडीआरएफ ल सुदृढ़ बनाना अउ प्राकृतिक आपदा के बेरा सून्य जनहानि के दृष्टिकोण म सरलग धियान देना सामिल हरय।
विश्व रेडक्रॉस दिवस
विश्व रेडक्रॉस दिवस म काली रईपुर म होय राज्य स्तरीय कारीकरम म स्कूल शिक्षा मंत्री गजेंद्र यादव ह सामिल होइन। ए मउका म ओमन किहीन कि निःस्वार्थ भाव ले लोगन मनके सेवा करना ही सबले बड़का धरम हरय अउ इही रेडक्रॉस के असली पहिचान हे। कारीकरम म लोक नृत्य, चित्रकला अउ नाटक प्रतियोगिता के विजेता मन ल इनाम देके संगेसंग प्रदेस के चौसठ रेडक्रॉस स्वयं सेवक मन ल प्रमाण पत्र दे गीस। एखर अलावा अंगदान, रक्तदान, नेत्रदान अउ समाज सेवा म योगदान देवइया लोगन मनके संग अच्छा काम करइया कलेक्टर मन ल घलो सम्मानित करे गीस। ए मउका म जूनियर अउ यूथ रेडक्रॉस सम्मेलन घलो होइस।
उहें, रईपुर जिला प्रशासन कोति ले प्रोजेक्ट छांव के चलत लोकभवन म स्वास्थ्य सिविर लगाय गीस, जेमा सामान्य बीमारी के संगेसंग हृदय रोग, कैंसर, किडनी, स्त्रीरोग अउ आने गंभीर बीमारी के निसुल्क जांच करे गीस।
दुर्घटना
बालोद जिला के डौण्डीलोहारा थाना क्षेत्र म आज होय एक रद्दा हादसा म तीन झिन जवान लइका मनके मउत होगे। पुलिस ह बतइन कि देवरी गांव ले ए तीनों झिन ह मोटर साइकिल ले डौण्डीलोहारा कोति जात रिहीन, फेर इही बेरा खैरीडीह गांव करा आगू ले आवत कार ह ए मोटर साइकिल ल टक्कर मार दीस। टक्कर ह अतेक जोरदरहा रिहीस कि ए तीनों जवान लइका मनके मउका म ही मउत होगे। सूचना मिलतेच पुलिस ह घटना स्थल म पहुंचिन अउ शव ल पोस्टमार्टम बर भेजके मामला के जांच सुरू कर देहे।
ओति, गौरेला-पेण्ड्रा-मरवाही जिला के मझगवा गांव म एक ठिन तेज रफ्तार मोटर साइकिल ह रद्दा तीर बइठे तीन झिन मनखे ल टक्कर मार दीस। जेखर सेति चाचा अउ भतीजा के मउका म ही मउत होगे। उहें, एक झिन आने ह गंभीर रूप ले घायल होय हे।
माओवादी सामग्री-बरामद
नारायणपुर जिला म आज सुरक्षाबल के टीम ह बड़का मात्रा म माओवादी समान जब्त करे हे। हमर संवाददाता ह बतइन कि सुरक्षा बल के टीम ह तलासी अभियान के चलत तोके के जंगल म भारी मात्रा म हथियार गोलाबारूद अउ आईईडी बनाय के समान जब्त करे हे, जेमा तीन सौ पंद्रह बोर राइफल, बारह बोर राइफल, रॉकेट लॉन्चर अउ जिंदा कारतूस सामिल हे।
जिले की चिट्ठी
प्रादेशिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के आकाशवाणी के सबो कंेंद्र रिले करही। ए बखत के अंक म ‘‘बालोद‘‘ जिला के संबंध म जानकारी दे जाही।
मौसम
राजधानी रईपुर समेत प्रदेस के कतकोन जिला म आज हल्का ले मध्यम बरसा होय के खबर हे। मौसम विभाग ले मिले जानकारी के अनुसार उत्तर-पूर्वी मध्यप्रदेस म एक ठिन चक्रवात बने हुए हे। उहें, राजस्थान ले लेके मध्यप्रदेस अउ उत्तरीय छत्तीसगढ़ ले लेत होत हुए झारखंड तक एक द्रोणिका विस्तारित हे। जेखर सेति मौसम म बदलाव आय हे।
मौसम वैज्ञानी डॉक्टर गायत्री वाणी ह बतइन कि अवइया चौबीस घंटा म प्रदेस के कुछू जघा म तेज हवा गरेर के संग पानी गिर सकत हे। उहें, ग्यारा मई ले तापमान ह बाढ़ सकत हे।
आईपीएल-मैच
नवा रईपुर के शहीद वीर नारायण सिंह अंतरर्राष्ट्रीय क्रिकेट स्टेडियम म काली दस मई के रॉयल चैलेंजर्स बैंगलुरू अउ मुंबई इंडियंस के बीच आईपीएल टी-ट्वेंटी क्रिकेट मैच खेले जाही। ए मैच ह संझा साढ़े सात बजे ले सुरू होही। आईपीएल मैच ल लेके प्रशासन ह सुरक्षा ल लेके जम्मो तियारी कर लेहे। पूरा स्टेडियम के निगरानी सीसीटीवी कैमरा ले करे जाही।