मुख्यमंत्री कन्या विवाह योजना
मुख्यमंत्री कन्या विवाह योजना के तहत आज प्रदेस के सबो जिला म सामूहिक विवाह के आयोजन करे गिस। ए प्रदेसव्यापी आयोजन म दू हजार तीन सौ ले जादा जोड़ा मन के अपन-अपन धरम अउ रीति-रिवाज ले बिहाव होइस। एमा हिन्दू, मुस्लिम, ईसाई, बौध्द अउ बिसेस पिछड़ा जनजाति के जोड़ा घलो समिल रिहीन।
उहें, मुख्यमंत्री कन्या विवाह योजना के तहत सक्ती जिला म 70 अउ गौरेला-पेंड्रा-मरवाही जिला म 72 जोड़ा के बिहाव कराय गिस।
बतादन कि गौरेला-पेंड्रा-मरवाही जिला के कारीकरम म बिसेस रूप ले चार बइगा आदिवासी परिवार के दू जोड़ा आकर्षण के केंद्र रिहीस। महिला अउ बाल विकास विभाग के अधिकारी अमित सिन्हा ह बतइन कि विभाग ह बेटी बचाओ-बेटी पढ़ाओ अभियान ल बढ़ावा देय के संग जिला ल बाल विवाह मुक्त बनाय के दिसा म सरलग कारज करत हे।
आकाशवाणी-मैराथन
आकाशवाणी ह राष्ट्र के प्रति अपन बिसेस सेवा के नब्बे बछर पूरे के मउका म आज राष्ट्रीय राजधानी म मैराथन के आयोजन करिस। करीबन साढ़े तीन किलोमीटर मैराथन के सुरूआत आकाशवाणी भवन ले होइस। ए मैराथन कृषि भवन, रेल भवन, रिजर्व बैंक ऑफ इंडिया ले गुजरत आकाशवाणी भवन म सिराइस। मैराथन पूरा करइया सबो प्रतिभागी मन ल पदक प्रदान करे गिस। उहें, पुरूष अउ महिला दूनों वर्ग म उपर के तीन प्रतिभागी मन ल टॉªफी प्रदान करे गिस।
बतादन कि प्रसार भारती के मुख्य कार्यकारी अधिकारी गौरव द्विवेदी अउ आकाशवाणी के महानिदेशक राजीव कुमार जैन ह ए मैराथन ल रवाना करिन। ए मउका म आकाशवाणी के महानिदेशक राजीव कुमार जैन ह बतइन कि ए आयोजन सार्वजनिक प्रसारक के रूप म आकाशवाणी के देस के सेवा म करे गे योगदान ल दर्साथे।
राष्ट्रीय लोक अदालत
देसभर के संग छत्तीसगढ़ म काली नौ मई के राष्ट्रीय लोक अदालत के आयोजन होही। ए दउरान कोर्ट म लंबित मामला मनके आपसी सहमति ले निपटारा करे जाही। उहें, इक्कीस ले तेईस अगस्त के बीच सर्वोच्च न्यायालय परिसर म बिसेस लोक अदालत म घलो लंबित मामला मनके सुनवाई होही। पक्षकार मन ल अपन लंबित मामला ल बिसेस लोक अदालत म सामिल करे बर जानकारी सर्वोच्च न्यायालय के वेबसाइट म इक्कीस मई तक गूगल फॉर्म म देना होही। जादा जानकारी बर बार रूम के वन स्टाफ सेंटर या जिला विधिक सेवा प्राधिकरण रइपुर ले संपर्क करे जा सकत हे।
कर्मचारी-महंगाई भत्ता
छत्तीसगढ़ स्टेट पावर ट्रांसमिसन कंपनी लिमिटेड ह अपन अधिकारी-करमचारी मनके महंगाई भत्ता म केंद्र सरकार जइसन दू प्रतिसत बढ़ोत्तरी के ऐलान करे हे। मुख्य अभियंता के आदेस ले अब करमचारी मन ल साठ प्रतिसत डीए दे जाही। ए बढ़ोत्तरी एक जनवरी दू हजार छब्बीस ले प्रभावी माने जाही। उहें, मई के वेतन ले करमचारी मन ल नवा दर ले भुगतान करे जाही।
धान खरीदी-गड़बड़ी
जांजगीर-चांपा जिला म धान खरीदी म बड़े गड़बड़ी उजागर होय हे। जिला के तीन ठन धान खरीदी केंद्र कीरित, कड़ारी अउ बिर्रा म करीबन चार हजार सात सौ कुंटल धान गबन करे गिस, जेखर कीमत एक करोड़ उनतीस लाख रूपिया बताय जावत हे। मामला आगु आय के बाद नवागढ़, बिर्रा अउ बारद्वार थाना म सात झन करमचारी के खिलाफ केस दर्ज करे गिस। एमा संस्था प्रबंधक, खरीदी प्रभारी, ऑपरेटर अउ हमाल घलो सामिल हें। ए सबो आरोपी मामला आगु आय के बाद फरार बताय जावत हे।
शिक्षक-कार्रवाई
छत्तीसगढ़ शिक्षा माध्यमिक मंडल ह हायर सेकेंडरी स्कूल परीक्षा-2025 के उत्तर पुस्तिका मूल्यांकन म लापरवाही बरतइया तीस झन शिक्षक मनके बड़े कारवाही करे हे। मंडल के आदेस म एखर ले जुड़े शिक्षक मन ल अवइया तीन बछर बर आने-आने कारज ले ब्लैकलिस्ट कर देय गिस।
जानकारी ले, उत्तर पुस्तिका के पुनर्मूल्यांकन के बेरा कतकोन छात्र मनके अंक ल बीस ले चालीस तक के बढ़ाय गे रिहीस हे, जेला गंभीर लापरवाही मानत मंडल ह जांच के बाद शिक्षक मन उपर कारवाही करिस। मंडल ह लापरवाह शिक्षक मन के एक वेतनवृध्दि संचयी प्रभावी ले रोके के घलो अनुसंसा करे हे।
दुर्घटना
कोरबा जिला के बांगो थाना इलाका म चोटिया गांव के तिर राष्ट्रीय राजमार्ग-130 म सड़क हादसा होगेा, जेमा एस.ई.सी.एल. गेवरा के पूर्व महाप्रबंधक अरूण कुमार त्यागी के निधन हो गिस। जानकारी ले अरूण कुमार त्यागी के हाल ही म डायरेक्टर टेक्निकल के पद म पदोन्नति होय रिहीस हे। ओमन इही नवा जिम्मेदारी ल संभाले बर कार ले सिंगरौली जावत रिहीन हंे। इही बेरा चोटिया गांव के तिर उंखर कार एक ठन आने गाड़ी ले टकरा गिस।
उहें, जांजगीर-चांपा जिला के बलौदा इलाका म घलो हरदीबाजार रद्दा म कोयला भरे टरक पलटगे। एखर चपेट म आय ले फटफटी सवार दू झन के मउका म ही मउत होगे। ए घटना के बाद टरक चलइया मउका ले फरार बताय जावत हे।
ओति, सक्ती जिला के नंदिनी गांव म बस स्टैंड के तिर दू ठन गाड़ी टकरा गिन। हादसा म कार सवार एक मनखे के मउत होगिस। ए हादसा म आमाकोनी गांव के सरपंच के संग चार लोगन घायल होगिन।
अवैध पेड़ कटाई-जांच
धमतरी-जगदलपुर राष्ट्रीय राजमार्ग क्रमांक-तीस के चौड़ीकरण कारज म बड़का लापरवाही आगू आय हे। वन विभाग के सुरूआती जांच म पता चले हे कि स्वीकृत एलाइनमेंट ले बाहिर जाके आठ हजार ले जादा पेड़ ल काटे गिस। मामला के गंभीरता ले लेवत विभाग ह दोषी मनके खिलाफ कड़ा कारवाही के प्रक्रिया सुरू कर देहे।
बछर दू हजार सत्रह म ए परियोजना बर बालोद, कांकेर, कोंडागांव अउ बस्तर जिला के चार सौ दू हेक्टेयर ले जादा वन भूमि के उपयोग के अनुमति देय गे रिहीस। केसकाल वनमंडल म दस हजार सात सौ इकतीस पेड़ के काटे के मंजूरी मिले रिहीस, जेमा जांच समिति ह पाइस कि आठ हजार ले जादा पेड़ स्वीकृत क्षेत्र ले बाहिर काटे गिस। वन विभाग ह जिम्मेदार तत्कालीन अधिकारी-कर्मचारी मनके खिलाफ कारवाही के प्रस्ताव वरिष्ठ कार्यालय ल भेज दे गेहे।
जशपुर-पुल स्वीकृत
जशपुर जिला म कुनकुरी-तपकरा-लवाकेरा रद्दा के श्री नदी म बड़का पुलिया अउ पहुंच मार्ग निर्माण बर राज्य सरकार ह करीबन नौ करोड़ पैंतालीस लाख रूपिया के स्वीकृति देय हे। ए पुलिया छत्तीसगढ़, झारखंड अउ ओडिशा ल जोड़इया रद्दा म बनाय जाही।
पुलिया बने ले तीन राज्य के बीच अवई-जवई जादा सुरक्षित अउ सरल होही। हाल बेरा संकरा पुलिया होय के सेति बरसात के दिन म परेसानी होवत रिहीस, एखर सेति लंबा बेरा ले क्षेत्रवासी मन पुलिया के मांग करत रिहीन।
वनोपज संरक्षण वाणी
वन मंत्री केदार कश्यप ह आज नवा रइपुर म ‘छत्तीसगढ़ वनोपज संरक्षण वाणी‘ अउ आई.वी. आर.एस. आधारित सूचना अउ संवाद तंत्र के सुभारंभ करिन। संग्राहक मन ल जानकारी लेय बर टोल फ्री नंबर- नौ आठ एक-एक-एक दू पांच आठ एक तीन (9811125813) म मिस्ड काल करना होही। मिस काल के बाद नौ-एक-एक (911) ले सुरू होवइया नंबर ले उपयोगकर्ता ल काल बैक आही। फोन उठावत ही संग्राहक अपन स्थानीय बोली-हल्बी अउ गोंडी म घलो जानकारी सुन सकहीं।
मौसम
प्रदेस म काली एक-दू जघा गरज-चमक के संग हवा गरेर अउ गाज गिरे के चेतावनी देय गेहे। मौसम विभाग के अनुसार एक ठन द्रोणिका दक्षिण-पश्चिम उत्तर प्रदेस ले अंदरूनी ओडिसा अउ छत्तीसगढ़ होवत गुजरही। एखर प्रभाव ले प्रदेस म काली कुछेक जघा गरज-चमक के संग छींटा पड़े के संभावना हे।
गांजा-बरामद
महासमुंद पुलिस, एंटी नारकोटिक टास्क फोर्स अउ कोमाखान पुलिस ह संयुक्त रूप ले कारवाही करत एक ठन एबुंलेंस ले पचहत्तर किलो गांजा जब्त करे गिस। आरोपी मन ओडिसा ले गांजा लेके महाराष्ट्र ले जावत रिहीन। ए मामला म महाराष्ट्र के पांच झन तस्कर मन ल गिरफ्तार करे गेहे अउ उंखर तिर ले गाड़ी अउ पांच ठन मोबाइल जब्त करे गिस।
श्रमिक-स्वास्थ्य शिविर
कर्मचारी राज्य बीमा निगम डहार ले काली राजधानी रइपुर के ई.एर्स.आइ.सी. अस्पताल रावाभाठा म निसुल्क जांच सिविर के आयोजन करे गिस, जिहंा चालीस बछर ले जादा उमर के बीमा होय अब्बड़ झन श्रमिक मन स्वास्थ्य जांच कराइन।