उहें, परदेशी सिद्धार्थ कोमल ल कृषि उत्पादन आयुक्त बनाय गेहे। श्यामलाल धावड़े ल रईपुर संभाग के आयुक्त नियुक्त करे गेहे। डॉक्टर संजय कन्नौजे ल संस्कृति विभाग के संचालक अउ रीता यादव ल माध्यमिक शिक्षा मंडल के सचिव के प्रभार सौंपे गेहे।
मुख्यमंत्री-पेयजल समस्या
मुख्यमंत्री विष्णुदेव साय ह सरगुजा जिला के चेराजोबला बस्ती म पीये के पानी ले जुड़े समाचार ल संज्ञान म लेवत जिला प्रशासन ल जरूरी कार्रवाई करे के निरदेस दीन हे। मुख्यमंत्री ह आज सरगुजा कलेक्टर अजीत वसंत ल फोन म प्रभावित बस्ती म जल्दी पीये के पानी के वेवस्था सुनिश्चित करे बर किहीन। श्री साय ह अधिकारी मन ले किहीन कि चेराजोबला बस्ती म पीये के पानी के संकट के स्थिति के जांच करके हैंडपंप लगाए अउ आने व्यवस्था जल्दी करे बर किहीन हे। मुख्यमंत्री ह यहू किहीन कि विशेष पिछड़ी जनजाति क्षेत्र म पीये के पानी, रद्दा, स्वास्थ्य अउ सिक्षा जइसन बुनियादी सुविधा के नियमित समीक्षा करे जाय।
इनोवेशन महाकुंभ-समापन
जगदलपुर के शहीद महेन्द्र कर्मा विश्वविद्यालय म राखे गे दू दिवसीय इनोवेशन महाकुंभ काली सिरा गे। समापन कार्यक्रम म बोलत मुख्यमंत्री विष्णुदेव साय ह इनोवेशन महाकुंभ म आत्मसमर्पित माओवादी मनके लइका मनके भाग ले म खुशी जतात किहीन कि बस्तर क्षेत्र म प्रतिभा अउ संभावना के कोनों किसम के कमी नइ हे, जरूरत सिरिफ सही मंच, अगुवई करे अउ मउका के हे। ओमन किहीन कि ए आयोजन ले युवा मन ल नवाचार अउ उद्यमिता बर मजबूत प्लेटफॉर्म मिलत हे। ए महाकुंभ म बेस्ट आईडिया अउ बेस्ट स्टार्टअप कॉम्पिटिशन के जीतइया मन ल इनाम दे गीस।
धमधा-नगर पालिका
उपमुख्यमंत्री अरूण साव ह धमधा नगर पंचायत के बढ़वार करके नगर पालिका बनाय के घोसना करीन हे। ओमन किहीन कि एखर ले धमधा के बने ढंग ले विकास अउ जनसुविधा विकसित करे के काम ल अउ जादा गति मिलही। श्री साव ह धमधा दउरा के दउरान करीबन सात करोड़ रूपिया के विकास काम के लोकार्पण अउ भूमिपूजन करीन। उहें, सहर के विकास खातिर दू करोड़ रूपिया देके घोसना करीन हे।
मुख्य सचिव-कैम्पा
मुख्य सचिव विकासशील के अगुवई म काली मंत्रालय म छत्तीसगढ़ प्रतीकात्मक वनरोपण निधि प्रबंधन अउ योजना प्राधिकरण-कैम्पा के समीक्षा बइठका राखे गीस। बइठका म पाछु दू वित्तीय बछर के काम के समीक्षा करे गीस। मुख्य सचिव वन अउ जलवायु परिवर्तन विभाग के अधिकारी मन ल वन क्षेत्र म पुल-पुलिया, रद्दा अउ जरूरी भवन बनाय खातिर निरदेस दीन। ओमन नक्सल मुक्त क्षेत्र म बिकास काम ल झटकिन करे बर किहीन। बइठका म बताय गीस कि बछर दू हजार छब्बीस-सत्ताईस बर सात सौ तेरह करोड़ तिहत्तर लाख रूपिया के वार्षिक कार्ययोजना केन्द्र सरकार ल अंतिम मंजूरी बर भेजे गेहे। मुख्य सचिव ह मानसून के पहिली सबो जरूरी काम बेरा रहत पूरा करे के निरदेस दीन।
राज्यपाल-टीबी मरीज
राज्यपाल रमेन डेका ह कोंडागांव म राखे गे राष्ट्रीय टीबी उन्मूलन कार्यक्रम म पांच झिन मरीज ल खाय-पीये के जिनीस बांटीन। ए बेरा म ओमन ग्राम पंचायत चिखलपुट्टी, किवईबालेंगा अउ मालाकोट ल टीबी मुक्त होय म प्रमाण पत्र दीन। कार्यक्रम म प्रधानमंत्री आयुष्मान भारत योजना के हितग्राही मन ल आयुष्मान कारड, रेडक्रॉस सोसायटी के नवा सदस्य मन ल सदस्यता प्रमाण पत्र के संगेसंग राष्ट्रीय अंधत्व निर्वाण कार्यक्रम म चश्मा बांटे गीस।
चावल महोत्सव-आवास दिवस
प्रदेस के ग्राम पंचायत म काली एक संघरा चावल महोत्सव, रोजगार दिवस अउ आवास दिवस मनाय जाही। रोजगार दिवस म काली ग्राम पंचायत मन म मनरेगा के काम के समीक्षा करे जाही अउ रोजगार बर नवा मउका म कार्ययोजना बनाय जाही। उहें, प्रधानमंत्री आवास योजना म लंबित मामला ल प्राथमिकता के संग पूरा करे जाही। सासन के लक्ष्य मंजूर आवास ल अवइया नब्बे दिन के भीतरी पूरा कराना हे। एखर संगेसंग जल संरक्षण खातिर ‘‘मोर-गांव मोर-पानी, मोर तरिया‘‘ अभियान म ‘‘नवा तरिया आय के जरिया‘‘ विषय म गोठबात अउ काम होही।
कृषि अनुदान-आवेदन
प्रदेस म किसान मन बर अनुदान म कृषि यंत्र अउ सिंचाई उपकरण बर ऑनलाइन अरजी के काम काली सात मई ले सुरू होही। छत्तीसगढ़ राज्य बीज अउ कृषि विकास निगम के मुताबिक चेम्प्स पोर्टल ले किसान मन अरजी दे सकही। प्रधानमंत्री कृषि सिंचाई योजना म ड्रिप अउ स्प्रिंकलर बर अरजी काली ले, शाकंभरी योजना म सिंचाई पंप बर ग्यारह मई ले अउ ट्रैक्टर हार्वेस्टर, रोटावेटर समेत आने कृषि यंत्र खातिर अरजी पन्द्रह मई ले ले जाही। अरजी बर आधार, बैंक पासबुक अउ भूईंया के दस्तावेज जरूरी होही।
वित्तमंत्री-बैंक शाखा
वित्तमंत्री ओपी चौधरी ह आज बीजापुर जिला के तर्रेम गांव म बैंक ऑफ बड़ौदा के नवा शाखा के वर्चुअल उद्घाटन करीन। ए मउका म वित्तमंत्री ह किहीन कि बैंक शाखा खुले ले इहां के लोगन ल अब अपन क्षेत्र म ही आसानी ले जरूरी बैंक सेवा मिल सकही। ओमन किहीन कि एखर ले सरकारी योजना के फायदा सोझे अउ साफगोई रूप ले हितग्राही मन तक पहुंचही।
राष्ट्रीय लोक अदालत
देसभर समेत छत्तीसगढ़ म अवइया नौ मई के राष्ट्रीय लोक अदालत के आयोजन करे जाही। ए दउरान न्यायालय म लंबित मामला के आपसी मंजूरी ले निराकरण होही। उहें, इक्कीस ले तेईस अगस्त के बीच सर्वोच्च न्यायालय परिसर म विशेष लोक अदालत ले लंबित मामला के सुनवाई होही। पक्षकार मन ल अपन लंबित मामला ल बिसेस लोक अदालत म सामिल करे बर जानकारी सर्वोच्च न्यायालय के वेबसाइट म इकतीस मई तक गुगल फार्म म दे बर पड़ही। जादा जानकारी बर बार रूम के वन स्टाप सेंटर या जिला विधिक सेवा प्राधिकरण रईपुर ले संपर्क करे जा सकत हे।
मुख्यमंत्री-फुलबासन बाई
पद्मश्री अउ समाजसेवी फुलबासन यादव के संग होय अपहरण के घटना ल मुख्यमंत्री विष्णुदेव साय ह गंभीरता ले लेहे। मुख्यमंत्री ह आज बिहनिया फोन म फुलबासन यादव ल गोठबात करत उंखर हालचाल जानीन अउ घटना के जानकारी लीन। श्री साय ह किहीन कि ए मामला के हर पहलू के जांच करे जाही अउ दोसी मन ल सजा मिलही।
लूट
राजधानी रईपुर के खरोरा क्षेत्र म एक सोना-चांदी दुकान के प्रबंधक के संग लूट के घटना होय हे। पुलिस के मुताबिक इहां के प्रबंधक दुकान बंद करके दूसर साखा ले सोना-चांदी के गहना लेके खरोरा लहुटत रिहीस हे। इही बेरा दू ले तीन फटफटी सवार अज्ञात मनखे मन ह ओखर उपर तलवार ले हमला करके करीबन एक करोड़ रूपिया के गहना लूट लीन अउ फरार होगे। घायल प्रबंधक के हालत गंभीर बताय जात हे। पुलिस ह मामला दरज करके जांच सुरू कर देहे।
गोलीकांड
राजधानी रईपुर के मोवा क्षेत्र म पाछु रतिहा एक मनखे ह दू झिन युवती उपर गोली चला दीन। ए घटना म एक युवती के मउकाच म मउत होगे अउ उहें, दूसर युवती के इलाज के दउरान मउत होइस। जानकारी के मुताबिक घटना ल पारिवारिक विवाद के सेती अंजाम दे गीस हे। बताय जात हे कि दूनों युवती नता म बहिनी रिहीन अउ आरोपी उंखर भाटो हे। पुलिस ह आरोपी मनखे ल गिरफ्तार कर लेहे।
संक्षिप्त समाचार
– रईपुर के पुलिस कमिश्नर संजीव शुक्ला ह सहर के व्यस्त रद्दा म बिहनिया नौ बजे ले रतिहा नौ बजे तक कोनों भी किस्म के रैली, सोभायात्रा, जुलूस अउ आने किसम के प्रदर्सन म प्रतिबंध लगा देहे। ए प्रतिबंध चार मई ले प्रभावी होगे हे, जउन अवइया दू महीना तक लागू रइही।
अउ
– कोंडागांव जिला म पूसपाल गांव तीर बाराती ले भरे एक गाड़ी अनते-तनते होके पलट गे। ए घटना म एक मनखे के मउत होगे हे। उहें, आठ झिन घायल हे।