देस के चार ठिन राज्य पश्चिम बंगाल, असम, केरलम, तमिलनाडु अउ एक ठिन केंद्रशासित प्रदेस पुद्दुचेरी म आज विधानसभा चुनई बर होय वोट के गिनती चलत हे। जेखर रूझान के अनुसार पश्चिम बंगाल म भारतीय जनता पार्टी ह निर्णायक बढ़त बना लेहे उहें, असम अउ पुद्दुचेरी म अपन सहयोगी दल के संग एक घांव फेर वापसी करत हे।
असम म भारतीय जनता पार्टी ह सरलग तीसर दरी सरकार बनाय बर जात हे।
तमिलनाडु विधानसभा चुनई म अभिनेता ले राजनेता बने विजय के पार्टी तमिलगा वेत्री कड़गम-टी वी के सेति बहुत बड़का बदलाव देखे बर मिले हे।
केरलम म घलो सबो 140 सीट के परिणाम अउ रूझान आगे हे। इंहा कांग्रेस पार्टी के नेतृत्व म यूडीएफ ह बढ़त बनाय हुए हे।
चार राज्य अउ एक केंद्रशासित प्रदेस म विधानसभा चुनई के परिणाम आय के बाद प्रधानमंत्री नरेंद्र मोदी ह आज संझा के नई दिल्ली के भाजपा मुख्यालय म पार्टी के कार्यकर्ता मन ल संबोधित करइया हे।
इही बीच, मुख्यमंत्री विष्णुदेव साय ह पश्चिम बंगाल, असम अउ पुद्दुचेरी म भाजपा अउ एनडीए ल जनादेस मिले म खुसी जतइन हे। अपन संदेस म ओमन ह एला लोकतंत्र के मजबूती, जनविस्वास अउ राष्ट्रवाद के भावना ल चिन्हारी बतइन हे।
मुख्यमंत्री-सुशासन तिहार
सुशासन तिहार के चलत मुख्यमंत्री विष्णुदेव साय ह आज कबीरधाम जिला के लोखान गांव पहुंचिन, जिंहा ओमन ह नवा बनत पंचायत भवन के औचक निरीक्षण करीन अउ उंहा काम करइया माईलोगिन मन ले गोठ करीन। माईलोगिन मन ह बतइन कि गांव म पिये के पानी के समस्या हरय, जेखर उपर कलेक्टर ह मुख्यमंत्री ल बतइन कि पहाड़ी जघा के छब्बीस ठन गांव बर एक ठिन बिसेस पेयजल योजना तियार करे जात हे, जेला जल्दी सुरू करे जाही।
एखर ले पहिली, काली मुख्यमंत्री ह बलरामपुर म होय समीक्षा बइठक म अधिकारी मन ल बरसा के पहिली सबो खराब रद्दा ल ठीक करे के निरदेस दीन हे। बठइका म रद्दा ल बनाय के सही जानकारी नइ दे पाय म मुख्यमंत्री ह लोक निर्माण विभाग के एक झिन अधिकारी उपर गुस्सा घलो करीन। श्री साय ह जल्दी ही मुख्यमंत्री हेल्पलाइन ल सुरू करे के घोसना घलो करीन हे, जिंहा टोल फ्री नंबर म लोगन मन अपन समस्या ल दरज करा सकही।
इनोवेशन महाकुंभ
जगदलपुर के शहीद महेन्द्र कर्मा विश्वविद्यालय म दू दिन चलइया इनोवेसन महाकुंभ ह आज ले सुरू हो गेहे। कारीकरम क सुभारंभ राज्यपाल रमेन डेका ह करीन। अपन संबोधन म राज्यपाल ह ए कारीकरम ल बस्तर म नवाचार, उद्यमिता अउ आत्मनिर्भरता के दिसा म एक ठिन मजबूत सुरूआत बतइन हे। ओमन ह जवान लइका मन ले स्व-रोजगार के दिसा म आगु बाढ़े के बात करीन। राज्यपाल ह बस्तर के महुआ, इमली, तेंदूपत्ता, रेशम जइसे उत्पाद ल ब्रांड बनाके बाजार तक पहुंचाय म जोर दीन। राज्यपाल ह ‘इनोवेशन एंड स्टार्टअप कंपेडियम पुस्तक‘ के विमोचन करीन अउ पद्मश्री डॉक्टर बुधरी ताती ल घलो सम्मानित करीन।
ए दू दिन के इनोवेशन महाकंुभ के सुभारंभ सत्र म आज वन मंत्री केदार कश्यप, सांसद महेश कश्यप, महापौर संजय पांडेय अउ पूर्व राज परिवार के सदस्य कमलचंद्र भंजदेव समेत आने लोगन मन रिहीन। ए कारीकरम म बस्तर संभाग समेत कतकोन जघा ले एक हजार ले जादा प्रतिभागी मन सामिल होवत हे।
मुख्यमंत्री-बोर्ड सम्मान/आईपीएल
मुख्यमंत्री विष्णुदेव साय ह आज बलरामपुर-रामानुजगंज जिला के दसवीं अउ बारहवीं बोर्ड परीक्षा म अच्छा प्रदर्सन करइया लइका मन ल सम्मानित करीन। मुख्यमंत्री ह बलरामपुर के सर्किट हाउस म होय ए कारीकरम म पढ़इया लइका मन ले गोठ घलो करीन। श्री साय ह ओमन ल प्रोत्साहित करत हुए किहीन कि सपना देखना अउ ओला लक्ष्य म बदल के सरलग कोसिस करना ही असली सफलता हे।
उहें, प्रदेस म दसवीं अउ बारहवीं बोर्ड के परीक्षा म मेरिट सूची म जघा बनाय वाले लइका मन ल दस मई के नवा रईपुर के शहीद वीर नारायण सिंह इंटरनेशनल क्रिकेट स्टेडियम म आईपीएल मैच देखाय जाही। एखर बर स्कूल शिक्षा विभाग ह सबो संभागीय संयुक्त संचालक अउ जिला शिक्षा अधिकारी मन ल निरदेस जारी करीन हे।
केंद्र-एलपीजी
अभी के बेरा म भू-राजनीतिक स्थिति के सेति एलपीजी के आपूर्ति ह प्रभावित होवत हे। एलपीजी के मांग के दबाव ल कम करे बर माटी तेल अउ कोयला जइसन वैकल्पिक ईंधन उपलब्ध कराय जात हे।
कोयला मंत्रालय ह कोल इंडिया अउ सिंगरेनी कोलियरीज ल निरदेस दीन हे कि ओमन ह छोटे अउ मध्यम उपभोक्ता मन ल बांटे बर राज्य मन ल अतिरिक्त कोयला के आपूर्ति करय। सबो राज्य ल सलाह दे गेहे कि ओमन ह घरेलू अउ व्यावासायिक उपभोक्ता मन बर नवा पीएनजी कनेक्सन के सुविधा देवय।
फेर इही बीच, एलपीजी वाहक पोत एमटी सर्वशक्ति ह भारत बर करीबन छियालीस हजार मीट्रिक टन तरल पेट्रोलियम गैस के संग होर्मुज के खाड़ी ल सुरक्षित पार कर लेहे, जेखर तेरह मई के विशाखापट्टनम पहुंचे के उम्मीद हरय।
अग्नि सुरक्षा सप्ताह
केंद्रीय स्वास्थ्य अउ परिवार कल्याण मंत्रालय ह देसभर म आज ले अखिल भारतीय अग्नि सुरक्षा सप्ताह मनावत हे। जेखर उद्देस्य स्वास्थ्य केंद्र म आगी ले होवइया घटना ल रोके अउ ओखर निवारण के प्रति जागरूकता ल बढ़ाना हे।
केंद्र-मधुमेह
केंद्र सरकार ह लइका मन म मधुमेह के बीमारी ल रोके बर दिसा निरदेस जारी करीन हे। केंद्रीय स्वास्थ्य मंत्रालय ह बतइन हे कि लइका पन ले मधुमेह के जांच, निदान अउ उपचार बर मानकीकृत राष्ट्रीय ढांचा उपलब्ध कराय जात हे। ए पहल ले भारत ह अब ओ चुनिंदा देस म सामिल हो गेहे, जिंहा लइका मन म मधुमेह के देखभाल ल सार्वजनिक स्वास्थ्य प्रणाली म एकीकृत करे हे।
राष्ट्रीय बाल स्वास्थ्य कार्यक्रम
केंद्रीय स्वास्थ्य अउ परिवार कल्याण मंत्रालय ह हाले म राष्ट्रीय बाल स्वास्थ्य कारीकरम के दूसर चरण बर दिसा-निरदेस जारी करीन हे। एमा गैर संक्रामक रोग, मानसिक स्वास्थ्य स्थिति अउ व्यवहार संबंधित चिंता समेत आधुनिक स्वास्थ्य चुनौती ल सामिल करे गेहे। एमा लइका पन ले लेके अट्ठारा बछर तक के लइका मन के स्वास्थ्य म धियान देत हुए जरूरी कदम अपनाय गेहे।
दुर्घटना
कवर्धा जिला म पाछू रतिहा एक ठिन रद्दा हादसा म चार झिन जवान लइका मनके मउत होगे। जानबा के अनुसार एमन ह रईपुर ले कार म पंडरिया कोति एक ठिन बिहाव म सामिल होय बर जात रिहीन। इही बेरा म पांडातराई नदी म उंखर कार ह अनियंत्रित होके गिर गे। जेखर बाद चार झिन युवक मनके मउका म ही मउत होगे, जबकि आने दू झिन युवक मन ह गंभीर रूप ले घायल होय हे। जउन मन इलाज बर रईपुर के अस्पताल म भर्ती करे गेहे।
उहें, जांजगीर-चंापा जिला के नवागढ़ के सेमरा गांव म तेजी ले आत एक ठिन मोटर साइकिल म सवार एक झिन मनखे ह अनियंत्रित होके रद्दा तीर बने सुवागत द्वार ले टकरा गीस, जेखर सेति ओखर मउत होगे।
माओवादी विस्फोटक बरामद
बस्तर संभाग म माओवादी मन कोति ले सबो जिला म छिपाके राखे गे विस्फोटक समेत आने समान ल बरामद करे बर सर्चिंग अभियान ह सरलग चलत हे। एखर चलत दंतेवाड़ा जिला के बारसूर थाना क्षेत्र के तोड़मा गांव ले सीआरपीएफ अउ जिला पुलिस के टीम ह भारी मात्रा म विस्फोटक अउ प्रतिबंधित समान ल जब्त करे हे। जेमा पचहत्तर ठीक इलेक्ट्रीक डेटोनेटर, एस.एल.आर. राउंड, इंसास राउंड, बारह बोर खाली केस अउ तीन सौ तीन ठीक बंदूक के खाली कारतूस के अलावा आने हथियार अउ विस्फोटक सामग्री के संग रोज दिन के जरूरी चीज ह सामिल करय।
फूड पॉयजनिंग
कोंडागांव जिला के डोंगरीगुड़ा के राउत पारा म एक ठिन बिहाव के कारीकरम म खाना खाय के बाद छियालीस झिन लोगन मन के तबियत खराब होगे। सुरूआती जांच म खाना खाय ले संक्रमण के सेति फूड पॉयजनिंग के आसंका जताय गेहे। सूचना मिलतेच स्वास्थ्य विभाग के टीम ह मउका म पहुंचिन अउ सबो मरीज मन के इलाज करीन। उहें, गंभीर मरीज मन ल जिला अस्पताल म भर्ती कराय गेहे अउ स्वास्थ्य विभाग ह गांव म स्थिति ल देखत हे।