केंद्र सरकार ह केहे हे कि मौजूदा-भू-राजनीतिक स्थिति के बावजूद ए सुनिश्चित करे गेहे कि घरेलू एलपीजी, घरेलू पीएनजी अउ सीएनजी परिवहन के सौ प्रतिसत आपूर्ति करे जाय। सरकार ह नागरिक मन ल सलाह दीन हे कि ओमन पेट्रोल, डीजल अउ एलपीजी के घबराहट म खरीदी ले बचय, काबर के सरकार पेट्रोल, डीजल अउ एलपीजी के उपलब्धता सुनिश्चित करे बर हर संभव प्रयास करत हे। मौजूदा भू-राजनीतिक स्थिति के कारण एलपीजी के आपूर्ति प्रभावित होवत हे। सरकार ह घरेलू उपयोग बर एलपीजी के आपूर्ति ल प्रमुखता देहे। घरेलू खपत ल पूरा करे बर रिफाइनरी ले एलपीजी के घरेलू उत्पादन बढ़ाय गेहे।
इही बीच, महासमुंद जिला म एलपीजी गैस के कथिक गबन के बड़का मामला आगू आय हे। जानकारी के अनुसार सुरक्षित रख-रखाव बर सुपुर्दनामा म दे गे छै एलपीजी कैप्सूल ले लगभग नब्बे मीट्रिक टन ले जादा गैस के गबन के खुलासा होय हे। एखर अनुमानित कीमत करीबन डेढ़ करोड़ रूपिया बताय गेहे। आरोप हे कि ठाकुर पेट्रोकेमिकल के मालिक, निदेशक अउ प्लांट प्रबंधक ह कूटरचना करके गैस खाली करीन। ए मामला के जांच जारी।
बताय जात हे कि जिला के सिंघोड़ा पुलिस ह पाछू दिसंबर महिना म एलपीजी गैस के छै कैप्सूल ट्रक ल जब्ती करे रिहीस। गैस ल भरे ए ट्रक ल सुरक्षित रखे बर ठाकुर पेट्रोकेमिकल ल दे गे रिहीस।
हाईकोर्ट-बेंच हंटिंग
छत्तीसगढ़ होईकोर्ट ह बेंच हंटिंग याने अपन पसंद के पीठ के आगू मामला सूचीबध्द कराय के कोसिस उपर कड़ा रवइया अपनाय हे। मुख्य न्यायाधीश रमेश सिन्हा अउ न्यायमूर्ति रविन्द्र कुमार अग्रवाल के खंडपीठ ह स्पष्ट करे के कि ए संबंध म जारी प्रशासनिक सर्कुलर केवल सावधानी बरते बर हे। ए कोनो न्यायाधीश ल सुनवाई ले अलग होय बर बाध्य नइ करय। हाईकोर्ट ह कहे हे कि न्यायिक विवेक सर्वोपरि हे अउ अदालत अपन फइसला लेबर स्वतंत्र हे। कोर्ट ह यहू केहे हे कि सर्कुलर के उद्देस्य न्यायिक प्रक्रिया के निष्पक्षता बनाय रखे अउ निहित स्वार्थ बर अदालत के दुरूपयोग ल रोकना हे। मामला के अगला सुनवाई अवइया अट्ठारा जून के होही।
सुशासन तिहार-मुख्यमंत्री दौरा
सुशासन तिहार के तहत मुख्यमंत्री विष्णुदेव साय ह आज जशपुर अउ सरगुजा जिला के गांव मनके औचक दउरा करीन। सबले पहिली मुख्यमंत्री जशपुर जिला म भैसामुड़ा गांव के चंदागढ़ शासकीय स्कूल पहुंचिन अउ क्रिकेट खेलत लइका मन संग मुख्यमंत्री ओमन के खेल म सामिल होइन। एखर बाद गांव म चौपाल लगाके श्री साय ह ग्रामीण अउ लइका मनले गोठबात करीन।
मुख्यमंत्री ह जिला कलेक्टर ल निरदेस दीन कि स्कूल के लइका मन ल जरूरी क्रिकेट कीट अउ स्पोर्ट्स ड्रेस उपलब्ध कराय जाय, उहें, ग्रामीण मन ले चर्चा करत श्री साय ह गांव के स्थिति अउ विकास कार्य के जानकारी लीन।
एखर बाद मुख्यमंत्री ह भैसामुड़ा म प्रधानमंत्री आवास योजना के तहत बनाय जात मकान के निरीक्षण करीन। ओमन खुदे करनी उठाके सिमेंट गारा र्ले इंटा जोड़िन अउ इंहा काम करत मजदूर मन ले ओमन के दैनिक मजदूरी अउ पारिवारिक स्थिति के बारे म जानकारी लीन। मुख्यमंत्री चंदागढ म किराना दुकान चलावत लखपति दीदी सुमिला कोरवा ले मिलीन अउ मुद्रा योजना के तहत ओमन ल मिले सहायता रासि के बारे म जानकारी घलो लीन।
मुख्यमंत्री के दउरा के दूसरा पड़ाव सरगुजा जिला के सिल्मा गांव म रिहीस। इंहा ओमन सांति पारा बस्ती म चौपाल लगाइन अउ स्थानीय लोगन मन ले चर्चा करत सरकारी योजना के मौजूदा स्थिति के जायजा लीन। मुख्यमंत्री ह ग्रामीण मन ल बतइन कि सुशासन तिहार के दउरान प्रशासन खुद जनता के द्वारे तक पहुंचही अउ ओमन के समस्या के मउकच म समाधान सुनिश्चित करही।
हाईकोर्ट-नोटिस
महासमुंद जिला के भंवरपुर स्थित स्वामी आत्मानंद उत्कृष्ट महाविद्यालय म माध्यमिक शिक्षा मंडल के बारहवीं बोर्ड परीक्षा के दउरान कथित रूप ले खुलेआम नकल कराय के मामला म छत्तीसगढ़ उच्च न्यायालय ह स्कूल शिक्षा सचिव ल नोटिस जारी करके सपथ पत्र के साथ जवाब पेस करे के निरदेस देहे। न्यायाधीश रमेश सिन्हा अउ रविन्द्र कुमार अग्रवाल ह ए मामला के सिकायत के बाद करे गे कारवाई के बारे म सपथ पत्र म बिस्तार ले जानकारी देबर कहे हे।
एक जनहित याचिका के मुताबिक भंवरपुर के ए छात्रा ह बाहरवीं के पर्चा के दउरान स्टिंग ऑपरेशन करके ए आरोप लगाय रिहीस कि शिक्षक विद्यार्थी मन ल नकल करे के मदद करत रिहीन। छात्रा ह एखर सिकायत स्कूल के प्राचार्य समेत दूसर अधिकारी मन करा घलो करे रिहीस। लेकिन एखर उपर कोनो कारवाई नइ होइस। छात्रा के आरोप हे कि ओखरे उपर ही स्कूल प्रबंधन कोति ले नकल करे के आरोप लगाय गीस, जेखर ले व्यथित होके छात्रा बीमार पड़ गीस। एखर बाद स्वतः संज्ञान लेवत अदालत ह राज्य के मुख्य सचिव अउ स्कूल शिक्षा विभाग के सचिव समेत दूसर ल प्रमुख पक्षकार बनाय हे।
शहीद जवान-श्रध्दांजलि
कांकेर अउ नारायणपुर जिला के सीमा म काली आईईडी बिस्फोट म सहीद होय डिस्ट्रिक्ट रिजर्व गार्ड-डीआरजी के चार जवान म ले तीन जवान ल आज नारायणपुर पुलिस लाइन म आखिरी सलामी दे गीस। उहें, एक दूसर सहीद जवान ल कांकेर ले जाय गीस, जिंहा ओमन ल श्रध्दांजलि दे गीस। नारायणपुर पुलिस लाइन म आयोजित कारीकरम म बस्तर रेंज के पुलिस महानिरीक्षक सुंदरराज पी. अउ जिला कलेक्टर नम्रता जैन के अलावा जनप्रतिनिधि अउ वरिष्ठ अधिकारी मन सहीद जवान ल श्रध्दांजलि दीन। एखर बाद जवान मन के पार्थिव सरीर ओमन के गृहग्राम बर रवाना करे गीस। बस्तर आईजी ह बतइन कि माओवाद के सिराय के बाद अबूझमाड़ के जंगल म माओवादी मनके ए डंप के रिकवरी के काम करे जात हे। इही दउरान ए घटना होइस।
बतादन कि नारायणपुर अउ कांकेर जिला के सीमावर्ती इलाका म स्थित अबूझमाड़ के मरकाबेड़ा जंगल म आईईडी निष्क्रिय करे के दउरान ओमा विस्फोट होय ले चार जवान सहीद होगे।
भोरमदेव-जंगल सफारी
कवर्धा म भोरमदेव मंदिर करा प्राकृतिक सौंदर्य ले भरे अउ जंगल के बीच स्थित करियाआमा क्षेत्र म जंगल सफारी विकसित करे गेहे। उपमुख्यमंत्री विजय शर्मा, वन मंत्री केदार कश्यप अउ संासद संतोष पांडेय ह आज ए परियोजना के लोकार्पण करीन। ए जंगल सफारी घना वन, उंचा पहाड़ी अउ समृध्द जैव विविधता के बीच पर्यटक मन ल न केवल रोमांचक अनुभव दिही बल्कि छत्तीसगढ़ ल प्राकृतिक सौंदर्य के बीच इको-टूरिज्म के नक्सा म नवा पहिचान मिलही। करीबन तीन सौ बावन वर्ग किलोमीटर क्षेत्र म फइले ए अभ्यारण्य म छत्तीस किलो मीटर लंबा जंगल सफारी रूट तियार करे गेहे। सफारी के मुख्य प्रवेस द्वार भोरमदेव मंदिर के तीर म हे।
ए मउका म उपमुख्यमंत्री श्री शर्मा ह किहीन कि ए परियोजना ले स्थानीय युवा मन बर रोजगार के नवा मउका बनही। बिसेस रूप ले स्थानीय युवक-युवती मन पर्यटक मन बर गाइड के रूप म काम करे सकही।
प्रसून जोशी-नियुक्ति
सूचना अउ प्रसारण मंत्रालय ह संचार विशेषज्ञ प्रसून जोशी ल भारत के लोक सेवा प्रसारक प्रसार भारती के अध्यक्ष नियुक्त करे हे। श्री जोशी अपन लोकप्रिय फिल्मी गीत अउ विज्ञापन बर देसभर म जाने जाथे। सूचना प्रसारण मंत्री अश्विनी वैष्णव ह किहीन कि ओखर अगुवई म प्रसार भारती नवा ऊर्जा, उद्देस्य अउ रचनात्मक सैली के संग काम करही। श्री जोशी केंद्रीय फिल्म प्रमाणन बोर्ड के अध्यक्ष घलो रइही चके हे।
मादक पदार्थ-तस्करी
रईपुर पुलिस ह अंतरराज्यीय मादक पदार्थ तस्करी के एक मामला म बड़का कारवाई करत दिल्ली ले दू झिन आरोपी ल गिरफ्तार करे हे। मिले जानकारी के अनुसार नाइजीरिया ले मादक पदार्थ छत्तीसगढ़ भेजे जात रिहीस। तस्कर एला ब्लडप्रेसर मापे वाला मसीन के डब्बा म लुकाके डिलीवरी करत रिहीन। पुलिस जांच म पता चले हे कि ए खेप पहिली दिल्ली पहुंचय, जेखर बाद एला रईपुर समेत दूसर जघा म भेजे जात रिहीस। पुलिस ह आरोपी मन के कब्जा ले मादक पदार्थ अउ दूसर जिनिस जब्ती करे हे। मामला म नेटवर्क ले जुड़े दूसर लोगन मनके जानकारी जुटाके जांच करे जात हे।