नारायणपुर जिला म आज आईडी ल निष्क्रिय करत खानी विस्फोट होय ले कांकेर जिला रिजर्व गार्ड-डीआरजी के चार झन जवान मन सहीद हो गेहे।
पुलिस ले मिले जानकारी के अनुसार थाना छोटेबेठिया क्षेत्र म कांकेर अउ नारायणपुर जिला के सीमा म डी-माइनिंग, एरिया डॉमिनेशन अउ सर्च ऑपरेशन बर जवान मनके टीम ल रवाना करे गे रिहीस। इही दउरान आईडी ल निष्क्रिय करे के बेरा अचानके विस्फोट हो गीस। एखर चपेट म आय ले इंस्पेक्टर सुखराम वट्टी, कांस्टेबल कृष्णा कोमरा अउ कांस्टेबल संजय गढ़पाले ह मउकच म सहीद हो गेहे। उहें, ए घटना म घायल होय कांस्टेबल परमानंद कोमरा ल इलाज बर रईपुर लाय गे रिहीस, जिंहा इलाज के दउरान उंखर मउत होगिस।
बस्तर रेंज के पुलिस महानिरीक्षक सुंदरराज पी. ह बतइन कि आत्मसमर्पित माओवादी ले मिले जानकारी अउ दूसर इनपुट के आधार म हाल के महिना म बस्तर संभाग म बड़े संख्या म आईडी बरामद करके निष्क्रिय करे के कारवाई चलत हे।
मुख्यमंत्री विष्णुदेव साय ह आईडी विस्फोट म चार झन जवान के सहादत म दुख जतइन हे। ओमन किहीन कि प्रदेस सरकार शहीद परिवार मन संग मजबूती ले खड़े हे। उंखर साहस अउ बलिदान ल हमेसा सुरता राखे जाही।
मुख्यमंत्री-निर्देश
मुख्यमंत्री विष्णुदेव साय ह मध्यप्रदेस म हाल म होय क्रूज हादसा के घटना ल देखत छत्तीसगढ़ म चलत सबो वाटर स्पोटर्स गतिविधि के सुरक्षा व्यवस्था के समीक्षा करत सुरक्षा नियम के पालन कड़ाई ले करे के निरदेस दीन हे। ओमन किहीन कि जन सुरक्षा के मामला म कोनो भी प्रकार के लापरवाही ल बर्दास्त नइ करे जाही।
ओति, मुख्यमंत्री ह बेमेतरा जिला के नगर पंचायत दाढ़ी क्षेत्र म हाल म बने सीसी रोड के क्षतिग्रस्त होय ले गंभीरता ले लीन हे अउ किहीन कि ओ सीसी रोड के तकनीकी परीक्षण करके सही स्थिति के आंकलन करे जाय अउ निर्माण म लगे सामग्री, काम के गुणवत्ता अउ पर्यवेक्षण व्यवस्था के जांच करे जाय।
जनगणना
जनगणना-दू हजार सत्ताईस के पहिली चरण म छत्तीसगढ़ संघरा छै ठन दर्ज म मकानसूचीकरण अउ मकान के गणना के काम काली ले सुरू हो गेहे।
प्रसिक्षित प्रगणक मन ह घर-घर जाके जानकारी सकेलत हे। इही कड़ी म जनगणना काम के पहिलीच दिन बस्तर जिला के तोकापाल तहसील के ग्राम गाटम म प्रगणक ह अपन काम पूरा कर लीस।
दूसर कोति, रईपुर नगर निगम क्षेत्र म जनगणना ड्यूटी म लगाय गे चौवालीस झन कर्मचारी मन ह गैर हाजिर रिहीन, जउन मन ल नगर निगम आयुक्त ह कारण बताओ नोटिस जारी करे हे। उहें, जशपुर जिला के प्राथमिक शाला सरहापानी के सहायक शिक्षक सत्यजीत निराला ल लापरवाही बरते के आरोप म निलंबित कर दे गेहे।
जनगणना के काम पहिली घंाव डिजीटल माध्यम ले कराय जावत हे, जउन ह तीस मई तक चलही।
रेत खनन-निर्देश
राज्य सरकार ह अवैध रेत खनन म सक्ति तेज कर देहे। खनिज विभाग के सचिव पी.दयानंद ह रेत आपूर्ति करइया ग्यारा ठन जिला के कलेक्टर मन संग वर्चुअल बइठका म स्पष्ट निरदेस दे हे कि अवैध खनन, परिवहन अउ भंडारण के खिलाफ जीरो टॉलरेंस नीति के कड़ाई ले पालन हो। ओमन किहीन कि रेत के आपूर्ति म कोनो कमी झन रहय अउ स्वीकृत खदान ले क्षमता के अनुसार उत्पादन करके आम लोगन ल उचित दर म रेती देवाय जाय। प्रधानमंत्री आवास योजना के हितग्राही मन ल रायल्टी मुक्त रेती दे जाय के निरदेस के घलो कड़ाई ले पालन करे बर केहे गेहे।
जिले की चिट्ठी
प्रादेशिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के आकाशवाणी के सबो कंेंद्र रिले करही। ए बखत के अंक म ‘‘मोहला-मानपुर-अंबागढ़ चौकी‘‘ जिला के संबंध म जानकारी दे जाही।
मोबाइल-अलर्ट
केंद्र सरकार ह स्वदेसी तकनीक के उपयोग करत नागरिक मन ल आपदा के सूचना तुरते देबर सेल ब्रॉडकास्ट सिस्टम सुरू करे गेहे। ए प्रणाली के परीक्षण करे बर आज मंझनिया कुन करीबन बारह बजे मोबाइल म सायरन के संग एक ठन सूचना भेजे गीस।
परीक्षण के दउरान संदेस म लिखे रिहीस-सतर्क नागरिक, सुरक्षित राष्ट्र। ए संदेस परीक्षण बर हे, तेखर सेति जनता ल एमा कोनो प्रतिक्रिया दे जाय के जरूरत नइ हे।
केंद्रीय संचार मंत्री ज्योतिरादित्य सिंधिया ह सोसल मीडिया पोस्ट म किहीन कि ए संदेस ले नागरिक मन ल घबराय के जरूरत नइ हे, एहा भारत के नवा मोबाइल आधारित आपदा संचार प्रणाली के परीक्षण संदेस हे। ओमन किहीन कि एला दूरसंचार विभाग ह राष्ट्रीय आपदा प्रबंधन प्राधिकरण के मदद ले सेल ब्रॉडकास्ट तकनीक के उपयोग करके विकसित करे हे।
बच्चे-मौत
बलरामपुर जिला म सामरीपाठ थाना क्षेत्र म ग्राम भुताही म आज नदी म नहाय बर गे दू झन लइका मनके डूबे ले मउत होगे। मिले जानकारी के अनुसार पांच अउ छै बछर के दू झन लइका मन ह अपन संगवारी मन संग गांव तीर के नदी म नहाय बर गे रिहीन। इही दउरान दूनों लइका मन ह गहरा पानी डहार चल दीन। सूचना मिलते साठ गांव के लोगन मन मउका म पहुंचिन अउ दूनों झन लइका के शव ल नदी ले बाहिर निकाले गीस। पुलिस ह मामला के जांच करत हे।
नीट-परीक्षा
राष्ट्रीय परीक्षा एजेंसी डहार ले राष्ट्रीय पात्रता सह प्रवेस परीक्षा-नीट काली तीन मई के कराय जाही। एखर बर प्रदेस के सबो जिला म परीक्षा केंद्र बनाय गेहे। परीक्षा के सफल संचानल बर सबो केंद्राध्यक्ष अउ पर्यवेक्षक मन ल निर्धारित मानक के पालन निश्चित करे के निरदेस दे गे हवय। परीक्षा के बेरा मंझनिया दू बजे ले संझा पांच बजे तक रइही। परीक्षार्थी मन ल बिहनिया ग्यारा बजे ले मंझनिया डेढ़ बजे तक परीक्षा केंद्र म प्रवेस के अनुमति दे जाही। एखर बाद कोनो भी परीक्षार्थी ल प्रवेस नइ मिल सकही।
आईपीएल-मैच
राजधानी रईपुर म अवइया दस अउ तेरह मई के होवइया आईपीएल मैच के टिकिट के बुकिंग काली तीन मई ले सुरू होही। मैच के टिकट सिरिफ आरसीबी के आधिकारिक वेबसाइट अउ ऐप म ही मिलही।
खबर के मुताबिक दस मई के रायल चैलेंजर्स बैंगलुरू अउ मुंबई इंडियन्स के अउ तेरह मई रायल चैलेजर्स बैंगलुरू अउ कोलकाता नाइट राइडर्स के बीच मुकाबला होही। दूनों मैच संझा साढ़े सात बजे ले सुरू होही।
मौसम
ओति, सारंगढ़-बिलाईगढ़ क्षेत्र म आज मंझनिया बाद अचानक मौसम के मिजाज बदलीस अउ तेज हवा संग बरसा होगिस।
संक्षिप्त समाचार
– छत्तीसगढ़ लोकसेवा आयोग ह राज्य सेवा मुख्य परीक्षा-दू हजार पच्चीस ले लिखित परीक्षा के समय-सारिणी घोसित कर देहे। आयोग डहार ले जारी सूचना के अनुसार परीक्षा के आयोजन छै जून ले नौ जून तक निर्धारित परीक्षा केंद्र म करे जाही।
– कृषि मंत्री रामविचार नेताम ह काली नवा रईपुर म राखेगे कारीकरम म प्रदेस के तीन हजार पांच सौ छप्पन बीज उत्पादक किसान मन ल आठ करोड़ रूपिया ले जादा के प्रोत्साहन रासि उंखर खाता म ऑनलाइन भेजिन।
अउ
– दुरूग पुलिस ह हेरोइन के तस्करी करत पांच झन आरोपी मन ल गिरफ्तार करे हे। इंखर मन तीर ले करीबन इक्कीस ग्राम हेरोइन बरामद करे गे हे, जेखर कीमत करीबन एक लाख उनहत्तर हजार बताय जावत हे