छत्तीसगढ़ विधानसभा म काली महिला आरक्षण ले जुड़े ‘सरकारी संकल्प‘ पारित होइस हे। ए संकल्प सरकार डहार ले पेस करे गे रिहीस। एखर उपर विधानसभा म करीबन दस घंटा चर्चा होइस, जेमा सत्ता पक्ष अउ विपक्ष के सदस्य मन भाग लेइन। फेर चर्चा के बाद संकल्प पारित होय ले पहिलीच विपक्ष ह सदन ले बहिष्कार कर दीस।
एखर ले पहिली गोठबात के जवाब देवत मुख्यमंत्री विष्णुदेव साय ह किहीन कि माईलोगन के सम्मान, बिकास अउ सशक्तिकरण बर संसद अउ सबो विधानसभा म उंखर बर एक तिहाई आरक्षण सुनिश्चित करे जाना महत्वपूर्ण कदम हे। मुख्यमंत्री ह बिस्वास जतावत किहीन कि अइसन उदिम ले देस के आधा आबादी ल निरनय प्रक्रिया म सशक्त भूमिका मिलही अउ जादा प्रभावी रूप ले बिकास होही। छत्तीसगढ़ सरकार ह मातृशक्ति के सम्मान अउ सशक्तिकरण बर सरलग प्रतिबध्द हे।
ऐति, मुख्यमंत्री ह किहीन कि प्रधानमंत्री के अगुवई म देस म माईलोगन मनके सामाजिक अउ आर्थिक सशक्तिकरण के जउन महत्वपूर्ण नेव राखे गेहे, उही क्रम म उंखर राजनीतिक भागीदारी ल घलो सशक्त करना अगला कदम हे। ए संकल्प देस के आधा आबादी ल उंखर अधिकार ले जोड़े बर बड़का उदिम आय। ए बेरा मुख्यमंत्री ह बिसेस सत्र आयोजित करे के सेति विधानसभा अध्यक्ष डॉक्टर रमन सिंह के आभार जतइन।सुशासन तिहार
आम लोगन के समस्या के तुरते समाधान बर आज ले प्रदेस म ‘‘सुशासन तिहार‘‘ सुरू हो गेहे। ए मउका म मुख्यमंत्री विष्णुदेव साय ह प्रशासनिक बेवस्था ल जनकेंद्रित अउ संवेदनसील बनाय के मंसा ले अधिकारी मन ल सख्त निरदेस देवत किहीन हे कि आम लोगन के संग सरल अउ सम्मान ढंग ले व्यवहार करंय। मुख्यमंत्री ह यहू किहीन कि-मुख्यालय अउ फिल्ड स्तर म सरकारी अधिकारी ही शासन के चेहरा होथे, एखर सेति ओखर आचरण सरकार के छवि ल प्रभावित करथे। मुख्यमंत्री ह अधिकारी मन ल अगाह करिन कि जनता के समस्या ल गंभीरता ले सुनंय अउ समाधान उपर केंद्रित रहंय। संवाद तभे सार्थक होही, जब ओखर म समस्या के समाधान करे के नीयत होही। मुख्यमंत्री ह किहीन कि ओमन सोयम औचक निरीक्षण करके जन समस्या के निराकरण के संग सरकारी योजना के क्रियान्वयन के समीक्षा करही।
सुशासन तिहार के बेरा मंत्री, विधायक अउ अधिकारी मन ग्रामीण इलाका म 10 जून तक सिविर लगाके लोगन के समस्या सुनहीं। संगेसंग उंखर आने-आने मांग उपर जरूरत के अनुसार कारवाही घलो करहीं। ए सिविर मन म लोगन के समस्या के तुरते समाधान करके योजना के लाभ दे जाही। सुशासन तिहार के दउरान कतकोन दफ्तर म लंबित मामला के सबले पहिली निराकरण करे जाही, जेमा जमीन, मनरेगा भुगतान, प्रमाण पत्र, बिजली अउ पानी ले जुड़े समस्या के समाधान करे जाही।
नागरिकता-संशोधन नियम
केंद्र सरकार ह नागरिकता-संशोधन नियम, दू हजार छब्बीस ल अधिसूचित कर देहे। एखर तहत ओसीआई कार्ड पंजीकरण अब पूरा तरह ले डिजीटल होही। नवा नियम म ई-ओसीआई, बायोमेट्रिक आधारित फास्टैªक इमिग्रेशन अउ नाबालिग मन बर दोहरा पासपोर्ट उपर पाबंदी जइसन प्रावधान सामिल हे।
बतादन कि गृह मंत्रालय ह नागरिकता अधिनियम-बछर 2009 म संशोधन करे हे। ए बदलाव के उद्देस्य प्रक्रिया ल सरल बनाना हे। मंत्रालय के अनुसार कोनो घलो नाबालिग लइका भारतीय पासपोर्ट के संगेसंग आने देस के पासपोर्ट नइ राख सकय। अधिसूचना के अनुसार ओसीआई कार्ड पंजीकरण के सबो आवेदन अब आधिकारिक पोर्टल के जरिया ले इलेक्ट्रानिक रूप ले जारी करे जाहीं। उहें, ओसीआई छोडे़ के घोसना करे म अपन मूल कार्ड ल भारतीय मिसन, पोस्ट या बिदेसी क्षेत्रीय पंजीकरण अधिकारी के तिर जमा करे ल परही।
जनगणना
छत्तीसगढ़ म जनगणना बछर- दू हजार सत्ताईस के तहत मकान सूचीकरण अउ गणना के कारज आज ले सुरू हो गेहे। 30 मई तक चलइया ए कारज के दउरान प्रगणक मन घर-घर जाके आवासीय अउ गैर-आवासीय भवन, ओखर स्थिति उपयोग अउ बुनियादी सुविधा के जानकारी जुटाहीं। ए बेरा आम नागरिक ले तैंतीस ठन सवाल पूछे जाही। ए जम्मो प्रक्रिया मोबाइल ऐप के जरिया ले होही।
एखर बर प्रशासन ह जानकारी देय हे कि प्रगणक कोनो घलो नागरिक ले वन टाइम पासवर्ड नइ मांगहीं अउ न ही कोनो लिंक साझा करहीं। सिरिफ फोटो लगे अधिकृत पहिचान पत्र वाला करमचारी मन ल ही जानकारी देवव। संगेसंग प्रशासन ए घलो किहीस हे कि जनगणना के बेरा जुटाय गे सबो जानकारी ल गुप्त राखे जाही। एखर उपयोग कोनो घलो प्रकार के कर निर्धारण, पुलिस जांच या न्यायिक साक्ष्य के रूप म नइ करे जा सकही अउ न ही सूचना के अधिकार के तहत एखर जानकारी पाय जा सकही।
राज्य गणना निदेशक कार्तिकेय गोयल ह बतइन कि-जनगणना एक ठन राष्ट्रीय दायित्व आय। नागरिक डहार ले देय गे जम्मो सही जानकारी ह भविष्य म शिक्षा, स्वास्थ्य, आवास, रोजगार अउ आधारभूत सुविधा मन ले जुड़े योजना मन ल जादा प्रभावी बनाय म सहायक होही। ओमन नागरिक मनले अपील करिन कि प्रगणक मन के सहयोग करके सही जानकारी देवव।
एखर ले पहिली, प्रदेस म सोलह ले तीस अप्रैल तक स्व-गणना कारज करे गिस, ए दउरान करीबन एक लाख अड़तीस हजार परिवार मन निर्धारित पोर्टल -एस.ई. डॉट सी.ई.एन.एस.यू.एस. डॉट जीओवी डॉट इन के जरिया ले सोयम अपन परिवार अउ मकान ले जुड़े जानकारी दर्ज कराइन।
श्रमिक दिवस
आज अंतर्राष्ट्रीय श्रमिक दिवस आय। श्रमिक आंदोलन अउ आने-आने देस के कामगार मनके योगदान ल सोरियावत हर बछर आजिक दिन श्रमिक दिवस मनाय जात हे। ए मउका म आज राजधानी रइपुर के संगे प्रदेस भर म आने-आने कारीकरम करके श्रमिक मनके सम्मान करे गिस अउ ओमन ल श्रम कानून के जानकारी घलो देय गिस।
ए मउका म मुख्यमंत्री विष्णुदेव साय ह प्रदेस के जम्मो श्रमवीर मन ल अंतस ले बधई अउ सुभकामना देइन हें।
बुध्द-पुर्णिमा
महात्मा गौतम बुध्द के जनम दिवस के मउका म आज विश्वभर म बुध्द पूर्णिमा के रूप म मनाय जावत हे। आजे के दिन महात्मा गौतम बुध्द ल बोधगया म ज्ञान मिले रिहीस। बुध्द पूर्णिमा के मउका म राष्ट्रपति, उपराष्ट्रपति, प्रधानमंत्री, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह सुभकामना देइन।
बातों-बातों-में
प्रादेशिक समाचार एकांश के समसामयिक बिसय उपर आधरित कारीकरम ‘‘बातों-बातों-में‘‘ ए दारी पश्चिम एशिया म जारी संकट के बीच किसान मन ल खातू के आपूर्ति सुनिश्चित करे बर उपाय मन उपर कृषि उत्पादन आयुक्त शहला निगार ले लेय गे भेंटवार्ता के प्रसारण होही। जेला काली दू मई के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ के जम्मो आकाशवाणी केंद्र एक्के संघरा रिले करहीं।
मौसम
मौसम विभाग ह अवइया पांच दिन तक प्रदेस म गरज-चमक अउ गाज गिरे के संगे हल्का बरसा के संभावना जताय हे। ए दउरान हवा गरेर घलो चल सकथे। एखर सेति मौसम विभाग ह प्रदेस के चार जिला रइपुर, मुंगेली, बेमेतरा अउ कबीरधाम म आरेंज अलर्ट जारी करे हे। उहें, नौ जिला म एलो अलर्ट जारी करे गेहे।
संक्षिप्त समाचार
– देसभर म आज ले कमर्शियल सिलंेडर के दाम फेर बाढ़गे। एलपीजी के उन्नीस किलो के सिलेंडर के कीमत म 993 रूपिया बढ़ोत्तरी करे गिस।
– गरियाबंद जिला के देवभोग इलाका म आज मंझनिया भूकंप के झटका महसूस करे गिस। जानकारी ले छत्तीस घंटा के भीतर ए तीसरइया घांव झटका लगिस हे।
अउ
– राष्ट्रीय जैविक स्ट्रैस प्रबंधन संस्थान रइपुर म ‘‘विज्ञान आधारित पोषक तत्व प्रबंधन को अपनाना‘‘ बिसय उपर दू दिन के राष्ट्रीय जागरूकता के अभियान करे गिस।