छत्तीसगढ़ विधानसभा के एक दिवसीय विशेष सत्र चलत हे। ए दउरान मुख्यमंत्री विष्णुदेव साय ह संसद अउ विधानसभा मन म तैंतीस प्रतिसत महिला आरक्षण बर शासकीय संकल्प पेस करीन। एमा किहीन कि-ए सदन के मत हे कि नारी सक्ति के सम्मान अउ महिला मनके समग्र विकास अउ सशक्तिकरण के उद्देस्य ले देस के संसद अउ जम्मो विधानसभा मन म माईलोगिन मन बर एक-तिहाई आरक्षण अउ परिसीमन के प्रक्रिया पूरा करत एला तुरते प्रभाव ले लागू करे जाही।
एखर पहिली, विधानसभा अध्यक्ष डॉक्टर रमन सिंह ह नेता प्रतिपक्ष डहार ले प्रस्तुत अशासकीय संकल्प ल खारिज कर दीस। मुख्यमंत्री डहार ले पेस करे गे शासकीय संकल्प उपर सदन म होय चर्चा म आने-आने सदस्य मन ह अपन बिचार व्यक्त करीन।
एखर पहिली, सत्र की सुरूआत म विधान अध्यक्ष डॉक्टर रमन सिंह ह सदन म छत्तीसगढ़ विधानसभा के पूर्व सदस्य जगेश्वर राम भगत अउ राज्यसभा के पूर्व सदस्य मोहसिना किदवई के निधन के उल्लेख करीन। मुख्यमंत्री विष्णुदेव साय अउ नेता प्रतिपक्ष चरणदास महंत ह ए दिवंगत हस्ती मन के राजनीतिक अउ सामाजिक योगदान के चर्चा करत ओमन ल श्रध्दांजलि अर्पित करीन। एखर बाद सदन म दू मिनट के मौन रखके दिवंगत नेता मन ल सुरता करे गीस। श्रध्दांजली के बाद सदन के कार्रवाई पांच मिनट बर स्थगित कर दे गीस।
जनजातीय सलाहकार परिषद-बैठक
मुख्यमंत्री विष्णुदेव साय के पगरइती म काली मंत्रालय म राखेगे छत्तीसगढ़ जनजातीय सलाहकार परिषद के बइठका म कतकोन महत्वपूर्ण फइसला ले गेहे। बइठका म मुख्यमंत्री ह बतइन हे कि ‘‘धरती आबा ग्राम उत्कर्ष योजना‘‘ के तहत प्रदेस के छै हजार छै सौ गांव मन म शिक्षा अउ स्वास्थ्य सुविधा सुदृढ़ करे जावत हे। जबकि, पीएम जनमन योजना के अंतर्गत बत्तीस हजार आवास के मंजूरी दे गेहे।
बइठका म मुख्यमंत्री ह ‘‘नियद नेल्लानार टू प्वाइंट जीरो‘‘ ल जल्दीच लागू करे के घोसना करीन। ओमन किहीन कि उन्नत पहल के माध्यम ले सुदूर अंचल मन म बिजली, पानी, सड़क अउ रासन जइसन मूलभूत सुविधा मन के अउ जादा विस्तार करे जाही।
जनगणना
छत्तीसगढ़ म जनगणना-दू हजार सत्ताईस के तहत चलत स्व-गणना काम के आज आखिरी दिन हे। स्व-गणना के तहत कोनो भी मनखे निर्धारित ऑनलाइन पोर्टल-‘‘एस.ई. डॉट सी.ई.एन.एस.यू.एस. डॉट जीओवी डॉट इन‘‘ के माध्यम ले खुदे अपन परिवार अउ मकान ले जुड़े जानकारी दर्ज करा सकत हे। स्व-गणना के काम प्रदेस म सोलह अप्रैल ले सुरू हो गे रिहीस।
उहें, प्रदेस म काली एक मई ले मकान सूचीकरण अउ गणना के काम करे जाही। ए दउरान प्रगणक घर-घर जाके आवासीय अउ गैर-आवासीय भवन, उंखर स्थिति, उपयोग अउ बुनियादी सुविधा जइसे पिये के पानी, सौचालय, बिजली, रसोई गैस, इंटरनेट अउ संचार व्यवस्था ले जुड़े जानकारी इकट्ठा करही। ए दउरान आम मनखे मन ले तैंतीस ठिन सवाल पूछे जाही।
एखर पहिली, जनगणना निदेशक कार्तिकेय गोयल ह काली वीडियो कॉन्फ्रेंसिंग के माध्यम ले जनगणना के पहिली चरण के तियारी मनके समीक्षा करीन।
ईडी-छापा
भारतमाला सड़क परियोजना ले जुड़े मुआवजा घोटाला के जांच म प्रवर्तन निदेशालय-ईडी ह आज बिहनिया दुर्ग, बिलासपुर, कोरबा अउ अंबिकापुर म एके संघरा छापा के कार्रवाई करे हे। ईडी के अधिकारी मन ह बिहनिया करीबन चार बजे दुर्ग के महेश नगर स्थित रियल एस्टेट कारोबारी चतुर्भुज राठी के घर अउ दफ्तर म छानबीन सुरू करीन। जांच के दउरान चतुर्भुज राठी के पांच फर्मं के डिजिटल रिकॉर्ड के तलासी घलो ले गीस। इही कड़ी म भिलाई म गोविंद मंडल के घर अउ कारखाना म घलो जांच करे जावत हे। उहें, बिलासपुर के सराफा कारोबारी विवेक अग्रवाल के घर अउ सदर बाजार स्थित ओखर सोनाचांदी के दुकान म घलो ईडी के दस ले जादा अधिकारी मन ह आज बिहनिया छापा मारे के कार्रवाई करे हे। बताय गे हे कि ए कार्रवाई सराब घोटाला के फरार आरोपी विकास अग्रवाल के सिंडिकेट ले जुड़े जानकारी के प्रमाण इकट्ठा करे बर करे गीस।
खबर के मुताबिक दू दिन पहिली ईडी के अधिकारी मन ह कुरूद अउ धमतरी म घलो भारतमाला सड़क परियोजना के मुआवजा के मामला म चार झिन मनखे के दस ले जादा ठिकाना म छापामारे रिहीस।
जीएसटी-रायपुर बेंच
वस्तु अउ सेवा कर-जीएसटी के अपीलीय न्यायाधिकरण के रायपुर बेंच ह अपन कामकाज सुरू कर दे हे। ए संबंध म आधिकारिक सूचना जारी कर दे गेहे। रायपुर बेंच के अस्थायी कार्यालय नवा रायपुर के सेक्टर-उन्नीस म स्थित जीएसटी भवन म स्थापित करे गेहे। ए बेंच केंद्र अउ राज्य सरकार डहार ले लागू जीएसटी कानून के अंतर्गत छत्तीसगढ़ राज्य के अधिकार क्षेत्र ले जुड़े अपील मन के सुनवाई करही। ए ट्रिब्यूनल म अपील दायर करे ले जुड़े दिसा-निरदेस अउ आने आदेस न्यायाधिकरण के आधिकारिक पोर्टल म उपलब्ध कराय गेहे। संगेसंग ई-फाइलिंग के दउरान कोनो प्रकार के परेसानी होय म अपीलकर्ता टोल फ्री-नंबर -एक आठ सून्य सून्य-एक सून्य तीन- चार सात आठ दू (1800-103-4782) म संपर्क कर सकत हे या फेर ऑनलाइन ‘इंसिडेंट रिपोर्ट फॉर्म‘ के माध्यम ले सिकायत दर्ज कर सकत हे।
सुशासन तिहार
प्रदेस म आम लोगन मनके परेसानी के तुरते समाधान बर काली ले ‘‘सुशासन तिहार‘‘ के आयोजन करे जाही। एखर बर जम्मों जिला मन म तियारी पूरा कर ले गेहे। सुशासन तिहार के दउरान सरकार के मंत्री, विधायक अउ जिला के अधिकारी ग्रामीण क्षेत्र मन म दस जून तक जनसमस्या निवारण सिविर लगाके लोगन मनके समस्या सुनही। संगेसंग ओखर मनके आने-आने मांग उपर जरूरत के मुताबिक कार्रवाई घलो सुनिश्चिित करे जाही। ए सिविर म लोगन मन के समस्या के मउका म समाधान करे जाही अउ योजना मनके फायदा दे जाही। सुशासन तिहार के दउरान आने-आने दफ्तर म पहिली ले लंबित मामला के सबले पहिली निराकरण करे जाही। एमा जमीन संबंधी मामला, मनरेगा भुगतान, प्रमाण पत्र, बिजली अउ हैंडपंप ले जुड़े समस्या मन ल प्राथमिकता दे जाही।
अग्निवीर भर्ती-आवेदन
भरतीय सेना म अग्निवीर भर्ती के लिखित परीक्षा के तियारी करत अभ्यर्थी मनके निःसुल्क प्रसिक्षण बर पंजीयन के आज आखिरी दिन आय। अभ्यर्थी रोजगार विभाग के अधिकारी वेब पोर्टल म अपन पंजीयन करा सकत हे। जिला रोजगार अउ स्वरोजगार मार्गदर्शन केंद्र, रायपुर डहार ले अभ्यर्थी मन ल निःसुल्क प्रसिक्षण देे जाही। प्रसिक्षण चार मई ले होके चार जून तक चलही। ए दउरान बिसय विशेषज्ञ डहार ले अभ्यर्थी मन ल निःसुल्क कोचिंग दे जाही।
भूकंप झटके
ओडिसा म काली संझा भूकंप के झटका महसूस करे गीस, जेखर असर छत्तीसगढ़ के गरियाबंद समेत सीमावर्ती इलाका मन म घलो देखे गेहे। राष्ट्रीय भूकंप विज्ञान केंद्र के मुताबिक, भूकंप के तीव्रता रिक्टर स्केल म चार दसमलव एक मापे गेहे। ए भूकंप के केंद्र ओडिसा के कालाहांडी जिला रिहीस, जेखर गहराई जमीन ले चौबीस किलोमीटर नीचे दर्ज करे गेहे।
देवभोग इलाका म काली संझा सात बजके बयालीस मिनट म तेज आवाज के संग होय, भूमि कंपन ले लोगन मन डरा गे। ए कंपन करीबन तीन सेकेंड तक महसूस करे गेहे।
मौसम
प्रदेस म अवइया चौबीस घंटा के दउरान एक-दू जघा म गरज-चमक के संग हल्का बरसा के संभावना हे। मौसम विभाग के मुताबिक ए बेरा कश्मीर ले ओडिसा तक एक पश्चिमी विक्षोभ बने हे। उहें, उत्तर प्रदेस के उपरी एक चक्रीय चक्रवाती घेरा घलो मौजूद हे। ए दूनों के असर ले प्रदेस म एक-दू जघा म हवा गरेर के संगेसंग सिटीर-साटर पानी गिरे के संभावना हे। उहें, गाज गिरे के चेतावनी घलो दे गेहे। मौसम वैज्ञानी के मुताबिक ए बदलाव के सेति प्रदेस के जादा तापमान म घलो कमी आ सकत हे।
इही बीच, गरियाबंद अउ जशपुर जिला के कुछेक जघा मन म पानी गिरे के संगेसंग करा गिरे के खबर मिले हे।