छत्तीसगढ़ माध्यमिक शिक्षा मंडल कोति ले आज दसवीं अउ बारहवीं बोर्ड परीक्षा के नतीजा जारी कर दे गेहे। मुख्यमंत्री विष्णुदेव साय ह ई-क्लिक करके ए नतीजा ल ऑनलाइन जारी करीन। ए मउका म स्कूल शिक्षा मंत्री गजेन्द्र यादव घलो मौजूद रिहीन। बारहवीं बोर्ड के परीक्षा म मेरिट सूची म बलौदाबाजार जिला के जिज्ञासु वर्मा ह बाजी मारिन। दूसर नंबर म बेमेतरा जिला के ओमनी वर्मा अउ तीसर स्थान म रायगढ़ के कृष महंत हवय।
उहें, दसवीं बोर्ड के मेरिट सूची म महासमुंद जिला के संध्या नायक अउ परीरानी प्रधान के संगेसंग मुंगेली जिला के अंशुल शर्मा संयुक्त रूप ले अव्वल आय हे। हाईस्कूल परीक्षा म एसो करीबन सतहत्तर प्रतिसत अउ हायर सेकेंडरी परीक्षा म करीबन तिरासी प्रतिसत परीक्षार्थी पास होय हे।
मंत्रिपरिषद-बैठक
छत्तीसगढ़ के शहरी क्षेत्र म रसोई गैस उपभोक्ता मन के घर तक पाईपलाइन ले पहुंचाय जाही। ए फइसला आज नवा रईपुर म मुख्यमंत्री विष्णुदेव साय के अगुवई म होय राज्यमंत्रिपरिषद के बइठका म ले गीस। बइठका के बाद पत्रकार मनले गोठबात करत उपमुख्यमंत्री अरूण साव ह बतइन कि मंत्रिपरिषद ह छत्तीसगढ़ शहरी गैस वितरण नीति ल मंजूरी देहे। उहें, मंत्रिपरिषद ह राजनांदगांव के जिला क्रिकेट एसोसिएसन ल क्रिकेट अकादमी बर सूर्यमुखी देवी राजगामी संपदा के पंाच एकड़ भुंईया कमती दर म आवंटित करे के फइसला लेहे।
मुख्यमंत्री स्वेच्छानुदान मद ले छै हजार आठ सौ नौ लोगन अउ संस्था ल करीबन ग्यारा करोड़ निन्यानवे लाख रूपिया के आर्थिक मदद मंजूर करे हे। बइठका म बछर उन्नीस सौ अठासी बैच के भारतीस पुलिस सेवा के तीन अधिकारी संजय पिल्ले, आर. के. विज अउ मुकेश गुप्ता के संबंध म पहिली जारी पदावनति आदेस ल फेर ले देखत ओला निरस्त करे के फइसला ले गेहे।
विधानसभा-विशेष सत्र
छत्तीसगढ़ विधानसभा के एक दिवसीय विशेष सत्र काली तीस अप्रैल के नवा रईपुर अटल नगर के नवा विधानसभा म राखे जाही। ए बिसेस सत्र म महिला आरक्षण अउ परिसीमन ले जुड़े मुद्दा के निपटारा ल लेके निंदा प्रस्ताव पारित करे जाही। संगेसंग सत्र के दउरान सरकारी कामकाज संपादित होही।
धर्मेन्द्र प्रधान-एनसीईआरटी
केंद्रीय शिक्षा मंत्री धर्मेन्द्र प्रधान ह वर्तमान सैक्षणिक सत्र बर राष्ट्रीय शैक्षिक अनुसंधान अउ प्रसिक्षण परिषद-एनसीईआरटी के पाठ्यपुस्तक के प्रकाशन अउ वितरण के समीक्षा करीन। शिक्षा मंत्रालय ह बताय हे कि श्री प्रधान ह राज्य अउ केंद्रशासित प्रदेस म किताब के उपलब्धता बिसेस रूप ले गांव-गंवई के क्षेत्र म रहवइया विद्यार्थी मन ल बेरा म किताब मिलय। एखर बर राज्य प्रशासन अउ वितरण एसेंजी संग समन्वय ल देखिन। ओमन आपूर्ति ल मजबूत करथ, छपाई क्षमता बढ़ाय अउ लोगन तक बेरा रहत किताब पहुंचय एखर बर अधिकारी मन ल जरूरी निरदेस दीन।
मुख्यमंत्री सेवा सेतु पोर्टल
मुख्यमंत्री विष्णुदेव साय ह छत्त्तीसगढ़ इंफोटेक प्रमोसन सोसायटी-चिप्स के ई-डिस्ट्रिक्ट पोर्टल के उन्नत संस्करण ‘सेवा सेत‘ु के सुभारंभ करीन। ए पोर्टल ले नागरिक मन ल चार सौ इकचालीस शासकीय सेवा एके प्लेटफार्म म मिलही। एमा चौव्वन ठिन नवा सेवा सामिल हवय। मुख्यमंत्री ह बतइन कि अब व्हॉटसअप ले घलो नागरिक मन ल सेवा के जानकारी आसानी ले मिल सकही। सेवा सेतु पोर्टल ले नागरिक एके प्लेटफार्म म ऑनलाइन भुगतान करके तुरते डिजीटल रसीद ले सकही। कोनो भी नागरिक सेवा सेतु म मिलइया सेवा के फायदा वैब पोर्टल के संगेसंग कोनो भी लोकसेवा केंद्र, च्वाइस सेंटर अउ कॉमन सर्विस सेंटर ले, ले सकत हे।
जनगणना
छत्तीसगढ़ म जनगणना-दू हजार सत्ताईस के तहत चलत स्व-गणना के काली आखिरी दिन हे। स्व-गणना के काम प्रदेस म सोलह अप्रैल ले सुरू होय हे। एमा कोनो भी नागरिक तय ऑनलाइन पोर्टल-एस.ई. डॉट सी. ई. एन. एस. यू. एस. डॉट जीओवी डॉट इन ले खुदे अपन परिवार अउ मकान ले जुड़े जानकारी दरज करा सकत हे।
उहें, प्रदेस म एक मई ले मकान सूचीकरण अउ गणना के काम करे जाही। ए दउरान प्रगणक घर-घर जाके आवासीय अउ गैर आवासीय भवन उंखर स्थिति बुनियादी सुविधा जइसे पिये के पानी, सौचालय, बिजली, रसोई गैस, इंटरनेट अउ संचार व्यवस्था ले जुड़े जानकारी इकट्ठा करही।
हाईकोर्ट-ग्रीष्मकालीन अवकाश
गर्मी के छुट्टी ल लेके छत्तीसगढ़ उच्च न्यायालय ह अधिसूचना जारी कर देहे। हाईकोर्ट ले जारी नोटिफिकेशन के मुताबिक अट्ठारा मई ले बारह जून तक गर्मी के छुट्टी रिही। पंद्रह जून ले हाईकोर्ट फेर खुलही, छुट्टी के बेरा जरूरी मामला के सुनवाई चलत रइही। एखर बर वेकेसन जज के नियुक्ति करे गेहे, जउन बिहनिया साढ़े दस बजे ले कोर्ट के कार्रवाई पूरा करही। जरूरत पड़े म सुनवाई के बेरा ल बढ़ाय जा सकत हे।
दवा-रोक
छत्तीसगढ़ म फेरस सल्फेट अउ फोलिक एसिड दवई ल बांटे म सीजीएमएससी ह रोक लगा देहे। दवई के गुणवत्ता ल लेके उठे सवाल के बाद जांच के काम सुरू कर दे गेहे। जांच पूरा होय तक राज्य के आने-आने सरकारी अस्पताल म दे गे दवई ल वापिस मंगाय के निरदेस जारी करे गेहे। जानकारी के मुताबिक ए दवई सिपको फार्मास्युटिकल्स कोति ले सरकारी अस्पताल म दे गे रिहीस हे। मामला आगू आय के बाद स्वास्थ्य विभाग ह कड़ा कदम उठात सबो अस्पताल ल स्टाक तुरते वेयर हाउस म जमा कराय के निरदेस दीन हे।
अचल संपत्ति-रजिस्ट्री उपकर
राज्य सरकार ह अचल संपत्ति के रजिस्ट्री म लगइया सून्य दसमलव छै सून्य प्रतिसत उपकर ल खतम कर देहे। ए फइसला तत्काल प्रभाव ले लागू हो गेहे। एमा अब अचल संपत्ति के अंतरण विलेख के पंजीयन म बाजार मूल्य के आधार म लगइया सून्य दसमलव छै सून्य प्रतिसत उपकर ल पूरा खतम कर दे गेहे।
अग्निवीर भर्ती-प्रशिक्षण
भारतीय सेना म अग्निवीर भर्ती के लिखित परीक्षा के तियारी करत उम्मीदवार मनके निःसुल्क प्रसिक्षण बर पंजीयन के काली आखिरी दिन हे। उम्मीदवार रोजगार विभाग के आधिकारिक वेब पोर्टल म अपन पंजीयन करा सकत हे। जिला रोजगार अउ स्व-रोजगार मार्गदर्शन केंद्र रईपुर कोति ले उम्मीदवार मन ल निःसुल्क प्रसिक्षण दे जाही। ए प्रसिक्षण चार मई ले सुरू होके चार जून तक चलही।
राज्यपाल दुर्ग-समीक्षा
राज्यपाल रमेन डेका ह काली दुरूग म जिला के ब्लॉक स्तरीय प्रशासनिक अधिकारी मनके बइठका लेके सबो स्कूल म सौचालय हवय कि नइ ए सुनिश्चित करे के निरदेस दीन। ओमन ब्लॉक शिक्षा अधिकारी मन ल अपन-अपन क्षेत्र के स्कूल के सौचालय के निरीक्षण करे बर किहीन अउ ए देखे बर किहीन कि सौचालय साफ-सुथरा होना चाही।
राज्यपाल ह किहीन कि जउन विद्यार्थी अपन पढ़ई पूरा करे के बाद अभी कोनो बने संस्थान म काम करत हे या दीगर क्षेत्र म उपलब्धि पाय हे, त ओमन ल स्कूल म बलाके सम्मानित करना चाही। राज्यपाल ह जल संरक्षण अउ वृक्षा रोपण ल बढ़ावा दे के संगेसंग किसान मन ल जैविक खेती करे खातिर आगू आय बर किहीन।
धमतरी सैनिक-स्कूल
धमतरी जिला म पांच सौ सीट के क्षमता वाले सैनिक स्कूल के स्थापना करे जाही। राज्य सरकार ह ए परियोजना के प्रस्ताव केंद्रीय रक्षा मंत्रालय ल भेज दे हे। ए सैनिक स्कूल म डिजीटल शिक्षा माध्यम ले बने आधुनिक स्मार्ट कक्षा होही। शारीरिक फिटनेस अउ खेल बर मैदान के संगेसंग व्यवस्थित छात्रावास, पुस्तकालय अउ बिसेस रक्षा प्रसिक्षण केंद्र होही। ए सैनिक स्कूल के स्थापना के उद्देस्य प्रदेस के युवा मन ल राष्ट्रीय स्तर के शिक्षा के संगेसंग सेना म कैरियर बर तियार करना हे।
संक्षिप्त समाचार
– रामलला दर्सन योजना म आज राजनांदगांव अउ दुरूग रेलवे स्टेसन ले आठ सौ पचास श्रध्दालू अयोध्या बर रवाना होइन।
– दुरूग जिला म तीन झन के हत्या के आरोपी रवि शर्मा ल तृतीय अपर सत्र न्यायाधीश ह आज मृत्युदंड के सजा सुनाइन। रवि शर्मा उपर इक्कीस जनवरी बछर दू हजार बीस के भिलई के तालपुरी क्षेत्र म अपन पत्नी, नोनी अउ एक आने मनखे के हत्या के आरोप हे।
अउ
– सक्ति जिला के बाराद्वार थाना क्षेत्र के लवसरा गांव म दू झिन नोनी के तरिया म बूड़े ले मउत होगे। ए दूनों नोनी जुड़वा बहिनी रिहीन।