केन्द्र सरकार ह बाढ़त तापमान अउ लू के प्रभाव ले मजदूर मन ल बचाय बर राज्य अउ केन्द्रसासित प्रदेस मन ल राष्ट्रव्यापी परामर्श जारी करे हे। राज्य मन ल सलाह दे गेहे कि सुरक्षा उपाय के तुरते कार्यान्वयन बर कर्मचारी, उद्योग अउ निर्माण कंपनी ल जरूरी निरदेस जारी करय। श्रम अउ रोजगार मंत्रालय ह राज्य अउ केन्द्रसासित प्रदेस के मुख्य सचिव अउ प्रसासक मन ले कहिन हे कि ओमन ह पर्याप्त पीये के पानी के सुविधा सुनिश्चित करयं अउ काम करे वाले जघा ल ठंडा राखे के प्रावधान करय। मजदूर मनके नियमित स्वास्थ्य जांच बर स्वास्थ्य विभाग ले समन्वय राखे बर घलो कहे गेहे। निर्माण के काम म लगे मजदूर, दिहाड़ी मजदूरी अउ अस्थाई मजदूर मन बर उपर विशेष ध्यान देके सलाह दे गेहे।
इही बीच, राष्ट्रीय मानवाधिकार आयोग ह छत्तीसगढ़ समेत इक्कीस राज्य अउ दिल्ली के मुख्य सचिव ल चिट्ठी जारी करके देस म लू के चलत कमजोर वर्ग के सुरक्षा बर पहिली ले कार्रवाई करे अउ राहत उपाय ल लागू करे के निरदेस दीन हे।
शिवराज सिंह चौहान-बैठक
नई दिल्ली म काली केन्द्रीय कृषि अउ किसान कल्याण मंत्री शिवराज सिंह चौहान के अध्यक्षता म बइठका होइस। ए बइठका म हरेक राज्य बर अलग-अलग कृषि रोडमैप ल तियार करे के निर्णय ले गीस। एखर बर एक ठिन उच्च स्तरीय समिति के गठन करे जाही। ए रोडमैप ह राज्य के सहमति ले तियार होही। एमा स्थानीय जलवायु अउ संसधान के अनुसार फसल चयन अउ वैज्ञानिक खेती बर जोर रइही। संगेसंग उत्पादन अउ उत्पादकता ल बढ़ाय खातिर आने-आने फसल, नवा तकनीक अउ कलस्टर आधारित विकास ल बढ़ावा दे जाही।
मुख्यमंत्री-श्रम विभाग समीक्षा
मुख्यमंत्री विष्णुदेव साय ह आज मंत्रालय म श्रम विभाग के काम अउ योजना के उच्च स्तरीय समीक्षा करीन अउ ए बेरा म ओमन ह ‘‘ई-श्रम साथी‘‘ मोबाइल एप्लीकेशन छत्तीसगढ़ डिजिटल लेबर चौक के सुभारंभ करीन। ओमन ह अधिकारी मन ल मजदूर मन तक योजना के लाभ पहुंचाय के निरदेस दीन। ओमन ह किहीन हे कि योजना के असली प्रभाव तभे दिखही, जब ओखर लाभ हरेक मनखे तक पहुंचही। मुख्यमंत्री ह अधिकारी मन ल बेरा-बेरा म औद्योगिक इकाई के औचक निरीक्षण करे बर किहीन हे।
बइठका म प्रदेस के सबो जिला म श्रम कार्यालय के माध्यम ले योजना के क्रियान्वयन अउ बेरा-बेरा म प्रसिक्षण कार्यक्रम करे बर घलो जोर दीन।
दसवीं-बारहवीं-परिणाम
छत्तीसगढ़ माध्यमिक शिक्षा मंडल कोति ले काली दसवीं अउ बारहवीं बोर्ड परीक्षा के परिणाम ल घोषित करे जाही। स्कूल सिक्षा मंत्री गजेन्द्र यादव ह पढ़ईया लइका मन ल धैर्य बनाय राखे, परिणाम ल सकारात्मकता के संग स्वीकार करे अउ आत्मविश्वास के संग आगू बाढ़े के सुभकामना दीन हे। काली सबले पहिली बोर्ड परीक्षा के प्रावीण्य सूची म सामिल लइका मनके नाम घोषित करे जाही, जउन छात्र मन ह टॉप करही, ओमन ल राज्य सरकार डहार ले सम्मानित करे जाही।
जानबा के अनुसार एसो दसवीं म तीन लाख बीस हजार ले जादा छात्र अउ बारहवीं म दू लाख पैंतालीस हजार ले जादा पढ़ईया लइका मन ह परीक्षा दे रिहीन।
मुख्य सचिव-बैठक
छत्तीसगढ़ राज्य के जलवायु परिवर्तन म कार्ययोजना बर गठित करे गे स्टियरिंग समिति के बइठका ह काली मंत्रालय म मुख्य सचिव विकासशील के अध्यक्षता म संपन्न होइस। बइठका म मुख्य सचिव ह किहीन हे कि राज्य के ग्रामीण क्षेत्र ल जलवायु परिवर्तन के अनुकूल बनाय अउ ग्राम पंचायतवार कार्ययोजना बनाय जाय। संगेसंग ओमन ह किहीन कि राज्य म जलवायु परिवर्तन कार्यक्रम बर सीएसआर मद के उपलब्ध पइसा के उपयोग करना प्रस्तावित करे जाय। ए बइठका म छत्तीसगढ़ राज्य जलवायु परिवर्तन केन्द्र, राज्य के जलवायु परिवर्तन म कार्ययोजना, राज्य म जलवायु परिवर्तन विषयक कार्यक्रम के क्रियान्वयन अउ राज्य जलवायु परिवर्तन प्राधिकरण के गठन अउ राज्य म कार्बन क्रेडिट आधारित कार्यक्रम करे बर गोठबात करे गीस।
जनगणना मकान सूचीकरण
जनगणना-दू हजार सत्ताईस के चलत छत्तीसगढ़ म एक मई ले मकान सूचीकरण अउ मकान के गणना के काम सुरू होही। ए काम ह तीस मई तक चलही। एखर बारे म आज रईपुर म जिला जनगणना अधिकारी मनीष मिश्रा ह सबो जनगणना चार्ज अधिकारी मनके बइठका लेके जरूरी दिसा-निरदेस दीन।
दुर्घटना
प्रदेस म पाछु चौबीस घंटा के भीतरी होय आने-आने रद्दा हादसा म छह झिन मनखे के मउत होगे।
पाछु रतिहा कोरबा जिला के चांपा-फरसवानी रद्दा म एक ठिन तेज रफ्तार कार ह अनियंत्रित होके डिवाइडर ले टकराय के बाद उहां ले जात ट्रक ले भीड़ गे। ए घटना म कार म बइठे एके परिवार के तीन झिन लोगन के मउत होगे।
उहें, बिलासपुर म लाल खदान ओवर ब्रिज तीर कार ह आटो ल टक्कर मार दीस, जेखर ले आटो म बइठे एक झिन माईलोगिन के मउत होगे। जबकि चार झिन आने लोगन मन घायल हवय।
इही जिला म कोटा ले पंडातराई कोति जावत बराती मन ले भरे एक चारपहिया गाड़ी ह नगचुई के तीर हादसा के सिकार होगे। ए घटना म एक झिन माईलोगिन के मउत होगे। उहें, तेरह झिन आने मनखे मन घायल होय हे।
बिलासपुर जिला म ही रलिया गांव के तीर कार के टक्कर ले मोटर साइकिल सवार एक झिन लोगन के मउत होगे।
मनरेगा-छत्तीसगढ़
महात्मा गांधी राष्ट्रीय ग्रामीण रोजगार गारंटी योजना-मनरेगा के अंतर्गत श्रमिक मनके ई-केवायसी के काम म छत्तीसगढ़ ह पूरा देसभर म पहिली स्थान प्राप्त करे हे। भारत सरकार कोति ले जारी करे गे रिपोर्ट के अनुसार प्रदेस म संतानवे प्रतिशत सक्रिय श्रमिक मनके ई-केवायसी ल पूरा कर ले गेहे, जउन कि राष्ट्रीय स्तर म सबले जादा हरय। उहें, प्रदेसभर म लगभग अंठावन लाख ले जादा मजदूर मनके डिजिटल वेरिफिकेशन ल पूरा कर ले गेहे। ए डिजिटल प्रक्रिया ह फर्जी जॉब कार्ड ल हटाय अउ सीधा वास्तविक लाभार्थी मनके बैंक खाता म मजदूरी के पइसा पहुंचाय म मदद करथे।
अग्निवीर-भर्ती प्रशिक्षण
भारतीय सेना म अग्निवीर भर्ती के लिखित परीक्षा के तियारी करत अभ्यर्थी मन बर जिला म निःशुल्क प्रशिक्षण के व्यवस्था करे गेहे। ए प्रसिक्षण ह जिला रोजगार अउ स्व-रोजगार मार्गदर्शन केन्द्र, रायपुर कोति ले दे जाही। ए प्रसिक्षण ह चार मई ले सुरू होके चार जून तक चलही। ए बेरा म विषय-विशेषज्ञ मन डहार ले अभ्यर्थी मन ल निःशुल्क प्रशिक्षण दे जाही। इच्छुक अभ्यर्थी मन ह रोजगार विभाग के आधिकारिक वेबपोर्टल म तीस अप्रैल तक अपन पंजीयन करा सकत हे।
ट्रेन-परिचालन
पूर्व मध्य रेलवे के पंडित दीन दयाल उपाध्याय मंडल के गया स्टेशन म सत्ताईस अप्रैल ले सोलह मई तक सीसी अप्रोन के डिसमेंटलिंग के काम करे जाही। एखर सेती दक्षिण पूर्व मध्य रेलवे ले जाय वाले पटना-चर्लपल्ली-पटना एक्सप्रेस ट्रेन ह आने रद्दा ले चलही।
उहें, मध्य रेलवे कोति ले करे जात स्टेसन के पुनर्विकास के काम के सेती हावड़ा-छत्रपति शिवाजी महाराज टर्मिनस एक्सप्रेस ह सत्रह मई तक सिरिफ दादर तक ही चलही।
इही बीच, गर्मी म यात्री मनके भीड़ ल देखत हुए रेलवे कोति ले आज पनवेल-खड़गपुर के बीच एक फेरा बर समर स्पेशल ट्रेन चलाय जात हे। ए ट्रेन ह गोंदिया, दुरूग, रईपुर, अउ बिलासपुर स्टेसन म रूकही।
मौसम
बंगाल के खाड़ी कोति ले आत नमी के सेती प्रदेस के एक-दू जघा म हल्का बरसा होय या गरज-चमक के संग बूंदाबांदी हो सकत हे। मौसम विभाग ह अवइया चौबीस घंटा के बेरा म प्रदेस म कुुछु जघा म हवा-गरेर चले अउ बिजली गिरे के चेतावनी देहे। एखर असर ले प्रदेस के बाढ़त तापमान म कमी हो सकत हे।
उहें, प्रदेस म पाछु चौबीस घंटा के चलत जांजगीर, रायगढ़ अउ बिलासपुर के कुछ जघा म तेज हवा के संग हल्का बरसा होय हे।
लू-पशुपालक एडवायजरी
गर्मी के मौसम म बाढ़त तापमान अउ लू ल देखत हुए छत्तीसगढ़ राज्य जीव-जंतु कल्याण बोर्ड ह पशुपालक मन बर जरूरी सावधानी जारी करे हे। बोर्ड ह केहे हे कि जादा गर्मी म पशु मन ल सीधा गर्मी के संपर्क ले बचाना बहुत जरूरी हवय। जारी करे गे निरदेस म केहे गेहे कि पशु मन ल दिनभर छईंया उपलब्ध कराय बर जरूरी व्यवस्था करे जाय। संगेसंग पीये के पानी के घलो बेवस्था ल सुनिश्चित करत हुए पशु मन ल हर रोज साफ अउ ताजा पानी दे जाय।