भारतमाला घोटाला मामला म प्रवर्तन निदेशालय-ईडी ह आज धमतरी जिला के कुरूद म भूपेन्द्र चंद्राकर के ठिकाना म छापा मारिन। एखर संगेसंग जमीन कारोबारी गोपाल गांधी अउ ओखर ले जुड़े आने ठिकाना म घलो छापा मारिन। बिहनिया तीन ठक गाड़ी म बारह ले जादा ईडी के अधिकारी मन ह भूपेन्द्र चंद्राकर के घर म पहुंचे रिहीन। टीम ह घर के भीतरी जांच पड़ताल करिन हे। आरोप हवय कि भूपेन्द्र चंद्राकर ह कथित भारतमाला घोटाला म अपन करीबी मन ल ही सिरिफ अभनपुर ही नही, बल्कि कायाबांधा, दुरूगा, पाटन, राजनांदगांव के देवादा अउ मगरलोड जइसे जघा म करोड़ो रूपिया के मुआवजा देवइन हे। ए आरोप ले संबंधित सिकायत दस्तावेज के संग दरज कराय गे रिहीस, जेखर आधार म ईडी ह अब ए जांच ल करत हे।
कंपनी-कारण बताओ नोटिस
औद्योगिक स्वास्थ्य अउ सुरक्षा विभाग के टीम ह जांजगीर-चांपा जिला के हथनेवरा गांव के प्रकाश इंडस्ट्रीज लिमिटेड ल कारण बताओ नोटिस देहे। जानबा के अनुसार चौबीस अप्रैल के इंडक्शन फर्नेस ले पिघलत धातु के रिसाव के घटना होय रिहीस, जेमा कोनो जनहानि नइ होय रिहीस। फेर सुरूआती जांच म सुरक्षा ले जुड़े कुछु कमी पाय गीस। जेखर बाद संबंधित फर्नेस ल फिलहाल बंद कर दे गेहे। विभाग ह प्रकाश इंडस्ट्रीज लिमिटेड ल निरदेस दीन हे कि सबो जरूरी सुरक्षा उपाय ल सुनिश्चित करे के बादेच फर्नेस ल फेर चालू करे जाय।
राज्यपाल-औद्योगिक सुरक्षा
छत्तीसगढ़ शासन के चीफ इंस्पेक्टर ऑफ फैक्ट्रीज हिम शिखर गुप्ता ह आज लोकभवन म राज्यपाल रमेन डेका ले भेंट करीन हे। ए बेरा म राज्यपाल ह कारखाना म होय वाला औद्योगिक दुर्घटना ल रोके अउ श्रमिक मनके सुरक्षा ल सबले पहिली प्राथमिकता ले सुनिश्चित करे के निरदेस दीन। ओमन ह किहीन कि कोनो भी प्रकार के लापरवाही ल गंभीरता ले जाना चाही। राज्यपाल ह किहीन हे कि कारखाना म सुरक्षा मानक के कड़ाई ले पालन होना चाही, मसीन के नियमित जांच करे जावय अउ करमचारी मन ल बेरा-बेरा म सुरक्षा के प्रसिक्षण दे जाय।
सट्टा-आरोपी गिरफ्तार
महासमुंद पुलिस ह ऑनलाइन सट्टा खिलाय वाले एक ठिक बड़का अंतर्राज्यीय नेटवर्क के खुलासा करीन हे। पुलिस ह ए मामला म मास्टर माइंड समेत कुल छै झिन आरोपी मन ल रईपुर अउ बेमेतरा ले गिरफ्तार करे हे। इंखर करा ले दू करोड़ रूपिया ले जादा के संपत्ति अउ लेनदेन के रिकॉर्ड जब्त करे गेहे। जांच के बेरा म पुलिस ल एक करोड़ पंद्रह लाख रूपिया के ऑनलाइन सट्टा के लेनदेन के रिकॉर्ड घलो मिले हे। पुलिस ह एखर करा ले दू ठिक लैपटाप, एक टैबलेट अउ बाईस ठिन मोबाइल फोन जब्त करे हे।
दुर्घटना
दुरूग जिला के बोरी थाना क्षेत्र म होय बस हादसा म उन्नीस झिन लोगन मन घायल हो गेहे। अतिरिक्त पुलिस अधीक्षक मणिशंकर चंद्रा ह बतइन कि ए बस ह मड़ियापार ले बारात ल वापिस दुरूग कोति लेके आत रिहीस, फेर इही बेरा म ए घटना होगे। जेमा एक सियान अउ एक झिन लइका के हालत गंभीर बताय जात हे। जेमन ल इलाज बर रईपुर के एम्स अस्पताल म भर्ती कराय गेहे अउ आने घायल मन ल तुरते तीर-तखार के अस्पताल म पहुंचाय गीस, जिंहा प्राथमिक उपचार के बाद उंखर स्थिति सामान्य होगेे।
उहें, मोहला-मानपुर-अंबागढ़ चौकी जिला के राष्ट्रीय राजमार्ग क्रमांक-नौ सौ तीस म कमानसुर गांव के तीर म घलो एक ठिन रद्दा हादसा होगे, जेमा दस झिन मनखे ह घायल होगिन। मानपुर थाना प्रभारी बृजेश सिन्हा ह बतइन कि बालोद जिला के भरदाकला गांव ले एके परिवार के दस झिन लोगन मन ह कांकेर जिला म एक ठिन परिवारिक कारीकरम म आय बर पहुंचे रिहीन। फेर वापसी के बेरा म इंखर गाड़ी ह अनियंत्रित होके पलटगे। पुलिस ह घायल मन ल मानपुर सामुदायिक स्वास्थ्य केंद्र म पहुंचाइन। उंहा ले गंभीर रूप ले घायल मन ल राजनांदगांव के मेडिकल कालेज भेजे गेहे।
मन की बात
प्रधानमंत्री नरेंद्र मोदी ह काली आकाशवाणी ले प्रसारित ‘मन की बात‘ कारीकरम म छत्तीसगढ़ के करिया हिरण ल बचाय के कोसिस के सराहना करीन। ओमन ह किहीन कि छत्तीसगढ़ म एखर संख्या ह तेजी ले कम होगे रिहीस। फेर सरलग कोसिस करे गीस अउ इंखर संरक्षण ल बढ़ाय गीस। जेखर सेति आज ए फेर ले मैदान म दउड़त दिखाई देथे।
मुख्यमंत्री विष्णुदेव साय ह किहीन हे कि ए उल्लेख ले राज्य के पर्यावरणीय पहल ह राष्ट्रीय स्तर म प्रमुखता ले आगू आय हे अउ बारनवापारा अभ्यारण्य ल नवा पहिचान मिले हे।
छत्तीसगढ़ के प्रधान मुख्य वन संरक्षक अरूण पांडेय ह बतइन कि वन विभाग कोति ले करिया हिरण ल बचाय बर नवा योजना ल लागू करे जात हे।
पद्म पुरस्कार-नामांकन
गणतंत्र दिवस के मउका म घोसित करे जाय वाले पद्म पुरस्कार बर ऑनलाइन नामांकन प्रक्रिया ह पंद्रह मार्च ले सुरू हो गेहे। एखर बर नामांकन के आखिरी तारीख इकतीस जुलाई हरय। नामांकन बर राष्ट्रीय पुरस्कार पोर्टल- अवॉडर््स डॉट जीओवी डॉट इन म ऑनलाइन करे जा सकत हे।
उहें, प्रधानमंत्री राष्ट्रीय बाल पुरस्कार-दू हजार छब्बीस बर नामांकन आमंत्रित करे जात हे। ए प्रक्रिया एसो इकतीस जुलाई तक पांच ले अट्ठारा बछर के लइका मन बर हरय। प्रधानमंत्री राष्ट्रीय बाल पुरस्कार एक ठिन प्रतिष्ठित राष्ट्रीय स्तर के पुरस्कार हरय, जउन कि हर बछर राष्ट्रपति डहार ले देसभर के लइका मनके आसाधारण उपलब्धि ल मान्यता देबर दे जाथे।
विश्व रेडक्रॉस दिवस
देसभर समेत छत्तीसगढ़ म आठ मई के विश्व रेडक्रॉस दिवस मनाय जाही। एखर ले पहिली आज लोकभवन म छत्तीसगढ़ रेडक्रॉस सोसायटी के अध्यक्ष टोमन साहू ह राज्यपाल रमेन डेका ले भेंट करीन। ए बेरा म राज्यपाल ह राज्य अउ जिला शाखा म कारीकरम करे के निरदेस दीन हे। ओमन ह किहीन हे कि रेडक्रॉस ह मानव सेवा काम के प्रचार-प्रसार अउ एला लोगन मन तक पहुंचाय बर सदस्यता अभियान ल गति देना जरूरी हवय। एखर बर जनप्रतिनिधि, समाजसेवी अउ कतकोन वर्ग के लोगन मन ल अभियान ले जोड़े जाय के बात किहीन।
राज्यपाल-श्रीमंत झा
राज्यपाल रमेन डेका ले आज लोक भवन म चौसठवां अंतर्राष्ट्रीय पदक विजेता पैरा आर्मरेसलर श्रीमंत झा ह भेंट करीन। ओमन ह हाले म नार्वे के ईदफ्योर्ड म होय पैरा आर्मरेसलिंग कप प्रतियोगिता म पच्यासी किलोग्राम वर्ग म स्वर्ण पदक जीते हे। एखर बर श्री डेका ह ओमन ल बधई अउ सुभकामना दीन अउ ओखर उज्जवल भविष्य के कामना करीन हे।
संगीत विश्वविद्यालय-बस सुविधा
राज्यपाल रमेन डेका ह आज लोकभवन म इंदिरा कला संगीत विश्वविद्यालय के खैरागढ़ के नवा बस ल हरा झंडी दिखाके रवाना करीन। बस के सुविधा मिले ले विश्वविद्यालय के पढ़इया लइका मन ल कला, संगीत अउ सांस्कृतिक प्रस्तुति बर कतकोन जघा म आय-जाय म आसानी होही। ए मउका म विश्वविद्यालय के कुलपति डॉक्टर लवली शर्मा समेत विश्वविद्यालय के आने अधिकारी मन रिहीन।
मंडीप खोल गुफा
खैरागढ़-छुईखदान-गंडई जिला के ठाकुरटोला के मंडीप खोल गुफा ल आज श्रध्दालू मन बर खोले गीस। ए गुफा ल बछर भर म सिरिफ एके दिन ही खोले जाथे, जेखर सेति लोगन मन म खुसी दिखाई दीस। फेर सुरक्षा ल देखत हुए ए गुफा म पुलिस बल के तैनाती घलो करे गे रिहीस।
गांजा-बरामद
गरियाबंद जिला के अतरमरा नहर तउंरत मिले गांजा के करीबन पंद्रह ठिक पाकिट ल पुलिस ह जब्त करे हे। हरेक पाकिट म करीबन दू किलो गांजा होय के अंदेसा लगाय जात हे। ए गांजा के कुल कीमत पंद्रह लाख रूपिया बताय जात हे। पुलिस ह तस्कर मन ल खोजे म लगे हे।