प्रधानमंत्री नरेंद्र मोदी ह तमिलनाडु के कलपक्कम म फास्ट ब्रीडर रिएक्टर ल चालू करे म सफलता मिले उपर देस के परमाणु वैज्ञानिक मन ल संहराइन हे। आकाशवाणी ले आज मन की बात कारीकरम म प्रधानमंत्री ह किहीन कि परमाणु ऊर्जा सफर के ए ऐतिहासिक उपलब्धि ले भारत के गौरव बाढ़े हे। ओमन किहीन कि असैन्य परमाणु कारीकरम ह राष्ट्र निर्माण म बड़का योगदान देवत हे।
श्री मोदी ह किहीन कि भारत के विकास बर सौर अउ पवन ऊर्जा जरूरी हे। एखर ले जवान लइका मन ल रोजगार के मउका मिलत हे। प्रधानमंत्री ह मौजूदा जनगणन अभियान ल विश्व के सबले बड़का जनगणना अभियान बताय हे। प्रधानमंत्री ह ए अभियान म लोगन ल पूरा भागीदारी बर आरो दीन। ओमन किहीन कि जनगणना बर सबो जानकारी डिजीटल रूप ले दर्ज करे जात हे।
प्रधानमंत्री ह किहीन कि ए बछर अवइया एक मई के बुध्द पूर्णिमा मनाय जाही। भगवान बुध्द के संदेस ह मानवता के कल्याण बर हमेसा जाने जथे।
श्री मोदी ह लइका मन ल गर्मी छुट्टी के भरपूर आनंद लेके संगे कुछू नवा सिखे के सलाह घलो दीन।
मन की बात
प्रधानमंत्री नरेंद्र मोदी ह ‘‘मन की बात‘‘ कारीकरम म छत्तीसगढ़ म करिया हिरण ल बचाय के चलत प्रयास बारे म बतइन। ओमन किहीन कि छत्तीसगढ़ म करिया हिरण ए घांव फेर देखे जात हे। एक समय एखर संख्या बहुते कम होगे रिहीस। फेर सरलग प्रयास होइस अउ संरक्षण बढ़ाय गीस। आज एमन ल खुल्ला भाठा जघा म भागत देखे जा सकत हे अउ हमर नंदावत विरासत ह लहुटत हे।
मुख्यमंत्री विष्णुदेव साय ह रईपुर के भाटागांव स्थित विनायक सिटी म जन समूह संग मन की बात कारीकरम ल सुनिन। ए मउका म मुख्यमंत्री ह किहीन कि प्रधानमंत्री डहार ले छत्तीसगढ़ म करिया हिरण ल बचाय खातिर होवत प्रयास के राष्ट्रीय स्तर म जिक्र करना राज्य बर बिसेस सम्मान वाले बात हरय। एखर ले ए स्पष्ट होथे कि पर्यावरण ल बचाय अउ जैव विविधता सोज प्रदेस के सोच मजबूत हे। संगे आने राज्य बर घलो एक ठिन प्रेरणादायी मॉडल रूप म देखे जात हे। मीडिया ले गोठबात करत मुख्यमंत्री ह किहीन कि मन की बात कारीकरम म प्रधानमंत्री ह पर्यावरण संरक्षण, जंगली जीव-जंतु के बचाव अउ ऊर्जा के नवा स्त्रोत ल बढ़ावा देबर देसवासी मन ल प्रेरित करीन।
ए मउका म विधानसभा अध्यक्ष डॉक्टर रमन सिंह वन मंत्री केदार कश्यप समेत आने जन प्रतिनिधि अउ बड़भारी संख्या म लोगन मौजूद रइही।
केंद्रीय मंत्री-चिंतन शिविर
केंद्रीय युवा कार्य अउ खेल मंत्री डॉक्टर मनसुख मांडविया ह किहीन हे कि बहुत जल्दी जवान लइका मनके मामला बर एक ठिन बिसेस सिविर राखे जाही। श्रीनगर म राखे गे खेल चिंतन सिविर के समापन मउका म केंद्रीय मंत्री ह ए घोसना करीन।
राष्ट्रीय खेल चिंतन सिविर म छत्तीसगढ़ के उपमुख्यमंत्री अरूण साव गुड गर्वनेंस इन स्पेर्ट्स उपर राखे गे सत्र के पगरइती करीन। ए दउरान ओमन छत्तीसगढ़ के खेल योजना अउ भविष्य के रणनीति उपर सुघ्घर काम वाले वीडियो प्रेजेंटेसन घलो दीन। श्री साव ह दू दिन के सिविर म कई ठन राज्य मनके खेल मंत्री अउ अंतर्राष्ट्रीय खिलाड़ी मन ले गोठबात करीन।
इंदिरा गांधी-समारोह
रईपुर के इंदिरा गांधी कृषि विश्वविद्यालय म काली होय एक ठिन समारोह म आगू बाढ़त किसान मन ल विकसित धान के छै ठिन उन्नत म्यूटेंट किस्म बांटे गीस। धान के ए किस्म मन ल भाभा एटामिक रिसर्च सेंटर ट्राम्बे-मुंबई के सहयोग ले तियार करे गेहे। ए मउका म कृषि उत्पादन आयुक्त शहला निगार ह किहीन कि राज्य सरकार डहार ले ए खरीफ बछर म धान के चालीस प्रतिसत जुन्ना कीसम के जघा नवा उन्नत कीसम के धान ल लगाय के योजना हे। ओमन किसान मन ले पारंपरिक फसल मनके जघा म जादा मुनाफा देवइया फसल लगाय के आरो दीन।
ईपीएफओ-समाधान समारोह
कर्मचारी भविष्य निधि संगठन-ईपीएफओ डहार ले काली सत्ताईस अप्रैल के राज्य के कई ठिन जिला मन म विसेस समाधान सिविर राखे जाही। ए सिविर मन म पीएफ दावा, यूनिवर्सल अकाउंट नंबर, केवाईसी अपडेट, बैंक खाता के जानकारी म सुधार अउ पेंसन ले जुड़े केस मनके निपटारा संबंधी सहूलियत दे जाही। ईपीएफओ के क्षेत्रीय कार्यालय रईपुर डहार ले सदस्य सेवा मन ल जादा सरल अउ आम जनता बर सहज बनाय खातिर निधि आपके निकट टू प्वाइंट जीरो कारीकरम चालू करे गेहे।
खैरागढ़ खोल गुफा
खैरागढ़ जिला के ऐतिहासिक अउ धार्मिक महत्तम वाले मंडीप खोल गुफा ले काली सत्ताईस अप्रैल के श्रध्दालू मन बर खोले जाही। ए गुफा ल खोले ले पहिली जिला प्रशासन के बड़का अधिकारी मन गुफा स्थल के निरीक्षण करके तियारी बारे म जायजा लीन। गुफा म श्रध्दालू मनके सुरक्षा खातिर विसेस बेवस्था राखे गेहे।
सट्टा-आरोपी गिरफ्तार
दुरूग पुलिस ह अंतरराज्यीय ऑनलाइन सट्टा गिरोह के पर्दाफास करत मुख्य संचालक समेत पांच झिन आरोपी ल गिरफ्तार करे हे। ए गिरोह ह गोवा समेत कई ठिन राज्य म सक्रिय रिहीस। गिरोह के सदस्य मन गोवा अउ छत्तीसगढ़ समेत कई ठिन राज्य म फर्जी सिम म्यूल अकाउंट अउ ऑनलाइन प्लेटफार्म के जरिया ले गैर कानूनी ढंग ले सट्टा खेलावत रिहीन। ए मामला म पुलिस ह छै झिन आरोपी ल आगूच गिरफ्तार करे हवय।
दुर्घटना
प्रदेस म आने-आने जिला म होय रोड एक्सीडेंट म छै झिन मनखे के मउत होगे। उहें, दर्जन भर मनखे मन घायल हो गेहे। कोरबा जिला के कटघोरा थाना क्षेत्र के कसनिया मोड़ तीर बिहाव ले लहुटत बेरा एक ठिन फटफटी के चारपहिया गाड़ी के चपेट म आय ले फटफटी सवार तीन झिन मनखे मे ले एक झिन के मउकच म मउत होगे। उहें, दू झिन घायल हो गेहे।
ओति, मोहला-मानपुर म नेशनल हाइवे उपर दल्लीराजहरा बीच पेंदुर गांव तीर एक ठिन माल डोहरइया गाड़ी अंते-तंते होके पलटी खागे। ए हादसा म दू झिन माईलोगिन के मउत होगे। उहें, दस झिन आने मनखे घायल होगे।
उहें, बालोद जिला के अछोली गांव तीर तेज रफ्तार ट्रक के फटफटी सवार दू झिन जवान लइका ल टक्कर मारे ले मउकच म ए दूनों के मउत होगे।
ऐति, धमतरी जिला के आरौद टोल प्लाजा तीर तेज रफ्तार ट्रक ह एक झिन मनखे ल अपन चपेट म ले लीस। गंभीर रूप ले घायल ए मनखे के जिला अस्पताल म इलाज बेरा मउत होगे।
मौसम
मौसम विभाग ह केहे हे कि काली दक्षिण छत्तीसगढ़ के कोनो-कोनो जघा म तेज हवा के संग सिटीर-साटर पानी गिर सकत हे। मौसम विज्ञानी ह बतइन कि प्रदेस के दक्षिण भाग म बंगाल के खाड़ी ले नमी वाले हवा आत हे, जेखर ले दक्षिण छत्तीसगढ़ के मौसम बदल सकत हे। उहें, यहू बतइन कि अवइया दू-तीन दिन तक मध्य छत्तीसगढ़ म लू घलो चल सकत हे।
संक्षिप्त समाचार
– छत्तीसगढ़ व्यावसायिक परीक्षा मंडल डहार ले आज राज्य कृषि विपणन बोर्ड के चलत मंडी उपनिरीक्षक भर्ती परीक्षा राखे गे रिहीस। ए परीक्षा ह बिहनिया दस बजे सुरू होके सवा बारह बजे तक चलिस।
अउ
– रईपुर जिला म कई झिन राईसमिलर्स ह भारतीय खाद्य नियम अउ नागरिक आपूर्ति निगम म तय मात्रा म कस्टम मीलिंग चांउर जमा नइ करे हे। एला लेके रईपुर जिला प्रशासन ह कड़ा रूख अपनावत चौहत्तर झिन राईस मिलर्स मन ल ब्लैक लिस्ट करे के चेतावनी देवत कारण बताओ नोटिस निकाले हे।