प्रवर्तन निदेशालय याने-ईडी ह विदेशी डेबिट कार्ड ले पइसा के अवैध निकासी ले जुड़े फेमा मामला म छत्तीसगढ़ समेत देसभर म तलासी अभियान चलाइस। एमा धमतरी अउ बस्तर क्षेत्र म पाछू कुछेक दिन म करे गे छापामार कारवाई म संदिग्ध नगदी निकासी के खुलासा होय हे। ए जघा मन म पाछू कुछ बछर ले लगभग साढ़े छै करोड़ रूपिया निकाले गेहे, जांच म पाय गे हे कि खास माओवाद प्रभावित बस्तर म आने-आने विदेशी डेबिट कार्ड ले अब्बड़ अकन पइसा के लेनदेन होय हे।
देसभर म करे गे जांच म पता चले हे कि ए कार्ड मनले करीब पंचानवे करोड़ रूपिया भारत लाय गीस अउ आने-आने राज्य के एटीएम ले घेरीबेरी नगदी निकाले गीस। जेखर उपयोग ‘‘द टिमोथी इनीशिएटिव‘‘ नामक संगठन के कामबूता म करे गीस, जउन ह विदेसी अंशदान विनियमन अधिनियम म पंजीकृत नइ हवय। तलासी के दउरान देस के आने-आने राज्य ले पचीस विदेसी डेबिट कार्ड अउ चालीस लाख रूपिया नगदी समेत अउ आने साक्ष्य जब्ती करे गेहे। ईडी ह ए मामला के जांच करत हे।
स्थानीय निकाय चुनाव
प्रदेस म अवइया मई-जून महिना म होने वाला नगर पालिका अउ त्रिस्तरीय पंचायत के आम अउ उपचुनाव के तियारी के बारे म काली नवा रईपुर म एक बड़का बइठका आयोजित करे गीस। एखर अध्यक्षता राज्य निर्वाचन आयुक्त अजय सिंह ह करीन। बइठका म आदर्स आचार संहिता के पालन बर जरूरी निरदेस जारी करे के संगेसंग वोटिंग के दिन सामान्य अवकाश घोसित करे के काम ल पक्का करे के निरदेस दे गीस।
आपमन ल बतादन कि प्रदेस म आने-आने नगर पालिका के कुल तिरासी पद, जेमा अध्यक्ष के छै अउ पार्षद के सतहत्तर पद हवय, एमन बर चुनई होना हे। एखर संग त्रिस्तरीय पंचायत के कुल एक हजार दू सौ दू पद, जेमा जनपद पंचायत सदस्य के दस, सरपंच के बयासी अउ पंच के एक हजार एक सौ दस पद सामिल हे, एमन बर घलो आम अउ उपचुनाव होना हे।
ए बारे म मतदाता सूची के आखिरी प्रकाशन अवइया पांच मई के होही, जेखर बाद राज्य निर्वाचन आयोग कोति ले चुनई कारीकरम जारी करे जाही।
निजी स्कूल-फीस विनियमन
राज्य के मुख्य सचिव विकासशील ह किहीन हे कि निजी स्कूल मन के अउने-पउने फीस वसूली उपर लगाम जगाय जाही अउ एमन म फीस विनियमन समिति ल तुरते काम करे बर लगाय जाही। मुख्य सचिव ह ए घलो बतइन कि स्कूल शिक्षा विभाग के अधिकारी मन ल साफ-साफ निरदेस दे गेहे कि सीबीएसई बोर्ड ले मान्यता प्राप्त निजी विद्यालय मन म अब सिर्फ एनसीईआरटी के पुस्तक ले पढ़ई कराना होही। पालक अउ विद्यार्थी मन उपर कोनो निजी प्रकाशक के महंगा किताब अउ वर्कबुक बिसाय बर दबाव डालने वाले निजी स्कूल मनके खिलाफ अब स्कूल शिक्षा विभाग ह कड़ा कारवाई करही।
पेट्रोल/डीजल-आपूर्ति
पश्चिम एशिया म अभी के स्थिति ल देखत हुए राज्य सरकार ह भारत सरकार के पेट्रोलियम और प्राकृतिक गैस मंत्रालय के सरलग संपर्क म हवय। जेखर ले प्रदेस म पेट्रोल-डीजल के निर्बाध आपूर्ति पक्का हो सकय। खाद्य विभाग ह राज्य म एलपीजी, पेट्रोल अउ डीजल के परयाप्त भंडार बतात हुए लोगन ले कोनो भी प्रकार के अफवाह उपर धियान नइ दे के अपील करे हे।
हज यात्री-फर्स्टएड किट
राज्य हज कमेटी कोति ले आज रईपुर म राखे गे कारीकरम म मुख्यमंत्री विष्णुदेव साय ह हज यात्री मन ल फर्स्टएड किट दे के ओमन के सुघ्घर अउ सुरक्षित यात्रा के मंगल कामना करीन। ए मउका म मुख्यमंत्री ह किहीन कि ए बछर प्रदेस ले कुल आठ सौ पंद्रह हज यात्री ए यात्रा म जावत हे।
जनगणना-टोल फ्री नंबर
भारत के रजिस्ट्रार जनरल और जनगणना आयुक्त कार्यालय ह बतइस हे कि जनगणना-दू हजार सत्ताईस बर राष्ट्रीय टोल फ्री हेल्पलाइन नंबर-एक-आठ-पांच-पांच सबो राज्य अउ केंद्रशासित प्रदेस मन म चालू हो गेहे। ए हेल्पलाइन नंबर ले क्षेत्रीय भाखा के संगेसंग अंग्रेजी म घलो मकान सूचीकरण अउ आवास जनगणना ले जुड़े मार्गदर्सन दे जाही।
मन की बात
प्रधानमंत्री नरेंद्र मोदी काली ईतवार के बिहनिया ग्यारा बजे आकाशवाणी के ‘‘मन की बात‘‘ कारीकरम म देस-दुनिया के लोगन संग अपन बिचार साझा करहीं। ए ह मासिक रेडियो कारीकरम के 133 वां कड़ी होही।
कारीकरम के प्रसारण आकाशवाणी अउ दूरदर्सन के जम्मों नेटवर्क म करे जाही। एखर सीधा प्रसारण एआईआर न्यूज, डीडी न्यूज, प्रधानमंत्री कार्यालय अउ सूचना तथा प्रसारण मंत्रालय के यूट्यूब चैनल मन म घलो होही। आकाशवाणी कोति ले क्षेत्रीय भाखा मन म घलो एखर प्रसारण करे जाही।
विश्व मलेरिया दिवस
आज विश्व मलेरिया दिवस हवय। ए मउका म प्रदेस के आने-आने जिला म जन-जागरूकता कारीकरम आयोजित करे गीस। इही कड़ी म गौरेला-पेंड्रा-मरवाही जिला के गौरेला सामुदायिक स्वास्थ्य केंद्र ले जागरूकता रैली निकाले गीस। एमा मलेरिया ले बचाव बर मच्छरदानी बउरे, साफ-सफाई रखे अउ बेरा-बेरा म जांच कराय के संदेस दे गीस।
सिग्नेचर ट्यून प्रतियोगिता
आकाशवाणी के नब्बे बछर पूरा होय के उपलक्ष्य म एक नवा सिग्नेचर ट्यून बनाय के प्रतियोगिता सुरू करे गेहे। एखर उद्देस्य आकाशवाणी के खास-खास कारीकरम बर अइसना संगीत तियार करना हे, जउन बिसय-वस्तु ले मेल खावय अउ सुनइया मन ल आकर्षित घलो करय। सबो धुन सिरिफ वाद्य संगीत उपर आधारित होना चाही।
मुख्यमंत्री-प्रतिनिधिमंडल मुलाकात
मुख्यमंत्री विष्णुदेव साय ले आज रईपुर म जापान ले आय प्रतिनिधि मंडल ह भेंट करीन। ए मउका म श्री साय ह प्रतिनिधि मंडल के संग राज्य म निवेस के ंसंभावना, औद्योगिक विकास अउ तकनीकी सहयोग के आने-आने बिसय उपर गोठबात करीन।
साइबर ठगी-आरोपी गिरफ्तार
रायगढ़ पुलिस ह करीबन सैंतीस लाख रूपिया के साइबर ठगी मामला म राजस्थान के भीलवाड़ा ले एक माईलोगिन समेत पांच झन आरोपी ल पकड़े हे। एमन ल ट्रांजिट रिमांड म रायगढ़ लाय गेहे। आप मन ल बतादन कि पाछू फरवरी महिना म ए आरोपी मन ह खुद ल सीबीआई अधिकारी बताके बिजली विभाग के एक सेवानिवृत्त अधिकारी ल डिजीटल अरेस्ट कर ले रिहीन अउ ओखर ले करीब सैंतीस लाख रूपिया ठग ले रिहीन।
रायगढ़ के एसएसपी शशि मोहन सिंह ह बतइन कि ए गिरोह ह अब्बड़ व्यवस्थित अउ सातिर तरीका ले काम करत रिहीस अउ आम लोगन ल कानून , मनी लांड्रिंग अउ गिरफ्तारी के भय देखाके ठगी करत रिहीन।
इही बीच, नवागढ़ पुलिस ह घलो साइबर ठगी करइया एक ठन अउ गिरोह के पर्दाफाश करीस हे। करीब बीस लाख रूपिया के ठगी के मामला म एचडीएफसी बैंक के एक कर्मचारी समेत चार आरोपी ल गिरफ्तार करे गेहे। एमन उपर आरोप हे कि फर्जी दस्तावेज ले म्यूल अकाउंट खोलवाय रिहीन।
जिले की चिट्ठी
आकाशवाणी रईपुर के प्रादेशिक समाचार एकांश कोति ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सबो आकाशवाणी केंद्र एके संग रिले करही। ए दारी के अंक म आपमन ‘‘धमतरी‘‘ जिला के गतिविधि के बारे म सुनिहा।
मौसम
मौसम विभाग ह प्रदेस म एक-दू जघा म काली गरज-चमक के संग हवा गर्रा चले अउ गाज गिरे के चेतावनी दे हे। उहें, मध्य छत्तीसगढ़ म लू चले के स्थिति बने रइही।
दूसर कोति, उपरी हवा के एक चक्रवात पूर्वी उत्तर प्रदेस अउ ओखर लकठा के क्षेत्र म बने हे। बंगाल के खाड़ी ले नमी वाला हवा घलो आवत हे। एखरे असर ले प्रदेस म काली एक-दू जघा म हल्का बरसा अउ गरज-चमक के संग छींटा पड़े के संभावना हे। बरसा के क्षेत्र मुख्यतः बस्तर संभाग रइही।
अग्निवीर भर्ती-प्रशिक्षण
भारतीय सेना म अग्निवीर भर्ती के लिखित परीक्षा के तियारी करत अभ्यर्थी मन बर रईपुर जिला म मुफ्त प्रसिक्षण के व्यवस्था करे गेहे। ए प्रसिक्षण जिला रोजगार और स्वरोजगार मार्गदर्शन केंद्र कोति ले प्रदान करे जाही। चार मई ले सुरू होके चार जून यानी एक महिना चलने वाला ए प्रसिक्षण बर, इच्छुक अभ्यर्थी मन रोजगार विभाग के आधिकारिक वेबसाइट उपर तीस अप्रैल तक अपन पंजीयन करवा सकत हे।