मुख्यमंत्री ए बात आज राष्ट्रीय पंचायती राज दिवस के मउका म राजधानी रईपुर म राखे गे पंचायत पदाधिकारी सम्मेलन ल संबोधित करत किहीन।
आंगनबाड़ी समय बदलाव
भयंकर गर्मी अउ लू के स्थिति ल देखत आंगनबाड़ी केंद्र मनके संचालन समय म बदलाव कर दे गेहे। अब आंगनबाड़ी केंद्र छै घंटा के बजाय चार घंटा चलही।
महिला अउ बाल विकास मंत्री लक्ष्मी राजवाड़े ह ए आशय के निरदेस दीन हे। आंगनबाड़ी म पढ़ईया छोटे लइका मन ल लू झन लगय, एला धियान म राखत अवइया तीस दिन तक आंगनबाड़ी केंद्र बिहनिया सात बजे ले ग्यारा बजे तक संचालित होही, लेकिन बिसेस रूप ले तेईस अप्रैल ले तीस जून तक लइका मनके उपस्थिति के बेरा केवल बिहनिया सात बजे ले नौ बजे तक निर्धारित करे गेहे। ए निर्धारित अवधि म लइका मन ल पहिली ले तय समय-सारिणी के अनुसार आने-आने गतिविधि मनके संग पूरक पोषण आहार के नियमित वितरण घलो सुनिश्चित करे जाही।
कृषि उत्पादन आयुक्त-बैठक
राज्य के कृषि उत्पादन आयुक्त शहला निगार ह किहीन हे कि फिलहाल प्रदेस म उर्वरक मनके कोई कमी नइ हे अउ पाछू बछर के तुलना म ए बार करीबन ढाई लाख मीट्रिक टन जादा उर्वरक उपलब्ध हे। ओमन ए घो बतइन कि डीएपी के विकल्प के रूप म एनपीके अउ एसएसपी उर्वरक मनके बेवस्था करे गेहे। एखर संगेसंग किसान मन ल हरा खाद, ब्लू-ग्रीन एल्गी अउ बायो फर्टिलाइजर के उपयोग बर प्रोत्साहित करे जात हे, जेखर ले खेती के लागत कम होय के संग मिट्टी के गुणवत्ता घलो सुघ्घर होही।
नगरीय प्रशासन विभाग-निर्देश
नगरीय प्रशासन विभाग ह बारिस के पहिली नगरीय निकाय म नाली मनके सफई अउ बाढ़ प्रभावित क्षेत्र बर जरूरी बेवस्था करे के निरदेस दीन हे। ए संबंध म विभाग ह जम्मो निकाय ल परिपत्र जारी कर दे हे। परिपत्र म कहे हे कि बरसा ऋतु म पानी निकासी बर नाली मनके समय ले पहिली सफई नइ होय के सेति बाढ़ के स्थिति बन जाथे।
मानवाधिकार आयोग-संज्ञान
राष्ट्रीय मानवाधिकार आयोग ह सक्ति जिला म स्थित वेदांता पावर प्लांट म बायलर ट्यूब विस्फोट के सेति होय श्रमिक मनके मउत अउ घायल मजदूर मनके मामला म मुख्य सचिव अउ पुलिस महानिदेशक ल नोटिस जारी करे हे। मीडिया रिपोर्ट के स्वतः संज्ञान लेवत आयोग ह दू हफ्ता के अंदर विस्तृत रिपोर्ट मांगे हे।
इही बीच, हादास म घायल होय एक अउ मजदूर के अस्पताल म इलाज के दउरान मउत होगे। अब मृतक मनके संख्या बाढ़के पच्चीस हो गेहे। घटना म घायल दस मजदूर मनके आने-आने अस्पताल म इलाज चलत हे।
राज्यपाल-हथकरघा उत्पाद
राज्यपाल रमेन डेका ह आज लोक भवन म छत्तीसगढ़ के पारंपरिक कोसा साड़ी, शॉल अउ गमछा के अवलोकन करीन अउ राज्य के हथकरघा उत्पाद ल राष्ट्रीय अउ अंतरराष्ट्रीय स्तर म नवा पहिचान दिलाय बर नवाचार, डिजाइन विकास अउ मूल्य संवर्धन उपर बिसेस जोर दीन। राज्यपाल ह सुझाव दीन कि छत्तीसगढ़ के प्रसिध्द कोसा साड़ी अउ शॉल म डॉबी अउ जैकार्ड तकनीक के उपयोग करके आधुनिक डिजाइन विकसित करे जाय। संघरा आने-आने आयु वर्ग के पसंद ल धियान म राखत उत्पाद ल आकर्षक अउ किफायती बनाय जाय। जेखर ले एखर मांग बाजार म बढ़ सकय। राज्यपाल ह किहीन कि एखर ले राज्य के बुनकर मन ल नवा पहिचान मिलही अउ ओखर आर्थिक स्थिति मजबूत होही।
बातों-बातों-में
प्रादेशिक समाचार एकांश आकाशवाणी रायपुर के समसामयिक बिसय उपर आधरित कारीकरम ‘‘बातों-बातों-में‘‘ ए बखत पश्चिम एशिया म चलत युध्द संकट अउ अंतर्राष्ट्रीय अस्थिरता के बीच प्रदेस म पेट्रोलियम पदार्थ के आपूर्ति निर्बाध रूप ले जारी रखे अउ जमाखोरी रोके बर करे जात प्रयास उपर केंद्रित रिही। एखर अंतर्गत इंडियन ऑयल कार्पोरेसन लिमिटेड के राज्य स्तरीय समन्वयक नितिन चौहान ले लेय गे भेंटवार्ता के प्रसारण करे जाही। एखर प्रसारण काली पच्चीस अप्रैल के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
जांजगीर-गोलीकांड
जांजगीर-चांपा जिला के बिर्रा थाना क्षेत्र स्थित करही गांव म देर रतिहा तीन झिन नकाबपोस अज्ञात बदमास मन एक घर म घुस के गोली चलाइन। ए घटना म एक मनखे के मउत होगे, जबकि एक झन दूसर मनखे घायल होय हे। दूनों झिन आपस म भाई बताय जात हे। घटना के बाद पुलिस ह कई जघा म नाकाबंदी करके अज्ञात आरोपी मनके तलास सुरू कर देहे।
इही बीच, घटना के विरोध म आज जनप्रतिनिधि अउ स्थानीय लोगन मन एंबुलेंस म रखाय शव के संग विरोध प्रदर्सन करके चक्काजाम सुरू कर दीस। ए विरोध प्रदर्सन म विधायक बालेश्वर साहू अउ व्यास कश्यप के अलावा कांग्रेस जिलाध्यक्ष राजेश अग्रवाल अउ मृतक के परिजन घलो सामिल होइन। पुलिस कोति ले उचित कारवाई के आस्वासन के बाद ए प्रदर्सन खतम करे गीस अउ शव के अंतिम संस्कार कर दे गेहे।
ट्रेन-परिचालन
गर्मी के छुट्टी के दउरान यात्री मनके सुविधा बर रेलवे ह वलसाड-खड़गपुर-वालसाड के बीच एक-एक फेरा बर स्पेशल ट्रेन चलाय के निर्णय लेहे। वलसाड-खड़गपुर स्पेसल ट्रेन वलसाड ले छब्बीस अप्रैल के चलही। उहें, खड़गपुर-वलसाड स्पेशल ट्रेन खड़गपुर ले अट्ठाईस अप्रैल के रवाना होही। ए ट्रेन के ठहराव दक्षिण पूर्व मध्य रेलवे के गोंदिया, दुरूग, रईपुर अउ बिलासपुर स्टेसन म दे गेहे।
अइसने, सीएसएमटी-खड़गपुर अउ पुणे-खड़गपुर के बीच घलो एक फेरा बर समर स्पेसल ट्रेन के परिचालन करे जात हे। दूनों ही ट्रेन आज रवाना होय हे अउ काली दक्षिण पूर्व मध्य रेलवे के ठहराव वाले गोंदिया, दुरूग, रईपुर अउ बिलासपुर स्टेसन ले होत खड़गपुर जाही।
उहें, रईपुर रेल मंडल म भिलाई ले भिलाई नगर रेल लाइन के बीच स्थित खुर्सीपार फाटक मरम्मत काम बर अवइया दू मई तक बंद रइही।
अउ अब पेस हे मौसम के हाल…
मौसम विभाग ह मध्य छत्तीसगढ़ के कुछेक जघा म अवइया दू दिन म लू चले के चेतावनी देहे। मौसम विभाग के अनुसार अवइया तीन दिन के दउरान राज्य के अधिकतम तामपान म दू ले तीन डिग्री सेल्सियस के बढ़ोत्तरी हो सकत हे। उहें, बीजापुर, दक्षिण बस्तर, दंतेवाड़ा, नारायणपुर, कोंडागांव अउ उत्तर बस्तर कांकेर जिला म मौसम के मिजाज बदले के संभावना जताय गेहे। इंहा गरज-चमक के संग बरसा होय, गाज गिरे अउ तीस ले चालीस किलोमीटर प्रति घंटा के रफ्तार ले तेज हवा चले के आसार हे।
दुरूग जिला के नंदिनी थाना क्षेत्र म पुलिस ह अवैध रूप ले संचालित जर्दा युक्त गुटखा बनाय के फैक्ट्री म छापामार कार्रवाई करे हे। इंहा ले बड़का मात्रा म गुटखा पैकिंग समाग्री अउ मसीनरी जब्ती करे गेहे।
पुलिस के अनुसार छापामारी के दउरान मउका म तेरह मजदूर काम करत मिलीन जउन मध्यप्रदेस, उत्तरप्रदेस अउ राजस्थान के रहइया हे। दुरूग पुलिस ह खाद्य सुरक्षा विभाग के अधिकारी मन संग संयुक्त कारवाई करिस अउ फैक्ट्री ल सील करे के प्रक्रिया सुरू कर देहे। दुरूग पुलिस ह स्पष्ट करे हे कि जिला म अवैध गतिविधि के खिलाफ अभियान सरलग जारी रइही अउ अइसे मामला ले जुड़े लोगन मनके खिलाफ कड़ा कारवाई करे जाही।