छत्तीसगढ़ विधानसभा के एक दिवसीय बिसेस सत्र तीस अप्रैल के नवा रईपुर अटल नगर के नवा विधानसभा भवन म कराय जाही। ए संबंध म छत्तीसगढ़ विधानसभा सचिव दिनेश शर्मा ह आदेश जारी कर देहे। ए बिसेस सत्र म महिला आरक्षण अउ परिसीमन ले जुड़े मुद्दा ल निपटाय के बारे म निंदा प्रस्ताव पारित करे जाही। ए छत्तीसगढ़ के छठवां विधानसभा के नौवा सत्र होही, जेमा एक ठन बइठका होही। आदेस म केहे गेहे कि सत्र के दउरान सरकारी कामकाज होही।
एखर पहिली, मुख्यमंत्री विष्णुदेव साय ह रईपुर म निकाले गे आक्रोश रैली म विधानसभा के विसेस सत्र बुलाय के बात केहे रिहीन।
पीएम-आशा योजना
केंद्र सरकार ह पीएम-आशा योजना म होवइया खरीदी ले जुड़े काम के विस्तार करे हे। एमा राष्ट्रीय सहकारी उपभोक्ता भारतीय संघ लिमिटेड-एनसीसीएफ अउ भारतीय राष्ट्रीय कृषि सहकारी विपणन संघ लिमिटेड-नेफैड के छत्तीसगढ़ म बड़े भूमिका हे। एनसीसीएफ ह पहिली घांव बिहार म मसूर के खरीद के पहल करे हे, जउन दलहन उत्पादन बर बड़े कदम हे।
शासकीय कर्मचारी-अवकाश निर्देश
सामान्य प्रशासन विभाग ह प्रदेस के शासकीय कर्मचारी मन बर निरदेस जारी करे हे कि सुशासन तिहार अउ जनगणना जइसन काम के बीच बिना स्वीकृति के कोनो भी शासकीय कर्मचारी छुट्टी नइ ले सकही। निरदेस म केहे गे हे कि पहिली ले स्वीकृति बिना कार्यालय ले गैर हाजिर रहना स्वैच्छिक अनुपस्थिति माने जाही अउ एला सेवा नियम के उल्लंघन माने जाही। सबो शासकीय सेवक ल आकस्मिक अवकाश के स्थिति म घलो फोन या डिजीटल माधयम ले सूचना देना पड़ही अउ लिखित पुष्टि कार्यालय आय के बाद करना पड़ही। एखर अलावा लंबा छुट्टी म जाय के पहिली संबंधित शासकीय सेवक ल अपन काम दूसर कर्मचारी ल देना होही।
गंगरेल बांध-पानी
भीषण गर्मी ले निपटे बर जल संसाधन विभाग ह धमतरी जिला के गंगरेल बांध के दू ठन गेट ल खोलके पांच हजार क्यूसेक ले जादा पानी छोड़े हे। ए पानी रूद्री बैराज के माध्यम ले महानदी मुख्य नहार अउ सहायक नहर ले गांव तक पहुंचत हे। एखर ले धमतरी संघरा बालोद, बलौदाबाजार अउ रईपुर म जल संकट म कमी आही। गंगरेल बांध म करीबन उनहत्तर प्रतिसत जल भराव हे, जउन ह गर्मी बर पर्याप्त माने जावत हे।
महानदी जल-बंटवारा
महानदी के जल बंटवारा बर छत्तीसगढ़ अउ ओडिसा के बीच चलत विवाद उपर पाछू बीस अप्रैल के ट्रिब्यूनल डहार ले सुनवाई करे गीस। ए सुनवाई उच्चतम न्यायालय के सेवानिवृत्त न्यायाधीश बेला त्रिवेदी के अध्यक्षता म बने ट्रिब्यूनल ह करीस। जेमा दूनों राज्य ल दस दिन के अंदर महानदी बेसिन म जल उपलब्धता के ताजा आंकड़ा देखाय के निरदेस दे गीस। ए मामला म अवइया सुनवाई दू मई के होही।
सीबीएसई-दसवीं परीक्षा
केंद्रीय माध्यमिक शिक्षा बोर्ड-सीबीएसई ह दसवीं के परीक्षा के दूसर चरण ल पंद्रह मई ले सुरू करही। ए परीक्षा वैकल्पिक हे, जउन विद्यार्थी मन ह पहिली चरण म मिले नंबर ल बढ़ाना चाहत हे, ओमन ह ए परीक्षा म बइठ सकत हे। सबो पास होय लइका मन विज्ञान, गणित, सामाजिक विज्ञान अउ भाषा ले कोनो तीन बिसय म अपन प्रदर्सन ल सुधारे बर ए परीक्षा दे सकत हे। ए सुरूआत राष्ट्रीय शिक्षा नीति के अनुसार होय हे, जेखर उद्देस्य एक शैक्षणिक सत्र म लइका मन ल दूसर मउका देके परीक्षा ले जुड़े तनाव ल कम करना हे।
व्यापमं-परीक्षा समय
बाढ़त गर्मी के बीच छत्तीसगढ़ व्यावसायिक परीक्षा मंडल-व्यापमं ह परीक्षा के समय म बदलाव करे हे। अभी तक परीक्षा बिहनिया ग्यारा बजे ले मंझनिया एक बजे तक होवत रिहीस, फेर अब नवा आदेस के अनुसार सबो परीक्षा बिहनिया दस बजे ले मंझनिया कुन सवा बारह बजे तक चलही। ए नवा समय छब्बीस अप्रैल ले लागू होही अउ अवइया आदेस तक प्रभावी रइही।
राज्यपाल-जांच शिविर
राज्यपाल रमेन डेका ह बलरामपुर जिला के धनेशपुर गांव म दिव्यांग लइका मन बर बिसेस जांच सिविर लगाय के निरदेस दीन हे। राज्यपाल ह समाज कल्याण विभाग अउ स्वास्थ्य विभाग ले किहीन हे कि ओमन ह ए गांव म सिविर लगाके दिव्यांग लइका मनके जरूरी जांच करय अउ संगेसंग दिव्यांगता के कारण के पता लगाय बर सर्वे अउ अध्ययन घलो कराय जाय। सिविर के दउरान लइका मन ल उंखर जरूरत के अनुसार उपकरण घलो दे जाही।
मुख्यमंत्री-सचिन तेंदुलकर
मुख्यमंत्री विष्णुदेव साय ह दंतेवाड़ा जिला के छिंदनार गांव म क्रिकेटर सचिन तेंदुलकर के आगमन ल बदलत बस्तर के सशक्त पहिचान बतइन हे। ओमन ह विस्वास जतइन कि अइसन पहल ले बस्तर के युवा मन ल नवा दिसा मिलही अउ ओमन ल अपन सपना ल साकार करे बर प्रेरित करही। मुख्यमंत्री ह किहीन कि सचिन तेंदुलकर फाउंडेसन अउ माणदेसी फाउंडेसन डहार ले चलत ‘‘मैदान कप अभियान‘‘ ह खेल के विकास के दिसा म एक ठन बड़े पहल हे। बिसेस करके जनजातीय अंचल म लइका मन ल खेल के मैदान अउ सुविधा देवाय बर ए प्रयास लइका मनके विकास म बड़े भूमिका निभाही
मॉल पार्किंग-शुल्क वसूली
जिला उपभोक्ता विवाद प्रतितोष आयोग रईपुर के अतिरिक्त पीठ ह आदेस देहे कि कोनो भी मॉल ह पार्किंग बर उपभोक्ता मनले पार्किंग सुल्क के मांग नइ कर सकय। आयोग ह केहे हे कि मॉल ल उपभोक्ता मन बर निसुल्क पार्किंग के व्यवस्था निश्चित करना होही।
अधिवक्ता अंजिनेश शुक्ला के शिकायत म जिला प्रतितोष आयोग ह ए फइसला सुनाय हे। आदेस म आयोग ह केहे हे कि मॉल म दुपहिया अउ चारपहिया गाड़ी ले अवइया लोगन बर मॉल म पार्किंग स्थल बनाय गेहे। एखर सेति मॉल ल कोनो भी प्रकार के पार्किंग सुल्क ले के अधिकार नइ हे। आयोग ह परिवादी ल मानसिक क्षति के रूप म पैंतालीस दिन के अंदर पचास हजार रूपिया के भुगतान करे के आदेस दे हवय। संगेसंग परिवादी ल सात प्रतिसत के दर ले वार्षिक ब्याज संघरा भुगतान करना होही।
विशेष कार्यक्रम
‘‘नक्सलवाद के अंत के बाद संभावनाए और चुनौतियां‘‘ बिसय म प्रादेशिक समाचार एकांश, आकाशवाणी रईपुर डहार ले बने विसेस कारीकरम के प्रसारण काली चौबीस अप्रैल के बिहनिया दस बजे ले करे जाही। तीस मिनट के ए कारीकरम के प्रसारण छत्तीसगढ़ के सबो आकाशवाणी केंद्र मन म एक्के संघरा होही।
दुर्घटना
मुंगेली जिला के फास्टरपुर थाना क्षेत्र के दाबो नवोदय विद्यालय तीर पाछू रतिहा होय सड़क हादसा म पति-पत्नी के मउत होगे। मिले जानकारी के अनुसार लगरा गांव के निवासी माता-पिता मन अपन बेटी के बिहाव बर जरूरी समान खरीद के मुंगेली ले लहुटत रिहीन, तभे दूसर डहार ले आवत चार पहिया गाड़ी ह उंखर मोटर साइकिल ल टक्कर मार दीस। हादसा म दूनों झन के मउकच म मउत होगे।
युविका कार्यक्रम
धमतरी जिला के दू झन विद्यार्थी- नेहा साहू अउ मयंक साहू के चयन भारतीय अंतरिक्ष अनुसंधान संगठन-इसरो के प्रतिष्ठित युवा वैज्ञानिक कारीकरम ‘‘युविका‘‘ बर होय हे। एमा मयंक अउ नेहा ल इसरो के आने-आने केंद्र म ट्रेनिंग ले के मउका मिलही, जिंहा ओमन ह रॉकेट तकनीक, उपग्रह के कार्य प्रणाली अउ अंतरिक्ष विज्ञान ले जुड़े काम ल समझही। मयंक साहू वर्तमान म लोहरसी के कें्रदीय विद्यालय म कक्षा दसवीं के छात्र हे। उहें, नेहा साहू कुरूद के पीएमश्री केंद्रीय विद्यालय म पढ़त हे।
खबर के मुताबिक युविका कारीकरम के उद्देस्य अंतरिक्ष तकनीक, विज्ञान अउ अनुप्रयोग बर युवा मन म रूची बढ़ाना हे। दू हफ्ता के ए आवासीय निसुल्क ग्रीष्मकालीन कारीकरम म ग्रामीण क्षेत्र के विद्यार्थी मन ल प्राथमिकता दे जाथे।
अउ अब थोरकुन समाचार सार म –
– केंद्र सरकार ह केंद्रीय कर्मचारी मन बर महंगाई भत्ता म बढ़ोत्तरी के आदेस जारी कर देहे। आदेस के मुताबिक महंगाई भत्ता के दर एक जनवरी, दू हजार छब्बीस ले मूल वेतन के अंठावन प्रतिसत ले बढ़ाके साठ प्रतिसत कर दे जाही।
– उत्तराखंड के चमोली जिला म स्थित भगवान बद्रीनाथ धाम के कपाट आज बिहनिया छै बजके पंद्रह मिनट म श्रध्दालू मन बर खोल दे गीस।
अउ
– अंबिकापुर म आज एक ठन फटाका गोदाम म आगी लग गीस। मउका म पहुंचे फायर ब्रिगेड के टीम ह आग म काबू पा ले हवय।