मुख्य सचिव विकासशील के अध्यक्षता म आज मंत्रालय म ‘‘ज्ञानभारतम‘ राष्ट्रीय पांडुलिपि सर्वेक्षण के प्रभावी क्रियान्वयन ल लेके उच्च स्तरीय बइठका आयोजित करे गीस। बइठका म मुख्य सचिव ह किहीन कि सासकीय संस्थान, मंदिर, मठ, पुस्तकालय, महाविद्यालय अउ निजी संस्थान मन म संरक्षित पांडुलिपि के सर्वेक्षण बर सक्रिय प्रयास करे जाय। ओमन सर्वेक्षण कार्य ल इकतीस मई तक हर हाल म पूरा करे के निरदेस दीन। मुख्य सचिव ह किहीन कि जिला म उपलब्ध पांडुलिपि के पहिचान, दस्तावेजीकरण, डिजिटलीकरण अउ संरक्षण ल प्राथमिकता दे जाय। बइठका म मुख्य सचिव ह जनभागीदार बढ़ाय बर ‘‘पांडुलिपि ट्रेजर हंट‘‘ जइसन नवाचार के आयोजन के सुझाव दीन, जेखर ले आम नागरिक घलो ए अभियान ले जुड़ सकय।
पहलगाम आतंकी हमला-बरसी
जम्मू-कश्मीर के पहलगाम म होय आतंकी हमला के आज पहला बरसा हे। पाछु साल इही दिन पहलगाम म आतंकवादी मन छब्बीस निर्दोष लोगन मनके हत्या कर दे रिहीन। एमा ज्यादातर मनखे पर्यटक रिहीन। दुनियाभर के सरकार अउ नेता मन ए हमला के कड़ा निंदा करे रिहीन। पहलगाम आतंकी हमला के जवाब म भारतीय सशस्त्र बल ह पाछु साल छह अउ सात मई के रात के ऑपरेशन सिंदूर सुरू करीन। ऑपरेशन सिंदूर ल सुरता करत भारतीय सेना ह सोशल मीडिया म एक संदेस साझा करे हे, जेमा ओमन आतंकवादी मन ल कड़ा चेतावनी देवत केहे हे कि जब मानवता के सीमा पार होथे तब जवाब निर्णायक होथे।
राष्ट्रपति द्रौपदी मुर्मु, उपराष्ट्रपति सीपी राधाकृष्णन अउ प्रधानमंत्री नरेन्द्र मोदी ह पहलगाम आतंकी हमला के पहला बरसी म पीड़ित मन ल श्रद्धांजलि अर्पित करीन हे।
प्रधानमंत्री ह किहीन कि देस आतंकवाद के कोनों भी रूप के आगू कभू नइ झुकही अउ आतंकवादी मन के घटिया इरादा कभू सफल नइ होही। पाछु साल इही दिन होय आतंकी हमला म जान गंवइया निर्दोष लोगन मन ल सुरता करत श्री मोदी ह किहीन कि पहलगाम आतंकी हमला के पीड़ित मन ल कभू भुलाय नइ जा सकही।
केदारनाथ धाम
उत्तराखंड के रूद्रप्रयाग जिला म स्थित केदारनाथ धाम के कपाट आज बिहनिया आठ बजे ले वैदिक मंत्रोच्चार अउ विधिविधान के संग श्रद्धालु मनके दर्सन बर खोल दे गेहे।
प्रधानमंत्री नरेन्द्र मोदी ह उत्तराखंड अवइया तीर्थयात्री मन ले अपील करीन हे कि ओमन पांच संकल्प के पालन करयं। एमा स्वच्छता बनाय रखना, पर्यावरण संरक्षण, सेवा अउ सहयोग के भावना ल मजबूत करना, स्थानीय उत्पाद ल बढ़ावा देना अउ यात्रा दिसा-निरदेस के अनुपालन करना सामिल हे।
उहें, बद्रीनाथ धाम के कपाट काली बिहनिया श्रद्धालु मन बर खोले जाही। जबकि गंगोत्री अउ यमुनोत्री धाम के कपाट उन्नीस अप्रैल ले खुल चुके हे।
सचिन तेंदुलकर-दंतेवाड़ा
पूर्व भारतीय क्रिकेटर सचिन तेंदुलकर आज एक दिन के छत्तीसगढ़ प्रवास म दंतेवाड़ा जिला के छिंदनार गांव पहुंचीन। ए दउरान ओमन छिंदनार म खेल मैदान के उद्घाटन करीन अउ लइका मन ले भेंट करके ओमन ले गोठबात करीन। श्री तेंदुलकर ह किहीन कि ‘मैदान कप‘ प्रतियोगिता के जरिया हजारों लइका मन ल अपन प्रतिभा दिखाए के मउका मिलही। ओमन बतईन कि पांच हजार ले जादा लइका मन ल ए प्रतियोगिता ले फायदा मिलही। श्री तेंदुलकर ह किहीन कि कबड्डी, खो-खो, एथलेटिक्स अउ वॉलीबॉल जइसे खेल के जरिया ले बस्तर के युवा मन ल नवा पहिचान मिलही।
राज्यपाल-मुलाकात
राज्यपाल रमेन डेका ले आज लोकभवन म नो प्लास्टिक अभियान के ब्रांड एंबेसडर शुभांगी आप्टे ह भेंट करीन। ए दउरान ओमन रईपुर नगर निगम क्षेत्र ल प्लास्टिक मुक्त बनाय बर चलाय जात अभियान अउ जन-जागरूकता गतिविधि के जानकारी दीन। श्रीमती आप्टे ह बतईन कि अब तक ओमन स्कूल, बैंक, बाजार अउ दूसर सार्वजनिक जघा मन म पचपन हजार ले जादा कपड़ा के थैली बांट चुके हे।
राज्यपाल ह उंखर सामाजिक अउ पर्यावरण संरक्षण संबंधी काम के सराहना करत एला समाज बर प्रेरणादायी बतईन।
व्यापमं-उप निरीक्षक परीक्षा
छत्तीसगढ़ व्यावसायिक परीक्षा मंडल डहार ले छत्तीसगढ़ राज्य कृषि विपणन बोर्ड के अंतर्गत उप निरीक्षक भर्ती परीक्षा के आयोजन छब्बीस अप्रैल के करे जाही। ए परीक्षा रायपुर जिला के एक सौ चार परीक्षा केन्द्र म बिहनिया दस बजे ले मंझनिया सवा बारह बजे तक आयोजित होही। अभ्यर्थी मन ल परीक्षा केन्द्र म प्रवेस बिहनिया साढ़े नौ बजे तक ही दे जाही।
अग्निवीर भर्ती-प्रशिक्षण
भारतीय सेना म अग्निवीर भर्ती के लिखित परीक्षा के तियारी करत अभ्यर्थी मन बर रईपुर जिला म निःशुल्क प्रशिक्षण के व्यवस्था करे गेहे। ए प्रसिक्षण जिला रोजगार अउ स्वरोजगार मार्गदर्शन केन्द्र, रायपुर डहार ले दे जाही। लिखित परीक्षा के तियारी बर विषय विशेषज्ञ मन कोति ले निःशुल्क कोचिंग दे जाही। ए प्रसिक्षण चार मई ले सुरू होके चार जून तक संचालित करे जाही। इच्छुक अभ्यर्थी रोजगार विभाग के आधिकारिक वेब पोर्टल ‘‘ई-रोजगार डॉट सीजी डॉट जीओवी डॉट इन‘‘ उपर तीस अप्रैल तक अपन पंजीयन करा सकत हे।
ट्रेन-परिचालन
दक्षिण पूर्व मध्य रेलवे के बिलासपुर मंडल के अंतर्गत जांजगीर-नैला स्टेशन म चौथा लाइन कनेक्टिविटी बर करे जात नॉन-इंटरलॉकिंग काम के सेती आज ले सत्ताईस अप्रैल तक पहिली निरस्त करे गे कुछेक गाड़ी मन ल फेर बहाल कर दे गेहे। एमा रायगढ़-बिलासपुर-रायगढ़ मेमू, रायपुर-गेवरारोड-रायपुर मेमू, रायपुर-कोरबा-रायपुर पैसेंजर, बिलासपुर-गेवरारोड-बिलासपुर मेमू के संघरा बिलासपुर-कोरबा-बिलासपुर मेमू सामिल हे। एखर अलावा गोंदिया-झारसुगुड़ा-गोंदिया मेमू घलो तेईस ले सत्ताईस अप्रैल के बीच अपन निर्धारित समय म गोंदिया ले झारसुगुड़ा तक चलही। उहें, कोरबा-रायपुर-कोरबा हसदेव एक्सप्रेस, इही तारीख म एक्सप्रेस बनके चलही।
किरंदुल विशाखापट्नम-पैसेंजर
दंतेवाड़ा म रेललाइन दोहरीकरण काम के चलत किरंदुल-विशाखापट्टनम पैसेंजर ट्रेन काली तेईस अप्रैल ले चौदह मई तक एक दिन के आड़ म चलाय जाही। ए दउरान तेईस, पच्चीस, सत्ताईस अउ उनतीस अप्रैल के दंतेवाड़ा-किरंदुल के बीच पैसेंजर ट्रेन के सुविधा प्रभावित रइही। फेर, नाइट एक्सप्रेस के संचालन सामान्य रइही अउ ए ह नियमित रूप ले चलही। लगभग बयालीस किलोमीटर म दोहरीकरण के काम चालू हे, जेमा ले अधिकांश काम पूरा को चुके हे।
वाहन-पत्थरबाजी
रायपुर-बिलासपुर रद्दा म झाल गांव के तीर सोमवार के रतिहा कुछ अज्ञात मनखे डहार ले चलत गाड़ी म पथराबाजी करे गीस। ए घटना म एक वाहन चालक के मउत होगे। जबकि चार दूसर मनखे गंभीर रूप ले घायल होगे हे। जानकारी के अनुसार आरोपी मन मेटाडोर, ट्रक अउ स्कॉर्पियो गाड़ी मन उपर पथरा फेंके रिहीन। सूचना मिलतेच बिल्हा पुलिस मउका म पहुंचीस अउ जांच के बाद आरोपी मनके खिलाफ हत्या के मामला दरज कर लेहे।
सोनमणि बोरा-बैठक
आदिम जाति, अनुसूचित जाति विकास, पिछड़ा वर्ग अउ अल्पसंख्यक विकास विभाग के प्रमुख सचिव सोनमणी बोरा ह स्वीकृत कार्य ल तय समय सीमा अउ गुणवत्ता के संग पूरा करे के निरदेस दीन हे। श्री बोरा ह काली रईपुर म वीडियो कॉन्फ्रेंसिंग के माध्यम ले जिला के सहायक आयुक्त, आदिवासी विकास अउ परियोजना प्रशासन मनके बइठका लीन। ओमन मई के पहिली हफ्ता तक निर्माण काम पूरा करे बर किहीन।
मौसम
मौसम विभाग ह चौबीस ले छब्बीस अप्रैल के बीच मध्य छत्तीसगढ़ म लू चले के चेतावनी देहे। मौसम विभाग के अनुसार मराठवाड़ा ले कोमोरिन क्षेत्र तक एक द्रोणिका बने हुए हे। उहें, महाराष्ट्र अउ ओखर ले लगे तेलंगाना अउ कर्नाटक के उपर एक चक्रवात फैले हे। एखर असर ले प्रदेस के अधिकतम तापमान म बढ़ोतरी दरज करे जात हे।
संक्षिप्त समाचार
– केन्द्र सरकार ह प्रधानमंत्री इंटर्नशिप योजना के पात्रता मानदंड के विस्तार करत एमा स्नातक अउ स्नातकोत्तर के आखिरी साल के छात्र मन ल घलो सामिल करे हे। एखर अंतर्गत अट्ठारह ले पच्चीस साल के आयु के आखिरी साल के छात्र घलो अब पीएम आई.एस. पोर्टल के माध्यम ले शीर्ष कंपनी म सशुल्क इंटर्नशिप बर आवेदन कर सकत हे।
– रायपुर सहर म रिंग रोड नंबर-एक अउ दू ले सहर के उन्नीस ठिन प्रवेस मार्ग म मध्यम अउ भारी मालवाहक गाड़ी मनके प्रवेस म तीस अप्रैल तक प्रतिबंध लगाय गेहे, जउन बिहनिया पांच बजे तक रतिहा बारह बजे तक प्रभावी रिही।
अउ
– मुंगेली पुलिस ह दू गांजा तस्कर ल गिरफ्तार करके ओमन करा ले करीबन बाईस किलो गांजा, एक स्कूटी अउ दू ठिन मोबाइल फोन जब्ती करे हे।