मुख्यमंत्री विष्णुदेव साय ह कहिन हे कि सरकार ह जल्दीच विधानसभा के एक दिन के सत्र बुलाही। एमा नारी शक्ति वंदन अधिनियम ल पारित नइ होवन दे खिलाफ निंदा प्रस्ताव लाय जाही अउ ओला पारित करके विपक्ष के ए रवैया के खिलाफ सशक्त अउ स्पष्ट संदेस दे जाही। रायपुर म काली राखे गे जन आक्रोश रैली ल संबोधित करत श्री साय ह कहिन कि ए विषय माईलोगिन मनके सम्मान अउ अधिकार ले जुड़े हवय।
उहें, केन्द्रीय राज्यमंत्री तोखन साहू ह नारी शक्ति वंदन अधिनियम के समर्थन म माईलोगिन मनके अधिकार अउ सशक्तिकरण उपर जोर दीन।
जन आक्रोश रैली ल संबोधित करत भाजपा प्रदेश अध्यक्ष किरण सिंह देव, भाजपा के राष्ट्रीय उपाध्यक्ष सरोज पांडेय अउ राष्ट्रीय उपाध्यक्ष लता उसेंडी के संगेसंग उपमुख्यमंत्री अरूण साव अउ मंत्री लक्ष्मी राजवाड़े ह घलो माईलोगिन मनके अधिकार के समर्थन म अपन विचार राखीन।
केन्द्र-दूध/एलपीजी आपूर्ति
केन्द्र सरकार ह कहिन हे कि पश्चिम एशिया म संघर्ष के बावजूद भारत म दूध के खरीदी, प्रसंस्करण अउ आपूर्ति निर्बाध रूप ले जारी हवय। पशुपालन अउ डेयरी विभाग के निदेशक पूजा रस्तोगी ह कहिन कि दूध अउ उंखर उत्पाद के कीमत स्थिर हवय अउ बाजार म कोनो व्यवधान नइ आय हे।
उहें, सरकार ह केहे हे कि देशभर म घरेलू एलपीजी आपूर्ति घलो सामान्य हे अउ कोनों एलपीजी वितरक के इहां आपूर्ति म कमी के कोनों रिपोर्ट नइ मिले हे।
एफ.एस.एस.ए.आई.-प्रतिबंध
भारतीय खाद्य सुरक्षा अउ मानक प्राधिकरण-एफ.एस.एस.ए.आई. ह खाद्य पदार्थ म अश्वगंधा के पत्ती के प्रयोग उपर अब प्रतिबंध लगा देहे। प्राधिकरण ह खाद्य कारोबार संचालक मन ल निरदेस देहे कि ओमन निर्धारित मानक के अनुरूप अपन उत्पाद म सिरिफ अश्वगंधा के जड़ अउ ओखर अर्क ल ही इस्तेमाल करयं। प्राधिकरण ह जम्मों राज्य अउ केन्द्रसासित प्रदेस के खाद्य अउ सुरक्षा आयुक्त मन ल कड़ा निगरानी रखे अउ नियम के पालन नइ करे के स्थिति म उचित कार्रवाई करे के निरदेस घलो देहे।
रेलवे-दिव्यांजन यूआईडी
भारतीय रेलवे ह स्पष्ट करे हे कि दिव्यांगजन अब वैध यूनिक डिसेबिलिटी आईडी-यू.आई.डी. कार्ड रखे म मेल अउ एक्सप्रेस ट्रेन के अनारक्षित दिव्यांगजन डब्बा म यात्रा कर सकत हे। रेल मंत्रालय ह केहे हे कि दिव्यांगजन सशक्तिकरण विभाग डहार ले जारी वैध यूआईडी कार्ड रखइया या रियायती किराया के पात्र दिव्यांजगन ए निर्धारित डिब्बा म यात्रा कर सकत हे।
ग्रीष्मकालीन विशेष रेलगाड़ियां
रेलवे ह अवइया तीन महीना म देसभर म कुल नौ सौ आठ ग्रीष्मकालीन विशेष रेलगाड़ी चलाही। पन्द्रह अप्रैल ले पन्द्रह जुलाई के दउरान ए रेलागाड़ी अट्ठारह हजार दू सौ बासठ फेरा लगाही।
इही बीच, दक्षिण पूर्व मध्य रेलवे ह ग्रीष्मकाल म यात्री मनके भीड़ ल देखत हुजूर साहेब नांदेड-आसनसोल-हुजूर साहेब नांदेड के बीच एक-एक फेरा बर स्पेशल ट्रेन चलाय के फइसला लेहे। गाड़ी संख्या सून्य सात सात शून्य एक नांदेड ले आज इक्कीस अप्रैल के अउ सून्य सात सात सून्य दू आसनसोल ले तेईस अप्रैल के चलही। ए ट्रेन के ठहराव गोंदिया, दुरूग, रायपुर अउ बिलासपुर समेत कई ठिन स्टेसन म रइही।
अरूण साव-समीक्षा
उपमुख्यमंत्री अउ नगरीय प्रशासन मंत्री अरूण साव ह काली रायपुर म नगर निगम अउ नगर पालिका के काम के समीक्षा करीन। ओमन पीये के पानी के आपूर्ति, अवैध प्लॉटिंग अउ अवैध निर्माण म नाराजगी जतावत ए बछर म स्थायी समाधान करे बर कहिन। श्री साव ह धमतरी के पेयजल योजना म देरी होय म कार्यपालन अभियंता ल निलंबित करे अउ ठेकेदार उपर पेनाल्टी लगाय के निरदेस दीन।
उपमुख्यमंत्री ह इकतीस मई तक नाला-नाली अउ ड्रेनेज के सफाई पूरा करे अउ बरसात म जलभराव रोके के उपाय करे बर घलो कहिन। बइठका म प्रधानमंत्री आवास योजना के तहत अधूरा आवास मन ल सितंबर तक पूरा करे अउ योजना के समय-सीमा म क्रियान्वयन सुनिश्चित करे के निरदेस दीन।
जनगणना
छत्तीसगढ़ म जनगणना-दू हजार सत्ताईस के तहत डिजिटल स्व-गणना के प्रक्रिया जारी हवय। ताजा आंकड़ा के मुताबिक अब तक राज्य म साढ़े तेईस हजार ले जादा मनखे मन ह स्व-गणना पूरा कर लेहे। उहें, बत्तीस हजार ले जादा नागरिक मन ह स्व-गणना पोर्टल म अपन पंजीकरण कर लेहे। स्व-गणना के काम तीस अप्रैल तक चलही।
स्व-गणना के बाद एक ले तीस मई तक मकान गणना अउ सूचीकरण के काम करे जाही। नागरिक मनके मदद बर ट्रोल फ्री हेल्पलाइन नंबर – एक आठ पांच पांच घलो दे गेहे।
मुख्यमंत्री स्वास्थ्य बस्तर अभियान
मुख्यमंत्री स्वास्थ्य बस्तर अभियान के तहत स्वास्थ्य विभाग के टीम ह बस्तर संभाग के दूरस्थ अउ दुर्गम क्षेत्र म स्थित गांव म जाके अब तक करीबन चार लाख बीस हजार ले जादा लोगन मनके स्वास्थ्य परीक्षण पूरा कर लेहे। अभियान म मरीज मनके निःशुल्क जांच करे के संगेसंग ओमन ल दवई अउ इलाज के सुविधा दे जावत हे। एखरे संग चार हजार ले जादा गंभीर मरीज मन ल सुघ्घर इलाज बर उच्च स्वास्थ्य संस्थान म भेजे गेहे। योजना के तहत हरेक नागरिक मनके डिजिटल स्वास्थ्य प्रोफाइल-आभा तैयार करे जावत हे।
महासमुंद-चांदी जब्त
महासमुंद जिला के सिंघोड़ा पुलिस ह अंतर्राज्यीय सीमा म अवैध रूप ले लेगत अट्ठारह किलो ले जादा चांदी के जेवर बरामद करे म सफलता पाय हे। एखर कीमत करीबन सैंतालीस लाख रूपिया बताय गेहे। पुलिस के मुताबिक रेहटीखोली नाका म तलाशी के दउरान ओडिशा कोति ले आवत निजी ट्रेवल्स के बस ले जांच के दउरान ए चांदी बरामद होइस। एक युवक ह अपन बैग म छह सौ नग चांदी के पायल लेके जावत रिहीस। फेर, ओ ह वैध दस्तावेज नइ दिखा पईस। पुलिस ह ए मामला के जांच सुरू कर देहे अउ आयकर विभाग ल एखर जानकारी दे गेहे।
मौसम
प्रदेस के ज्यादातर इलाका ह ए दिन भीषण गर्मी के चपेट म हवय। पाछु चौबीस घंटा के दउरान बिलासपुर म सबले जादा करीबन चवालीस डिग्री सेल्सियस तापमान दर्ज करे गीस। जबकि, राज्य के दक्षिणी इलाका म तापमान कमती हवय अउ कुछेक जघा म हल्का ले मध्यम बरसा होय हे।
मौसम विभाग के मुताबिक अवइया दिन म अधिकतम तापमान म अउ बढ़ोत्तरी हो सकत हे। मध्य छत्तीसगढ़ म एक-दू स्थान म लू चले के आशंका हवय।
मौसम विभाग के चेतावनी ल देखत एखर बचाव बर रायपुर जिला प्रशासन ह व्यापक तैयारी सुरू कर देहे। जिला कलेक्टर डॉक्टर गौरव सिंह ह लोगन मन ले सावधानी बरते अउ जरूरतेच होय म बाहिर निकले के अपील करे हे। सहर के सार्वजनिक जघा म शीतल जल केन्द्र अउ कूलिंग सेल्टर बनाय जावत हे। स्वास्थ्य केन्द्र म हीट स्ट्रोक ले निपटे के व्यवस्था करे गेहे। उहें, गर्भवती माईलोगिन अउ लइका मनके विशेष निगरानी करे के निरदेस दे गेहे।
अइसने, भीषण गर्मी ल देखत बेमेतरा जिला कलेक्टर प्रतिष्ठा ममगाई ह अधिकारी मन ल जिला के जम्मों ग्रामीण अउ सहरी क्षेत्र म नियमित स्वच्छ अउ पर्याप्त पेयजल के आपूर्ति सुनिश्चित करे के निरेदेस देहे। लोक स्वास्थ्य यांत्रिकी विभाग के समीक्षा बइठका म कलेक्टर ह कहिन कि गर्मी के मौसम म हर घर तक पानी पहुंचना चाही अउ एमा कोनां भी प्रकार के लापरवाही बर्दास्त नइ करे जाही।
संक्षिप्त समाचार
– केन्द्र सरकार ह किसान मनके फायदा अउ घरेलू बाजार के स्थिरता बर उपरहा पच्चीस लाख मीटरिक टन गेहूं के निर्यात ल अपन मंजूरी दे देहे। ए फइसला उत्पादन अनुमान, स्टॉक के उपलब्धता अउ मूल्य रूझान के समीक्षा के बाद ले गेहे।
– राष्ट्रीय परीक्षा एजेंसी-एनटीए ह जेईई मेन्स सत्र-दू के रिजल्ट जारी कर देहे। ए परीक्षा म कुल दू लाख पचास हजार एक सौ बयासी अभ्यर्थी जेईई एडवांस्ड बर योग्य घोषित होय हे।
अउ
– बलरामपुर जिला के वाड्रफनगर म अजगरा नाला के तीर एक ठिन गाड़ी अनते-तनते होके पेड़ ले टकरा गीस। ए हादसा म गाड़ी म बइठे एक झिन मनखे के मउत होगे। उहें, दू झिन मनखे के हालत गंभीर बताय जावत हे।