प्रधानमंत्री-संबोधन
प्रधानमंत्री नरेंद्र मोदी ह किहीन हे कि कांग्रेस अउ ओखर गठबंधन सहयोगी मन महिला आरक्षण के विरोध करके जउन पाप करे हे ओखर दंड ओमन ल जरूर मिलही। विपक्ष ह संसद अउ राज्य विधानसभा मन म नारी शक्ति वंदन संसोधन विधेयक के विरोध करत ओला पास नइ होन दीन। काली संझा राष्ट्र के नाव अपन संबोधन म प्रधानमंत्री ह किहीन कि उंखर सरकार ह माईलोगिन आरक्षण के रद्दा म अवइया हरेक बाधा ल दूरिहा करही, जउन दल ह महिला आरक्षण के विरोध करत हे। ओमन देस के माईलोगिन मनके संसद अउ राज्य विधानसभा मन म बाढ़त भागीदारी ल नइ रोक सकही, काबर की देस के जम्मो नारी शक्ति के आर्सिवाद उंखर सरकार के संग हे।
नारी शक्ति वंदन-मुख्यमंत्री
मुख्यमंत्री विष्णुदेव साय ह किहीन हे कि नारी शक्ति वंदन अधिनियम ले जुड़े संविधान संसोधन विधेयक ह लोकसभा अउ विधानसभा मन म माईलोगिन मन बर तैंतीस प्रतिसत आरक्षण के रद्दा देने वाला रिहीस, फेर परिवारवाद राजनीति अउ वोट बैंक ल साधे बर कांग्रेस ह देस के सत्तर करोड़ माईलोगिन मन संग विस्वासघात करे हे। श्री साय ह आज रईपुर म राखे गे एक ठिन पत्रकारवार्ता म बोलत किहीन कि देस के आधा आबादी ल अगुवई के अधिकार ले वंचित करे के उद्देस्य ले महिला आरक्षण के रद्दा म विघन डाले के जउन महापाप कांग्रेस अउ ईडी गठबंधन ह करे हे। ओखर नतीजा ओमन ल जरूर भुगते ल पड़ही। ओमन यहू किहीन कि छत्तीसगढ़ समेत देसभर के नारी शक्ति ह अवइया बेरा म कांग्रेस ल करारा जवाब दे हे।
शिवराज सिंह चौहान-बैठक
केंद्रीय ग्रामीण विकास मंत्री शिवराज सिंह चौहान ह राज्य अउ केंद्रशासित प्रदेस के ग्रामीण विकास मंत्री मन संग वर्चुअल बइठका के पगरईती करीन। बइठका म विकसित भारत-रोजगार अउ आजीविका मिशन-ग्रामीण ल लागू करे बर राज्य मन के तियारी के समीक्षा करे गीस। श्री चौहान ह राज्य मन ल निरदेस देहे कि ग्राम पंचायत स्तर म परयाप्त काम उपलब्ध कराय जाय, जेखर ले कोनो भी मजदूर मन ल कामबूता खातिर अगोरना झन पड़य। ओमन यहू किहीन कि मजदूर मन ल बेरा म काम देवाना अउ बेरा म मजदूरी के भुगतान तय करना सरकार के मुख्य प्राथमिकता हे।
लक्ष्मी सखी मिलेट्स कार्ट
महिला अउ बाल विकास मंत्री लक्ष्मी राजवाड़े ह आज रईपुर म राखे गे कारीकरम म कई ठिन स्व-सहायता समूह के माईलोगिन मन ल ‘‘लक्ष्मी सखी मिलेट्स कार्ट‘‘ बांटिन। ए मउका म श्रीमती राजवाड़े ह किहीन कि महिला सशक्तिकरण ह राज्य के चौतरफा विकास के आधार हरय। ओमन किहीन कि जब माईलोगिन मन मजबूत होथे, त परिवार, समाज अउ जम्मो राज्य मजबूत होथे।
महिला अउ बाल विकास मंत्री ह बतइन कि मिलेट्स कार्ट अभियान ह माईलोगिन मन बर स्व-रोजगार याने खुदे के काम खातिर सशक्त माध्यम बन गेहे। राज्य सरकार के लक्ष्य जादा ले जादा माईलोगिन मन ल लखपति दीदी बनाना हे। जेखर ले उंखर आर्थिक मजबूती तय हो सकय। ओमन यहू बतइन कि राज्य सरकार डहार ले चलत महिला कोष योजना अउ सक्षम योजना ह ए सोज बड़का काम करत हे।
जनगणना
छत्तीसगढ़ म जनगणना-दू हजार सत्ताईस के तहत डिजीटल स्व-गणना के प्रक्रिया जारी हे। अब तक ले राज्य म करीबन चौदह हजार नागरिक मन स्व-गणना पूरा कर लेहे। स्व-गणना के चलत नागरिक मन ल पोर्टल म अपन मोबाइल नंबर दर्ज करके ओटीपी के माध्यम ले प्रमाणीकरण करना होथे। एखर बाद परिवार के मुख्या डहार ले संबंधित जानकारी दर्ज करे जाथे।
स्व-गणना बाद एक ले तीस मई तक घर-दुवार के गनती अउ लिस्टिंग के काम करे जाही।
समीक्षा बैठक
उपमुख्यमंत्री अरूण साव काली ले रईपुर म दू दिन तक बइठका करके राज्य के सबो नगरीय निकाय मनके कामकाज के समीक्षा करही। ए दउरान ओमन नगरीय निकाय मन म विकास काम के प्रगति अउ योजना मनके क्रियान्वयन के बारे म जानकारी लेइही। नगरीय प्रशासन विभाग ह सबो नगर निगम आयुक्त अउ मुख्य नगर पालिका अधिकारी मन ल अपन बड़का अधिकारी मन संग बइठका म रेहे के निरदेस देहे।
प्लांट हादसा
सक्ति जिला के सिंघीतराई स्थित वेदांता पावर लिमिटेड म पाछू दिन होय हादसा म मृतक मजदूर मनके संख्या बाढ़ के चौबीस हो गेहे। उहें, हादसा म घायल बारह झिन आने मनखे के इलाज अलग-अलग अस्पताल म चलत हे।
अक्षय तृतीया/परशुराम जयंती
प्रदेस म अक्षय तृतीया याने अक्ति तिहार के परब ल आज उछाह अउ हांसी-खुसी के संग मनाय जात हे। नान्हे लइका मन िंजंहा पुतरा-पुतरी के बिहाव करत हे। उहें, मनखे मन मंदिर देवाला म करसा अउ आने जिनिस दान करके पूजा-पाठ करत हे। ए परब ल बैसाख महिना के उजियारी पाक के तृतीया तिथि के दिन मनाय जाथे।
उहें, भगवान परशुराम के जयंती घलो श्रध्दा अउ उछाह के संग मनाय जात हे। राजधानी रईपुर म समग्र ब्राम्हण परिषद छत्तीसगढ़ डहार ले महामाया देवी मंदिर परिसर म भगवान परशुराम के जन्मोत्सव मनाय गीस। ए मउका म श्रध्दालु मन भगवान परशुराम के जीवन आदर्स सत्य धरम अउ न्याय ल अपनाय के संकल्प लीन।
ओति, अक्ष्य तृतीया के मउका म यमुनोत्री अउ गंगोत्री धाम के कपाट खुले के संगे आज उत्तराखंड म वार्षिक चार धाम यात्रा सुरू हो गेहे। गंगोत्री मंदिर भीतर देवी गंगा के मूर्ति अउ यमुनोत्री मंदिर परिसर म यमुना के मूर्ति पूरा रीति-रिवाज संग स्थापित करे गीस।
उहें, केदारनाथ धाम के कपाट बाईस अप्रैल अउ बद्रीनाथ धाम के कपाट ह तेईस अप्रैल के खुलही।
मौसम
मौसम विभाग ह काली प्रदेस के एक-दू जघा म गरजई-चमकई के संगे तेज आंधी अउ गाज गिरे के चेतावनी दे हे। मौसम विभाग के मुताबिक पूर्वी उत्तर प्रदेस ले झारखंड तक एक ठिन द्रोणिका बने हे, इही पाय के छत्तीसगढ़ के बस्तर संभाग समेत धमतरी, बालोद, राजनांदगांव अउ गरियाबंद जिला के कोनो-कोनो जघा म थोरबहुत पानी गिर सकत हे। जेखर ले लू असन हालात म राहत मिल सकत हे।
संक्षिप्त समाचार
– अग्निवीर भर्ती के लिखित परीक्षा के तियारी करत जवान लइका मन जिला रोजगार अउ स्व-रोजगार मार्गदर्सन केंद्र रईपुर डहार ले अवइया चार मई ले चार जून तक निसुल्क कोचिंग के सहुलियत दे जाही। एखर बर तीस अप्रैल तक ऑनलाइन पंजीयन करे जा सकत हे।
– बलौदाबाजार भाटापारा जिला के चौकी गिरौदपुरी पुलिस ह रेलवे म नौकरी लगाय के नाम ले करीबन पांच लाख रूपिया के धोखाधड़ी मामला म दू झिन आरोपी ल पकड़े हे।
– बलरामपुर जिला म राजपुर थाना क्षेत्र के पुलिस चौकी बरियो म भुंईया बांटा ल लेके होय विवाद म एक झिन माईलोगिन के मउत होगे।
– कोरिया जिला के देवखोल क्षेत्र म कोयला के गैर कानूनी ढंग ले खनई के मामला म खनिज वन पुलिस अउ राजस्व विभाग के संघरा टीम ह अभियान चलाके करीबन छै टन ले जादा कोयला जब्ती करे हे।
अउ
– रईपुर, दुरूग नेशनल हाईवे म खारून नदिया पूल म काली एक ठिन रोड एक्सीडेंट म फटफटी सवार जवान लइका के मउत होगे।