लोकसभा विधेयक
लोकसभा म काली एक सौ इकतीसवां संशोधन विधेयक पारित नइ हो सकिस। ए विधेयक म लोकसभा अउ विधानसभा म महिला मन बर एक तिहाई सीट आरक्षित राखे के प्रावधान रिहीस। लोकसभा म उपस्थित कुल पांच सौ अठासी सदस्य मन म दू सौ अंठानवे सांसद मन ह एखर पक्ष म अउ दू सौ तीस ह एखर विरोध म मतदान करीन, जउन ह दू तिहाई बहुमत ले कम रिहीस।
ए विधेयक के पारित नइ होय ले भारतीय जनता पार्टी के नेता मन ह विपक्ष के तीखा आलोचना करे हे। केंद्रीय गृह मंत्री अमित शाह ह किहीन हे कि महिला मन ल तैंतीस प्रतिसत आरक्षण देने वाला ए बिल ल गिराना निंदनीय हे। ओमन चेतावनी दे हे कि एखर राजनीतिक असर दूरिहा तक जाही अउ विपक्ष ल बछर दू हजार उनतीस के लोकसभा चुनाव समेत हर चुनाव म महिला मन के आक्रोस के सामना करना पड़ही।
उहें, छत्तीसगढ़ के मुख्यमंत्री विष्णुदेव साय ह किहीन कि ए विधेयक ल लेके विपक्ष के विरोध केवल एक कानून के विरोध नोहय, बल्कि देस के मातृ शक्ति के अधिकार, सम्मान अउ नेतृत्व क्षमता ल नकारे के प्रयास हरय। उहें, भारतीय जनता पार्टी के प्रदेस अध्यक्ष किरण सिंह देव ह आरोप लगइन कि विपक्ष ह जानबूझ के ए संवैधानिक संशोधन बिल ल पास नइ होवन देवत हे।
उहें, भाजपा सांसद रूपकुमारी चौधरी, कमलेश जांगड़े अउ लक्ष्मी वर्मा ह किहीन कि कई दसक तक महिला मन के राजनीतिक सशक्तिकरण ल नकारने वाला पार्टी के असली चेहरा एक बर फेर उजागर हो गेहे।
इही बीच, ए विधेयक ल लेके कांग्रेस समेत यूपीए गठबंधन के रवैए के विरोध म काली दुर्ग म भाजपा के राष्ट्रीय उपाध्यक्ष डॉ. सरोज पांडे के नेतृत्व म महिला मन ह आक्रोस रैली निकालीन अउ जम के नारेबाजी करीन।
केंद्र मंत्रिमंडल-निर्णय
केंद्र सरकार ह केंद्रीय कर्मचारी मनके महंगाई भत्ता अउ पेंसन भोगी मनके महंगाई राहत म दू फीसदी बढ़ोत्तरी ल मंजूरी दे देहे। केंद्र ह महंगाई भत्ता ल अंठावन ले बढ़ाके साठ प्रतिसत कर देहे। ए निर्णय आज प्रधानमंत्री नरेंद्र मोदी के अध्यक्षता म होय कैबिनेट के बइठका म ले गीस।
बइठका के बाद मंत्रिमंडल म लेगे निर्णय मनके जानकारी देवत सूचना अउ प्रसारण मंत्री अश्विनी वैष्णव ह बतइन कि ए फइसला ले सरकार उपर सालाना छै हजार सात सौ इंक्यानवे करोड़ रूपिया ले जादा के खरचा बाढ़ही। ओमन किहीन कि ए निर्णय ले पचास लाख ले जादा केंद्रीय सरकारी कर्मचारी अउ अड़सठ लाख ले जादा पेंसनभोगी मन ल फायदा होही।
श्री वैष्णव ह किहीन कि मंत्रिमंडल ह प्रधानमंत्री ग्राम सड़क योजना ल मार्च दू हजार अट्ठाईस तक चालू रखे के घलो मंजूरी दे देहे। योजना के संशोधित परिव्यय तिरासी हजार नौ सौ ससत्तर करोड़ रूपिया होही।
जनगणना-अवकाश प्रतिबंध
छत्तीसगढ़ म जनगणना काम म लगे अधिकारी अउ कर्मचारी मन ल अब बिना कलेक्टर के अनुमति के अवकाश नइ दे जाय। गृह विभाग ह ए संबंध म आदेश जारी कर दे गेहे। आदेस म केहे गे हे कि कर्मचारी मन बिना अनुमति मुख्यालय झन छोड़य। संगेसंग ए आदेस के उल्लंघन करइया मन के खिलाफ नियमानुसार कार्रवाई करे जाही।
बतादन कि प्रदेस म एक मई ले तीस मई तक जनगणना के प्रथम चरण के तहत मकान सूचीकरण अउ मकान मनके गणना के काम करे जाना हे। ए काम बर प्रदेस म बासठ हजार ले जादा अधिकारी अउ कर्मचारी मन के ड्यूटी लगाय गेहे।
प्लांट हादसा-जांच
सक्ति जिला के सिंघीतराई करा वेदांता पावर लिमिटेड म पाछू दिन होय हादसा म मरे मजदूर मन के संख्या बाढ़ के तेईस हो गेहे। ए हादसा म छत्तीस झिन घायल हो गे रिहीन, जेमा ले तेरह झन के इलाज प्रदेस के अलग-अलग अस्पताल मन म जारी हे। घटना के बाद वेदांता के चेयरमैन अनिल अग्रवाल समेत दस झन के खिलाफ डभरा थाना म एफआईआर दर्ज होय हे।
इही बीच, सामान्य प्रशासन विभाग ह ए हादसा के जांच के आदेस जारी कर देहे। जांच बर बिलासपुर संभाग के आयुक्त ल जांच अधिकारी नियुक्त करे गेहे। सामान्य प्रशासन विभाग ह अपन आदेस म केहे हे कि जांच अधिकारी तीस दिन के भीतर जांच पूरा कर अपन प्रतिवेदन राज्य शासन के आगू प्रस्तुत करही।
संजू देवी-सम्मान
भारत ल कबड्डी विश्वकप अउ एशियन चैंपियनशिप देवाय म अहम भूमिका निभाने वाली संजू देवी ल खेल अउ युवा कल्याण विभाग डहार ले पचास लाख रूपिया के प्रोत्साहन रासि प्रदान करे गेहे। उपमुख्यमंत्री अरूण साव ह आज रायपुर म आयोजित सम्मान समारोह म उनला ए रासि सौंपिन। श्री साव ह ए दउरान बिलासपुर के चिंगराज पारा कबड्डी क्लब ल कबड्डी मैट घलो प्रदान करीन।
एसीबी-ईओडब्ल्यू-कार्रवाई
एंटी करप्शन ब्यूरो-एसीबी अउ आर्थिक अपराध अन्वेषण ब्यूरो-ईओडब्ल्यू ह भ्रष्टाचार के खिलाफ बड़ा कार्रवाई करत हुए निलंबित आईएएस समीर विश्नोई के करीब पंद्रह ले बीस करोड़ रूपिया के बेनाम संपत्ति ल अटैच कर लेहे। एखर पहिली, निलंबित आईएएस रानू साहू अउ सौम्या चौरसिया के संपत्ति ल घलो अटैच करे जा चुके हे।
कार्रवाई के तहत महासमुंद म बाईस एकड़ जमीन, नवा रायपुर के जमीन अउ रायपुर म एक ठन मकान सहित कई ठन बेनामी संपत्ति ल सीज कर ले गेहे, जेखर कीमत करोड़ो रूपिया बताय जावत हे। जांच म आगू आय हे कि जादातर संपत्ति अपन पत्नी अउ रिस्तेदार मनके नाम म खरीदे रिहीन। एसीबी अउ ईओडब्ल्यू ह ए संपत्ति मन ल सीज करे के ब्योरा विसेस न्यायधीश के आगू प्रस्तुत करे रिहीन। कोर्ट ह आदेस मिले के बाद करोड़ो के संपत्ति कुर्क कर लेहे।
बतादन कि प्रवर्तन निदेशालय-ईडी ह आज ले चार साल पहिली समीर विश्नोई ल मनि लॉड्रिंग अउ कोयला घोटाला के मामला म गिरफ्तार करे रिहीस।
छत्तीसगढ़-पुरस्कार
आयुष्मान भारत प्रधानमंत्री जन आरोग्य योजना म उत्कृष्ट प्रदर्सन बर छत्तीसगढ़ ल राष्ट्रीय स्तर म दू प्रतिष्ठित पुरस्कार मिले हे। महाराष्ट्र के पुणे म आयोजित चिंतन सिविर म छत्तीसगढ़ ल ये पुरस्कार प्रदान करे गेहे। ए पुरस्कार दू श्रेणी म दे गेहे। स्वास्थ्य मंत्री श्यामबिहारी जायसवाल ह ए उपलब्धि बर खुसी जतावत हुए किहीन कि आयुष्मान भारत प्रधानमंत्री जन आरोग्य योजना के माध्यम ले सरकार प्रदेस के आखिरी मनखे तक गुणवत्तापूर्ण अउ निसुल्क स्वास्थ्य सेवा उपलब्ध कराय बर संकल्पित हे।
मौसम
प्रदेस म भारी गरमी के असर लगातार बने हुए हे अउ अवइया दू दिन म घलो लोगन मन ल कोई राहत मिले के आसार नइ हे। मौसम विभाग ह चेतावनी देहे कि काली राज्य के कतकोन जिला म लू जइसे हालात बने रइही। उहें, अधिकतम तापमान म कोई विसेस बदलाव होय के संभावना नइ हे। एखर अलावा बस्तर संभाग के अधिकतम तापमान म मामूली गिरावट हो सकत हे।
पाछू चौबीस घंटा के दउरान प्रदेस म सबले गरम सहर राजनांदगांव रइही। जिंहा दिन के तापमान चवालीस डिग्री सेल्सियस दर्ज करे गेहे। एखर अलावा रईपुर अउ बिलासपुर म पारा तिरालीस डिग्री सेल्सियस के आस-पास बने रइही।