एक सौ छठवां संवैधानिक संसोधन अधिनियम-दू हजार तेईस, नारी शक्ति वंदन अधिनियम काली ले लागू हो गेहे। बछर दू हजार तेईस म संसद ह ए अधिनियम ल पारित करे रिहीस, जउन संघीय ढांचा के सबो स्तर के सार्वजनिक जीवन म महिला मनके बरोबर प्रतिनिधित्व ल बढ़ावा देय के दिसा म राष्ट्रीय यात्रा म ऐतिहासिक मील के पत्थर हे। ए महत्वपूर्ण कानून लोकसभा अउ दिल्ली राष्ट्रीय राजधानी क्षेत्र के विधानसभा के संगे सबो राज्य विधानसभा के सबो सीट म एक तिहाई सीट महिला मन बर बारी-बारी ले आरक्षित करथे।
प्रधानमंत्री ह किहीन हे कि नारी शक्ति सशक्त भारत के चिन्हारी आय। सोसल मीडिया म एक ठन संस्कृत सुभाषितम साझा करत प्रधानमंत्री ह नारी के शक्ति अउ योगदान ल सोरयाइन। प्रधानमंत्री ह यहू किहीन कि देस के माई-बहिनी अउ बेटी मन आज अपन अटूट संकल्प, समर्पन अउ सेवा भाव ले हर क्षेत्र म देस के मान बढ़ावत हें।
लोकसभा-नारी शक्ति वंदन अधिनियम
लोकसभा म संविधान के 131वां संशोधन विधेयक-दू हजार छब्बीस, परिसीमन विधेयक दू हजार छब्बीस अउ केंद्र शासित प्रदेस कानून संशोधन विधेयक दू हजार छब्बीस उपर चर्चा होवत हे। ए तीनों विधेयक के उद्देस्य लोकसभा राज्यसभा अउ केंद शासित प्रदेस के विधानसभा म महिला मनके भागीदारी ल बढ़ाना हे। तीनों विधेयक मन उपर आज मतदान होना हे।
प्रधानमंत्री ह सबो सांसद मन ले नारी शक्ति वंदन अधिनियम म संशोधन के समर्थन करे के आग्रह करिन हें। सोसल मीडिया पोस्ट म श्री मोदी ह किहीन हे कि देस के लाखों महिला मन के नजर संसद, ओखर इरादा अउ फइसला उपर टिके हे। ओमन सबो राजनीतिक दल मन ले महिला आरक्षण के पक्ष म मतदान करे के अपील करिन।
छत्तीसगढ़ के राज्यसभा सांसद लक्ष्मी वर्मा ह महिला आरक्षण बिल ल ‘अब्बड़ गरब के बेरा‘ बताइन अउ महिला सशक्तिकरण ल आगू बढ़ाय बर प्रधानमंत्री के धन्यवाद करिन।
केंद्र सरकार-नक्सलवाद
केंद्र सरकार ह राज्य सरकार मन ल सूचित करे हे कि देस म अब कोनो घलो नक्सल प्रभावित जिला नइये। केंद्रीय गृह मंत्रालय ह अपन पाती म छत्तीसगढ़ संगे आंध्रप्रदेस, बिहार, झारखंड, मध्यप्रदेस, महाराष्ट्र, ओडिशा, तेलंगाना अउ पश्चिम बंगाल ल सूचित करे हे कि सैंतीस जिला मन ल ‘‘विरासत अउ विकास जिला‘‘ के रूप म बांटे गेहे। उहें, एक ठन जिला ल ‘‘चिंताजनक जिला‘‘ घोसित करे गेहे। ‘‘विरासत अउ विकास जिला‘‘ ओ जिला हें जउन नक्सली हिंसा ले पूरा तरह ले मुक्त हें। उहें, ‘‘चिंताजनक जिला‘‘ ओ जिला हें जिंहा नक्सली हिंसा उपर नियंत्रण पाय गेहे। फेर अवइया बेरा म सरलग सुरक्षा अउ बिकास के जरूरत हे। उहें, झारखंड के पश्चिम सिंहभूम जिला इकतीस मार्च के बाद एकमात्र ‘‘चिंताजनक जिला‘‘ के रूप म सूचीबध्द हे।
छत्तीसगढ़-जनगणना
छत्तीसगढ़ म जनगणना-बछर दू हजार सत्ताईस के पहिली चरण के तहत स्व-गणना प्रक्रिया काली ले सुरू हो गेहे। ए कारज ह तीस अप्रैल तक चलही। एखर बर नागरिक मन पोर्टल म जाके अपन जानकारी स्वयं दर्ज कर सकत हें। रइपुर म मुख्य सचिव विकास शील ह स्व-गणना के तहत अपन जानकारी दर्ज करिन। ए मउका म अपर मुख्य सचिव मनोज कुमार पिंगुआ अउ जनगणना निदेशक कार्तिकेय गोयल मौजूद रिहीन। ए बेरा अधिकारी मन लोगन ले स्व-गणना के उपयोग करे के अपील करिन हें। एखर बाद एक-मई ले तीस मई तक प्रगणक घर-घर जाके मकान सूचीकरण अउ गणना के कारज करहीं।
बातों-बातों-में
माओवादी-मुठभेड़
झारखंड के हजारीबाग जिला के पिपरवार-केरेदारी सीमा इलाका म आज सुरक्षाबल के संग होय मुठभेड़ म चार झन माओवादी मारे गिन। एमा माओवादी उप-क्षेत्रीय कमांडर सहदेव महतो घलो सामिल हे, जेखर उपर पंद्रह लाख रूपिया के इनाम रिहीस। घटनास्थल ले भारी मात्रा म हथियार, गोला-बारूद अउ माओवादी जिनिस बरामद करे गिस।
प्लांट हादसा-एफआईआर
सक्ती जिला के वेदांता पावर प्लांट हादसा म पुलिस ह वेदांता समूह के मुखिया अनिल अग्रवाल के संग दस लोगन के खिलाफ केस दर्ज करे हे। औद्योगिक सुरक्षा विभाग के सुरूआती जांच म पता चलिस कि प्लांट म सुरक्षा मानक के पालन म लापरवाही बरते गे रिहीस।
बतादन कि बीते चौदह अप्रैल के प्लांट म होय हादसा म अब तक इक्कीस झन श्रमिक मनके मउत हो चुके हे। पुलिस ह प्लांट ले जुड़े अधिकारी अउ प्रबंधन के जिम्मेदारी तय करत जांच सुरू कर देहे। उहें, राज्य सरकार ह घटना ल गंभीर बतावत दोषी मन उपर कड़ा कारवाही के निरदेस देहे। हादसा के कारण के बिस्तार ले जांच चलत हे।
इही बीच, नेता प्रतिपक्ष डॉ. चरणदास महंत ह पत्रकारवार्ता म किहीन कि- ‘‘राज्य सरकार के डहार ले उद्योग मन म श्रमिक मन के सुरक्षा उपर कोनो धियान नइ दे के सेति प्रदेस म दुर्घटना होवत हें। वेदांता प्लांट मामला म सरकार डहार ले ही प्रबंधन अउ उंखर ले जुड़े मनखे के खिलाफ बहुतेच सामान्य धारा म केस दर्ज करे गेहे, जउन जमानतीय हे। ओमन ए मामला के जांच हाईकोर्ट के जज ले कराय के मांग करिन।
उहें, कांग्रेस के प्रदेस अध्यक्ष दीपक बैज ह घलो आरोप लगाइन कि-उद्योग विभाग अउ संयंत्र प्रबंधन के लापरवाही के सेति पावर प्लांट म घटना घटिस। अगर श्रमिक मनके सुरक्षा उपर सावधानी बरते रतिन, त अतेक बड़े जनहानि नइ होतिस।
हज यात्रा
बछर दू हजार छब्बीस के हज यात्रा काली ले सुरू होवत हे। जायरीन के पहिली जत्था देशभर के आने-आने जघा ले सऊदी अरब बर रवाना होही। अल्पसंख्यक कार्य मंत्रालय ह बताइस कि एक लाख पचहत्तर हजार ले जादा जायरीन के भारत ले हज यात्रा म सामिल होय के उम्मीद हे। अल्पसंख्यक कार्य मंत्री किरेन रिजिजू ह बताइन कि मंत्रालय ह जायरीन के सेवा ल बेहतर बनाय बर ए बछर नवा उदीम करे गेहे।
मौसम
मौसम विभाग ह अवइया तीन दिन म छत्तीसगढ़ के मध्य भाग म गरम हवा चले के चेतावनी देहे। ए बेरा अधिकतम तापमान म एक ले तीन डिग्री सेल्सियस बाढ़ सकथे। एखर असर रइपुर, दुरूग अउ बिलासपुर संभाग म देखे बर मिलही। उहें, ए दउरान बस्तर संभाग के दक्षिण हिस्सा म गरज-चमक के संग छींटा पड़ सकत हे। संगेसंग अवइया चौबीस घंटा म बस्तर संभाग के एक-दू जघा गाज गिरे के संग हवा गरेर के घलो चेतावनी देय गेहे।
अउ अब थोरकुन समाचार सार म –
– छत्तीसगढ़ मेडिकल सर्विसेज कार्पोरेसन म करीबन पांच सौ पचास करोड़ रूपिया के मेडिकल उपकरण खरीदी मामला म ईओडब्ल्यू ह चार झन नवा आरोपी के खिलाफ पूरक चालान पेस करिन।
– बालोद जिला के संबलपुर एसबीआई कियोस्क केंद्र म ग्राहक मन ले नौ लाख रूपिया के धोखाधड़ी करइया दू आरोपी गिरफ्तार होइन।
– जिला रोजगार अउ मार्गदर्शन केंद्र रइपुर डहार ले अग्निवीर भर्ती परीक्षा के तियारी बर युवा मन ल 4 मई ले 4 जून तक निसुल्क प्रसिक्षण दे जाही। एखर बर 30 अप्रैल तक आनलाइन पंजीयन कर सकत हें।
– रइपुर-दुरूग रद्दा के कुम्हारी म खारून नदी म बने पुलिया के मरम्मत के बाद अवई-जवई सुरू हो गेहे।
अउ
– महासमुंद जिला म एंटी करप्सन ब्यूरो ह ग्राम पंचायत बेमचा के सरपंच ल एक लाख रूपिया के रिस्वत लेवत रंगेहाथ गिरफ्तार करिस।