संसद के विस्तारित बजट अधिवेशन के तीन दिन के विशेष सत्र आज ले शुरू होगे हे। ये सत्र अठारा अप्रैल तक चलही । ये सत्र महिला आरक्षण अउ परिसीमन उपर केंद्रित होही।
आज लोकसभा म नारी शक्ति वंदन अधिनियम म संवैधानिक संशोधन ले संबंधित तीन जरूरी विधेयक उपर चर्चा के दौरान प्रधानमंत्री नरेंद्र मोदी ह कहिन कि देश के पचास प्रतिशत आबादी ल निर्णय लेके प्रक्रिया म शामिल करे जाना चाही। ओमन ह कीहिन कि नारी शक्ति देश के विकास म जरूरी भूमिका निभावत हे अउ नीति निर्माण म ओमन ल उचित प्रतिनिधित्व देना समय के मांग हे। प्रधानमंत्री ह विपक्षी दल ले ए ऐतिहासिक विधेयक ल राजनीतिक रंग ना देके अपील करीन। ओमन ह कीहिन कि ये सबो बर अउ देश के लोकतंत्र बर लाभकारी होही। ओमन ह कहिन कि ये विधेयक देश के दिशा अउ भविष्य तय करे म जरूरी भूमिका निभाही। प्रधानमंत्री ह कहिन कि सरकार नीति निर्माण म ‘‘सबका साथ सबका विकास‘‘के भावना के संग काम करत हे।
एखर पहिली केंद्रीय विधि अउ न्याय मंत्री अर्जुन मेघवाल ह लोकसभा म संविधान एक सौ इकतीसवां संशोधन विधेयक अउ परीसिमन विधेयक पेश करीन। उंहे केंद्रीय गृह मंत्री अमित शाह ह सदन म केंद्र शासित प्रदेश कानून संशोधन विधेयक प्रस्तुत करीन।
नारी शक्ति वंदन अधिनियम-अरूण साव
लोकसभा म महिला आरक्षण के संशोधन विधेयक म आज ले चर्चा शुरू होगे हे। उप मुख्यमंत्री अरूण साव ह एला स्वतंत्र भारत के इतिहास के एक महत्वपूर्ण दिन बताय हे। नवा रायपुर म पत्रकार मनले चर्चा करत हुए श्री साव ह ए विधेयक के सर्व सम्मति ले पारित होय के उम्मीद जतइन। ओमन ह कहिन कि ए कदम देश म महिला सशक्तिकरण ल नवा दिशा अउ नवा भारत के निर्माण ल गति दीही। श्री साव ह कहिन कि प्रधानमंत्री नरेंद्र मोदी के नेतृत्व म बेटी बचाओ-बेटी पढ़ाओ, छब्बीस सप्ताह के मातृत्व अवकाश अउ लखपति दीदी जइसन कतकोन जरूरी कदम उठाय गेहे। महिला आरक्षण घलो उही दिशा म एक ऐतिहासिक निर्णय हे। जेखर ले माइलोगिन मनके भागीदारी अउ सशक्त्किरण बाढ़ही।
छत्तीसगढ़-जनगणना
छत्तीसगढ़ म जनगणना – दू हजार सत्ताईस के तहत स्व-गणना के काम आज ले सुरू होगे हे, जेन तीस अप्रैल तक चलही। मुख्यमंत्री विष्णुदेव साय ह रायपुर स्थित मुख्यमंत्री निवास म ऑनलाइन स्व-गणना करके जनगणना अभियान के सुभारंभ करीन। ए दउरान ओमन पोर्टल म अपन जानकारी खुदे दर्ज करीन अउ लोगन मन ल ए राष्ट्रीय काम म सक्रिय भागीदारी निभाय के संदेस दीन। ओमन ह कहिन कि मनखे मन सोलह ले तीस अप्रैल के बीच ऑनलाइन पोर्टल के जरिया ले अपन परिवार ले संबंधित जानकारी खुदे दर्ज कर सकत हे। ओमन ह कहिन कि ए दरी जनगणना ल आधुनिक अउ डिजिटल स्वरूप दे गेहे, जेखर ले प्रक्रिया जादा पारदर्सी अउ अच्छा हो सकय। मुख्यमंत्री ह कहिन कि जनगणना केवल आंकड़ा के संकलन नइ हे, बल्कि देस अउ राज्य के भविष्य के दिसा तय करे के आधार हे। श्री साय ह बतईन कि एक मई ले जनगणना के पहिली चरण सुरू होही, जेमा मकान सूचीकरण अउ गणना के काम करे जाही। तीस मई तक प्रगणक घर-घर जाके आवासीय अउ गैर-आवासीय भवन, उंखर स्थिति, उपयोग अउ बुनियादी सुविधा जइसे पानी, सौचालय, बिजली, रसोई गैस, इंटरनेट अउ संचार व्यवस्था ले संबंधित जानकारी जुटाही।
मुख्य सचिव विकासशील अउ गृह विभाग के अपर मुख्य सचिव मनोज कुमार पिंगुआ ह घलो आज मंत्रालय म स्व-गणना के तहत अपन जानकारी खुदे दर्ज करीन। ए बेरा म ओमन ह प्रदेसवासी मन ले अपील करीन कि ओमन ए सुविधा के जादा ले जादा उपयोग करयं अउ अपन जानकारी खुदे भरके जनगणना म सक्रिय भागीदारी निभाय।
स्कूल-अवकाश
स्कूल शिक्षा विभाग ह प्रदेश म भीषण गर्मी ल देखत हुए गरमी के छुट्टी बर संशोधित आदेश जारी करे हे। अब प्रदेस के सबो सासकीय, अशासकीय अउ अनुदान प्राप्त के संग गैर अनुदान प्राप्त स्कूल ल बीस अप्रैल ले पन्द्रह जून तक बंद राखे के घोषणा करे गेहे। स्कूल शिक्षा मंत्री गजेन्द्र यादव ह बतईन कि अप्रैल महीना म बाढ़त तापमान अउ भीषण लू के स्थिति ल ध्यान म राखत हुए ए फइसला ले गेहे, जेखर ले विद्यार्थी के स्वास्थ्य म कोनों प्रकार के प्रतिकूल प्रभाव न पडे़। ओमन ह यहू बतईन कि ए संबंध म सासन डहार ले सबो संबंधित विभाग ल जरूरी निरदेस जारी कर दे गेहे।
जानबा के मुताबिक स्कूल सिक्षा विभाग डहार ले पहिली एक मई ले पन्द्रह जून तक गर्मी के छुट्टी घोषित करे गे रिहीस।
सहायक शिक्षक भर्ती
स्कूल शिक्षा विभाग डहार ले सहायक शिक्षक के दू हजार दू सौ बयानबे पद म भर्ती बर विज्ञापन जारी करे जात हे। एमा सात सौ पंचयानबे पद ई-संवर्ग के शाला अउ एक हजार चार सौ संतानबे पद टी-संवर्ग के शाला म भरे जाही।
लोक शिक्षण संचालनालय के उप संचालक अशोक नारायण बंजारा ह बताइन कि भर्ती संबंधी विज्ञापन छत्तीसगढ़ व्यावसायिक परीक्षा मंडल-व्यापम के वेबसाईट अउ स्कूल शिक्षा विभाग के वेबसाइट म जारी करे जाही। ए पद बर लिखित भर्ती परीक्षा के आयोजन व्यापम डहार ले करे जाही। जेखर संभावित तिथि ग्यारा अक्टूबर निर्धारित करे गेहे।
जानबा के मुताबिक स्कूल शिक्षा विभाग डहार ले प्रदेश म पांच हजार शिक्षक पद म भर्ती के प्रक्रिया शुरू करे जात हे।
पावर प्लांट-दुर्घटना
सक्ती जिला के वेदांता पावर प्लांट हादसा म मृतक मनके संख्या बाढ़के बीस होगे हे। हादसा म घायल पन्द्रह लोगन मनके छत्तीसगढ़ के अलग-अलग अस्पताल म इलाज चलत हे।
इही बीच, भारतीय मजदूर संघ ह मजदूर मनके मउत के बाद मुआवजा के संग आने-आने मांग ल लेके आज प्लांट प्रबंधन के खिलाफ प्रदर्सन करीन। मजदूर संघ ह मृतक मनके परिजन मन ल एक-एक करोड़ रूपिया अउ घायल मन ल पचास-पचास लाख रूपिया मुआवजा देके मांग करीन। संगेसंग संघ ह कहिन कि उंखर परिजन ल सरकारी नौकरी घलो दे जाय। भारतीय मजदूर संघ के राष्ट्रीय मंत्री राधेश्याम जायसवाल ह कहिन कि प्लांट म क्षमता ले जादा बॉयलर के संचालन करे ले ए हादसा होय हे। ओमन बॉयलर इंस्पेक्टर के खिलाफ कार्रवाई करे के मांग घलो करीन।
इही बीच, सक्ती जिला के तीन मृतक मन ले दू के अंतिम संस्कार कर दे गेहे अउ अन्य राज्य के मृतक मनके पार्थिव सरीर उंखर गांव भेजे जावत हे।
शराब घोटाला
छत्तीसगढ़ म कथित तीन हजार दू सौ करोड़ रूपिया के शराब घोटाला म केंद्रीय अन्वेषण ब्यूरो – सीबीआई ह पूर्व आबकारी विशेष सचिव अउ छत्तीसगढ़ राज्य विपणन निगम लिमिटेड के प्रबंध निदेशक अरूण पति त्रिपाठी के खिलाफ आय ले जादा संपत्ति के मामला दर्ज करे गीस।
मौसम
मौसम विभाग ह अवइया तीन दिन के दउरान मध्य छत्तीसगढ़ के कुछ इलाका म ग्रीष्म लहर यानी लू चले के चेतावनी देहे। प्रदेश म अवइया तीन दिन के दउरान अधिकतम तापमान म दू ले तीन डिग्री सेल्सियस बाढ़ सकत हे। पाछू चौबीस घंटा के दउरान प्रदेश के राजनांदगांव शहर म सबले जादा तिरालिस डिग्री सेल्सियस तापमान दर्ज करे गेहे।
सट्टा-कार्रवाई
सट्टा कारोबार के खिलाफ कार्रवाई करत हुए पुलिस ह रायपुर, दुर्ग, महासमुंद अउ मुंबई ले बीस सटोरी अउ खाईवाला मन ल गिरफ्तार करे हे। ए कार्रवाई म दस लैपटॉप, सत्यासी मोबाइल फोन, तीन एलईडी, बहत्तर एटीएम कार्ड, तेईस सिम कार्ड, तीन चेकबुक, एक पासबुक अउ एक कार जब्त करे गेहे। आरोपी मनके बैंक खाता के सुरूआती जांच म करीब चार करोड़ रूपिया के लेनदेन के जानकारी मिले हे। पुलिस आरोपी मन ले पूछताछ करत हे।
सुशासन तिहार
प्रदेस म आम लोगन मनके समस्या के तुरते समाधान बर ‘‘सुशासन तिहार‘‘ के आयोजन करे जाही। मुख्यमंत्री विष्णुदेव साय ह ए संबंध म सबो जिला कलेक्टर मन ल पत्र लिखके जरूरी दिसा-निरदेस दीन। मुख्यमंत्री ह कहिन कि लोगन मनके सिकायत के निराकरण समय-सीमा म करना सासन के प्राथमिकता हे। ओमन ह निरदेस दीन हे कि तीस अप्रैल तक लंबित प्रकरण के निराकरण बर विशेष अभियान चलाय जाय। एमा जमीन संबंधी मामला, मनरेगा भुगतान, प्रमाण पत्र, बिजली अउ हैंडपंप ले जुड़े समस्या ल प्राथमिकता दे जाही। सुशासन तिहार म एक मई ले दस जून तक प्रदेसभर म जनसमस्या निवारण सिविर लगाय जाही। ए सिविर म लोगन मनके समस्या के मउका म समाधान करे जाही अउ योजना के लाभ दे जाही।
रक्षक पाठ्यक्रम
प्रदेस के महाविद्यालय म ‘‘रक्षक‘‘ पाठ्यक्रम सुरू करे पहल करे जात हे। एखर उद्देश्य विद्यार्थी मनके जरिया ले बाल अधिकार के प्रति जागरूकता बढ़ाना अउ लइका मनके सुरक्षा सुनिश्चित करना हे। रायपुर म होवइया परामर्श बइठका म आने-आने विश्वविद्यालय मनके प्रतिनिधि मन ह पाठ्यक्रम के रूपरेखा उपर चर्चा करीन। राज्य बाल अधिकार संरक्षण आयोग ह बतईन कि अवइया सैक्षणिक सत्र ले एला लागू करे के तियारी करे जात हे।