मुख्यमंत्री विष्णुदेव साय के अगुवई म आज मंत्रालय म होय राज्य मंत्रि परिषद के बइठका म कतकोन महत्वपूर्ण फइसला ले गीस। मंत्रि परिषद ह राज्य म समान नागरिक संहिता लागू करे के दिसा म कदम उठावत एखर प्रारूप तियार करे बर रिटायर न्यायाधीश रंजना प्रकाश देसाई के अगुवई म एक समिति बनाय के फइसला लेहे। समिति आने-आने वरग ले सुझाव लेके प्रारूप तियार करही। जउन ह विधानसभा म प्रस्तुत करे जाही।
बइठका म माईलोगिन मन ल संपत्ति ले बर बढ़ावा देके उद्देश्य ले उंखर नाव म होवइया भूमि पंजीयन सुल्क म पचास प्रतिसत के कमी करे के फइसला ले गेहे। उहें, सैनिक, भूतपूर्व सैनिक अउ उंखर विधवा ल पच्चीस लाख रूपिया तक के संपत्ति खरीदे म स्टांप सुल्क म पच्चीस प्रतिसत के छूट दे जाही।
मंत्रिपरिषद ह औद्योगिक भूईंया अउ भवन प्रबंधन नियम म संसोधन ल मंजूरी देहे, जेखर ले सेवा क्षेत्र ल स्पष्ट पात्रता अउ निवेस ल बढ़ावा मिलही। एखर संगेसंग गौण खनिज रेत नियम अउ गौण खनिज नियम म घलो संसोधन करके खनन क्षेत्र म साफगोई बढ़ाय अउ अवैध खनन म रोक लगाय के प्रावधान करे गेहे। पशुपालन क्षेत्र म दुधारू पशु योजना म सबो वरग ल सामिल करे के फइसला होय हे। मवेसी मनके टीकाकरण बर जरूरी टीका ल बेरा म देवाय बर एक एजेंसी ले सोझे बिसाय के मंजूरी दे गेहे।
उहें, मंत्रिपरिषद ह छत्तीसगढ़ अउ मध्यप्रदेश के बीच पेंशन दायित्व के समायोजन ले जुड़े प्रस्ताव ल मंजूरी देहे। बइठका म अवइया खरीफ फसल बर खातू अउ रसोई गैस के कतका मात्रा म हे, एखर समीक्षा करे गीस।
नारी शक्ति वंदन अधिनियम
नारी शक्ति वंदन अधिनियम म गोठबात बर काली सोलह अप्रैल ले संसद के विशेष सत्र बलाय जाही। तीन दिवसीय ए सत्र के दउरान लोकसभा अउ विधनसभा म माईलोगिन मन बर तैंतीस प्रतिशत आरक्षण दे संबंधी अधिनियम पारित करे जाही।
संसदीय कार्य मंत्री किरेन रिजिजू ह भरोसा देवईन हे कि महिला आरक्षण विधेयक ल लेके संसो करे जइसन कोनो बात नइ हे। काबर कि सबो प्रावधान म बने असन विचार करे गेहे। नई दिल्ली म संवाददाता मन ले गोठबात म श्री रिजिजू ह किहीन कि हरेक राज्य ल निष्पक्ष रूप ले धियान म राखत सीट के संख्या बढ़ाय के बात करे गेहे। ओमन किहीन कि प्रस्तावित विधेयक संतुलित हे अउ हरेक समुदाय क्षेत्र अउ राज्य के लोगन ल एमा ध्यान म राखे गेहे।
प्राथमिक कृषि साख सहकारी समिति
मुख्यमंत्री विष्णुदेव साय ह आज मंत्रालय ले प्रदेश के नवा बने पांच सौ पन्द्रह प्राथमिक कृषि साख सहकारी समिति-पैक्स के वर्चुअल सुभारंभ करीन। नवा समिति के सुरू होय ले अब प्रदेस म सहकारी समिति के संख्या बाढ़के दू हजार पांच सौ तिहत्तर होगे हे। ए बेरा म मुख्यमंत्री ह किहीन कि अब पैक्स समिति बहुउद्देश्यीय सोसायटी के रूप म काम करही, जेखर ले किसान मन ल खातू, बीजा अउ अल्पकालीन ऋण जइसन सुभीता उंखर गांव के तीरे म मिलही। उहें, धान बेचे के काम घलो आसान होही अउ किसान अपन तीर के समिति म धान बेच सकही। ओमन बतईन कि नवा बने पांच सौ पन्द्रह समिति म एक सौ संतानवे समिति आदिवासी क्षेत्र म बनाय गेहे, जेखर ले दूर-दराज के किसान मन ल सोझे फायदा मिलही।
आरटीई-प्रवेश प्रक्रिया
प्रदेस म सैक्षणिक सत्र दू हजार छब्बीस-सत्ताईस बर प्राईवेट स्कूल मन म निःशुल्क प्रवेश खातिर शिक्षा के अधिकार अधिनियम-आरटीई म लॉटरी निकाले गीस। मुख्यमंत्री विष्णुदेव साय ह आज मंत्रालय म दाखिला के वर्चुअल सुभारंभ करीन। ए मउका म स्कूल सिक्षा मंत्री गजेन्द्र यादव मौजूद रिहीन।
पहिली चरण म निकाले गे लॉटरी म चौदह हजार चार सौ तीन लइका मनके प्राईवेट स्कूल म दाखिला बर चयन होय हे। फेर, मुख्यमंत्री डी.ए.व्ही. स्कूल के सीट सामिल नइ हे। आज निकाले गे लॉटरी म सबले जादा सीट दू हजार छह सौ छह रईपुर जिला के सबले कमती नौ सीट सुकमा जिला के हे।
आरटीई के तहत पहिली चरण म राज्य के प्राईवेट स्कूल मन म कक्षा पहली म एक ले तीस मई तक दाखिला होही। उहें, प्रवेस के दूसर चरण के काम आठ जून ले सत्रह अगस्त तक चलही।
सीबीएसई-परिणाम
केन्द्रीय माध्यमिक सिक्षा बोर्ड सीबीएसई ह कक्षा दसवीं के बोर्ड परीक्षा के नतीजा घोषित कर देहे। छात्र अपन नतीजा आधिकारिक वेबसाइट – सीबीएसई डॉट जीओवी डॉट इन अउ सीबीएसई रिजल्ट्स डॉट एनआईसी डॉट इन म देख सकत हे। आधिकारिक पोर्टल के संगेसंग परिणाम डिजी लॉकर अउ उमंग ऐप जइसन प्लेटफॉर्म म घलो देखे जा सकत हे।
पावर प्लांट दुर्घटना
राष्ट्रपति द्रौपदी मुर्मु ह ए हादसा म मउत होय लोगन मन बर सोक जतईन हे। उहें, घायल होय लोगन मनके जल्दी स्वस्थ होय के कामना करीन हे।
प्रधानमंत्री नरेन्द्र मोदी ह मृतक मनके परिवार वाले मन ल दू-दू लाख अउ घायल मन ल पचास-पचास हजार रूपिया देके घोसना करीन।
छत्तीसगढ़ के मुख्यमंत्री विष्णुदेव साय ह घलो मृतक के परिवार वाले मन ल पांच-पांच लाख अउ घायल मन ल पचास-पचास हजार रूपिया देके घोसना करीन हे। मुख्यमंत्री ह घटना के जांच के आदेस दे देहे। बिलासपुर संभाग के आयुक्त ल एखर जिम्मेवारी सौंपे गेहे।
इही बीच, प्लांट प्रबंधन ल मृतक के परिवार वाले मन ल पैंतीस लाख रूपिया अउ एक आश्रित ल नौकरी देके घोसना करे हे। घायल मन ल पन्द्रह लाख रूपिया अउ उपचार के सुभीता देके बात केहे गेहे।
ए घटना के जांच बर छत्तीसगढ़ प्रदेस कांग्रेस कमेटी ह दस सदस्य वाले जांच समिति के गठन करे हे। पूर्व मंत्री जयसिंह अग्रवाल ल समिति के संयोजक बनाय गेहे।
खबर के मुताबिक काली मंझनिया वेदांता पावर प्लांट के बायलर ट्यूब म औचक ब्लॉस्ट होय ले चार झन मजदूर मनके मउकाच म मउत होगे रिहीस। हादसा के बाद घायल मजदूर मन ल रायगढ़, बिलासपुर अउ रईपुर इलाज बर भेजे गे रिहीस।
जनगणना-2027
जनगणना दू हजार सत्ताईस म छत्तीसगढ़ म काली सोलह ले तीस अप्रैल तक स्व-गणना के काम करे जाही। एमा कोनों भी नागरिक तय ऑनलाइन पोर्टल के माध्यम ले खुदे अपन परिवार अउ मकान ले जुड़े जानकारी दर्ज कर सकत हे। स्व-गणना करइया परिवार मन ल स्व-गणना आईडी दे जाही, जेला सुरक्षित रखना जरूरी होही अउ एला प्रगणक ल देबर परही। उहें, प्रदेस म एक ले तीस मई तक मकान सूचीकरण अउ मकान के गणना के काम होही।
मतदाता सूची-प्रारंभिक प्रकाशन
प्रदेस म नगरीय निकाय अउ त्रिस्तरीय पंचायत के उपनिर्वाचन खातिर मतदाता सूची के प्रारंभिक प्रकाशन कर दे गेहे। राज्य निर्वाचन आयोग के निरदेस म एखर ले जुड़े क्षेत्र म निर्वाचक रजिस्ट्रीकरण अधिकारी कार्यालय तय करे गेहे, जिहां मतदाता सूची देखे जा सकत हे। लोगन अपन नांव जोड़वाय अउ या फेर सुधार बर बीस अप्रैल तक दावा आपत्ति कर सकत हे। एखर बर संबंधित मतदान केन्द्र म अरजी जमा करे के बेवस्था करे गेहे।
माओवादी-मुठभेड़
झारखंड के सारंडा के जंगल म सुरक्षा बल अउ माओवादी मनके बीच मुठभेड़ चलत हे। माओवादी पोलित ब्यूरो सदस्य मिसिर बेसरा के मौजूदगी के सूचना मिलतेच कोबरा बटालियन के जवान सर्चिंग म निकले रिहीन। एही दउरान पहिली ले घात लगाके बइठे माओवादी मन ह सुरक्षा बल उपर फायरिंग शुरू कर दीन। सारंडा के जंगल म मिसिर बेसरा के लुकाय के सूचना म जवान मन कोति ले सर्चिंग अभियान चलाय जात हे।
अउ अब जानन मौसम के हाल…..
मौसम विभाग ह मध्य छत्तीसगढ़ म गरमी बाढ़े के संगेसंग अवइया चौबीस घंटा म लू चले के संभावना जताय हे। आज रईपुर के अधिकतम तापमान बयालीस डिग्री सेल्सियस अउ न्यूनतम तापमान लगभग छब्बीस डिग्री सेल्सियस रिहीस। मौसम विभाग ह उन्नीस अप्रैल तक प्रदेस के एक-दू जघा म लू चले के संभावना जताय हे।