सक्ती जिला के डभरा ब्लाक के सिंघनतराई गांव तीर वेदांता पावर प्लांट म बॉयलर फटे ले नौ मजदूर के मउत होगे। उहें, चालीस ले जादा मजदूर मन झोला गेहे। एमन म आठ के हालत गंभीर बताय जावत हे। घायल मन ल अस्पताल म भर्ती कराय गेहे। घटना के सूचना मिलतेच पुलिस अउ प्रशासन के टीम ह मउका म पहुंच के जांच म जुट गे। जिला प्रशासन ह हादसा के गंभीरता ले देखत हुए तुरते जांच के आदेस दे देहे। दुर्घटना के कारण अभी स्पष्ट नइ होय हे।
जिला के पुलिस अधीक्षक प्रफुल्ल ठाकुर ह बतइन कि प्लांट म काम के बीच अचानक बॉयलर फट गे, जेखर ले अब्बड़ अकन मजदूर मन झोला गेहे। ओमन बतइन कि अभी भी प्लांट म अब्बड़ अकन मजदूर मन फंसे हे। जेमन ल निकाले के प्रयास जारी हे।
इही बीच, श्रम अउ उद्योग मंत्री लखन लाल देवांगन ह घटना के जांच के निरदेस देहे। ओमन किहीन कि ए हादसा म दोषी मन उपर श्रम कानून के तहत कार्रवाई होही। श्री देवांगन ह किहीन कि राज्य सरकार ह मृतक अउ घायल मनके परिजन ल उचित मुआवजा देही।
उहें, नेता प्रतिपक्ष डॉक्टर चरणदास महंत ह वेदांता प्लांट म होय ए घटना उपर दुख व्यक्त करे हे। ओमन जिला कलेक्टर अउ पुलिस अधीक्षक ले फोन म घटना के जानकारी लीन अउ अधिकारी मन ल घायल मजदूर मन ल तुरते अउ सुघ्घर इलाज उपलब्ध कराय के निरदेस दीन हे।
दुर्घटना
रईपुर जिला के गोबरा नवापारा म पाछू रतिहा हाईवा अउ टरक के टक्कर म तीन लोगन के मउत होगे। मिले जानकारी अनुसार अभनपुर थाना क्षेत्र के पिपरौद-बजरंगपुर म नवा बनत टोल प्लाजा के तीर रेती ले भरे हाईवा ह एक ठिन टरक ले टकरागे। जेखर ले टरक म बइठे तीन झन केबिन म ही फंस गे। घटना के सूचना मिलतेच पुलिस ह मउका म पहुंचिस अउ दू घंटा के मेहनत के बाद फसे ए तीन झन ल निकालीस। एमन ल गोबरा के सामूदायिक स्वास्थ्य केंद्र म ले जाय गीस, जिंहा इलाज के बीच तीनो झन के मउत होगे।
प्रधानमंत्री-नारी शक्ति वंदन अधिनियम
प्रधानमंत्री नरेंद्र मोदी ह किहीन हे कि नीति-निर्माण अउ निरनय ले म माईलोगिन के सक्रिय भागीदारी ले बछर दू हजार सैंतालीस तक विकसित भारत के यात्रा के दृष्टिकोण ह अउ मजबूत होही। भारत के नारी शक्ति ल लिखे अपन पत्र म श्री मोदी ह किहीन कि सोलह अप्रैल के संसद ह, नारी शक्ति वंदन अधिनियम ले जुड़े जरूरी संवैधानिक संसोधन उपर चर्चा अउ ओला पारित करे बर दुबारा सत्र सुरू करही।
प्रधानमंत्री ह सदन म ए विधेयक के पारित होय के आसा जतइन हे। ओमन किहीन कि देसभर के माईलोगिन मन विकसित भारत के निरमान म योगदान देके एक सुघ्घर मउका मिले उपर खुसी जतावत हे।
मुख्यमंत्री-नारी शक्ति वंदन अधिनियम
मुख्यमंत्री विष्णुदेव साय ह नारी शक्ति वंदन अधिनियम के प्रभावी अउ समय म क्रियान्वयन ल लेके प्रदेस के सबो लोकसभा-राज्यसभा सांसद, विधानसभा सदस्य अउ महिला संगठन ल चिट्ठी लिखके सक्रिय सहभागिता निभाय के आग्रह करीन हे। ओमन सोहल अप्रैल के नारी शक्ति वंदन अधिनियम के उपर होवइया चर्चा ल देस के लोकतांत्रिक इतिहास के निर्णायक क्षण बतात हुए किहीन कि एहा मातृशक्ति ल लोकतांत्रिक संस्था मन म सही प्रतिनिधित्व दिलाय के दिसा म एक ऐतिहासिक मउका हे। मुख्यमंत्री ह सांसद मन ल लिखे अपन पत्र म आग्रह करीन हे कि बछर दू हजार उनतीस के लोकसभा अउ विधानसभा चुनई ले पहिली ए अधिनियम ल प्रभावी रूप ले लागू करे बर अपन सकारात्मक अउ सक्रिय भूमिका निभावय, जेखर ले मातृशक्ति ल उंखर सही अधिकार मिल सकय। ओमन किहीन कि नारी शक्ति के अगुवई म सशक्तिकरण के ए अभियान ह देस के संघरा विकास बर महत्वपूर्ण हे। मुख्यमंत्री ह सबो विधायक मन ले अपेक्षा करे हे कि ओमन महिला आरक्षण के समर्थन म छत्तीसगढ़ के आवाज ल मजबूत करय अउ ए बिसय उपर होवइया चर्चा म सक्रिय सहभागिता निभावय।
अंबेडकर जयंती
भारतीय संविधान के मुख्य सिल्पकार बाबा साहेब डॉक्टर भीमराव अंबेडकर के एक सौ पैंतीसवां जयंती उपर देस ह आज उंहला श्रध्दांलि अर्पित करत हे। राष्ट्रपति द्रौपदी मुर्मु, प्रधानमंत्री नरेंद्र मोदी अउ गृह मंत्री अमित शाह ह बाबा साहेब के जयंती उपर ओमन ल सुरता करत, श्रध्दांजलि अर्पित करीन।
ऐति, छत्तीसगढ़ म घलो डॉक्टर भीम राव अंबेडकर के जयंती उपर अब्बड़ अकन कारीकरम आयोजित करे जावत हे। मुख्यमंत्री विष्णुदेव साय ह रईपुर के अपन निवास कार्यालय म डॉक्टर अंबेडकर के फोटू उपर फूल चढ़ाके नमन करीन। उहें, मुख्यमंत्री ह बाबा साहेब के जयंती म रईपुर म राखे गे समरसता भोज म सामिल होइन। एखर अलावा श्री साय ह रईपुर कलेक्टरेट चौक म बाबा साहेब के नवा मूर्ति के अनावरण घलो करीन।
उहें, उपमुख्यमंत्री अरूण साव अउ केंद्रीय राज्य मंत्री तोखन साहू ह बिलासपुर के जेल चौक तीर डॉक्टर भीम राव अंबेडकर के मूर्ति म माला चढ़ाके श्रध्दांजलि दीन।
ए बीच, प्रदेस के सबो ग्राम पंचायत म आज ग्राम सभा के आयोजन करे गीस। पंचायत अउ ग्रामीण विकास विभाग के निरदेस अनुसार ग्रामसभा के कार्रवाई के वीडियो रिकॉर्डिंग करना अनिवार्य हे।
अग्निशमन दिवस
आज अग्निशमन दिवस हवय। ए मउका म प्रदेस के आने-आने जघा म जागरूकता कारीकरम राखे गीस। दुरूग के अग्निशमन अउ आपातकालीन सेवा कोति ले श्रध्दांजलि अउ जागरूकता कारीकरम के आयोजन करे गीस। एमा अग्निशमन कार्यालय दुरूग ले रैली निकाल के आमलोगन ल आगी ले बचाव के प्रति जागरूक करे गीस। कारीकरम म सहीद अग्निशमन कर्मचारी मन ल श्रध्दांजलि घलो अर्पित करे गीस।
गांजा-बरामद
जगदलपुर के बोधघाट पुलिस ह चौव्वन किलो गांजा संग छै झन आरोपी ल गिरफ्तार करे हे। जब्त गांजा के अनुमानित कीमत सत्ताईस लाख रूपिया बताय जावत हे। ए मामला म पकड़ाय आरोपी मन म तीन राजस्थान के, एक उत्तर प्रदेस के अउ दू झन छत्तीसगढ़ के सुकमा जिला के रहइया हे।
ओति, कबीरधाम जिला म कोतवाली पुलिस ह नौ किलो ले जादा गांजा के संग दू आरोपी ल गिरफ्तार करे हे। जब्त गांजा के कीमत साढ़े चार लाख रूपिया बताय जावत हे।
नकली दवा-कार्रवाई
राज्य म नकली दवई के अवैध व्यापार के खिलाफ औषधि प्रशासन विभाग कोति ले अभियान चलाय जावत हे। जेमा रईपुर के गोगांव स्थित नागपुर गोल्डन ट्रांसपोर्ट ले नकली दवई के जब्ती के प्रकरण म बड़का कार्रवाई करे गेहे। जांच के दउरान तीन आरोपी ल गिरफ्तार करे गेहे। जांच म अब्बड़ अकन दवई दुकान ले संदिग्ध अउ नकली दवई के भंडार अउ बंटई ले जुड़े जरूरी साक्ष्य मिले रिहीस। एखरे आधार म ए कार्रवाई करे गीस हे।
अउ अब सुनथन मौसम के हाल…
मौसम विभाग ह काली पंद्रह अप्रैल ले मध्य छत्तीसगढ़ म लू चले के चेतावनी देहे। विभाग के अनुसार एक द्रोणिका ह दक्षिणी असम ले दक्षिण तमिलनाडु अउ छत्तीसगढ़ के उपर बने हुए हे। एखरे असर ले प्रदेस म ताते-ताते हवा आवत हे। जेखर कारण अधिकतम तापमान म बढ़ोत्तरी होय के आसंका हे। बस्तर अउ सरगुजा संभाग के अधिकतम तापमान म थोरकुन बढ़त-घटत के संग कोनो खास बदलाव होय के संभावना नइ हे।
अउ अब थोरकुन समाचार सार म –
– भारतीय जनता पार्टी के विधायक सम्राट चौधरी ल बिहार म भाजपा विधायक दल के नेता चुने गेहे। जेखर ले बिहार के अगला मुख्यमंत्री बने के उंखर रद्दा साफ हे।
– मुख्यमंत्री विष्णुदेव साय के अगुवई म काली पंद्रह अप्रैल के मंत्रालय, महानदी भवन म राज्यमंत्रि मंडल के बइठका आयोजित करे जाही।
– शैक्षणिक सत्र दू हजार छब्बीस-सत्ताईस म मुफ्त प्रवेस बर शिक्षा के अध्किर अधिनियम यानी आरटीई के काली लॉटरी निकाले जाही।
अउ
– प्रदेस म कृषि अउ पशुपालन समेत आने-आने कोर्स म भर्ती बर आवेदन प्रक्रिया सुरू हो गेहे। छत्तीसगढ़ व्यावयायिक परीक्षा मंडल के वेबसाइट म सत्ताईस अप्रैल तक ऑनलाइन आवेदन स्वीकार करे जाही।