आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री नरेंद्र मोदी ह किहीन हे कि भारत के नारी शक्ति अपन दृढ़ साहस, आत्मविश्वास अउ मेहनत के दम म सरलग नवा ऊंचाई छूवत हे। नई दिल्ली म आज नारी शक्ति वंदन सम्मेलन ल संबोधित करत श्री मोदी ह किहीन हे कि भारत इक्कीसवीं सदी म महिला सशक्तिकरण ल समर्पित एक बड़का फइसला लेवत हे। ओमन किहीन कि संसद नवा इतिहास रचइया हे, जेमा भूत अउ भविष्य के महत्वाकांक्षा ल पूरा करे जाही।
प्रधानमंत्री ह किहीन कि लोकतंत्र म महिला आरक्षण, बहुते जरूरी हे। श्री मोदी ह किहीन हे कि माईलोगिन मनके भागीदारी लोकतंत्र ल मजबूत करथे। अेमन किहीन हे कि पंचायती राज संस्थान माईलोगिन मन के अगुवई के सुघ्घर उदाहरण आय। श्री मोदी ह किहीन हे कि अभी म चौदह लाख ले जादा माईलोगिन मन स्थानीय, सार्वजनिक निकाय मन म सेवा देवत हे।
आज भारत म चौदह लाख ले जादा माईलोगिन लोकल गवर्नमेंट बॉडी म सुघ्घर ढंग ले काम करत हे। करीबन इक्कीस राज्य मन म पंचायत म उंखर भागीदारी करीबन पचास प्रतिसत म पहुंच गेहे। लाखो माईलोगिन मन के राजनीति अउ सामाजिक जीवन म ए सक्रियता दुनिया के बड़े-बड़े नेता अउ राजनीति के बिसेसज्ञ मन ल घलो हैरान हवय अउ एखर ले भारत के गौरव बाढ़थे।
ए मउका म केंद्रीय महिला अउ बाल विकास मंत्री अन्नपूर्णा देवी ह किहीन कि नारी शक्ति वंदन अधिनियम, महिला सशक्तिकरण, आत्मसम्मान अउ लोकतांत्रिक भागीदारी ल सुनिश्चित करथे।

मुख्यमंत्री-नारी शक्ति वंदन सम्मेलन

मुख्यमंत्री विष्णुदेव साय ह आज रईपुर म नई दिल्ली के विज्ञान भवन ले प्रसारित ‘नारी शक्ति वंदन सम्मेलन‘ म प्रधानमंत्री नरेंद्र मोदी के उद्बोधन ल सुनिन। बाद म पत्रकार मन ले गोठबात करत मुख्यमंत्री ह किहीन कि ‘पंचायत ले पार्लियामेंट तक‘ नारी की भागीदारी सुनिश्चित करे के ए कोसिस नवा भारत के झलक प्रस्तुत करथे। ओमन प्रधानमंत्री के ए दृष्टिकोण ल रेखांकित करे के फइसला के काम म माईलोगिन मन के सीधा भागीदारी ह विकसित भारत के सशक्त नींव आय। ओमन किहीन कि सोलह अप्रैल के संसद म ‘नारी शक्ति वंदन अधिनियम‘ म होवइया चर्चा ए ऐतिहासिक पहल ल मूर्त रूप देके दिसा म एक बिसेस कदम आय।
मुख्यमंत्री ह किहीन कि छत्तीसगढ़ म माईलोगिन मन के सशक्तिकरण ल प्राथमिकता देवत कतकोन प्रभावी कदम उठाय गेहे। स्थानीय निकाय मन म पचास प्रतिसत आरक्षण के माध्यम ले माईलोगिन मन ल अगुवई करे के मउका मिलत हे, जेखर सकारात्मक प्रभाव जमीनी स्तर म देखाई देवत हे। संगेसंग ‘महतारी वंदन योजना‘‘ जइसन पहल माता अउ बहिनी मन ल आर्थिक अउ सामाजिक रूप ले सक्षम बनावत हे।

माओवादी-मुठभेड़

कांकेर जिला म सुरक्षा बल मन के संग होय मुठभेड़ म एक झिन माईलोगिन  माओवादी मारे गीस। पुलिस अधीक्षक निखिल राखेचा ह बइतन हे कि जिला के छोटेबेठिया-परतापुर थाना क्षेत्र के सीमावर्ती इलाका के जंगल म माओवादी मन के मौजूदगी के खबर मिले रिहीस। ए आधार म सुरक्षा बल मन ह सर्च आपरेसन सुरू करीन। इही दउरान माचपल्ली क्षेत्र म पुलिस अउ माओवादी मनके बीच मुठभेड़ होय हे। बाद म सर्चिंग के दउरान एक झिन माईलोगिन माओवादी के शव, एक पिस्टल, गोला-बारूद अउ आने-आने जिनिस बरामद करे गेहे।
उहें, बस्तर रेंज के पुलिस महानिरीक्षक सुंदरराज पी. ह बस्तर म बांचे माओवादी कैडर मन ले अपील करे हे कि उंखर तीर बहुते कम बेरा बाकी हे। ओमन जम्मों हिंसा के रद्दा ल छोड़के समाज के मुख्यधारा म लहुटय अउ सुघ्घर जिनगी के सुरूआत करय।
इही बीच, गरियाबंद जिला म छत्तीसगढ़-ओडिसा सीमा स्थित सोनाबेड़ा अभयारण्य के ढेकुनपानी जंगल म सीआरपीएफ जवान मन ह भारी मात्रा म विस्फोटक समान बरामद करीन हे। ए कार्रवाई ओडिसा के कोमना पुलिस कैंप के सीआरपीएफ टीम डहार ले करे गेहे।

मुख्यमंत्री-स्वस्थ बस्तर अभियान

मुख्यमंत्री विष्णुदेव साय ह आज सुकमा प्रवास के दउरान ‘‘मुख्यमंत्री स्वस्थ्य बस्तर अभियान‘‘ के सुभारंभ करीन। ए मउका म मुख्यमंत्री ह अपन स्वास्थ्य के जांच कराय अउ जम्मो झन ल स्वास्थ्य के प्रति सजग रहे के संदेस घलो दीन। ए अभियान के अंतर्गत बस्तर संभाग के सात जिला, बत्तीस विकासखंड अउ पांच हजार ले जादा गांव अउ बस्ती मन म स्वास्थ्य सिविर लगाय जाही।
ए दउरान मुख्यमंत्री ह सुकमा जिला बर तीन सौ आठ करोड़ रूपिया के आने-आने विकास काम के लोकार्पण अउ भूमिपूजन घलो करीन।

जनगणना-2027

जनगणना दू हजार सत्ताईस के तहत पहिली चरण म छत्तीसगढ़ म एक मई ले तीस मई तक मकान सूचीकरण अउ मकान मनके गणना के काम सुरू करे जाही। एखर माध्यम ले आवासीय अउ गैर-आवासीय भवन, मकान के स्थिति, उपयोग अउ उपलब्ध सुविधा मन ले जानकारी इकट्ठा करे जाही। इही दउरान आम लोगन मनले तैंतीस ठिन सवाल पूछे जाही। रईपुर म आज पत्रकार मन ले गोठबात करत गृह विभाग के अतिरिक्त मुख्य सचिव मनोज कुमार पिंगुआ अउ राज्य के जनगणना निदेशक कार्तिकेय गोयल ह, ए जानकारी दीन। श्री पिंगुआ ह बतइन कि डिजिटल इंडिया के तहत ए बखत आम जनता मनके सुविधा बर स्व-गणना के विकल्प घलो उपलब्ध कराय गेहे। कोनो भी मनखे सोलह अप्रैल ले तीस अप्रैल तक निर्धारित ऑनलाइन पोर्टल के माध्यम ले खुद अपन परिवार अउ घर ले जुड़े जानकारी दर्ज कर सकत हे। स्व-गणना करइया परिवार मन ल स्व-गणना आईडी दे जाही, जेला सुरक्षित रखना जरूरी होही अउ एला प्रगणक ल देना होही।
श्री पिंगुआ ह बतइन कि जनगणना के दउरान इकट्ठा करे गे जानकारी गोपनीय रखे जाही। एखर उपयोग सिरिफ सांख्यिकीय उद्देस्य अउ नीतिगत फइसला बर करे जाही। ओमन जम्मों मनखे ले अपील करे हे कि प्रगणक मन ल सही जानकारी देवय।
उहें, राज्य जनगणना निदेशक कार्तिकेय गोयल ह बतइन कि छत्तीसगढ़ म जनगणना काम बर करीबन बासठ हजार पांच सौ अधिकारी अउ कर्मचारी मन के ड्यूटी लगाय हे, जेमा इंक्यावन हजार तीन सौ प्रगणक अउ नौ हजार पर्यवेक्षक सामिल हे। जनगणना के काम राज्य के जम्मो जिला, एक सौ पंचानवे नगरीय निकाय मन म अउ दू सौ बावन तहसील मनके अंतर्गत उन्नीस हजार नौ सौ अठहत्तर गांव मन म संपादित कराय जाही। प्रदेस म जनगणना के दूसर चरण के काम अवइया बछर फरवरी म सुरू करे जाही।

समर स्पेशल ट्रेन

यात्री मन के सुविधा बर रेलवे डहार ले कुछेक समर स्पेशल ट्रेन ए महिना ले सुरू करे जावत हे। एमा वलसाड अउ खड़गपुर के बीच पंद्रह ले चौबीस अप्रैल तक दू-दू फेरा बर स्पेसल ट्रेन चलही, जउन ह हर बुधवार के वलसाड ले सुरू होके खड़गपुर पहुंचही। उहें, खड़गपुर ले ए ट्रेन शुक्रवार के चलही। एखर स्टापेज दुर्ग, रायपुर अउ बिलासपुर दे गेहे।
उहें, एलटीटी सांतरागाछी समर स्पेशल ट्रेन सत्रह ले छब्बीस अप्रैल तक दू-दू फेरा बर सुरू करे जावत हे। ए ट्रेन हर शुक्रवार के एलटीटी ले सुरू होके दुर्ग, रायपुर, बिलासपुर होवत सांतरागाछी पहुंचही। उहें, सांतरागाछी ले ए ट्रेन उन्नीस अउ छब्बीस अप्रैल तक चलही।
एखर संगेसंग पुणे- सांतरागाछी स्पेशल ट्रेन सत्रह ले सत्ताईस अप्रैल तक दू-दू फेरा बर चलाय जाही। एखर स्टापेज घलो दुर्ग, रायपुर, बिलासपुर दे गेहे।

अउ अब पेस हे मौसम के हाल…

प्रदेस म अवइया दिन म गरमी बाढ़ सकत हे। मौसम विभाग के मुताबिक काली मौसम शुष्क रइही। उहें, पंद्रह अप्रैल ले प्रदेस के मध्य भाग म अधिकतम तापमान म बढ़ोत्तरी होय के संभावना हे। ए बेरा प्रदेस म उत्तर-पश्चिम ले गरम अउ सुष्क हवा पहुंचत हे, जेखर सेति अवइया दू दिन म बस्तर संभाग ल छोड़के आने-आने संभाग मनके तापमान म करीबन दू डिग्री सेल्सियस के बढ़ोत्तरी होय के संभावना हे।

अउ अब थोरकुन समाचार सार म –

– रायपुर के इंदिरा गांधी कृषि विश्वविद्यालय म चलत सोयाबीन अनुसंधान केंद्र के राष्ट्रीय स्तर म सुघ्घर काम बर ‘‘सर्वश्रेष्ठ केंद्र पुरस्कार‘‘ ले सम्मानित करे गेहे।

– केंद्र सकरार ह बाबा साहेब डॉक्टर भीमराव अंबेडकर के जयंती के मउका म काली देसभर म छुट्टी घोसित करे हे। जारी आदेस के अनुसार काली जम्मो केंद्रीय सरकारी कार्यालय अउ औद्योगिक प्रतिष्ठान म छुट्टी रइही।

– खाद्य अउ औषधि प्रशासन विभाग ह रायपुर के भाठागांव स्थित एक ठिन फैक्ट्री म छापा मारके एक हजार दू सौ किलो नकली पनीर जब्त करे हे। मउका ले बड़ मात्रा म नकली पनीर बनाय के समान बरामद करे गेहे।

– जशपुर पुलिस ह ऑपरेसन आघात के तहत पत्थलगांव थाना क्षेत्र ले एक सौ बारह किलो गांजा के संग दू झिन आरोपी मन ल गिरफ्तार करे हे। जब्त गांजा के कीमत करीबन चौव्वन लाख रूपिया बताय जात हे।

अउ

– कोंडागांव जिला रोजगार अउ स्वरोजगार मार्गदर्शन केंद्र म अवइया सत्रह अप्रैल के प्लेसमेंट कैंप के आयोजन करे जाही, जेमा निजी क्षेत्र के आने-आने कंपनी डहार ले एक सौ छियालीस पद म भर्ती करे जाही।