प्रधानमंत्री नरेंद्र मोदी ह किहीन हे कि महिला आरक्षण कानून म सच्ची भावना के संग अमल करे के समय आ गेहे। जेखर ले दू हजार उनतीस ले लोकसभा अउ विधानसभा चुनाव माईलोगिन आरक्षण के संग कराय जाय सकय। लोकसभा अउ राज्यसभा म सदन के नेता मन ल लिखे पत्र म श्री मोदी ह माईलोगिन आरक्षण कानून म संसोधन के मुद्दा म सबो सदस्य ल एकजुट होय के अनुरोध करीन। ए कानून ल नारी सक्ति वंदन अधिनियम के नाम दे गेहे। ए संसोधन ल पारित करे बर संसद के बजट सत्र के अवधि बढ़ाय गे रिहीस। तीन दिन के बिसेस सत्र सोलह ले अट्ठारा अप्रैल तक चलही।
उहें, भारतीय जनता पार्टी के उपाध्यक्ष डॉक्टर सरोज पांडे ह रईपुर म संवाददाता सम्मेलन म नारी सक्ति वंदन अधिनियम ल लोकतंत्र बर एक जरूरी कदम बतइन। ओमन ह किहीन कि ए अधिनियम ले माईलोगिन मन ल विधानसभा अउ लोकसभा तैंतीस प्रतिसत आरक्षण मिलही। डॉक्टर पांडे ह प्रधानमंत्री नरेंद्र मोदी के प्रति आभार जतात हुए किहीन कि माईलोगिन मन ल उंखर अधिकार दे के दिसा म ए बड़का निरनय हे। ओमन ह किहीन कि माईलोगिन मन के भागीदारी बढ़े ले नीति निर्माण म सकारात्मक बदलाव आही। ए बेरा म महिला अउ बाल विकास मंत्री लक्ष्मी राजवाड़े घलो अधिनियम ल ऐतिहासिक बतात हुए किहीन कि एखर प्रचार-प्रसार बर राज्य म आने-आने कारीकरम आयोजित करे जाही।
फास्टैग-नई व्यवस्था
केंद्रीय सड़क परिवहन अउ राजमार्ग मंत्रालय ह देसभर के राष्ट्रीय राजमार्ग सुल्क केंद्र म भुगतान व्यवस्था म बदलाव करे हे। मंत्रालय के अनुसार दस अप्रैल ले सबो उपयोगकर्ता सुल्क के भुगतान केवल फास्टैग या यूपीआई के जरिया ले करे जावत हे।
मंत्रालय ह स्पष्ट करे हे कि ए नवा व्यवस्था के उद्देस्य भुगतान प्रक्रिया ल आसान अउ तेज बनाना हे। फेर चुनाव आचार संहिता के कारण तमिलनाडु, केरल, असम, पश्चिम बंगाल अउ केंद्रशासित प्रदेस पुडुचेरी म फिलहाल ए व्यवस्था लागू नइ करे गेहे।
मंत्रालय ह यात्री मन ले निर्धारित जरिया ले ही सुल्क भुगतान करे के अपील करे हे।
कृषि मंत्री-घोषणा
केंद्रीय कृषि मंत्री शिवराज सिंह चौहान ह केहे हे कि जलवायु परिवर्तन के चुनौती के बीच किसान मन ल आधुनिक सुविधा उपलब्ध कराना सरकार के प्राथमिकता हे। ओमन ह किहीन कि हर गांव तक उन्नत कृषि मशीनरी, अच्छा बीज अउ सही फसल लेके सलाह पहुंचाय जाही।
ओमन ह बतइन कि बदलत मौसम के कारण खेती प्रभावित होवत हे। एला देखत हुए वैज्ञानिक अइसन नवा फसल के किस्म विकसित करत हे, जेन जादा गरमी, जादा बरसा अउ कम पानी के स्थिति म घलो अच्छा उत्पादन दे सकय। कृषि मंत्री ह किहीन कि ए उन्नत किस्म ल जल्दी किसान मन तक पहुंचाय के प्रयास करे जावत हे।
अमरनाथ यात्रा
अमरनाथ यात्रा ए बछर तीन जुलाई ले अट्ठाईस अगस्त तक चलही। जम्मू कश्मीर के उपराज्यपाल मनोज सिन्हा ह बतइन कि पहिली पूजा ज्येष्ठ पूर्णिमा याने उनतीस जून के होही। पंजीकरण पंद्रह अप्रैल ले ऑनलाइन अउ ऑफलाइन सुरू होही। पंजीकरण सुविधा जम्मू अउ कश्मीर बैंक, पंजाब नेशनल बैंक, स्टेट बैंक ऑफ इंडिया अउ यश बैंक म उपलब्ध होही।
जनगणना-2027
भारत सरकार डहार ले जनगणना दू हजार सत्ताईस के तहत पहिली चरण म घर सूचीकरण अउ घर के गणना के काम छत्तीसगढ़ म एक मई ले तीस मई तक करे जाही। ए दउरान सबो आवासीय अउ गैर आवासीय भवन के स्थिति, उपयोग अउ सुविधा ले संबंधित जानकारी जुटाय जाही।
डिजीटल सुविधा के तहत नागरिक सोलह ले तीस अप्रैल तक स्व-गणना के जरिया ले अपन जानकारी ऑनलाइन दर्ज कर सकही। एखर बर ओमन ल एक पहिचान संख्या दे जाही, जेला प्रगणक ल देखाना होही। निर्धारित समय म प्रगणक घर-घर जाके जानकारी जुटाही। प्रशासन ह मनखे मन ले अपील करे हे कि ओमन सही जानकारी दे के ए काम म सहयोग करय।
आशा भोसले-निधन
प्रख्यात गायिका अउ पद्म विभूषण ले सम्मानित आशा भोसले के आज मुंबई म निधन होगिस। ओमन बयानवे बछर के रिहीन। उंखर अंतिम संस्कार काली मंझनिया चार बजे शिवाजी पार्क म होही। गायिका के पोती जनाई भोसले ह बतइन कि उंखर सीना म संक्रमण अउ कमजोरी के कारण काली संझा मुंबई के एक अस्पताल म भर्ती कराय गे रिहीस। आशा भोसले के करियर आठ दसक ले जादा लंबा रिहीस अउ ओमन अपन बहुमुखी प्रतिभा बर जाने जात रिहीस।
आशा भोसले अपन आठ दसक ले जादा लंबा कार्यकाल म आने-आने भाखा म बारह हजार पांच सौ ले जादा गीत रिकॉर्ड करीन। ओमन ह मराठी फिलिम ले अपन कैरियर के सुरूआत करीन अउ उन्नीस सौ अड़तालीस म ‘‘चुनरिया‘‘ फिलिम के संग हिन्दी फिलिम जगत म प्रवेस करीन। ओमन ल दू राष्ट्रीय फिल्म पुरस्कार, अट्ठारा महाराष्ट्र राज्य फिल्म पुरस्कार, नौ फिल्म फेयर पुरस्कार जेमा एक लाइफ टाइम अचीव मेंट अवार्ड घलो सामिल हे अउ सर्व श्रेष्ट पार्श्व गायन बर रिकॉर्ड सात फिल्म फेयर पुरस्कार मिलिस। बछर दू हजार म ओमन ल सिनेमा के क्षेत्र म भारत के सर्वोच्च सम्मान दादा साहब फालके पुरस्कार प्रदान करे गीस। बछर दू हजार आठ म भारत सरकार ह ओमन ल देस के दूसर सर्वोच्च नागरिक सम्मान पद्मविभूषण ले सम्मानित करीन।
प्रधानमंत्री नरेंद्र मोदी अउ छत्तीसगढ़ के मुख्यमंत्री विष्णुदेव साय के संग कतकोन वरिष्ठ मनखे मन ह महान गायिका आशा भोसले के निधन म गहरा सोक जतइन। प्रधानमंत्री ह सोसल मीडिया पोस्ट म किहीन कि आशा भोसले भारत के सर्वाधिक प्रतिष्ठित अउ बहूमुखी पार्श्व गायिक म ले एक रिहीन। ओमन ह किहीन कि दसक तक उंखर असाधारण संगीतमय सफर ह देस के सांस्कृतिक विरासत ल समृध्द करीन।
श्री मोदी ह किहीन कि उंखर गीत हमेसा लोगन मनके जीवन म गुंजत रइही। उहें, मुख्यमंत्री विष्णुदेव साय ह किहीन कि आशा भोसले अपन मधुर विलक्षण अउ दिल छुने वाला अवाज ले दसक तक भारतीय संगीत ल समृध्द करीन अउ करोड़ो दिल म अपन स्थान बनाइन।
‘नारी शक्ति युवा संसद‘
माई भारत, छत्तीसगढ़, केंद्रीय युवा कल्याण अउ खेल मंत्रालय डहार ले रईपुर स्थित राजीव गांधी राष्ट्रीय भूजल प्रसिक्षण अउ अनुसंधान संस्थान म ‘‘नारी शक्ति युवा संसद‘‘ के आयोजन करे गीस। ‘‘नारी शक्तिः विकसित भारत की अवाज़-समावेसी लोकतंत्र ल सुदृढ़ बनाना‘‘ बिसय म आधारित ए कारीकरम के उद्देस्य युवा माईलोगिन मन ल राष्ट्रीय स्तर के विधायी प्रक्रिया अउ नीति गत चर्चा ले जोड़े अउ ओमा नेतृत्व क्षमता के विकास करना रिहीस।
कारीकरम ल संबोधित करत हुए राज्य बाल अधिकार संरक्षण आयोग के अध्यक्ष डॉक्टर वर्णिका शर्मा ह किहीन कि सशक्त अउ समावेसी लोकतंत्र तभी संभव हे, जब युवा माईलोगिन नीति-निर्माण के प्रक्रिया म बढ़-चढ़के हिस्सा लिही। कारीकरम म विशिष्ट अतिथि के रूप म उपस्थित रईपुर के महापौर मीनल चौबे ह युवा प्रतिभागी मन ले संवाद करीन।
कारीकरम के मुख्य आकर्षण ‘महिला आरक्षण विधेयक‘ म केंद्रित एक ‘मॉक संसद‘ सत्र रिहीस। एमा राज्यभर ले आय चालीस युवा महिला प्रतिभागी मन ह सांसद अउ मंत्रि के भूमिका निभाय हे।
अउ अब पेस हे मौसम के हाल…
मौसम विभाग ह प्रदेस म गरमी बाढ़े के संभावना जताय हे। मौसम विभाग ले मिले जानबा के अनुसार पाछू चौबीस घंटा के दउरान रईपुर के संग आने जिला मनके पारा एक डिग्री सेल्यिस तक बाढ़ गेहे, अउ अवइया दिन म ए बढ़ोत्तरी लगभग चार डिग्री सेल्सियस तक हो सकत हे। मौसम विभाग ह पंद्रह अप्रैल के बाद प्रदेस के कतकोन क्षेत्र म ग्रीष्म लहर के संभावना जताय हे।