मुख्यमंत्री ह किहीन कि केंद्र सरकार कोति ले सुरू करे गे ‘ज्ञानभारतम् राष्ट्रीय पांडुलिपि‘ सर्वेक्षण अभियान म छत्तीसगढ़ बड़चढ़ के भाग लेवत हे। प्रदेस के तैंतीस ठिन जिला मन म अभी तक छब्बीस जिला म जिला स्तरीय समिति के गठन करके नोडल अधिकारी मनके नियुक्ति कर दे गेहे। उहें, बांचे सात जिला म ए काम चलत हे। ए अभियान म केंद्र सरकार कोति ले प्रारंभिक रूप म छत्तीसगढ़ म एक सौ अड़तालीस पांडुलिपि के जानकारी दे गे रिहीस, जेखर बाद सर्वे के काम म तेजी आय हे। अभी राज्य के छै ठिन जिला म सर्वे के काम सुरू हो गेहे। अभी तक करीबन बयालीस सौ पांडुलिपि के सर्वे ज्ञान भारतम् ऐप ले करे गेहे।
ज्योतिबा फुले-जयंती
राष्ट्र आज समाज सुधारक अउ महान जन सेवक महात्मा ज्योतिबा फुले के जयंती म ओमन ल श्रध्दांजलि देवत हे। राष्ट्रपति द्रौपदी मुर्मु, उपराष्ट्रपति सी.पी.राधाकृष्णन अउ प्रधानमंत्री नरेंद्र मोदी ह आज संसद परिसर म महात्मा ज्योतिबा फुले के जयंती म फूलमाला चढ़ाइन। प्रधानमंत्री ह किहीन कि ज्योतिबा फुले के जीवन साहस अउ सामाजिक कल्याण बर समर्पण के उदाहरण हवय।
ऐति, छत्तीसगढ़ म ज्योतिबा फुले के जयंती म कतकोन करीकरम होवत हे। रईपुर के प्रदेस भाजपा कार्यालय म मुख्यमंत्री ह ज्योतिबा फुले के चित्र म फूलमाला चढ़ाइन। ए बेरा म मुख्यमंत्री ह किहीन कि महात्मा ज्योतिबा फुले ह महिला शिक्षा के दिसा म महत्ता के काम करीन हे। ओमन देस म समानता, न्याय अउ आत्म सम्मान के अलख जगइन।
महिला आरक्षण
नारी शक्ति वंदन अधिनियम म गोठबात बर अवइया सोलह अप्रैल ले तीन दिवसीय संसद के बिसेस सत्र बलाय जाही। ए संबंध अधिसूचना जारी कर दे गेहे। मुख्यमंत्री विष्णुदेव साय ह किहीन कि केंद्र सरकार नारी शक्ति वंदन अधिनियम ले राजनीति म माईलोगन मनके भागीदारी सुनिश्चित करे बर प्रतिबध्द हवय।
उहें, भारतीय जनता पार्टी के राष्ट्रीय उपाध्यक्ष लता उसेंडी ह किहीन हे कि महिला आरक्षण विधेयक माईलोगन मनके सशक्तिकरण के दिसा म महत्वपूर्ण कदम होही। ओमन किहीन कि ए विधेयक ले महिला मनके भागीदारी बाढ़ही अउ ओमन ल तैंतीस प्रतिसत आरक्षण मिलही। सुश्री उसेंडी ह बतइन कि ए पहल लोकतंत्र ल अउ जादा मजबूत बनाही।
नवजात शिशु-देखभाल ईकाई
गौरेला-पेंड्रा-मरवाही जिला चिकित्सालय म आज स्वास्थ्य मंत्री श्याम बिहारी जायसवाल अउ केंद्रीय आवासन मंत्री तोखन साहू ह बिसेस नवजात शिशु देखभाल ईकाई के सुभारंभ करीन। ए मउका म ओमन किहीन कि नान्हे लइका मनके बने देखभाल सुनिश्चित करना सरकार के प्राथमिकता हरय। नवा इाकई सुरू होय ले जिला म शिशु मृत्युदर म कमी आही अउ गंभीर रूप ले बीमार लइका मन ल स्थानीय स्तर म बने उपचार मिल सकही।
नगरीय निकाय-त्रिस्तरीय चुनाव
राज्य म नगरीय निकाय अउ त्रिस्तरीय पंचायत उपचुनाव के तियारी तेज हो गेहे। राज्य निर्वाचन आयुक्त अजय सिंह ह मतदाता सूची पुनरीक्षण काम ल साफगोई अउ बेरा रहत पूरा करे के निरदेस दीन हे। प्रारंभिक मतदाता सूची के प्रकाशन तेरह अप्रैल के करे जाही। उहें, दावा आपत्ति बीस अप्रैल तक ले जाही। एखर निराकरण सत्ताईस अप्रैल तक होही। मतदाता सूची के अंतिम प्रकासन पांच मई के करे जाही।
‘मेरा युवा भारत‘-बजट क्वेस्ट
मेरा युवा भारत अभियान म रईपुर म काली ले दू दिवसीय बजट क्वेस्ट राखे जाही। ए कारीकरम के समापन समारोह म मुख्यमंत्री विष्णुदेव साय, उपमुख्यमंत्री अरूण साव अउ केंद्रीय राज्यमंत्री तोखन साहू संघरीन। ए कारीकरम म देसभर ले चुने गे युवा मन भाग लिही। उहें, प्रदेस ले चार सौ इकहत्तर प्रतिभागी सामिल हेही। ए कारीकरम म शिक्षा, कौसल, विकास, कृषि अउ ग्रामीण अर्थव्यवस्था जइसन बिसय म गोठबात होही। काली पंजीकरण के संग महिला युवा संसद के आयोजन करे जाही।
मुख्यमंत्री-वाईस चांसलर मीट
मुख्यमंत्री विष्णुदेव साय ह किहीन हे स्वस्थ नागरिक विकसित छत्तीसगढ़ के आधारसिला हवय। श्री साय ह काली नवा रईपुर म राखे गे वाईस चांसलर मीट म बोलत किहीन कि ए सम्मेलन ले स्वास्थ्य शिक्षा अउ चिकित्सा क्षेत्र म नवाचार ल बढ़ावा मिलही। मुख्यमंत्री ह बतइन कि प्रदेस म नवा मेडिकल अउ नर्सिंग महाविद्यालय के बढ़वार करे जात हे। एखर बर पांच हजार बिस्तर वाले सुपर स्पेशियलिटी अस्पताल बनाय जाही। एखर ले प्रदेसवासी मन ल विश्व स्तरीय चिकित्सा सुविधा मिलही। ओमन किहीन कि पारंपरिक अउ आधुनिक चिकित्सा के मेल ले बने स्वास्थ्य सेवा मिलही। मुख्यमंत्री ह बतइन कि सुकमा म अवइया तेरह अप्रैल के मुख्यमंत्री बस्तर स्वास्थ्य योजना के सुभारंभ करे जाही। एमा छत्तीस लाख लोगन के स्वास्थ्य जांच, परीक्षण अउ आयुष्मान कारड बनाय के काम सुरू करे जाही।
माओवादी-आत्मसमर्पण
तेलंगाना म बयालिस झिन माओवादी मन ह पुलिस के आगू आत्मसमर्पण करीन हे। एमा पीएलजीए बटालियन के कमांडर सोडी मन ल उर्फ केशा घलो सामिल हे। आत्मसमर्पण करइया माओवादी मन उपर करीबन एक करोड़ तिरानवे लाख रूपिया के इनाम घोसित रिहीस। पुलिस के मुताबिक आत्मसमर्पण के दउरान ए माओवादी मन ह छत्तीस ठिन हथियार घलो सौंपे हे, जेमा पांच ठिन एके फोर्टिसेवन रायफल अउ चार सेल्फलोडिंग रायफल सामिल हे। एखर संगेसंग माओवादी मन ह आठ सौ ग्राम सोना घलो सौंपे हे। तेलंगाना के पुलिस महानिदेशक बी. शिवाधर रेड्डी ह बतइन कि तेलंगाना अउ सशस्त्र माओवादी गतिविधि ले मुक्त हो गेहे।
ऐति, बस्तर रेंज के पुलिस महानिरीक्षक सुंदरराज पी. ह किहीन हे कि तेलंगाना म बयालिस झिन माओवादी मनके आत्मसमर्पण ए बताथे कि माओवादी संगठन अपन अंतिम चरण कोति बाढ़त हे। ओमन बस्तर क्षेत्र म बांचे कुछेक माओवादी कैडर मन ले अपील करत किहीन कि बदलत बेरा ल समझत हिंसा के रद्दा छोड़के समाज के मुख्यधारा म लहुट आवय।
विश्व पार्किंसन दिवस
आज विश्व भर म पार्किंसन रोग कोति लोगन के जागरूकता बढ़ाय बर विश्व पार्किंसन दिवस मनाय जात हे। ए तंत्रिका तंत्र अउ मस्तिष्क कोशिका ल परभावित करइया एक बीमारी हवय। ए मउका म छत्तीसगढ़ समेत देसभर के कतकोन कारीकरम होवत हे। राजनांदगांव के कम्पोजिट रीजनल सेंटर- सीआरसी कोति ले विश्व पार्किंसन दिवस अउ कैंसर जागरूकता मांग म कारीकरम राखे गीस। ए बेरा म विद्यार्थी, लाभार्थी अउ आने लोगन ल पार्किंसन रोग अउ मौखिक कैंसर के जल्दी पहिचान करके ओला ठीक करे के उपाय के संबंध म बताय गीस।
पोस्ट मैट्रिक छात्रवृत्ति योजना
राज्य म पोस्ट मैट्रिक छात्रवृत्ति योजना म बैंक खाता ले जुड़े गलती ल अट्ठारा अप्रैल तक सुधारे जा सकत हे। अनुसूचित जाति, जनजाति अउ अन्य पिछड़ा वर्ग के अइसन विद्यार्थी जिंखर छात्रवृत्ति खाता म जमा नइ हो पात हे। ओमन तय पोर्टल म जाके गलती ल सुधार कर सकत हे। समय-सीमा के भीतरी सुधार नइ होय म छात्रवृत्ति रूक सकत हे।
दुर्घटना
कोंडागांव म पलारी चौक तीर काली होय रद्दा दुर्घटना म दू झन के मउत हो गेहे। पुलिस ले मिले जानकारी के मुताबिक धान ले लदे एक टरक ल दूपहिया गाड़ी ल अपन चपेट म ले लीस। ए हादसा म दुपहिया सवार प्रधान आरक्षक ज्ञान सिंह मांडवी अउ गांव के एक मनखे के मउकच म मउत होगे। पुलिस ह मामला दरज करके जांच सुरू कर देहे।
जिले की चिट्ठी
प्रादेशिक समाचार एकांश, आकाशवाणी रईपुर कोति ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सबो केंंद्र रिले करही। ए बखत के अंक म ‘‘राजनांदगांव‘‘ जिला के संबंध म जानकारी दे जाही।
अउ अब जानन मौसम के हाल…
प्रदेस म अवइया कुछेक दिन म अधिकतम तापमान म बढ़वार होय के संभावना हरय। मौसम विभाग के मुताबिक रईपुर, दुरूग अउ बिलासपुर समेत कई ठिन जिला म तापमान बयालिस डिग्री सेल्सियस तक जा सकत हे। उहें, लू चले के स्थिति बन सकत हे।
स्वास्थ्य विभाग ह लोगन ले मंझनिया बेरा बाहिर निकले ले बांचे जरूरत के मुताबिक पानी पिये अउ सावधानी राखे के सलाह दीन हे।