आज दिनभर के खबर ल अपन गुरतुर छत्तीसगढ़ी भाखा म पढ़व

मुख्यमंत्री बस्तर स्वास्थ्य योजना के तहत छत्तीस लाख लोगन के हेल्थ स्क्रीनिंग अउ आयुष्मान कारड निर्माण के कारज तेरह अप्रैल ले सुरू करे जाही। एखर सुरूआत सुकमा जिला ले होही। स्वास्थ्य मंत्री श्याम बिहारी जायसवाल ह आज नवा रइपुर के पंडित दीन दयाल उपाध्याय स्मृति स्वास्थ्य विज्ञान अउ आयुष विश्वविद्यालय म आयोजित ऑल इंडिया हेल्थ साइंसेज वाइस चांसलर मीट ल संबोधित करत ए जानकारी देइन।
सम्मेलन ल संबोधित करत मुख्यमंत्री विष्णुदेव साय ह किहीन हे कि- ए आयोजन म स्वास्थ्य शिक्षा अउ चिकित्सा क्षेत्र म नवाचार के बड़का आदान-प्रदान होही, जउन अवइया बेरा म मील के पत्थर साबित होही। मुख्यमंत्री ह राज्य म स्वास्थ्य अधोसंरचना के तेजी ले बिस्तार के गोठ करत किहीन कि राजधानी क्षेत्र म मेडिसिटी हब विकसित करे जावत हे, जेखर तहत पांच हजार बिस्तर वाला सुपर स्पेशियलिटी अस्पताल स्थापित करे जाही।

भारत बजट क्वेस्ट

केंद्रीय युवा कारीकरम अउ खेल मंत्रालय के अंतर्गत ‘‘माय भारत छत्तीसगढ़‘़ के डहार ले नवा रइपुर म बारह अउ तेरह अप्रैल के ‘माय भारत बजट क्वेस्ट‘ के आयोजन करे जाही। ‘‘माय भारत छत्तीसगढ़‘‘ के राज्य निदेशक ह पत्रकारवार्ता म बतइन कि बारह अप्रैल के नवा रइपुर के राजीव गांधी भू-जल प्रसिक्षण अउ अनुसंधान संस्थान म ‘‘नारी सक्ति विकसित भारत के आवाज‘‘ बिसय उपर महिला युवा संसद आयोजित करे जाही, जेमा महिला आरक्षण विधेयक उपर संरचित संसदीय सैली के चर्चा माईलोगन प्रतिभागी भाग लिहीं।
उहें, तेरह अप्रैल के नवा रइपुर के ट्रिपल आईटी म आयोजित कारीकरम म केंद्रीय बजट के क्षेत्रीय पहलू उपर गोठबात करे जाही। जेमा छत्तीसगढ़ के चार सौ इकहत्तर चयनित प्रतिभागी राष्ट्रीय अउ राज्य स्तरीय टॉपर के संग भाग लिहीं। ए कारीकरम देस के सत्रह जघा आयोजित करे जाही। जेमा पंद्रह हजार ले युवा हिस्सा लिहीं।
बतादन कि ए कारीकरम ल प्रधानमंत्री ह वर्चुअल माध्यम ले संबोधित करहीं, जेमा केंद्रीय युवा अउ खेल मंत्री मनसुख मांडविया घलो सामिल होहीं।

प्रवासी मजदूर-सिलेंडर

राज्य सरकार ह प्रवासी मजदूर मन ल राहत पहुंचाय के उद्देस्य ले पांच किलो के एलपीजी गैस सिलेंडर देवाय के निरनय लेहे। खाद्य विभाग ह एखर ले जुड़े दिसा-निरदेस सबो जिला कलेक्टर मन ल जारी करे हे। आदेस म प्रवासी मजदूर मन ल गैस सिलेंडर संबंधित वितरण केंद्र ले दे जाही अउ जेखर बर हितग्राही मन ल पहिचान प्रमाण के रूप म आधार कारड अउ श्रम विभाग डहार ले जारी पंजीयन प्रमाण पत्र देखाय बर परही। जरूरी दस्तावेज के सत्यापन के बाद पात्र हितग्राही मन ल नवा कनेक्सन अउ रिफिल सिलेंडर उपलब्ध कराय जाही।

आयुष्मान-अस्पताल कार्रवाई

प्रदेस म आयुष्मान भारत प्रधानमंत्री जन आरोग्य योजना के तहत दिसा-निरदेस मनके पालन नइ करइया उनसठ अस्पताल मनके खिलाफ कारवाही करे गिस। राज्य नोडल एजेंसी राष्ट्रीय स्वास्थ्य प्राधिकरण के मानक के अनुसार ए कारवाही करे हे।
उहें, निर्धारित बेरा म जरूरी जानकारी अपडेट नइ करे म इक्कीस ठन अस्पताल मन ल निलंबित करे गिस। उंहे, बारह ठन अस्पताल मन ल जानकारी अउ प्रश्न के उत्तर पूरा करे तक निलंबित करे गेहे। एखर अलावा छब्बीस ठन अस्पताल मनके भुगतान अउ पूर्व स्वीकृति उपर रोक लगाय गेहे।
ऐति, राज्य नोडल एजेंसी ह सबो अस्पताल मन ले पोर्टल म निर्धारित बेरा म सबो जरूरी जानकारी अउ दस्तावेज अपलोड करे बर किहीस हे।

दुर्घटना

कांकेर जिला म राष्ट्रीय राजमार्ग-30 म दू ठन कार के जोरदरहा टकराय ले छै लोगन के मउत होगे। उहें, तीन झन आने लोगन गंभीर रूप ले घायल होगिन। पुलिस के मुताबिक ए लोगन बिहाव के बाद अपन गांव उड़कुड़ा- चारामा लहुटत रिहीन हे, इही बेरा नाथिया नवागांव के तिर उंखर कार एक ठन आने कार ले टकरा गिस। जिंहा छै लोगन के मउत हो गिस। उहें, तीन झन गंभीर रूप ले घायल मन ल कांकेर के अस्पताल म भर्ती कराय गिस।
मुख्यमंत्री विष्ण्ुदेव साय ह ए घटना उपर दुख जतावत मृतक मनके परिजन के प्रति सोक प्रकट करिन।
उहें, दुरूग जिला के पुलगांव थाना इलाका के कोनारी गांव के तिर काली एक ठन चारपहिया गाड़ी के टक्कर ले फटफटी सवार दू झन के मउत हो गिस। उहें, चारपहिया वाहन सवार दू झन आने मनखे घायल होगिन।

नगरीय निकाय चुनाव-मतदाता सूची

प्रदेस म अवइया नगरीय निकाय अउ त्रिस्तरीय पंचायत आम अउ उपचुनाव के तियारी सुरू हो गेहे। ए चुनाव मई-जून महिना म संभावित हे। एखर बर मतदाता सूची के प्रारंभिक प्रकासन तेरह अप्रैल के करे जाही। बीस अप्रैल तक दावा-आपत्ति लगा सकहीं अउ सत्ताईस अप्रैल तक उंखर निराकरण करे जाही। मतदाता सूची के आखिरी प्रकासन पांच मई के करे जाही।

मुख्यमंत्री-निजी स्कूल

शिक्षा के अधिकार अधिनियम के तहत प्रदेस के निजी स्कूल मन ल नर्सरी या पहिली कक्षा म पच्चीस प्रतिसत सीट आरक्षित करना अनिवार्य हे। एखर एवज म राज्य सरकार ह प्रति छात्र खरचा के आधार म स्कूल मन ल प्रतिपूर्ति रासि के भुगतान करथे। सबो निजी स्कूल मन ल आरटीई के प्रावधान के तहत मान्यता देय गेहे।

इही बीच, मुख्यमंत्री विष्णुदेव साय ह सोज गोठ किहीन हे कि प्रदेस म निजी स्कूल मन के मनमानी बर्दास्त नइ करे जाही। पालक मन ल कोनो प्रकार परेसानी नइ होय ल दे जाही अउ उंखर सिकइत उपर तुरते कारवाही करे जाही। मुख्यमंत्री ह यहू किहीन कि- यदि कोनो घलो स्कूल ह नियम के उल्लंघन करही, त उंखर उपर सख्त कारवाही करे जाही।

अग्निवीर भर्ती-आवेदन

भारतीय थल सेना म अग्निवीर भर्ती बर ऑनलाइन आवेदन करे के आज आखिरी तारीख हे। जिला रोजगार अउ स्वरोजगार मार्गदर्सन केंद्र के अनुसार इच्छुक आवेदक भारतीय सेना के वेबसाइट-डब्ल्यू डब्ल्यू डब्ल्यू डॉट ज्वॉइन इंडियन आर्मी डॉट एनआईसी डॉट इन म आवेदन कर सकत हें। पुरूष मन बर अग्निवीर म जनरल, तकनीकी, लिपिक, स्टोर कीपर अउ ट्रेडमैन के पद म भर्ती करे जाही। उहें, सेना पुलिस, स्थाई कैडर नर्सिंग असिस्टेंट वेट अउ सिपाही  फार्मा के महिला पद म भर्ती करे जाही।

बातों-बातों-में

प्रादेशिक समाचार एकांश के समसामयिक बिषय उपर आधारित कारीकरम ‘‘बातों-बातों में‘‘ ए दारी रेलवे डहार ले यात्री सुविधा के संग माल लदान के क्षेत्र म बीते वित्तीय बछर म हासिल करे गे उपलब्धि उपर रइपुर रेल मंडल प्रबंधक दयानंद ले लेय गे भेंटवार्ता के प्रसारण करे जाही। जेला काली ग्यारा अप्रैल के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। जेला छत्तीसगढ़ के जम्मो आकाशवाणी केंद्र एक्के संघरा रिले करही।

सट्टा-आरोपी गिरफ्तार

बलौदाबाजार पुलिस ह आईपीएल क्रिकेट म ऑनलाइन सट्टा खेलइया अंतरराज्यीय गिरोह के खुलासा करत सोलह झन आरोपी मन ल गिरफ्तार करे हे। पुलिस अधीक्षक भावना गुप्ता ह बतइन कि- चार अप्रैल के भाटापारा  रेलवे स्टेसन के तिर अजय बतरा ल मोबाइल ले ऑनलाइन सट्टा खेलावत पकड़े गे रिहीस। जांच म हिमाचल प्रदेस ले एक ठन गिरोह के ऑनलाइन सट्टा संचालित करे के पता चलिस। एखर बाद पुलिस ह हिमाचल प्रदेस के सोलन जिला के परवानु इलाका म एक ठन किराया घर म छापामार के सोलह झन आरोपी मन ल गिरफ्तार करिस। आरोपी मन ले अब्बड़ अकन जिनिस जब्त करे गिस।

अउ अब थोरकुन समाचार सार म –

– साझा प्राकृतिक संसाधन-कॉमन्स के सुशासन अउ सामुदायिक संरक्षण बिसय उपर केंद्रित दू दिवसीय ‘‘कॉमन्स कंवीनिंग‘‘ के आयोजन नवा रइपुर के ट्राइबल रिसर्च एंड ट्रेनिंग इंस्टीट्यूड म करे गिस।

– छत्तीसगढ़ माध्यमिक शिक्षा मंडल के डहार ले प्रश्न पत्र लीक होय के बाद रद्द करे गे बारहवीं के हिंदी परीक्षा आज दुबारा होइस।

– प्रधानमंत्री इंटर्नशिप योजना के तहत दुरूग के उदय प्रसाद शासकीय पॉलिटेक्निक म तीस मार्च ले चलइया बिसेस सिविर उनतीस अप्रैल तक चलही।

– एंटी करप्शन ब्यूरो के टीम ह रइपुर के क्षेत्रीय परिवहन कार्यालय के लिपिक ल चौदह हजार रूपिया रिस्वत लेवत रंगेहाथ गिरफ्तार करिस।

अउ

– जोहार छत्तीसगढ़ पार्टी के अध्यक्ष अमित बघेल ल हाईकोर्ट ले अंतिम जमानत मिल गेहे।