प्रधानमंत्री नरेन्द्र मोदी ह कहिन हे कि विधायी निकाय म माईलोगिन मन बर आरक्षण समय के मांग हे। ओमन ह कहिन कि माईलोगिन मन बर आरक्षण ले लोकतंत्र ह जादा जीवंत अउ सहभागी बनही। एक वीडियो म समाचार पत्र म दे गे अपन विशेष लेख के उल्लेख करत हुए प्रधानमंत्री ह कहिन कि माईलोगिन मनके आरक्षण ले जुड़े जरूरी विधेयक उपर चर्चा अउ ओला पारित कराय बर सोलह अप्रैल के संसद के सत्र बुलाय गेहे। प्रधानमंत्री ह कहिन कि ए जरूरी हे कि बछर दू हजार उनतीस के लोकसभा चुनाव अउ अवइया समय म आने-आने राज्य म विधानसभा चुनाव माईलोगिन मन बर आरक्षित सीट के प्रावधान के संग आयोजित हो।
इही बीच, छत्तीसगढ़ के मुख्यमंत्री विष्णुदेव साय ह कहिन कि नारी शक्ति वंदन अधिनियम बर संसद के विशेष सत्र बुलाय गेहे। ओमन ह कहिन कि ए अधिनियम के जरिया ले माईलोगिन मन ल तैंतीस प्रतिशत आरक्षण देके मार्ग प्रशस्त होही।
पीएम आशा योजना
छत्तीसगढ़ म प्रधानमंत्री अन्नदाता आय संरक्षण अभियान – पीएम आशा योजना के तहत किसान मन ल राहत देवत हुए पंजीयन के आखिरी तारीख बढ़ाके बीस अप्रैल कर दे गेहे। राज्य म न्यूनतम समर्थन मूल्य म दलहन अउ तिलहन फसल के खरीदी जारी हे। एमा अवइया खरीफ बछर म अरहर, उड़द, मूंग, सोयाबीन अउ मूंगफली के संग रबी बछर म चना, मसूर अउ सरसों फसल बर किसान अब बीस अप्रैल तक सेवा सहकारी समिति के जरिया ले पंजीयन करा सकही। किसान जरूरी दस्तावेज के संग ग्रामीण कृषि विस्तार अधिकारी के जरिया ले आवेदन कर सकत हे। फसल अउ रकबा के सत्यापन बर पटवारी अउ कृषि अधिकारी के संयुक्त प्रमाण पत्र ल मान्य करे जाही। कृषि विभाग ह किसान मन ले समय राहत पंजीयन कराय के अपील करे हे।
मुख्यमंत्री-प्रतिनिधि मुलाकात
मुख्यमंत्री विष्णुदेव साय ले आज रायपुर म गूगल फॉर एजुकेशन इंडिया के प्रमुख संजय जैन अउ गूगल इंडिया के पब्लिक पॉलिसी प्रमुख राकेश रंजन ह मुलाकात करीन। ए दउरान श्री जैन ह बतईन कि रायपुर जिला म पायलट प्रोजेक्ट के रूप म ‘‘एआई सक्षम शिक्षा अभियान‘‘ के सुरूआत करे गेहे। ए अभियान के जरिया ले स्कूल सिक्षा म आर्टिफिशियल इंटेलिजेंस आधारित नवाचार ल बढ़ावा दे जाही। ओमन ह बतईन कि ए अभियान के तहत राज्य म सिक्षक ल आधुनिक डिजिटल टूल्स अउ एआई आधारित शिक्षण पद्धति के प्रशिक्षण दे जाही। ओमन ह बतईन कि पहिली चरण के सुरूआत रायपुर ले करे जाही। एखर बाद एखर विस्तार राज्य के सबो जिला म करे जाही।
मुख्यमंत्री ह कहिन कि छत्तीसगढ़ के शिक्षा व्यवस्था ल भविष्य के जरूरत के अनुरूप तकनीक-सक्षम अउ नवाचार आधारित बनाय बर राज्य सरकार लगातार प्रयास करत हे। श्री साय ह कहिन कि ‘‘एआई सक्षम शिक्षा अभियान‘‘ जइसे कार्यक्रम सिक्षक अउ विद्यार्थी मन बर परिवर्तनकारी सिद्ध होही।
मुख्यमंत्री-सरगुजा
मुख्यमंत्री विष्णुदेव साय आज सरगुजा जिला के लुंड्रा विकासखंड म आयोजित किसान सम्मेलन म सामिल होइन। ए बेरा म ओमन ह दू सौ अस्सी करोड़ रूपिया के आने-आने विकास काम के भूमिपूजन अउ लोकार्पण करीन। एखर बाद श्री साय ह अंबिकापुर म पूर्व विधायक पंडित रविशंकर त्रिपाठी अउ शहीद चन्द्रशेखर आजादा के प्रतिमा के अनावरण घलो करीन।
संपत्ति कर-राहत
प्रदेस म संपत्ति कर के बकायादार मन ल राहत देत हुए नगरीय प्रसासन विभाग ह तीस अप्रैल तक भुगतान म अधिभार ले छूट देहे। ए दउरान कर जमा करे म अतिरिक्त पइसा नइ लगही। नगर निगम अउ नगरीय निकाय डहार ले बकायादार मन ले संपर्क करके ओमन ल समय म कर जमा करे बर जागरूक करे जात हे। अधिकारी मन ह लोगन मन ले अपील करे हे कि ओमन निर्धारित अवधि म संपत्ति कर के भुगतान करके छूट के लाभ लेवयं। संगेसंग चेतावनी दे गेहे कि समय म भुगतान नइ करे म नियम के अनुसार कार्रवाई करे जाही।
पोषण पखवाड़ा
महिला अउ बाल विकास मंत्रालय डहार ले आज ले देशभर म ‘‘पोषण पखवाड़ा‘‘ के आयोजन करे जात हे। ए पखवाड़ा तेईस अप्रैल तक चलही। ए बछर ‘‘पोषण पखवाड़ा‘‘ के विषय ‘‘जीवन के पहले छह वर्षों में मस्तिष्क विकास को बढ़ावा देना‘‘ राखे गेहे।
छत्तीसगढ़ म घलो पोषण पखवाड़ा के तहत आने-आने कार्यक्रम आयोजित करे जात हे। ए दउरान सबो जिला म आंगनबाड़ी केन्द्र के जरिया ले माईलोगिन, लइका अउ परिवार के भागीदारी के संग आने-आने गतिविधि आयोजित करे जाही। अभियान के दउरान महतारी अउ शिशु पोषण, सुरूआती देखभाल, खेल आधारित सिक्षा अउ जागरूकता कार्यक्रम म विशेष ध्यान दे जाही।
ग्राम सभा
प्रदेस के सबो ग्राम पंचायत म चौदह अप्रैल के ग्रामसभा के आयोजन करे जाही। पंचायत अउ ग्रामीण विकास विभाग के निरदेस के अनुसार ए आयोजन डॉक्टर भीमराव अंबेडकर जयंती के बेरा म करे जात हे। निरदेस के अनुसार ग्रामसभा के कार्यवाही के वीडियो रिकॉर्डिंग करना अनिवार्य होही अउ एला मोबाइल अनुप्रयोग म अपलोड करे जाही। संगेसंग कार्यवाही के विवरण तैयार करे बर नवा तकनीकी व्यवस्था के उपयोग करे जाही। राज्य सासन ह बछर म निर्धारित दिनांक म ग्रामसभा के आयोजन अनिवार्य करे हे।
सोनमणि बोरा-बैठक
रायपुर म आदिम जाति, अनुसूचित जाति, अन्य पिछड़ा वर्ग अउ अल्पसंख्यक विकास विभाग के समीक्षा बइठका प्रमुख सचिव सोनमणि बोरा के अध्यक्षता म आयोजित करे गीस। बइठका म विभागीय योजना अउ काम के प्रगति के समीक्षा करे गीस। बजट के समुचित उपयोग नइ करे म बलौदाबाजार, बेमेतरा, जशपुर अउ बिलासपुर के सहायक आयुक्त ल कारण बताओ नोटिस जारी करे के निरदेस दे गीस।
प्रमुख सचिव ह आश्रम छात्रावास म मरम्मत, पोताई, पानी अउ बिजली व्यवस्था ल दू महीना म पूरा करे बर कहिन। सेप्टिक टैंक के सफाई मसीन ले कराय के निरदेस दे गीस। संगेसंग रूके वन अधिकार प्रकरण ल पन्द्रह दिन म निपटाय के निरदेस घलो दे गीस।
सिंचाई जलाशय
राज्य के बारह बड़े अउ चौंतीस मध्यम सिंचाई परियोजना म ए बछर जलभराव के स्थिति अच्छा हे। वर्तमान म राज्य के छियालीस प्रमुख सिंचाई जलाशय म सड़सठ प्रतिशत ले जादा जल भरे हुए हे, जेन पाछु दू बछर के तुलना म ठीक हे। ए स्थिति राज्य म अच्छा बरसा, सुनियोजित जल प्रबंधन अउ जलाशय के प्रभावी संचालन के परिणाम हे।
मुख्यमंत्री विष्णुदेव साय ह कहिन हे कि ए बछर जलाशय म ठीक जलभराव समन्वित प्रयास के परिणाम हे। ओमन अधिकारी मन ल जलाशय के जलस्तर के निगरानी करत हुए जल के उपयोग सुनिश्चित करे के निरदेस देहे।
हाईकोर्ट-वन्यजीव मौत
छत्तीसगढ़ म बिजली करेंट ले वन्यजीव के मउत के मामला ल लेके उच्च न्यायालय ह खुदे संज्ञान म लेगे जनहित याचिका म सुनवाई करीन। मुख्य न्यायाधीश अउ न्यायमूर्ति रविन्द्र कुमार अग्रवाल के खंडपीठ म होय सुनवाई के दउरान आने-आने घटना के उल्लेख करे गीस, एमा हाथी, भालू अउ आने वन्यजीव मनके मउत सामिल हे। न्यायालय ह वन अउ जलवायु परिवर्तन विभाग के अपर मुख्य सचिव ले सपथ पत्र मांगे हे। एमा घटना के कारण अउ उठाय जावत कदम के जानकारी दे बर कहे गेहे। मामला के अवइया सुनवाई पांच मई के होही।
ग्रीष्मकालीन स्पेशल ट्रेन
दक्षिण पूर्व मध्य रेलवे के नागपुर मंडल ह गोंदिया-रक्सौल-गोंदिया के बीच पच्चीस अप्रैल ले सत्ताईस जून तक दस-दस फेरा बर साप्ताहिक ग्रीष्मकालीन स्पेशल ट्रेन चलाय के निर्णय लेहे। ए ट्रेन के ठहराव डोंगरगढ़, राजनांदगांव, दुरूग, रायपुर, बिलासपुर, चांपा अउ रायगढ़ म घलो दे गेहे।
अउ अब थोरकुन समाचार सार म –
– मुख्यमंत्री विष्णुदेव साय के अध्यक्षता म अवइया पन्द्रह अप्रैल के मंत्रालय म राज्य मंत्रिपरिषद के बइठका होही।
– शराब घोटाला मामला म छत्तीसगढ़ उच्च न्यायालय ले जमानत मिले के बाद सौम्या चौरसिया अउ के.के. श्रीवास्तव जेल ले रिहा होगे हे। दूनों ल कोर्ट ह पासपोर्ट जमा करे अउ हर पेसी म उपस्थित रेहे के सर्त म जमानत देहे।
– विकसित भारत – जी राम जी अधिनियम के तहत बलौदाबाजार जिला म रोजगार दिवस के आयोजन करे गीस। ए दउरान करीबन पांच हजार काम म बत्तीस हजार ले जादा श्रमिक मन ल रोजगार दे गीस।
– महासमुंद जिला म एंटी नारकोटिक्स टास्क फोर्स अउ सिंघोड़ा पुलिस ह एक ट्रक ले करीब तीन सौ बारह किलोग्राम गांजा बरामद करे हे। जब्त गांजा के कीमत करीब एक करोड़ छप्पन लाख रूपिया बताय गेहे। ए मामला म पुलिस ह दू आरोपी मन ल गिरफ्तार करे हे।
अउ
– गौरेला-पेण्ड्रा-मरवाही जिला के गौरेला आईटीआई तीर होय सड़क हादसा म दू माईलोगिन के मउत होगे।