केन्द्र सरकार ह राज्य म प्रावासी मजदूर मन ल दे जाने वाला पांच किलो के एलपीजी सिलेंडर के दैनिक आवंटन ल दुगुना करे के फइसला करे हे। पेट्रोलियम अउ प्राकृतिक गैस मंत्रालय के सचिव डॉक्टर नीरज मित्तल ह ए बारे म सबो राज्य अउ केन्द्रसासित प्रदेस के मुख्य सचिव मन ल चिट्ठी लिखीन हे। ओमन किहीन कि पांच किलो के ए एलपीजी सिलेंडर राज्य सरकार अउ उंखर खाद्य अउ नागरिक आपूर्ति विभाग ल अपन राज्य म प्रवासी मजदूर मन ल तेल विपणन कंपनी के मदद ले पूर्ति करे बर देवाय जाही।
इही बीच, पश्चिम एशिया म जारी संघर्ष के बीच केन्द्र सरकार ह देस म खाद्यान्न के पर्याप्त उपब्धता के भरोसा देवाय हे। उपभोक्ता मामला के विभाग के अपर सचिव अनुपम मिश्रा ह किहीन कि खाद्य कीमत स्थित हे अउ दाल संघरा म जादा ले जादा समान के उपलब्धता पर्याप्त हे।
मुख्यमंत्री-प्रधानमंत्री मुलाकात
मुख्यमंत्री विष्णुदेव साय ह आज नई दिल्ली म प्रधानमंत्री नरेन्द्र मोदी ले भेंट करीन। ए दउरान ओमन ह बस्तर संघरा छत्तीसगढ़ ले नक्सलवाद के खात्मा बर प्रधानमंत्री के आभार जतईन। संगेसंग ओमन ह श्री मोदी ल ‘सैचुरेशन, कनेक्ट, फैसिलिटेट, एम्पावर अउ एंगेज‘ रणनीति उपर आधारित ब्लूप्रिंट घलो सौंपीन। ओमन बतईन कि ए ब्लूप्रिंट के माध्यम ले बस्तर म अब विकास, रोजगार अउ सुविधा के नवा दउर सुरू होही। श्री साय ह प्रधानमंत्री ल मानसून के बाद बस्तर आय के नेवता दीन, जिहां उंखर मौजूदगी म कतकोन बड़े परियोजना के सिलान्यास अउ लोकार्पण होना हे। ओमन बतईन कि सिक्षा अउ स्वास्थ्य सुधार के तहत नवा एजुकेशन सिटी, सुपर स्पेशलिटी अस्पताल अउ मेडिकल कॉलेज बनाय जावत हे। उहें, इंद्रावती नदी म बैराज, रेललाइन अउ एयरपोर्ट के विस्तार ले कनेक्टिविटी मजबूत होवत हे।
मुख्यमंत्री ह प्रधानमंत्री ल जउन कार्ययोजना दीन, ओमा ‘बस्तर मुन्ने‘ यानी अग्रणी बस्तर कार्यक्रम सामिल हे। एमा हर ग्राम पंचायत म सिविर लगाय जाही, जिहां अधिकारी मनके मौजूदगी म लोगन ल सरकारी योजना के फायदा सीधा देवाय जाही।
खान मंत्रालय-नियम
खान मंत्रालय ह खनिज रियायत नियम म संसोधन के अधिसूचना जारी कर दे गेहे। एखर ले खनन पट्टा के तीर-तखार के क्षेत्र अउ ओखर ले जुड़े खनिज ल सामिल करे के रद्दा आसान होगे हे। सुधारे गे नियम म क्षेत्र ल बढ़ाय बर आवेदन म काम बर सरल प्रावधान करे गेहे। ए जरूरी करे गेहे कि राज्य सरकार ह आवेदन मिले के तीस दिन के भीतर एखर बर मंजूरी देवय।
केरोसिन-आवंटन
प्रदेस म सार्वजनिक वितरण प्रणाली-पीडीएस के तहत अप्रैल महीना बर केरोसिन के आवंटन जारी कर दे गेहे। खाद्य विभाग ह केन्द्र सरकार ले मिले पहला तिमाही के कोटा ले पांच सौ अट्ठाईस किलोलीटर केरोसिन रासनकार्डधारी मन बर आवंटित करे हे। ए केरोसिन ल उचित मूल्य के दुकान मनके माध्यम ले बांटे जाही। खाद्य विभाग के अनुसार अंत्योदय अउ प्राथमिकता श्रेणी के सबो राशनकार्डधारी मन ल एखर फायदा मिलही। सहरी क्षेत्र म प्रति रासनकार्ड जादा ले जादा एक लीटर अउ गंवई क्षेत्र म जादा ले जादा दू लीटर केरोसिन दे जाही।
विश्व स्वास्थ्य दिवस
आज विश्व स्वास्थ्य दिवय हरय। ए मउका म स्वास्थ्य सेवा ल मजबूत करे के उद्देश्य ले अउ जन-जागरूकता बढ़ाय बर छत्तीसगढ़ संघरा देसभर म कतकोन कार्यक्रम कराय जावत हे। ए बछर के थीम हे – ‘‘स्वास्थ्य के लिए एकजुट, विज्ञान के साथ खड़े रहें।‘‘
इही कड़ी म गौरेला-पेण्ड्रा-मरवाही जिला म स्वास्थ्य विभाग डहार ले जागरूकता कार्यक्रम चलाय जावत हे। गौरेला के सामुदायिक स्वास्थ्य केन्द्र म एचपीवी टीकाकरण अभियान के सुरूआत करे गेहे, जिला टीकाकरण अधिकारी डॉक्टर के.के. सोनी ह बतईन कि एचपीवी टीका किशोरी मन ल गंभीर रोग ल बचाय बर एक बड़े कदम हे।
विश्व स्वास्थ्य दिवस के मउका म मुख्यमंत्री विष्णुदेव साय ह प्रदेसवासी मन ल बधाई देवत स्वस्थ जीवनशैली अपनाय के अपील करीन हे।
महतारी वंदन योजना
महतारी वंदन योजना के छब्बीसवां किस्त काली जारी करे गीस। एमा अड़सठ लाख अड़तालीस हजार ले जादा माईलोगिन मनके खाता म छह सौ इकचालीस करोड़ बासठ लाख रूपिया भेजे गीस। महिला अउ बाल विकास विभाग ह बतईस कि जउन हितग्राही मनके ई-केवाईसी होना बांचे हे। ओमन ह तीस जून तक एला पूरा कर लेवय, ताकि महतारी वंदन के पइसा ओमन ल सरलग मिलत राहय।
खबर के मुताबिक ए योजना म माईलोगिन मन ल हर महीना एक-एक हजार रूपिया के सहायता राशि उंखर खाता म भेजे जाथे। अभी तक कुल सोलह हजार आठ सौ इक्यासी करोड़ रूपिया के भुगतान होगे हवय।
आरटीई-प्रवेश
प्रदेस म आरटीई के तहत प्रवेस नइ देवइया स्कूल मन उपर कार्रवाई करे जाही। संगेसंग नियम के उल्लंघन करइया प्राईवेट स्कूल के मान्यता घलो रद्द करे जाही। स्कूल शिक्षा विभाग ह बतईस कि निजी स्कूल म पच्चीस प्रतिसत सीट आर्थिक रूप ले कमजोर अउ वंचित वर्ग के लइका मन बर आरक्षित हवय। एखर बदला सरकार स्कूल मन ल पइसा देथे, जउन ह दूसर राज्य के तुलना म जादा माने जाथे। अभी प्रदेस म छह हजार आठ सौ ले जादा प्राईवेट स्कूल म तीन लाख तिरसठ हजार ले जादा लइका मन ह ए योजना के फायदा लेवत हे। विभाग ह माता-पिता मन ले गलत जानकारी ले बांचे के अउ आधिकारिक सूचना म भरोसा करे के अपील करीन हे।
दुर्घटना
बस्तर जिला के ढाबामारी गांव तीर आज बिहनिया होय एक ठिन सड़क हादसा म दू झिन माईलोगिन मनके मउत होगे अउ पैंतीस ले जादा लोगन घायल होगे हे। घायल मनके इलाज जगदलपुर मेडिकल कॉलेज म चलत हे।
मिले जानकारी के अनुसार सिरिसगुड़ा गांव ले एक ठन परिवार ह कुछेक लोगन संग नारायणपुर जिला के रेंगाबेड़ा गांव म एक ठिन बिहाव म सामिल होय बर गे रिहीस। वापिस लहुटत खानी इंखर पिकअप गाड़ी ह घोटिया थाना क्षेत्र के ढाबामारी गांव तीर अंते-तंते होके पलट गे। ए हादसा म दू झिन माईलोगिन के मउकाच म मउत होगीस।
उहें, कोरबा जिला के कटघोरा थाना क्षेत्र म ट्रक के चपेट म आय ले फटफटी म बइठे दू झन युवक मनके मउकाच म मउत होगे। पुलिस ह ट्रक ड्राईवर ल गिरफ्तार कर ले हवय।
बायपास सड़क-निर्माण
लोक निर्माण विभाग ह राज्य म नौ ठन बायपास सड़क बनाय बर चार सौ अड़तालीस करोड़ रूपिया ले जादा के राशि मंजूर करे हे। ए रासि ले रायगढ़ म तीन, धमतरी अउ बलौदाबाजार म दो-दो बायपास बनाय जाही। एखर अलावा बिलासपुर अउ बेमेतरा म घलो बायपास सड़क बनाय जाही।
बीएसपी-आगजनी
भिलाई इस्पात संयंत्र के पावर प्लांट पीबीएस-टू के टर्बाइन म आज बिहनिया करीबन दस बजे भीषण आग लग गे। ए घटना म दू नियमित अउ पांच झिन ठेका श्रमिक घायल बताय जावत हे, जिखर इलाज सेक्टर-नौ के अस्पताल म चलत हे।
घटना के सूचना मिलते साथ फायर ब्रिगेड के टीम ह तुरते मउका म पहुंचीस अउ रेस्क्यू ऑपरेशन सुरू करे गीस। ए घटना के मेहनत के बाद आगी म काबू पाय गीस। प्रशासन अउ प्रबंधन के टीम ह आगी लगे के कारण के पता लगावत हे।
ठगी
सारंगढ़-बिलाईगढ़ जिला के सरसीवां पुलिस ह नकली दस्तावेज के माध्यम ले बैंक खाता ले करीबन इकतीस लाख रूपिया के ठगी करइया गिरोह के तीन झन सदस्य ल गिरफ्तार करे हे। पुलिस के अनुसार आरोपी मन ह बैंक कर्मचारी मन संग मिलके खाता ले पइसा निकालीन। आरोपी मन तीर ले गाड़ी, लैपटॉप अउ दूसर जिनीस संघरा करीबन चालीस लाख रूपिया के सामान जब्त करे गेहे।
अउ अब पेस हे मौसम के हाल…
अवइया चौबीस घंटा के दउरान प्रदेस म कुछेक जघा म हल्का बरसा होय के संभावना हे। उहें, एक-दू जघा म गरज-चमक के संग अंधड़ चले के अउ आकाशीय बिजली गिरे के चेतावनी दे गे हवय।
मौसम विभाग के अनुसार उपरी हवा के एक ठन चक्रीय चक्रवाती घेरा पूर्वी उत्तरप्रदेश के उपर बने हे। उहें, एक ठन दूसर चक्रवाती घेरा ओडिशा अउ ओखर तीर-तखार म हवय, जेखर प्रभाव ले प्रदेस के मौसम म बदलाव देखे बर मिलत हे।