भाजपा-स्थापना दिवस-छत्तीसगढ़
भारतीय जनता पार्टी ह आज अपन सैंतालीसवां स्थापना दिवस मनावत हे। इही कड़ी म मुख्यमंत्री ह आज प्रदेस भाजपा कार्यालय कुशाभाऊ ठाकरे परिसर म ध्वजारोहण करीन। ए दउरान मुख्यमंत्री ह भाजपा के पितृ पुरूष मनके मूर्ति ल नमन करके ओमन ल पुष्पांजलि अर्पित करीन। ए मउका म मुख्यमंत्री ह किहीन कि भाजपा ह विश्व के सबले बड़का राजनीतिक दल हरय, जउन ह अपन कार्यकर्ता मन के सरलग मेहनत अउ पितृ पुरूष मनके त्याग ले मजबूत होय हे। उहें, भाजपा के प्रदेस अध्यक्ष किरण सिंह देव ह जगदलपुर स्थित जिला भाजपा कार्यालय म झंडा फहराइन। ए दउरान ओमन कार्यकर्ता मन ल स्थापना दिवस के बधाई देवत किहीन कि भाजपा के हरेक कार्यकर्ता मन मेहनती होथे।
भातरीय जनता पार्टी डहार ले भाजपा स्थापना दिवस उपर प्रदेस म बारह अप्रैल तक सेवा सप्ताह अउ कतकोन कारीकरम कराय जाही।
प्रदेस महामंत्री यशवंत जैन ह बतइन कि ए दउरान बूथ स्तरीय बइठका अउ जिला सम्मेलन राखे जाही। संगेसंग काली ले बारह अप्रैल तक गांव बस्ती चलो अभियान के तहत जनसंपर्क कारीकरम चलाय जाही।
ताड़मेटला-बरसी/उपमुख्यमंत्री-स्
आज ताड़मेटला म होय नक्सली हमला के सोलहवां बरसी हरय। शहीद जवान मनके सुरता म इंहा शहीद स्मारक बनाय गेहे। आज सीआरपीएफ के महानिदेशक ज्ञानेन्द्र प्रताप सिंह ह एखर लोकार्पण करीन। जानबा के मुताबिक बछर दू हजार दस म होय नक्सली हमला म सीआरपीएफ के छिहत्तर झिन जवान शहीद होय रिहीस।
इही बीच, उपमुख्यमंत्री अउ गृहमंत्री विजय शर्मा के अपन विधानसभा क्षेत्र कवर्धा पहुंचिन। सशस्त्र नक्सलवाद के समाप्ति के राखे गे तारीख के बाद कवर्धा पहुंचे उपर उपमुख्यमंत्री के जोरदरहा सुवागत करे गीस। ओमन किहीन कि आज बस्तर के गांव म विकास के गोठबात होवत हे।
जानबा के मुताबिक केंद्रीय गृहमंत्री अमित शाह ह इकतीस मार्च तक नक्सलवाद समाप्ति के घोसना करे रिहीन, जेखर मियाद छै दिन पहिलीच पूरा हो चुके हे।
दुर्घटना
सरगुजा जिला के गांधी नगर थाना क्षेत्र के सकालो के तीर आज एक ठिन ट्रक अउ कार के टक्कर होगे। ए घटना म कार म बइठे तीन झिन लोगन के मउकच म मउत होगे अउ एक झिन मनखे ह गंभीर रूप ले घायल हो गे। मृतक म एक झिन महिला अउ दू झन पुरूष सामिल हे।
उहें, अंबिकापुर, बिलासपुर राष्ट्रीय राजमार्ग उपर भिट्टिकला के तीर पाछू संझा तेज रफ्तार गाड़ी के चपेट म आय ले रद्दा म चलइया लोगन दुर्घटना के सिकार होगे। ए घटना म तीन झिन माईलोगिन के मउकच म पराण छूट गे। घटना के बाद राजमार्ग उपर गाड़ी मनके जाम लग गे। पुलिस ह मउका म पहुंच के स्थिति ल नियत्रित करके आगू के कार्रवाई करीन। मुख्यमंत्री विष्णुदेव साय ह ए दुर्घटना म तीन झिन माईलोगिन के मउत उपर दुख व्यक्त करे हे।
उहें, जांजगीर-जिला के बलौदा थाना के बुचीहरदी गांव म बोलेरो अउ कार के टक्कर म कार सवार पिता-पुत्र के मउत होगे। उहें, दू झिन आने मनख्े मन घायल हो गेहे। मृतक अकलतरा के अमोरा गांव के रहइया बताय जात हे।
इही बीच, अब ले थोरिक देर पहिली, बालोद जिला म ट्रैक्टर पलटे ले दू झिन लोगन के मउत होगे।
हाईकोर्ट-अमित जोगी
रामअवतार जग्गी हत्या मामला म छत्तीसगढ़ उच्च न्यायालय ह पूर्व मुख्यमंत्री अजित जोगी के बेटा अमित जोगी ल दोषी बतावत आजीवन कारावास के सजा सुनाय हे। हाईकोर्ट ह दू हजार सात म ट्रायल कोर्ट डहार ले दे गे बरी के आदेस ल निरस्त कर देहे। हाईकोर्ट ह अपन फइसला म किहीन कि जउन साक्ष्य के आधार म आने आरोपी मन ल दोषी ठहराय गीस, उही साक्ष्य के रहत अमित जोगी ल बरी करे जाना न्याय संगत नइ हे। कोर्ट ह ए आधार उपर केंद्रीय अन्वेषण ब्यूरो-सीबीआई के अपील ल मंजूरी करीन। हाईकोर्ट ह अमित जोगी ल भारतीय दंड संहिता के धारा तीन सौ दू अउ एक सौ बीस-बी के तहत दोषी ठहरावत आजीवन कारावास अउ एक हजार रूपिया के अर्थदंड लगाय गेहे। अदालत ह यहू निरदेस दीन कि अमित जोगी जउन ए बेरा जमानत म हवय, ओमन तीन हफ्ता के भीतर न्यायालय के आगू आत्मसमर्पण करय।
जानबा के मुताबिक चार जून दू हजार तीन के रईपुर म एनसीपी नेता रामअवतार जग्गी के गोली मारके हत्या कर दे गे रिहीस। इही मामला के जांच बाद म सीबीआई ल सौपे गे रिहीस, जेमा हत्या के पाछू साजिस होय के बाद आगू आइस। ए मामला म ट्रायल कोर्ट ह आने आरोपी मन ल पहिलीच, दोषी ठहरा के आजीवन कारावास के सजा सुनाय रिहीस।
इही बीच, आज सुप्रीम कोर्ट म अमित जोगी डहार ले लगाय गे विसेस अनुमति याचिका एसएलपी उपर न्यायधीश विक्रमनाथ अउ संजीव मेहता के बेंच म सुनवाई होइस। अमित अजित जोगी कोति ले वरिष्ठ अधिवक्ता कपील सिब्बल, मुकुल रोहतगी, विवेक तन्खा अउ सिध्दार्थ दवे आय रिहीन। सुप्रीम कोर्ट ह अमित जोगी के अंतिम निर्णय के विरूध्द बीस अप्रैल के पहिली याचिका दायर करे के निरदेस देहे। ए प्रकरण के सुनवई अब बीस अप्रैल के होही।
एनएसयूआई-प्रदर्शन
भारतीय राष्ट्रीय छात्र संगठन-एनएसयूआई डहार ले छात्र संघ चुनाव बहाली के मांग ल लेके आज पंडित रविशंकर शुक्ल विश्वविद्यालय के घेराव करे गीस। ए दउरान बड़ संख्या म एनएसयूआई कार्यकर्ता अउ छात्र-छात्रा मन ह नाराबाजी करत छात्र संघ चुनाव जल्द बहाल करे के मांग करीन।
प्रदेसव्यापी आंदोलन के तहत रईपुर के इंदिरा गांधी कृषि विश्वविद्यालय, धमतरी स्थित, आयुष विश्वविद्यालय अउ दुर्ग स्थित हेमचंद यादव विश्वविद्यालय म घलो एनएसयूआई कार्यकर्ता मन डहार ले प्रदर्सन करे गीस।
रेलवे-ट्रेन परिचालन
ईस्ट कोस्ट रेलवे के संबलपुर रेल मंडल म गर्डर के लॉन्चिंग काम के सेति विशाखापट्टनम-रईपुर-विशाखापट्
अइसने, रईपुर रेलमंडल के दुरूग, दल्लीराजहरा सेक्सन म मानव रहित समपार फाटक सिकोसा-पिनकापार गेट के तीर म रोड अंडर ब्रिज बने के काम पूरा हो गेहे। रोड अंडर ब्रिज ल आम जनता बर दस अप्रैल ले खोल दे जाही अउ समपार फाटक ल स्थायी रूप ले बंद कर दे जाही।
अब पेस हे मौसम के हाल…
मौसम विभाग के मुताबिक अवइया चौबीस घंटा के दउरान प्रदेस के कतकोन जघा म हल्का ले मध्यम बरसा या गरज-चमक के संग बूंदाबांदी होय के संभावना हे। उहें, एक-दू जघा म हवा गरेर के संग करा गिरे के चेतावनी दे गेहे।
अवइया चौबीस घंटा के दउरान जम्मो संभाग मन म बरसा हो सकथे। फेर आठ अप्रैल के दक्षिण छत्तीसगढ़ के बरसा हो सकथे
आज मंझनिया राजधानी रईपुर म हवा गरेर के संग बरसा होइस। उहें, जांजगीर-चांपा जिला के शिवरीनारायण म करा गिरे ले फल अउ सब्जी के फसल ल नकसान होय के समाचार मिले हे। ऐति कांकेर जिला के पखांजूर क्षेत्र म गाज गिरे ले एक झिन किसान के मउत होगे।
अउ अब थोरकुन समाचार सार म –
– मुख्यमंत्री ह जशपुर के पूर्व विधायक अउ समाजसेवी जगेश्वर राम भगत के निधन उपर सोक जताय हे।
– राज्यपाल रमेन डेका ह जशपुर जिला के समीक्षा बइठका म बिसेस पिछड़ी जनजाति पहाड़ी कोरवा अउ बिरहोर परिवार मन बर हर महिना मेडिकल कैंप लगाय के निरदेस दीन।
– लोक निर्माण विभाग ह नौ ठिन बायपास रद्दा बनाय बर चार सौ अड़तालीस करोड़ रूपिया ले जादा के रासि मंजूर करे हे। एमा रायगढ़ जिला म तीन, धमतरी अउ बलौदाबाजार म दू-दू बायपास बनही।
अउ
– रईपुर जिला म राजस्व पखवाड़ा के तहत ग्राम पंचायत स्तर म शिविर मनके आयोजन करे जात हे। ए सिविर मन म नक्सा-खसरा अउ प्रमाण पत्र ले जुड़े समस्या मनके तुरते निपटारा करे जात हे।