केंद्र सरकार ह देसभर म पेट्रोल, डीजल अउ एलपीजी के पूर्ति बनाय राखे बर सबो परयास करत हे। सरकार ह लोगन ले एलपीजी सिलेंडर बुक कराय बर डिजीटल तरीका के उपयोग करे के अउ गैस वितरक मन तीर जबरन जाय ले बांचे बर किहीन हे।
तेल अउ प्राकृतिक गैस मंत्रालय ह बताय हे कि काली नब्बे हजार ले जादा पांच किलो ग्राम वाले एफटीएल-छोटे सिलेंंडर के बिक्री करे गीस। ए छोटे सिलेंडर पास के एलपीजी वितरक मन तीर हवय अउ एला कोनो भी पहिचान पत्र दिखाके खरीदे जा सकत हे। एखर बर कोनो आवासीय पता के जरूरत नइ हे। मंत्रालय के अनुसार मार्च दू हजार छब्बीस ले करीबन तीन लाख साठ हजार पीएनजी गैस कनेक्सन दे गे हवय। एखर अलावा तीन लाख नब्बे हजार ले जादा उपभोक्ता मन ह नवा कनेक्सन बर पंजीकरण कराइन हे।
जन विश्वास संशोधन विधेयक
केंद्रीय विधि अउ न्याय मंत्रालय म अपर सचिव के.वी. कुमार ह किहीन हे कि जन विश्वास संसोधन विधेयक ले व्यापार अउ जीवन आसान होही। डॉक्टर कुमार ह आकाशवाणी ल बतइन कि ए विधेयक म तेईस ठन मंत्रालय ले जुड़े सात सौ चौरासी प्रावधान सामिल हे। ओमन बतइन कि कारोबार ल असान करे बर कतकोन प्रावधान ल अपराध के श्रेणी ले बाहिर कर दे गेहे।
कृषि मंत्री-किसान
केंद्रीय कृषि अउ किसान कल्याण मंत्री शिवराज सिंह चौहान ह किहीन हे कि बेमौसमी बरसात अउ करा गिरे ले पीड़ित किसान मन ल चिंता करे के जरूरत नइ हे। ओमन किहीन कि सरकार स्थिति म नजर राखे हे अउ किसान मन ल होय नुकसान के जायजा लेबर संबंधित राज्य के कृषि मंत्री मन संग चर्चा करे जाही।
साधना सप्ताह-पहल
केंद्रीय विज्ञान अउ प्रौद्योगिकी राज्य मंत्री जितेन्द्र सिंह आज नई दिल्ली म साधान सप्ताह के तहत कई ठन सुरूआत करीन। एमा उन्नति पोर्टल अउ कर्मयोगी कर्तव्य कारीकरम के राष्ट्रीय स्तर म कार्यान्वयन के रूपरेखा सामिल हे। डॉक्टर सिंह ह एक ठन बिसेस सत्र म किहीन कि मिसन कर्मयोगी ह पांच बछर पूरा कर लेहे। ए सरकारी कर्मचारी मनके क्षमता निर्माण म बढ़ोत्तरी के प्रतीक हे। ओमन किहीन कि दू ले आठ अप्रैल तक मनाय जावत साधना सप्ताह ह सरकारी अधिकारी मन के बीच सरलग सिखे के संस्कृति ल मजबूत करे के अउ कौशल ल बढ़ाय के लक्ष्य रखथे। ओमन किहीन कि एखर बर एक ठन समझौता ज्ञापन म हस्ताक्षर करे गीस।
मुख्यमंत्री-माओवादी आतंक
मुख्यमंत्री विष्णुदेव साय ह किहीन हे कि छत्तीसगढ़ अब माओवादी आतंक ले मुक्त हो गे हवय अउ अब कहू रेड कॉरिडोर नइ हे, हर तरफ ग्रीन कॉरिडोर हवय। ओमन ह एखर बर प्रधानमंत्री नरेंद्र मोदी, केंद्रीय गृहमंत्री अमित शाह, शहीद जवान अउ बस्तर के जनता बर अपन आभार व्यक्त करीन।
मुख्यमंत्री ह किहीन कि ए सफलता सामूहिक संकल्प, मजबूत रणनीति अउ सुरक्षाबल के साहस के परिणाम हे। ओमन शहीद जवान मन ल श्रध्दांजलि देवत किहीन कि उंखर बलिदान ले ही ए नवा सुरूआत संभव हो पाय हे। श्री साय ह बतइन कि सरकार ह हिंसा के रद्दा छोड़इया मनके सुवागत करे हे अउ विकास अउ पुनर्वास म बिसेस धियान दे हे। मुख्यमंत्री ह विस्वास जतइन कि अब बस्तर म सांति, सुरक्षा अउ विकास के नया दउर सुरू हो गे हवय।
दुर्घटना
गौरेला-पेंड्रा-मरवाही जिला के ग्राम पिपरिया म सड़क हादसा म एक झन मनखे के मउत होगे। उहें, दू झन दूसर युवक मन गंभीर रूप ले घायल हो गेहे। मिले जानकारी के अनुसार पिपरिया के रहइया तीन झन ग्रामीण मन फटफटी म बइठके अपन घर लहुटत रिहीन। इही दउरान पडखुरी गांव कोति ले आवत एक ठन ट्रैक्टर ह उंखर फटफटी ल टक्कर मार दीस।
अग्निवीर भर्ती-आवेदन
भारतीय थल सेना अग्निवीर भर्ती बर ऑनलाइन आवेदन करे के आखिरी तारीख एक अप्रैल ले बढ़ाके दस अप्रैल कर दे गेहे। इच्छुक आवेदक मन ह भारतीय सेना के वेबसाइट-डब्ल्यू डब्ल्यू डब्ल्यू डॉट ज्वाइन इंडियन आर्मी डॉट एनआईसी डॉट इन म आवेदन कर सकत हे। पुरूष मन बर अग्निवीर म जनरल, तकनीकी, लिपिक, स्टोर कीपर अउ ट्रैडमेन के पद म भर्ती करे जाही। उहें, सेना पुलिस, स्थायी कैडर नर्सिंग असिस्टेंट वेट अउ सिपाही फार्मा के महिला पद म भर्ती करे जाही।
राज्यपाल-जशपुर पौधारोपण
राज्यपाल रमेन डेका ह आज जशपुर जिला के मातृत्व वन म ‘‘एक पेड़ मां के नाम‘‘ अभियान के तहत सीता अशोक के पउधा लगइन। ए मउका म राज्यपाल ह किहीन कि ‘एक पेड़ मां के नाम‘ अभियान के माध्यम ले मां के प्रति सम्मान ल प्रकृति ले जोड़े जावत हे। ए पहल ले अवइया पीढ़ी मन ल पर्यावरण संरक्षण बर जागरूक करे के संगेसंग सामाजिक मूल्य ल घलो मजबूत करे म मदद मिलही। ओमन किहीन कि ‘मातृत्व वन‘ जइसन पहल ले न सिरिफ हरित क्षेत्र ल आगू बढ़ाय म मदद मिलही, फेर समाज म संवेदनसील अउ जिम्मेदारी के भावना घलो विकसित होही।
खबर के मुताबिक करीबन दू एकड़ क्षेत्र म विकसित ए मातृत्व वन म चार सौ ले जादा आने-आने प्रजाति के पउधा लगाय गेहे।
बच्चे-मौत
जशपुर जिला के बगीचा थाना क्षेत्र के बिसबहरी गांव म तालाब ले दू झन लइका मनके शव मिले हे। बताय जात हवय कि ए लइका मन पाछू कुछ दिन ले लापता रिहीन, जिंखर तलास करे जात रिहीस। घटना के सूचना मिलते साठ पुलिस ह मउका म पहुंचके कार्रवाई करत हे।
ईस्टर
ईस्टर के परब आज पूरा दुनिया म हर्षोल्लास के संग मनाय जावत हे। मान्यता हे कि गुड फ्राइडे म ईसा मसीह ल सूली उपर चढ़ाय जाय के बाद आजे के दिन उंखर पुनर्जन्म होय रिहीस। ए मउका म छत्तीसगढ़ के सबो गिरजाघर म बिहनिया ले ही श्रध्दालु मनके भीड़ उमड़े हे। इंहा बिसेस प्रार्थना सभा घलो आयोजित करे गेहे।
राष्ट्रपति द्रौपदी मुर्मु, उपराष्ट्रपति सीपी राधा कृष्णन अउ प्रधानमंत्री नरेंद्र मोदी ह देसवासी मन ल सुभकामना दीन हे।
उपमुख्यमंत्री-सामाजिक अधिवेशन
उपमुख्यमंत्री विजय शर्मा ह आज दुरूग जिला के पाटन विकासखंड के ग्राम जामगांव म राखे गे चंद्रनाहू कुर्मी क्षत्रीय समाज के वार्षिक अधिवेशन म सामिल होइन। समारोह म श्री शर्मा ह अपन भाषण म अधिवेशन म समाज के माईलोगिन मनके बड़े सहभागिता उपर खुसी जाहिर करीन। एखरे संग ओमन ह बतइन कि माईलोगिन मनके प्रतिभा ल स्थान अउ सम्मान देवाय, विधानसभा अउ लोकसभा के अलावा आने सबो जघा माईलोगिन मन बर तैंतीस प्रतिसत आरक्षण सुनिश्चित करे बर अवइया सोलह, सत्रह अउ अट्ठारह अप्रैल के संसद के बिसेस सत्र के आयोजन करे जाही।
ए मउका म उपमुख्यमंत्री ह सामाजिक भवन म डोम सेड अउ मंच बनाय बर अउ ग्राम तर्रा म कुर्मी सामाजिक भवन बर बारह लाख रूपिया देके घोसना करीन।
थाना प्रभारी-निलंबित
दुरूग के वरिष्ठ पुलिस अधीक्षक विजय कुमार अग्रवाल ह नंदिनी नगर थाना के प्रभारी निरीक्षक भानु प्रताप साव ल काम म लापरवाही बरते के आरोप म निलंबित कर देहे। उहें, छावनी थाना प्रभारी मनीष शर्मा ल हटाके यातायात विभाग भेज दे गेहे। चार उप निरीक्षक मनके प्रभाव म फेरबदल करे गेहे।
इही बीच, नशाखोरी अउ असमाजिक गतिविधि उपर लगाम लगाय बर पाछु रतिहा दुरूग पुलिस ह पेट्रोलिंग अभियान चलईस। ए दउरान आने-आने थाना क्षेत्र म कार्रवाई करत छियालीस ठिन जघा म दबिस दीस। संगेसंग सार्वजनिक जघा म सराब के सेवन करइया मनके खिलाफ आबकारी एक्ट के तहत कार्रवाई घलो करे गीस।
अउ अब पेस हे मौसम के हाल…
प्रदेस म काली छै अप्रैल के कुछेक जघा म हल्का ले मध्यम बरसा होय या गरज-चमक के संग छींटा पड़े के संभावना हे। मौसम विभाग ह एक-दू जघा म हवा गरेर चले, गाज गिरे अउ करा गिरे के चेतावनी घलो देहे। करा गिरे के क्षेत्र मुख्यतः मध्य अउ उत्तर छत्तीसगढ़ रहे के संभावना हे। उहें, सात अप्रैल के प्रदेस के लगभग सबो संभाग म बरसा हो सकत हे। अइसने, आठ अप्रैल के दक्षिण छत्तीसगढ़ म बरसा होय के संभावना जताय गेहे।