नवा रायपुर अटल नगर स्थित भारतीय प्रबंधन संस्थान-आईआईएम म आज पंद्रहवां वार्षिक दीक्षांत समारोह के आयोजन करे गीस। समारोह म मुख्य अतिथि के रूप म विदेस मंत्री डॉक्टर एस. जयशंकर सामिल होइन। इही दउरान ओमन पांच सौ बावन विद्यार्थी मन ल डिग्री प्रदान करीन। उहें, शैक्षणिक उत्कृष्टता बर नौ झन विद्यार्थी मन ल स्वर्ण पदक दे गीस। समारोह म एमबीए के छात्र चिराग जैन ल ‘‘ओवरऑल बेस्ट परफॉर्मर‘‘ चुने गीस।
दीक्षांत समारोह ल संबोधित करत हुए डॉक्टर जयशंकर ह किहीन कि भारत आज तकनीकी क्षमता अउ वैश्विक जुड़ाव के महत्वपूर्ण मोड़ म खड़े हे, जिंहा ए भावी नेतृत्वकर्ता मनके भूमिका देस ल विश्व पटल म अउ मजबूत बनाय म अहम होही। ओमन किहीन कि विश्व एक जादा अस्थिर अउ अप्रत्याशित माहौल म खुद ल सुरक्षित रखे के चुनौती के सामना करत हे।
समारोह म संस्थान के कार्यवाहक निदेशक प्रोफेसर संजीव पराशर ह वार्षिक रिपोर्ट पेस करत हुए बतइन कि ए बछर आईआईएम रायपुर ह राज्य सरकार के सहयोग ले ‘पब्लिक पॉलिसी‘ अउ एचपीसीएल बर ‘एनर्जी मैनेजमेंट‘ जइसन दू नवा एमबीए पाठ्यक्रम सुरू करे हे।
समारोह ल आईआईएम रायपुर के बोर्ड ऑफ गवर्नर के चेयरपर्सन पुनीत डालमिया ह घलो संबोधित करीन।
केन्द्र-पेट्रोल/डीजल/एलपीजी
केंद्र सरकार ह आश्वस्त करे हे कि ओहा देस म पेट्रोल-डीजल अउ एलपीजी के उपलब्धता सुनिश्चित करे के हरसंभव प्रयास करत हे। सरकार ह नागरिक मन ल अफरा-तफरी म पेट्रोल अउ डीजल के खरीददारी नइ करे अउ एलपीजी के अनावश्यक बुकिंग ले बांचे के सलाह देहे।
पेट्रोलियम अउ प्राकृतिक गैस मंत्रालय के सचिव डॉक्टर नीरज मित्तल ह सबो राज्य अउ केंद्रशासित प्रदेस के अपर मुख्य सचिव अउ प्रधान सचिव के संग इंर्धन आपूर्ति के स्थिति के समीक्षा करे बर एक ठन बइठका के अध्यक्षता करीन। ए दउरान ओमन पर्याप्त उपलब्धता सुनिश्चित करे बर उठाय गे उपाय मन के उल्लेख करीन। बइठका म राज्य मनके एलपीजी वितरण ल विसेस रूप ले घरेलू अउ आवश्यक जरूरत मन ल प्राथमिकता दे के निरदेस दे गीस। संगेसंग जमाखोरी, हेराफेरी अउ गलत सूचना के खिलाफ कड़ा निगरानी राखे बर घलो केहे गेहे।
पश्चिम इंडिया-कोल इंडिया
इही बीच, पश्चिम एशिया म संकट के बीच कोल इंडिया लिमिटेड, देस के ऊर्जा आवश्यकता मन ल पूरा करे बर हरसंभव प्रयास करत हे। कोल इंडिया के अध्यक्ष बी.साईराम ह कोरबा जिला के प्रवास के दउरान आकाशवाणी समाचार ल बतइन कि ऊर्जा मांग ल पूरा करे बर पर्याप्त कोयला के भंडार उपलब्ध हे।
बुलेटिन शुभारंभ
आकाशवाणी केंद्र रईपुर के प्रादेशिक समाचार एकांश कोति ले अवइया पांच अप्रैल ले पांच-पांच मिनट के दू ठिन उपराहा प्रादेशिक समाचार बुलेटिन के प्रसारण करे जाही। ए समाचार बुलेटिन बिहनिया नौ बज के पचपन मिनट ले दस बजे तक अउ ग्यारा बजके पचपन मिनट ले बारह बजे तक प्रसारित होही। एखर प्रसारण छत्तीसगढ़ स्थित आकाशवाणी के जम्मो केंद्र ह करही।
ट्रेन परिचालन
रायपुर रेलमंडल के अंतर्गत रायपुर अउ मांढर के बीच आटोमेटिक सिग्नल लगाय जाय के सेति पांच अउ छै अप्रैल के कुछ यात्री ट्रेन मनके परिचालन प्रभावित रइही। इही दउरान दस ठन पैसेंजर गाड़ी मन रद्द रइही। एमा रायपुर ले बिलासपुर अउ रायपुर ले दुरूग के बीच चलइया गाड़ी मन सामिल हे। एखर अलावा लंबा दूरी के चार ठन ट्रेन रायपुर, बिलासपुर, महासमुंद अउ गोंदिया के बीच समाप्त कर दे जाही।
गांजा-बरामद
महासमुंद जिला के सिंघोड़ा पुलिस अउ एंटी नारकोटिक्स टास्क फोर्स ह रेहटीखोल चेकपोस्ट करा गाड़ी मनके तलासी के दउरान दू ठन वाहन ले दु कुंटल इकयासी किलोग्राम गांजा बरामद करे हे। जब्त गांजा के कीमत करीब एक करोड़ इकतालीस लाख रूपिया आंके गेहे। ए मामला म पुलिस ह पांच अंतरराज्यीय तस्कर मन ल गिरफ्तार करे हे।
खेलो इंडिया ट्रायबल गेम्स-समापन
छत्तीसगढ़ म आयोजित प्रथम खेलो इंडिया ट्राइबल गेम्स के काली समापन होइस। मुख्यमंत्री विष्णुदेव साय रायपुर म आयोजित समापन समारोह म मुख्य अतिथि के रूप म सामिल होइन। ए बेरा म श्री साय ह किहीन कि खेलो इंडिया ट्राइबल गेम्स, देस के आदिवासी प्रतिभा मन ल एक मंच प्रदान करे अउ उंखर खेल क्षमता ल आगू लाय के अनूठा अवसर साबित होय हे। ओमन किहीन कि छत्तीसगढ़ आज देस के खेल मानचित्र म प्रमुख स्थान म स्थापित होय हे। अब ए गेम्स हर बछर छत्तीसगढ़ म आयोजित करे जाही। मुख्यमंत्री ह छत्तीसगढ़ के खिलाड़ी मन के प्रदर्सन उपर गर्व व्यक्त करत हुए किहीन कि प्रदेस के खिलाड़ी मन ह ए प्रतियोगिता म तीन स्वर्ण, दस रजत अउ छै कांस्य समेत कुल उन्नीस पदक जीते हे। ए अवसर म मुख्यमंत्री ह पदक विजेता मन बर नगद पुरस्कार के घोसना घलो करीन। व्यक्तिगत स्पर्धा मन म स्वर्ण पदक बर दू लाख, रजत बर डेढ़ लाख अउ कांस्य बर एक लाख रूपिया प्रदान करे जाही। उहें, दलीय स्पर्धा मन म स्वर्ण बर एक लाख, रजत बर पचहत्तर हजार अउ कांस्य पदक बर पचास हजार रूपिया दे जाही।
समापन समारोह ल उपमुख्यमंत्री अउ खेल मंत्री अरूण साव ह घलो संबोधित करीन। ए मउका म अंतरराष्ट्रीय बॉक्सर मेरीकॉम अउ फुटबालर बाइचुंग भूटिया घलो विसेस अतिथि के रूप म सामिल होइन।
बतादन कि खेलो इंडिया ट्राइबल गेम्स म छत्तीसगढ़ समेत देसभर के तीस राज्य अउ केंद्रशासित प्रदेस के खिलाड़ी मन भाग लीन।
पीएमश्री विद्यालय-प्रशिक्षण कार्यक्रम
छत्तीसगढ़ के पीएमश्री विद्यालय के शिक्षक मन बर आईआईटी भिलाई म पांच दिवसीय प्रसिक्षण कारीकरम के आयोजन करे गीस। ए दउरान प्रदेसभर के एक सौ पचास पीएमश्री शिक्षक मन एक्सपीरिएंशियल लर्निंग अउ राष्ट्रीय शिक्षा नीति-दू हजार बीस के अनुरूप लइका मन ल पढ़ाय के ढंग बताय गीस। प्रसिक्षण के दउरान शिक्षक मन ल आईआईटी भिलाई के अलग-अलग प्रयोगशाला म ले जाके तकनीकी अउ कार्यप्रणाली मनले अवगत कराय गीस। संगेसंग इक्कीसवीं सदी के शिक्षा ले जुड़े चुनौती मन बर घलो तैयार करे गीस।
आईआईटी भिलाई के डायरेक्टर राजीव प्रकाश ह नवा शिक्षा नीति के अनुरूप शिक्षण म नवाचार, एसटीईएम शिक्षा अउ लइका मन म वैज्ञानिक दृष्टिकोण विकसित करे उपर जोर दे गीस।
खल्लारी मेला महोत्सव
महासमुंद जिला म स्थित खल्लारी माता मंदिर म काली ले पांच दिवसीय खल्लारी मेला महोत्सव के आयोजन करे जात हे। महोत्सव के सुभारंभ अवसर म उपमुख्यमंत्री अरूण साव ह मां खल्लारी मंदिर म पूजा-पाठ कर प्रदेसवासी मनके सुख-समृध्दि के कामना करीन। ए मउका म उपमुख्यमंत्री ह राष्ट्रीय राजमार्ग ले खल्लारी मंदिर तक पहुंच मार्ग ल सुगम बनाय के घोसना करीन।
अउ अब पेस हे मौसम के हाल…
मौसम विभाग ह अवइया चौबीस घंटा के दउरान प्रदेस के एक-दू जघा म हल्का बरसा होय के संभावना जताय हे। उहें, कुछेक एक जघा म अंधड़ चले गाज गिरे अउ करा गिरे के घलो चेतावनी दे गेहे। बरसा के क्षेत्र मुख्य रूप ले दक्षिण छत्तीसगढ़ रइही। ए दउरान अधिकतम तापमान म कमी आय के घलो आसार हे।
अउ अब थोरकुन समाचार सार म –
– राज्य शासन ह राजधानी रायपुर म लोगन मन ल ट्रैफिक के समस्या ले राहत दिलाय के उद्देस्य ले चार ठन नवा फ्लाईओवर निर्माण बर तीन सौ साठ करोड़ रूपिया मंजूर करे हे।
अउ
– भिलाई खुर्सीपार स्थित परीक्षा केंद्र म आयोजित एनटीए जेईई मेन्स परीक्षा के दउरान एक झन परीक्षार्थी ल चप्पल के अंदर मोबाइल छिपाके परीक्षा देवत हुए पकड़े गेहे। ए मामला म पुलिस ह अपराध दर्ज कर जांच सुरू कर देहे।