संसद ह जन विश्वास प्रावधान संशोधन विधेयक दू हजार छब्बीस ल पारित कर दे गेहे। प्रधानमंत्री नरेंद्र मोदी ह किहीन हे कि ए विधेयक के पारित होय ले देस म जीवन यापन अउ व्यापार म सरलता मिलही। एक ठिन सोसल मीडिया पोस्ट म प्रधानमंत्री ह किहीन कि ए विधेयक ह विश्वास उपर आधारित ढांचा ल मजबूत करथे। ए विधेयक के पारित होय ले जीवन यापन अउ व्यापार सुगमता बर विश्वास उपर आधारित शासन ल अउ मजबूत करे बर कुछ कानून मन म संसोधन करथे। एखर ले कोनो-कोनो अपराध ल गंभीर अपराध के श्रेणी ले बाहर करे जा सकही। एमा तेईस मंत्रालय डहार ले प्रशासित उनयासी केंद्रीय अधिनियम मन म संशोधन के प्रस्ताव हे।
केंद्र सरकार-एलपीजी निर्देश
केंद्र सरकार ह राज्य अउ केंद्रशासित प्रदेस मन ले एलपीजी अउ आने पेट्रोलियम उत्पाद मनके जमाखोरी अउ कालाबाजारी ल रोके बर जरूरी कार्रवाई करे बर केहे हे। पेट्रोलियम अउ प्राकृतिक गैस मंत्रालय के सचिव डॉक्टर नीरज मित्तल ह ए बारे म राज्य अउ केंद्रशासित प्रदेस मन ल चिट्ठी लिखे हे।
राज्य मन ल जमाखोरी, हेराफेरी अउ घबराहट पैदा करइया गलत सूचना के प्रसार उपर कड़ा निगरानी राखे के सलाह देहे। मंत्रालय ह किहीन हे कि जम्मो रिफाइनरी मनके उच्च क्षमता उपर काम करत हे। कच्चा तेल के भरपूर भंडार हवय।
इही बीच, प्रदेस म घरेलू गैस सिलेंडर मनके बुकिंग म पाछू दू हफ्ता म गिरावट आय हे। एखर ले आपूर्ति बेवस्था ह अब सामान्य होवत हे। खाद्य विभाग के सचिव रीना बाबा साहेब कंगाले ह बतइन कि राज्य शासन डहार ले खाद्य विभाग अउ आयल कंपनी मनके अधिकारी मनके बीच राज्य स्तरीय समिति बनाय गेहे। समिति डहार ले दैनिक बुकिंग, जिला मन ल दे जात एलपीजी रिफिल सिलेंडर, बांटे गे सिलेंडर, रोके गे बुकिंग संख्या अउ जिला मन म उपलब्ध एलपीजी रिफिल सिलेंडर के स्टाक के रोजे समीक्षा करे जात हे। ओमन बतइन कि राज्य शासन डहार ले कमर्सियल गैस के आपूर्ति बीस प्रतिसत ले बढ़ाके चालीस प्रतिसत कर दे गेहे। ओमन बतइन कि राज्य म पेट्रोल अउ डीजल के पूरा भंडार हवय।
स्वास्थ्य विभाग-एमओयू
राज्य सरकार ह आम लोगन मन के स्वास्थ्य सेवा के बढ़िया जांच देवाय के दिसा म जरूरी कदम उठावत केंद्र सरकार के उपक्रम एचएलएल लाइफकेयर के संग दस्तखत करे हे। एखर ले राज्य के एक हजार ले जादा स्वास्थ्य संस्था मन म जरूरी जांच सुविधा हो पाही। योजना के तहत पहिली लैब के सुभारंभ चौदह अप्रैल के जगदलपुर ले करे जाही।
ए योजना म छत्तीसगढ़ इंटीग्रेटेड डायग्नोस्टिक मैनेजमेंट सिस्टम विकसित करे जात हे। एखर माध्यम ले राज्यभर म ‘‘हब एंड स्पोक‘‘ मॉडल उपर एक ठिन मजबूत जांच नेटवर्क तियार होही। एमा स्टेट रेफरल लैब, चार संभागीय लैब, तैंतीस ठिन जिला लैब, बारह ठिन सिविल अस्पताल लैब के संगेसंग एक सौ सत्यासी ठिन सामुदायिक स्वास्थ्य केंद्र स्तर के लैब जोड़े जाही।
राज्यपाल-जल संरक्षण
राज्यपाल रमेन डेका ह महासमुंद जिला के सरायपाली म आज विकासखंड स्तरीय अधिकारी मनके समीक्षा बइठका लीन। बइठका म ओमन आने-आने जनकल्याणकारी योजना अउ विकास काम के प्रगति के जानबा लीन। राज्यपाल ह जल संरक्षण के काम ल तेजी लाय अउ जादा ले जादा पेड़ लगाय ओला ठीकठाक राखे के बात किहीन।
अरूण साव-राशि स्वीकृत
राज्य सरकार ह चालू वित्तीय बछर म लोक निर्माण विभाग बर नौ हजार करोड़ ले जादा के विकास काम के मंजूरी दे हे। एमा पुल-पूलिया, रद्दा बनाय अउ भवन बनाय के काम करे जाही। उपमुख्यमंत्री अरूण साव ह बतइन कि विकसित छत्तीसगढ़ बनाय बर अवागमन ल सरल बनाना अउ दूरदराज के रद्दा मन ल बने ढंग ले बनाना जरूरी हे।
रायपुर रेलमंडल पत्रकारवार्ता
रईपुर रेलमंडल ह वित्तीय बछर दू हजार पच्चीस-छब्बीस म राजस्व, संरक्षा, तकनीकी, नवाचार अउ यात्री सुविधा मनके क्षेत्र म बढ़िया प्रदर्सन करत भारतीय रेल म एक ठिन आदर्स मंडल के रूप म अपन पहिचान बनाय हे। मंडल ह ए वित्तीय बछर म छियालिस मीलियन टन ले जादा के लदान करके करीबन पांच हजार करोड़ रूपिया के राजस्व पाय हे, जउन ह पाछू वित्तीय बछर ले करीबन चार प्रतिसत जादा हे।
आज रईपुर म होय पत्रकारवार्ता म मंडल प्रबंधक दयानंद ह बतइन कि ए सफलता के पाछू आधुनिक लोडिंग अउ संरचना, ग्राहक केंद्रित नीति के संगेसंग डिजीटल पहल अउ आने विभाग मनके भूमिका रिहीस। ओमन बतइन कि ए वित्तीय बछर म रईपुर रेलमंडल ह भारतीय रेल के प्रमुख शीर्ष रेलमंडल म नौवां स्थान म हवय।
खेलो इंडिया ट्रायबल गेम्स
छत्तीसगढ़ म होय खेलो इंडिया ट्राइबल गेम्स आज सिरागे। ए प्रतियोगिता म कर्नाटक ह तेईस स्वर्ण पदक के संग ओवर ऑल चैंपियन के खिताब अपन नांव करीन। दूसर जघा म ओडिसा ह इक्कीस अउ झारखंड ह सोलह ठिन स्वर्ण पदक के संग तीसर स्थान म रिहीस। त उहें, मेजबान छत्तीसगढ़ ह तीन स्वर्ण, दस रजत अउ छै ठिन कांस्य पदक जीत के नौवां स्थान म रिहीस।
खेलो इंडिया ट्राइबल गेम्स के तहत आज आखिरी दिन रईपुर म खेले गे पुरूष फुटबॉल के फाइनल मुकाबला म पश्चिम बंगाल ह छत्तीसगढ़ ल सून्य के मुकाबला एक गोल ले पराजित करके स्वर्ण पदक जीतिन। एखर अलावा आज तीरंदाजी के प्रतियोगिता घलो होइस, जेमा झारखंड के कोमालिका बारी ह मिक्स टीम खिताब के बाद महिला रिकर्व तीरंदाजी म स्वर्ण पदक जीतिन। उहें, ओडिसा के अर्जुन खारा ह पुरूष रिकर्व वर्ग म स्वर्ण पदक जीतिन।
जानबा के मुताबिक खेलो इंडिया ट्राइबल गेम्स म तीस राज्य अउ केंद्रशासित प्रदेस के तीन हजार आठ सौ खिलाड़ी मन भाग लीन। जेमा सात खेल तीरंदाजी, एथलेटिक्स, फुटबॉल, हॉकी, तैराकी, वेटलिफ्टिंग अउ कुस्ती के प्रतियोगिता होइस। फेर मलखंभ अउ कबड्डी ल डेमो खेल के रूप म सामिल करे गे रिहीस।
खेलो इंडिया ट्रायबल गेम्स-पत्रकारवार्ता
इही बीच, आज रईपुर म होय पत्रकारवार्ता म अंतरराष्ट्रीय बॉक्सर मेरीकॉम अउ फुटबॉलर बाइचुंग भूटिया ह छत्तीसगढ़ म होय खेलो इंडिया ट्राइबल गेम्स के प्रसंसा करीन। ओमन किहीन कि एखर ले ए खिलाड़ी मन ल अंतरराष्ट्रीय मंच म घलो मउका मिलही अउ देस के गौरव बढ़ाही।
अग्निवीर भर्ती-आवेदन
भारतीय थल सेना म अग्निवीर भर्ती बर ऑनलाइन अर्जी करे के आखिरी तारीख एक अप्रैल ले बढ़ाके दस अप्रैल कर दे गेहे। जिला रोजगार अउ स्व-रोजगार मार्गदर्शन केंद्र ले मिले जानबा के मुताबिक अर्जी करइया मन भारतीय सेना के वेबसाइट डब्ल्यू डब्ल्यू डब्ल्यू डॉट ज्वाइन इंडियन आर्मी डॉट एनआईसी डॉट इन म अर्जी कर सकथे।
गुड फ्राइडे
आज गुड फ्राइडे हरय। प्रभु ईसा मसीह ल सलीब उपर चढ़ाय जाय के सुरता म ए दिन मनाय जाथे। इही दिन प्रभु यीशु ह मनुष्य मन ल पाप ले मुक्ति दिलाय बर अपन जिनगी उत्सर्ग करीन। प्रधानमंत्री नरेंद्र मोदी ह गुड फ्राइडे उपर प्रभु यीशु मसीह के बलिदान ल सुरता करीन।
प्रभु ईसा मसीह के बलिदान दिवस उपर राजधानी रईपुर के संगेसंग छत्तीसगढ़ के कतकोन गिरिजाघर म बिसेस प्रार्थना सभा राखे गीस।
बुलेटिन शुभारंभ
आकाशवाणी केंद्र रईपुर के प्रादेशिक समाचार एकांश कोति ले अवइया पांच अप्रैल ले पांच-पांच मिनट के दू ठिन उपराहा प्रादेशिक समाचार बुलेटिन के प्रसारण करे जाही। ए समाचार बुलेटिन बिहनिया नौ बज के पचपन मिनट ले दस बजे तक अउ ग्यारा बजके पचपन मिनट ले बारह बजे तक प्रसारित होही। एखर प्रसारण छत्तीसगढ़ स्थित आकाशवाणी के जम्मो केंद्र ह करही।
बातों-बातों में
प्रादेशिक समाचार एकांश के समसामयिक बिषय उपर आधारित कारीकरम बातों-बातों में ए बार छत्तीसगढ़ के संगेसंग देस ले सशस्त्र नक्सलवाद के समाप्ति उपर केंद्रित रइही। ए कारीकरम के प्रसारण काली आकाशवाणी केंद्र रईपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मो केंद्र रिले करही।