विश्व के सबले बड़े जनसंख्या प्रक्रिया, जनगणना-दू हजार सत्ताईस के पहिली चरण आज ले सुरू होगे। जनगणना दू पारी म आयोजन करे जाही। पहिली, पारी म मकान सूचीकरण अउ दूसर पारी म जनसंख्या के गणना होही। एखर बर पहिली मार्च दू हजार सत्ताईस के संदर्भ तिथि तय करे गेहे।
पहिली घांव जनगणना डिजीटल माध्यम ले होही। एमा स्व-गणना के विकल्प घलो मौजूद होही। ए स्व-गणना आज ले लेके पंद्रह अप्रैल तक चलही। मकान सूचीकरण अउ आवास गणना सोलह अप्रैल ले सुरू होके पंद्रह मई तक जारी रइही। मकान सूचीकरण म सबो भवन के आवासीय स्थिति मिलत सुविधा के जानकारी जुटाय जाही। भवन के जीयो टैगिंग घलो कराय जाही अउ हरेक संरचना ले एक विशिष्ट संख्या पहिचान मिलही। देसभर म ए काम खातिर तीस लाख ले जादा गणना कर्मी, पर्यवेक्षक अउ आने अधिकारी तैनात करे गेहे। संगेसंग नागरिक सोलह ठिन भाषा म अपन जानकारी ऑनलाइन दरज करा सकही। दूसर चरण अवइया बछर फरवरी म होही। एमा आयु, लिंग, व्यावसाय, साक्षरता अउ जाति संबंधी जानकारी इकट्ठा करे जाही।
नये नियम लागू
आज ले नवा वित्तीय बछर के सुरूआत हो गेहे। एखर संगेसंग परमुख वित्तीय नियम म फेरबदल समेत कई ठिन सुधार देसभर म लागू हो गेहे। नवा वित्तीय बछर के पहिली दिन आज आयकर अधिनियम दू हजार पच्चीस ह छै दसक ले जादा जुन्ना आयकर अधिनियम के जघा ले लेहे। एमा जुन्ना प्रावधान ल हटाके कठिन नियम ल बेवस्थित करे गेहे। भारतीय रिजर्व बैंक के निरदेस के मुताबिक आज ले देस म सबो डिजीटल लेनदेन भुगतान बर दू कारक प्रमाणीकरण के मानदंड ल पूरा करना जरूरी होही। चालू वित्तीय बछर बर फास्ट टैग वार्षिक पास के संसोधित सुल्क घलो आज ले लागू होही। एखर संगेसंग स्थायी खाता संख्या पेन कार्ड बर अर्जी दे या ओला अपडेट करे बर बने नियम आज ले प्रभावी होही।
केंद्रीय खेल मंत्री पत्रकारवार्ता
केंद्रीय खेल अउ युवा कल्याण राज्य मंत्री रक्षा निखिल खडसे ह आज रईपुर म पत्रकार मन ले गोठबात करत किहीन कि केंद्र सरकार अउ राज्य सरकार के संग मिलके खेल संस्कृति ल बढ़ावा देवत हे। एमा प्रथम खेलो इंडिया ट्रायबल गेम्स के छत्तीसगढ़ म खेले जात हे। अइसन कीसम के आयोजन ले युवा मन म आत्मविस्वास बाढ़ही अउ ओमन किहीन कि खेल ले विकसित भारत के सपना साकार होही। अस्मिता लीग के आयोजन भारत सरकार के एक सराहनीय परयास हरय। एसो अस्मिता लीग के आयोजन देस के दू सौ पचास जिला म करे गीस, जेमा करीबन दू लाख माईलोगिन संघरीन।
एखर पहिली, केंद्रीय राज्य मंत्री रक्षा निखिल खडसे ह खेलो इंडिया ट्रायबल गेम्स म धरमपुरा क्रीडा परिसर के दउरा करीन। ओमन किहीन कि खेलो इंडिया ट्रायबल गेम्स एक सामाजिक आंदोलन हे, जेखर मंसा देस के खेल विरासत ल पुनर्जीवित करना, आदिवासी युवा मन ल मउका देना अउ हरेक गांव ले चैंपियन तियार करना हे। ओमन एला आदिवासी सशक्तिकरण जमीनी स्तर म प्रतिभाखोज अउ खेल ले राष्ट्र निर्माण के दिसा म एक ऐतिहासिक पहल बतइन। केंद्रीय राज्य मंत्री खडसे ह बस्तर ओलंपिक अउ सरगुजा ओलंपिक जइसन आयोजन ल बतात किहीन कि आदिवासी क्षेत्र म पहिलीच ले खेल के मजबूत परंपरा मौजूद हवय। जेला ए प्रतियोगिता एक मंच दिही। ओमन किहीन कि एखर ले आदिवासी प्रतिभा ल राष्ट्रीय मंच मिलत हे। केंद्रीय राज्य मंत्री खडसे ह किहीन कि खेल सिरिफ प्रतियोगिता के माध्यम नो हय भलुक आत्मविस्वास अउ राष्ट्रीय एकता के मजबूत माध्यम हरय। ओमन बतइन कि स्पोर्ट्स अथॉरिटी ऑफ इंडिया के कोच सबो प्रतियोगिता के जघा म तैनात हवय, जउन नवा प्रतिभा के चिन्हारी करत हे। बने प्रदर्सन करइया खिलाड़ी मन ल सोज्झे खेलो इंडिया कारीकरम ले जोड़े जाही, जेखर ले राष्ट्रीय स्तर तक पहुंचे के रद्दा सरल होही। एखर पहिली, केंद्रीय राज्य मंत्री ह आज मुख्यमंत्री विष्णुदेव साय ले उंखर निवास म भेंट करीन।
खेलो इंडियो ट्रायबल गेम्स
खेलो इंडिया ट्रायबल गेम्स म आज रईपुर के सरदार वल्लभ भाई पटेल अंतरराष्ट्रीय हॉकी स्टेडियम म पुरूष वरग के हॉकी प्रतियोगिता म छत्तीसगढ़ अउ मध्यप्रदेस के बीच तीसर अउ चौथा स्थान बर मैच खेले गीस। एमा छत्तीसगढ़ ह मध्यप्रदेस ल छै के मुकाबला चौदह गोल ले हराके कांस्य पदक जीतिन। आकाशवाणी समाचार ले गोठबात करत छत्तीसगढ़ पुरूष हॉकी टीम के कप्तान अश्विन कुजूर ह ए जीत के श्रेय टीम के सबो खिलाड़ी अउ कोच ल दीन।
छत्तीसगढ़ टीम के खिलाड़ी संदीप कुमार ठाकुर अउ रोहित एक्का ह ए मैच म तीन-तीन गोल करीन। उहें महिला हॉकी म झारखंड ह मध्यप्रदेस ल सून्य के मुकाबला चार गोल ले हराके कांस्य पदक जीतिन। महिला हॉकी के फाइनल मुकाबला आज मिजोरम अउ ओडिसा के बीच खेले जात हे। अब ले थोरिक अबेर म पुरूष हॉकी के फाइनल मुकाबला झारखंड अउ ओडिसा के बीच खेले जाही।
अइसने, पुरूष वर्ग म फुटबाल के सेमीफाइनल मुकाबला म पश्चिम बंगाल ह गोवा ल दू के मुकाबला पांच गोल ले हराके फाइनल म प्रवेस करीन। रईपुर के स्वामी विवेकानंद एथलेटिक्स स्टेडियम म छत्तीसगढ़ अउ अरूणाचल प्रदेस के बीच दूसर सेमीफाइनल मैच खेले जात हे।
तीरंदाजी प्रतियोगिता के आयोजन रईपुर के साईंस कालेज मैदान म करे जात हे। उहें, एथलेटिक्स के मुकाबला जगदलपुर म चलत हे।
इही बीच, अंबिकापुर म पाछू चार दिन ले चलत कुस्ती प्रतियोगिता के काली समापन होइस। पुरूष वरग म हिमाचल प्रदेस राज्य ओव्हर ऑल चैंपियन रिहीस। उहें, जम्मू कश्मीर फर्स्ट रनरअप, महाराष्ट्र अउ झारखंड सेकेंड रनरअप बनिन। महिला वरग म असम राज्य ओव्हर ऑल चैंपियन रिहीस। उहें, झारखंड फर्स्ट रनरअप अउ कर्नाटक, तेलंगाना सेकेंड रनरअप रिहीन।
डिजीटल सेवा
राज्य सरकार के कोष अउ लेखा संचालनालय ह नवा वित्तीय बछर ले कतकोन डिजीटल सेवा के सुरूआत करे हे। एमा ई-चालान के तहत ओवर द काउंटर-ओटीसी प्रणाली ल आज ले लागू कर देहे। एमा लोगन आसानी ले चालान तियार करके राजस्व जमा कर सकही। एखर संगेसंग आजे ले कोषालय म ऑनलाइन बीटीआर सुविधा सुरू हो गेहे। उहें, राज्य म एक केंद्रीय कोषालय के सुभारंभ करे गेहे। कोष अउ लेखा संचालनालय ह नवा वेबसाइट डीटीए डॉट सीजी डॉट जीओवी डॉट इन घलो लॉन्च करे हे। एखर ले विभाग ले जुड़े जानकारी आने-आने ऑनलाइन सेवा अउ जरूरी सुविधा एके मंच म मिलही।
राज्यपाल-सामूहिक विवाह
राज्यपाल रमेन डेका आज कोरबा जिला के दउरा के दउरान गांव ढपढप-बांकीमोंगरा म राखे गे दिव्य श्री हनुमंत कथा अउ एक सौ आठ दिव्यांग अउ निर्धन नोनी मन के सामूहिक विवाह कारीकरम म संघरीन। ए बेरा म ओमन नवा बिहाव होय जोड़ा मन ले भेंट करके आसीस दीन। राज्यपाल ह जम्मो नवा बिहाव होय लोगन ल सम्मान के रूप म पांच हजार रूपिया देके घोसना करीन।
बुलेटिन शुभारंभ
आकाशवाणी केंद्र रईपुर के प्रादेशिक समाचार एकांश कोति ले अवइया पांच अप्रैल ले पांच-पांच मिनट के दू अतिरिक्त प्रादेशिक समाचार बुलेटिन के प्रसारण करे जाही। ए समाचार बुलेटिन बिहनिया नौ बज के पचपन मिनट ले दस बजे तक अउ ग्यारा बजके पचपन मिनट ले बारह बजे तक प्रसारित होही। एखर प्रसारण छत्तीसगढ़ स्थित आकाशवाणी के जम्मो केंद्र कोति ले करे जाही।
अउ अब थोरकुन समाचार सार म –
– पश्चिम एशिया म चलत संघर्ष के सेति तेल विपणन कंपनी ह व्यावसायिक एलपीजी सिलेंडर के कीमत म एक सौ पंचानवे रूपिया पचास पइसा के बढ़वार करे हे।
– प्री-बीएड अउ प्री-डीएलएड प्रवेस परीक्षा बर ऑनलाइन अर्जी के काम पच्चीस मार्च ले सुरू हो गेहे। उम्मीदवार बारह जून तक ऑनलाइन अर्जी दे सकत हे।
– संचालनालय तकनीकी शिक्षा कोति ले पॉलीटेक्निक कालेज म भर्ती बर ऑनलाइन अर्जी अउ परीक्षा कारीकरम घोसित कर दे गेहे। उम्मीदवार सत्रह अप्रैल तक ऑनलाइन अर्जी दे सकत हे।
– सारंगढ़-बिलाईगढ़ जिला के सरिया पुलिस ह अवैध गांजा तस्करी के आरोप म अंतरराज्यीय गिरोह के तीन झिन सदस्य ल गिरफ्तार करे हे। उंखर तीर ले तिहत्तर किलो गांजा बरामद करे गीस, जेखर कीमत लाखो रूपिया आंके गेहे।
– सूरजपुर जिला के ग्राम पंचायत कुबेरपुर म बाल विवाह मुक्त छत्तीसगढ़ अभियान म जागरूकता रैली राखे गीस।