मुख्यमंत्री-नक्सलवाद
केन्द्र सरकार कोति ले छत्तीसगढ़ समेत देस ले नक्सलवाद ल पूरा खत्म करे के तय समय-सीमा के आज आखिरी दिन हे।
मुख्यमंत्री विष्णुदेव साय ह आज के दिन ल छत्तीसगढ़ म नक्सलवाद के खिलाफ लड़ाई म ऐतिहासिक दिन बताय हे। ओमन किहीन कि छत्तीसगढ़ अब नक्सलवाद जइसन नासूर ले बाहिर निकल के विकास, विश्वास अउ सुशासन के नवा युग के सुरूवात करत हे। श्री साय ह एखर श्रेय प्रधानमंत्री नरेन्द्र मोदी अउ केन्द्रीय गृहमंत्री अमित शाह के मजबूत अगुवई, रणनीति अउ अडिग इच्छाशक्ति ल दीन।
मुख्यमंत्री ह किहीन कि नक्सलवाद ह छत्तीसगढ़, मुख्य रूप ले बस्तर क्षेत्र के विकास ल बंधक बनाके राखे रिहीस। प्राकृतिक संसाधन ले भरे होय के बादो बस्तर करीबन चालीस बछर तक विकास ले दूरिहा रिहीस। ओमन किहीन कि अब स्थिति बदलत हे अउ बस्तर विकास के मुख्यधारा म मजबूती ले लहुटत हे।
माओवादी आत्मसमर्पण
दंतेवाड़ा जिला म आज चार महिला समेत पांच झिन माओवादी मन ह आत्मसमर्पण करीन हे। एखर मन उपर नौ लाख रूपिया के इनाम घोषित रिहीस। ए माओवादी मन ले मिले जानकारी के आधार म सुरक्षा बल ह आने-आने जघा म डंप करे गे एसएलआर, इंसास, बीजीएल समेत चालीस हथियार बरामद करे हे।
उहें, कांकेर जिला म आज दू झिन माओवादी मन ह हथियार समेत आत्मसमर्पण करीन हे। जिला के पुलिस अधीक्षक निखिल राखेचा ह बतईन कि पाछु पांच दिन म नौ झिन माओवादी मन ह हिंसा के रद्दा छोड़के समाज के मुख्यधारा म सामिल होय के फइसला लेहे।
बस्तर रेंज के पुलिस महानिरीक्षक सुंदरराज पी. ह बाकी बाचे माओवादी मन ले घलो आत्मसमर्पण करे के अपील करीन।
इही बीच, नारायणुर जिला म एक इनामी माओवादी ह पुलिस अधीक्षक रॉबिन्सन गुडिया के आगू आत्मसमर्पण करे हे। एखर उपर एक लाख रूपिया के इनाम घोषित रिहीस।
उहें, सुरक्षा बल ह माओवादी मन कोति ले डम्प करे गे उनसठ हथियार बरामद करे हे। पुलिस अधिकारी मन ह किहीन कि मारे गे नक्सली मन कोति ले अबूझमाड़ के जंगल लुकाय गे हथियार, विस्फोटक जिनीस अउ रोजमर्रा के बउरे जिनीस मिले के संभावना हरय। ओमन गांव के लोगन ले अपील करीन हे कि सुरक्षा बल के मदद करत संदिग्ध जिनीस के सूचना पुलिस अउ केन्द्रीय बल देवय।
जनगणना 2027
केन्द्र सरकार ह काली ले सुरू होवत जनगणना दू हजार सत्ताईस के पहिली पारी बर तैंतीस ठिन प्रश्न अधिसूचित करे हे। नई दिल्ली म संवाददाता सम्मेलन म भारत के महापंजीयक अउ जनगणना आयुक्त मृत्युंजय कुमार नारायण ह बतईन कि जनगणना दू चरण म होही। पहिली चरण म घर-घर जाके सूचीकरण अउ स्व-गणना के काम पूरा होही। ए चरण राज्य अउ केन्द्रसासित प्रदेस कोति ले तय कार्यक्रम के मुताबिक तीस सितंबर तक चलही।
केन्द्र-राशि
केन्द्र सरकार ह पन्द्रहवां वित्त आयोग के अनुदान के तहत छत्तीसगढ़ समेत आठ राज्य ल दू हजार चार सौ इकसठ करोड़ रूपिया ले जादा के रकम जारी करे हे। एखर उद्देश्य गांव के स्थानीय शासन ल अउ मजबूत करना हे। केन्द्रीय पंचायत राज मंत्रालय ह बतईन कि छत्तीसगढ़ ल करीबन तीन सौ सत्यासी करोड़ रूपिया के रकम जारी करे गेहे।
मुख्यमंत्री-एंबुलेंस सेवा
मुख्यमंत्री विष्णुदेव साय ह आज रईपुर म तीन सौ बेसिक लाइफ सपोर्ट अउ सत्तर ठिन एडवांस्ड लाइफ सपोर्ट एंबुलेंस ल हरियर झंडा देखाके के प्रदेस के सबो जिला बर रवाना करीन। एखर संग डायल एक सौ आठ एम्बुलेंस के सबो सेवा प्रदेसभर म तत्काल प्रभाव ले सुरू होगे हे। ए पहल ले प्रदेस म पहली घांव पांच नियोनेटल ए.एल.एस. एम्बुलेंस सेवा घलो सुरू करे गेहे। ए मउका म मुख्यमंत्री ह किहीन कि राज्य सरकार के लक्ष्य हरय कि सहरी क्षेत्र म पन्द्रह मिनट अउ गांव-गंवई के क्षेत्र म तीस मिनट के भीतरी एम्बुलेंस सेवा मिल जाय, जेखर ले जरूरतमंद मरीज मन तक बेरा म स्वास्थ्य सहायता मिल सकय।
उहें, स्वास्थ्य मंत्री श्यामबिहारी जायसवाल ह किहीन कि छत्तीसगढ़ देस के दूसर राज्य बन गेहे, जिहां नियोनेटल एम्बुलेंस सेवा सुरू करे गेहे। नियोनेटल एम्बुलेंस मुख्य रूप ले नान्हें लइका मन ल ध्यान म राख के सुरू करे गेहे। एमा इन्क्यूबेटर, वेंटिलेटर, सक्शन मशीन अउ ऑक्सीजन सपोर्ट जइसन इकचालीस किसम के आपातकालीन जीवन रक्षक सुभीता हवय।
खेलो इंडिया ट्रायबल गेम्स
छत्तीसगढ़ म चलत प्रथम खेलो इंडिया ट्रायबल गेम्स के सातवां दिन आज रईपुर म फुटबॉल अउ तीरंदाजी के मुकाबला होइस। उहें, अंबिकापुर म कुश्ती के अउ जगदलपुर म एथलेटिक्स के मुकाबला खेले जात हे।
छत्तीसगढ़ के सिद्धार्थ नागेश ह आज एथलेटिक्स म सानदार प्रदर्सन करत दू ठिन पदक जीतीन। पुरूष वर्ग के शॉर्टपुट मुकाबला म नागेश ह स्वर्ण पदक जीतीस। उहें, मेन्स डिस्क्स थ्रो म सिद्धार्थ नागेश ह रजत पदक जीते हे। पुरूष वर्ग के सौ मीटर दउड़ म छत्तीसगढ़ के ही तिलक बारसेल ह रजत पदक अपन नाव करीन।
छत्तीसगढ़ के महिला फुटबॉल टीम ह आज सेमीफाइनल मुकाबला म अरूणाचल प्रदेश ल हराके फाइनल म जघा बना लेहे। भारतीय अंतर्राष्ट्रीय खिलाड़ी किरण पिसदा ह सेमीफाइनल म जोरदरहा प्रदर्सन करीन। बने प्रदर्सन के सेती छत्तीसगढ़ ह तय समय के बाद दू-दू के बराबरी रेहे म पेनल्टी शूटआउट म तीन-चार ले रोमांचक जीत दरज करीन।
फुटबॉल के महिला वर्ग के दूसर सेमीफाइनल मुकाबला म झारखंड ह गुजरात ल शून्य के मुकाबला नौ गोल ले हरईस। अब छत्तीसगढ़ अउ झारखंड के बीच दू अप्रैल के फाइनल मुकाबला खेले जाही।
काली पुरूष वरग म खेले गे हॉकी के सेमीफाइनल मुकाबला म ओडिशा ह छत्तीसगढ़ ल एक के मुकाबला पांच गोल ले हरा दीस। उहें, दूसर सेमीफाइनल मुकाबला म झारखंड ह मध्यप्रदेश ले हरईस। ओडिशा अउ झारखंड के बीच काली एक अप्रैल के रईपुर म फाइनल मुकाबला खेले जाही।
उहें, महिला वरग म हॉकी के फाइनल मुकाबला काली ओडिशा अउ मिजोरम के बीच होही।
संपत्ति कर-तिथि
नगरीय प्रशासन विकास विभाग ह ए वित्तीय बछर बर संपत्ति कर भुगतान के आखिरी तारीख इकतीस मार्च ले बढ़ाके अब तीस अप्रैल कर देहे। एखर बाद भुगतान करे म सत्रह प्रतिशत सरचार्ज दे बर पड़ही। विभाग कोति ले जारी आदेस के मुताबिक सबो नगरीय निकाय ल तीस दिन के अलग ले बेरा दे गेहे। राजस्व वसूली के लक्ष्य पूरा नइ होय अउ आने प्रसासनिक काम के चलत ए फइसला ले गेहे।
अग्निवीर भर्ती-आवेदन
भारतीय सेना म अग्निवीर भर्ती बर ऑनलाइन अरजी करे के काली एक अप्रैल आखिरी तारीख हे। जउन उम्मीदवार एमा अरजी करना चाहत हे ओमन भारतीय सेना के आधिकारिक वेबसाइट म आवेदन कर सकत हे। अग्निवीर भर्ती म जनरल, तकनीकी, लिपिक, स्टोर कीपर, ट्रेडमैन के संगेसंग सेना पुलिस, स्थायी कैडर नर्सिंग असिस्टेंट अउ सिपाही फार्मा के पद म भर्ती करे जाही। ऑनलाईन प्रवेश परीक्षा एक ले दस जून तक होय के संभावना हरय।
महावीर जयंती
चौबीसवां अउ अंतिम जैन तीर्थंकर भगवान महावीर के जयंती आज छत्तीसगढ़ समेत देसभर म उछाह के संग मनाय जात हे। राष्ट्रपति द्रौपदी मुर्मु, प्रधानमंत्री नरेन्द्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह महावीर जयंती म लोगन मन ल सुभकामना दीन हे।
महावीर जयंती के मउका म राजधानी रईपुर समेत प्रदेस के आने-आने जिला मन म घलो जैन समाज कोति ले कतकोन कार्यक्रम कराए जात हे।
पासपोर्ट सेवा केन्द्र
रईपुर के क्षेत्रीय पासपोर्ट सेवा केन्द्र ल नवा पता म बदली करे जात हे। ए केन्द्र अब तेलीबांधा के वन हाई स्ट्रीट म दूसर मंजिल म चलही। नवा पासपोर्ट केन्द्र छह अप्रैल ले काम करे बर सुरू करही।
क्षेत्रीय पासपोर्ट अधिकारी ह बतईन कि छह अप्रैल या उंखर बाद के तारीख बर पासपोर्ट बर अरजी करइया मन केन्द्र के नवा पता म जा सकत हे।
खारून नदी-पुल मरम्मत
भिलाई के कुम्हारी म खारून नदी म बने पुल के मरम्मत के काम सुरू करे जाही। एला देखत आज रतिहा दस बजे के बाद तीस अप्रैल तक ए पुल ल अवई-जवई बर बंद कर दे जाही। पुल बंद रेहे के सेती रईपुर ले दुरूग अउ दुरूग ले रईपुर अवइया-जवइया जम्मों गाड़ी ल दिगर रद्दा ले होके जाय बर पड़ही।