खबर के मुताबिक अंबिकापुर ले दिल्ली हवई सेवा सम्मार अउ बुधवार के होही। उहें, कोलकाता बर बिरसपत अउ सनिच्चर के रइही। विमामनन कंपनी एलायंस एयर कोति ले ए उड़ान के संचालन करे जाही। यात्री मनके सुविधा खातिर टिकिट बुकिंग आधिकारिक वेबसाइट म सुरू हो गेहे।
इही बीच, काली ले बिलासपुर के बिलासा देवी केंवट एयरपोर्ट ले रतिहा कुन हवई सेवा के सुरूआत करे गेहे। मुख्यमंत्री विष्णुदेव साय ह नाईट आपरेसन के लोकार्पण करीन।
मुख्यमंत्री-पुलिस दीक्षांत समारोह
मुख्यमंत्री विष्णुदेव साय आज रईपुर जिला म चंदखुरी के नेता जी सुभाष चंद्र बोस राज्य पुलिस अकादमी म राखे गे उपनिरीक्षक संवर्ग के दीक्षांत समारोह म सामिल होइन। ओमन परेड के निरीक्षण करत सलामी लीन। ए सत्र म आठ सौ उनसठ झन अपन प्रसिक्षण पूरा करीन, जेमा सूबेदार, उपनिरीक्षक अउ प्लाटून कमांडर सामिल हे। ए बेरा म मुख्यमंत्री ह किहीन कि राज्य सरकार सुरक्षा विकास अउ विस्वास ए तीन स्तंभ म काम करत हे अउ पुलिस के भूमिका ए तीनों ल मजबूत बनाय म बहुते महत्ता के हरय। समारोह म उपमुख्यमंत्री अउ गृहमंत्री विजय शर्मा ह अधिकारी मन ले किहीन कि ओमन अइसन वातावरण बनावय, जेमा अपराधी मनके मन म कानून के डर अउ आम नागरिक के मन म पुलिस बल भरोसा बने रहय। समारोह म आने-आने बिसय म बने प्रदर्सन करइया मन ल सम्मानित करे गीस।
ग्रामीण आवास-उपलब्धि
छत्तीसगढ़ ह ग्रामीण आवास निर्माण म उपलब्धि पावत चालू वित्तीय बछर म छै लाख ले जादा घर पूरा कर लेहे। ए एसो देस म सबले जादा मकान बने के आंकड़ा हे। ए दउरान प्रधानमंत्री आवास योजना- ग्रामीण म पांच लाख सतयासी हजार, प्रधानमंत्री जनमन आवास योजना म तेरह हजार अउ मुख्यमंत्री आवास योजना म दस हजार ले जादा घर बनाय गेहे। ए घर बने ले महिला स्व-सहायता समूह ल आजीविका के नवा मउका मिले हे अउ ओमन लखपति दीदी बनके आर्थिक रूप ले मजबूत होय हे। संगेसंग छै हजार ले जादा राज मिस्त्री मन ल प्रसिक्षित करे गेहे, जेमा माईलोगिन घलो सामिल हे। उहें, आत्मसमर्पण करइया नक्सली मन ल एखर ले जोड़के ओमन ल सम्मानजनक आजीविका के मउका दे गेहे।
खेलो इंडिया ट्रायबल गेम्स
छत्तीसगढ़ म चलत प्रथम खेलो इंडिया ट्रायबल गेम्स के छटवां दिन आज रईपुर म हॉकी अउ फुटबॉल के मैच खेले जात हे। उहें, अंबिकापुर म कुस्ती के मुकाबला होवत हे अउ जगदलपुर म एथलेटिक्स के मुकाबला आज ले सुरू हो गेहे। हॉकी महिला वरग के फाइनल मुकाबला मिजोरम अउ ओडिसा के बीच एक अप्रैल के रईपुर के सरदार वल्लभ भाई पटेल इंटरनेशनल स्टेडियम म खेले जाही। आज महिला वरग के सेमी फाइनल मुकाबला म मिजोरम ह झारखंड ल दू के मुकाबला तीन गोल ले हराइस। उहें, एक आने सेमी फाइनल मुकाबला म ओडिसा ह मध्यप्रदेस ल सून्य के मुकाबला आठ गोल ले हराइस। पुरूष वर्ग के पहिली सेमी फाइनल मुकाबला झारखंड अउ मध्यप्रदेस के बीच खेले जावत हे। आज संझाकुन दूसर सेमी फाइनल मुकाबला छत्तीसगढ़ अउ ओडिसा के बीच खेले जाही। पुरूष वर्ग के फाइनल मैच घलो एक अप्रैल के होही।
फुटबॉल म पुरूष वर्ग के लीग मुकाबला म ग्रुप ए म पश्चिम बंगाल ह तमिलनाडु ल सून्य के मुकाबला नौ गोल ले हराइस। उहेंं ग्रुप बी म गोवा ह मिजोरम ल एक के मुकाबला चार गोल ले पराजित करे हे। पदक तालिका म कर्णाटक पदं्रह स्वर्ण समेत पच्चीस पदक के संग अव्वल स्थान म हवय। ओडिसा तेईस पदक के संग दूसर जघा बनाय हे अउ छत्तीसगढ़ दस पदक संग पदक तालिका म नौवा स्थान म हवय।
इही बीच, तीरंदाजी के मुकाबला रईपुर म काली ले सुरू होही।
माओवादी-डंप बरामद
काली इकतीस मार्च के माओवाद समाप्ति के समय-सीमा के एक दिन पहिली मोहला-मानपुर-अंबागढ़ चौकी जिला म पुलिस ल नक्सल मोर्चा म बड़े सफलता मिले हे। सुरक्षाबल ह मदनवाड़ा क्षेत्र के जंगल म माओवादी मन कोति ले बड़ मात्रा म लुकाके राखे गे हथियार बरामद करे गेहे। एमा एके सैंतालीस अउ इंसास रायफल, छियालीस ठिन जिंदा कारतूस सामिल हे। राजनांदगांव रेंज के आईजी बालाजी राव ह मोहला म एक प्रेस कॉन्फ्रेंस म बतइन कि नक्सली डंप के सूचना मिलतेच डीआरजी अउ आईटीबीपी के जवान मन ह आज बिहनिया जंगल म सर्च आपरेसन चलाइन। इही दउरान ए हथियार बरामद करे गेहे।
वन क्षेत्र-अवारा कुत्ता रोक
वन क्षेत्र अउ अभ्यारण्य म ऐति-तेति किंजरइया अवारा कुकुर मनके प्रवेस म रोक लगाय बर वन विभाग ह सख्ती बढ़ा देहे। कुछेक दिन पहिली अंबिकापुर म अवारा कुकुर कोति ले हिरण मन ल मार डारे के घटना के बाद ए कदम उठाय गेहे। प्रधान मुख्य संरक्षक अरूण कुमार पांडे ह ए संबंध म सबो क्षेत्रीय अधिकारी मन ल जरूरी निरदेस जारी करे हे, जेखर मुताबिक वन क्षेत्र के तीर के गांव म पालतू कुकुर मन ल बिसेस रंग के पट्टा पहिराय जाही, जेखर ले उंखर चिन्हारी हो सकय। कहू कोनो पालतू कुकुर वन क्षेत्र म पाय जाही, त उंखर मालिक के खिलाफ नियम के मुताबिक कार्रवाई करे जाही। वन क्षेत्र के तीर-तखार के गांव म पोस्टर बैनर अउ ग्रामसभा ले जन जागरूकता अभियान चलाके लोगन ल जागरूक करे जाही। एखर उद्देस्य वन के जीव जन्तु मन ल हमला अउ रैबिज जइसन बीमारी ले बचाना हे।
जशपुर डिजीटल कर भुगतान
जशपुर नगर पालिका क्षेत्र म अब टेक्स जमा करे बर दफ्तर के चक्कर लगाय के जरूरत नइ पड़य। अब ओमन डिजीटल डोर सुविधा ले घर बइठे क्ूय आर कोड़ स्कैन करके जल, संपत्ति अउ दुकान कर के भुगतान कर सकही। मुख्यमंत्री विष्णुदेव साय ह ए सेवा के सुभारंभ करीन। ए नवा बेवस्था म नगर पालिका जशपुर बर बिसेस क्यू आर कोड तियार करे गेहे। हरेक घर बर आने-आने क्यू आर कोड तियार हवय, जउन ल घरोघर चस्पा करे जात हे। ए क्यू आर कोड म मकान मालिक के नांव, मकान नंबर, मोबाइल नंबर अउ बकाया कर के जानकारी मिलही। नागरिक क्यू आर कोड स्कैन करके डी.डी.एन. नंबर, मोबाइल नंबर या प्रापर्टी आईडी ले अपन भुगतान देख सकही अउ भुगतान करे बाद तुरते डिजीटल रसीद मिल जाही।
अउ अब जानन मौसम के हाल…
प्रदेस म काली एक-दू जघा म छूटपुट बरसा होय अउ गरज-चमक संग छींटा बौछार पड़े के संभावना हरय। मौसम विभाग के मुताबिक एक-दू जघा म हवा गरेर चले गाज गिरे अउ करा गिरे के आसार हे। प्रदेस म एखर ले अधिकतम तापमान म थोरिक गिरावट हो सकत हे। इही बीच, बस्तर जिला म औचक मौसम बदलगे अउ मंझनिया बाद हवा गरेर संग बरसा होइस। जेखर ले तापमान म कमी आय हे।
अउ अब थोरकुन समाचार सार म –
– रईपुर नगर निगम के वित्तीय बछर दू हजार छब्बीस-सत्ताईस बर महापौर मीनल चौबे ह आज दू हजार एक सौ तीस करोड़ रूपिया ले जादा के बजट पेस करीन। ए बजट म ओमन वर्किंग वूमेन हास्टल नालंदा परिसर असन लाइब्रेरी, यूथ हास्टल, इलेक्ट्रानिक मार्केट, आटोमेटिक पार्किंग अउ हरेक वार्ड म बर्तन बैंक बनाय समेत कतकोन योजना के घोसना करीन।
अउ
– दुरूग पुलिस ह नसा के खिलाफ कार्रवाई करत खुर्सीपार थाना क्षेत्र ले अंतर्राज्यीय गिरोह के तीन सदस्य ल गिरफ्तार करे हे। एखर तीर ले तैंतालीस ग्राम ले जादा हेरोइन जब्त करे गेहे, जेखर कीमत करीबन साढ़े आठ लाख रूपिया आंके गेहे।