प्रधानमंत्री ह भारत के महान संस्कृति अउ विरासत ल देखाय बर लोगन के भागीदारी के भावना ल समझाय वाले ज्ञान भारतम सर्वे उपर जोर दीन। प्रधानमंत्री ह किहीन कि माई भारत, राष्ट्र निर्माण के जिम्मेदारी ल पूरा करे म बड़े भूमिका निभावत हे। श्री मोदी ह किहीन कि देस के कतकोन हिस्सा म गर्मी सुरू होय के संगेच पानी बचाय बर फेर संकल्पित होय के समय आ गेहे।
मन की बात
प्रधानमंत्री ह जनभागीदारी ले जल संरक्षण ले जुड़े उदाहरण साझा करीन। ओमन छत्तीसगढ़ के कोरिया जिला म होय पहल के बारे म जानकारी दीन। जिंहा किसान मन ह खेत म छोटे-छोटे तलाब अउ सोखता गड्ढा बनाय हे। एखर ले बरसात के पानी धीरे-धीरे जमीन के भीतर जाथे। ए मॉडल ल इलाका के एक हजार दू सौ ले जादा किसान मन ह अपनाय हे।
इही बीच, छत्तीसगढ़ के कतकोन जिला म मन की बात कारीकरम ल सुने गीस। मुख्यमंत्री विष्णुदेव साय ह रईपुर के अपन निवास म ए कारीकरम ल सुनिन अउ एला राष्ट्र निर्माण बर प्ररेणादायक बतइन। श्री साय ह किहीन कि प्रधानमंत्री डहार ले कोरिया जिला के किसान मन के प्रयास के तारीफ होना छत्तीसगढ़ बर गर्व के प्रेरणा के बिसय हे।
माओवादी मुठभेड़
सुकमा जिला के पोलमपल्ली थाना क्षेत्र म आज डिस्ट्रिक्ट रिजर्व गार्ड-डीआरज के जवान मन संग होय मुठभेड़ म एक झन माओवादी मारे गीस, जेखर उपर पांच लाख रूपिया के इनाम रिहीस। जिला के पुलिस अधीक्षक किरण चव्हान ह बतइन कि पोलमपल्ली क्षेत्र म माओवादी मनके मौजूदगी के सूचना के आधार म डीआरजी के टीम ह सर्च आपरेसन सुरू करे रिहीस। इही दउरान आज बिहनिया माओवादी मन संग जवान मनके मुठभेड़ होइस, जेमा एक झन माओवादी मारे गीस। मउका के तलासी के दउरान माओवादी के सव के अलावा हथियार घलो बरामद करे गेहे। ए माओवादी उपर आईईडी बिस्फोट अउ हत्या जइसन कतकोन मामला दर्ज रिहीस।
बस्तर रेंज के पुलिस महानिरीक्षक सुंदरराज पी. ह किहीन कि माओवादी मनके आगू आत्मसमर्पण अउ पुनर्वास के फायदा उठाय बर बहुते कम समय बांचे हे। ओमन अपील करीन कि माओवादी कैडर ए मउका के फायदा समझदारी ले उठाय अउ समाज के मुख्यधारा म लहुट के सम्मान जनक जीवन के सुरूआत करय।
मुख्यमंत्री-जशपुर
मुख्यमंत्री विष्णुदेव साय ह जशपुर म राखे गे जिला स्तरीय श्रमिक सम्मेलन म उनयासी हजार ले जादा निर्माण श्रमिक अउ उंखर परिवार वाला मनके बैंक खाता म सत्ताईस करोड़ रूपिया ले जादा के रासि भेजिन। अपन संबोधन म मुख्यमंत्री ह श्रमिक कल्याण बर राज्य अउ केंद्र सरकार डहार ले चलत कतकोन योजना के बारे म बतइन।
अपन जशपुर प्रवास के दउरान मुख्यमंत्री ह तीन करोड़ बावन लाख रूपिया के लागत ले बने इंडोर बास्केट बॉल स्टेडियम के सुरूआत करीन। ए स्टेडियम म बास्केट बॉल के संग शतरंज, कैरम अउ टेबल टेनिस जइसन खेल के प्रसिक्षण बर आधुनिक सुविधा मुहइया कराय जाही।
उहें, श्री साय ह जशपुर म क्रिकेट एकेडमी के घलो सुरूआत करीन। ए मउका म ओमन किहीन कि जशपुर म क्रिकेट ल बढ़ावा देके उद्देस्य ले नगर पालिका अउ ग्रीन क्रिकेट जशपुर के बीच एमओयू करे गेहे, जेखर ले स्थानीय खिलाड़ी मन ल बेहतर प्रसिक्षण अउ संसाधन उपलब्ध हो सकही।
मुख्यमंत्री ह सत्ताईस लाख रूपिया के लागत ले बने स्पोर्ट्स क्लाइमिंग वॉल इंडोर स्टेडियम के घलो उद्घाटन करीन। इंहा खिलाड़ी मन ल पर्वतारोहन अउ क्लाइमिंग ले जुड़े प्रसिक्षण दे जाही।
एखर अलावा मुख्यमंत्री ह जशपुर के रणजीता स्टेडियम म राजस्व विभाग बर चार ठन नवा शासकीय वाहन ल हरा झंडा दिखाके रवाना करीन।
भाजपा-स्थापना दिवस
भारतीय जनता पार्टी अवइया छै अप्रैल के अपन सैंतालीसवां स्थापना दिवस मनाही। ए दिन छत्तीसगढ़ के कतकोन जिला म घलो कारीकरम कराय जाही। एखर बर पार्टी डहार ले प्रदेस स्तरीय समिति बनाय जाही। ए समिति के संयोजक प्रदेस महामंत्री यशवंत जैन बनाय गे हवय। ओमन बतइन कि स्थापना दिवस के मउका म छै ले चौदह अप्रैल तक भाजपा डहार ले बूथ, मंडल अउ जिला स्तर म कतकोन कारीकरम कराय जाही।
वन धन-भारत ट्राइब्स फेस्ट
केंद्रीय जनजातीय कार्य राज्य मंत्री दुर्गादास उइके ह केहे हे कि देस के जनजातीय समुदाय मन ह प्रकृति के संग सामंजस्य के प्रतीक हवय। अेमन ह पर्यावरण अउ सांस्कृतिक संरक्षण म बड़े भूमिका निभाथे। नई दिल्ली म भारत जनजातीय महोत्सव के वन धन सम्मेलन म ओमन ह किहीन हे कि जनजातीय समाज के पारंपरिक ज्ञान अउ टीकाउ जीवन सैली ह दुनिया बर बडे़ सीख देथे। एखर बावजूद एमन ल बहुत बेरा ले वन अउ कृषि उत्पाद के उचित मूल्य नइ मिलत रिहीस।
खेलो इंडिया ट्रायबल गेम्स
छत्तीसगढ़ म चलत पहिली ‘‘खेलो इंडिया ट्रायबल गेम्स‘‘ के पाचवां दिन आज रईपुर म हॉकी, फुटबॉल, वेटलिफ्टिंग अउ सरगुजा म कुस्ती के मुकाबला होवत हे। रईपुर म खेले गे वेटलिफ्टिंग स्पर्धा के पुरूष वर्ग म अरूणाचल प्रदेस अउ महिला वर्ग म असम ह ओव्हरऑल चैंपियनशिप के खिताब ल अपन नांव कर लेहे। ए स्पर्धा म छत्तीसगढ़ के रिशिका कश्यप ह रजत अउ लक्की बाबू मरकाम ह कांस्य पदक हासिल करीस। पुरूष वर्ग म मिजोरम दूसर अउ असम ह तीसर स्थान म रिहीस। उहें, महिला वर्ग म ओडिसा ह दूसरा अउ छत्तीसगढ़ ह तीसरा स्थान हासिल करीस। रईपुर म राखे गे वेटलिफ्टिंग स्पर्धा के समापन समारोह म वन मंत्री केदार कश्यप अउ महापौर मीनल चौबे ह विजेता खिलाड़ी मन ल पुरस्कार बांटिन।
वेटलिफ्टिंग के फाइनल मुकाबला म एक सौ दस किलोग्राम भार वर्ग म अरूणाचल प्रदेस के सांबोलापुंग ह दू सौ निन्यानवे किलोग्राम वजन उठाके स्वर्ण पदक ल अपन नांव करीन। उहें, मिजोरम के डेविड ह दू सौ सत्तर किलोग्राम वजन उठाके रजत अउ छत्तीसगढ़ के लक्की बाबू मरकार म ह दू सौ इकसठ किलोग्राम वजन उठाके कांस्य पदक जीतिन।
उहें, एक सौ दस प्लस किलोग्राम वर्ग म मिजोरम के डेविड ह स्वर्ण, आंध्रप्रदेस के गुलूलोथु राजा शेखर ह रजत अउ असम के मनास प्रतिम सोनवाल ह कांस्य पदक ल अपन नांव करीन।
महिला वर्ग के छियासी किलोग्राम वर्ग म महाराष्ट्र के साक्षी बुरकुले ह स्वर्ण अउ छत्तीसगढ़ के रिशिका कश्यप ह रजत पदक हासिल करीस। उहें, छियासी किलोग्राम ले जादा वर्ग म मिजोरम के जोसांगजुआली ह स्वर्ण, असम के पिंकी बोरो ह रजत अउ मध्यप्रदेस के गुंजन उइके ह कांस्य पदक हासिल करीन।
खेलो इंडिया ट्रायबल गेम्स
रईपुर म महिला वर्ग के फुटबाल लीग मुकाबला म छत्तीसगढ़ ह गुजरात ल एक के मुकाबला दू गोल ले हराइस। उहें, महिला हॉकी म छत्तीसगढ़ ह बिहार के खिलाफ नौ गोल ले जीत दर्ज करीस। बिहार के टीम ह एको ठन गोल नइ कर पाइस।
खेलो इंडिया ट्रायबल गेम्स म अंबिकापुर म काली ले कुस्ती के मुकाबला सुरू हो गेहे। ए स्पर्धा म करीब एक सौ चौवालीस खिलाड़ी मन भाग लेवत हे। पहिली दिन पुरूष फ्री स्टाइल सीनियर वर्ग म चौहत्तर किलोग्राम वर्ग म जम्मूकश्मीर के मुनेर हुसैन अउ महाराष्ट्र के विक्रम साहेबराव पवार ह फाइनल म अपन जघा बनाइन। अइसने, एक सौ पच्चीस किलोग्राम भार वर्ग म तेलंगाना के बनोथ विनोद कुमार अउ महाराष्ट्र के विनोद यशवंत सलकार के बीच फाइनल मुकाबला होही। उहें, महिला सीनियर पचास किलोग्राम वर्ग म झारखंड के पूनम ओरांव अउ तेलंगाना के के.गीता फाइनल म पहुंच गेहे। बासठ किलोग्राम भार वर्ग म असम के देबी दैमारी अउ हिमाचल के प्रियंका चौधरी के बीच फाइनल खेले जाही।