श्री मोदी ह राज्य मन ले अपील करीन कि ओमन आपूर्ति व्यवस्था बनाय राखे अउ जमाखोरी के खिलाफ कड़ा कदम उठावय। प्रधानमंत्री ह राज्य मन ले सौर ऊर्जा, जैव ईंधन अउ इलेक्ट्रिक मोबीलिटी जइसन वैकल्पिक ऊर्जा स्त्रोत मन ल अपनाय के बात किहीन अउ पाइप वाले प्राकृतिक गैस के बुनियादी ढांचा के बिस्तार करे के बात किहीन।
मुख्यमंत्री-बैठक
मुख्यमंत्री ह अस्पताल, छात्रावास, शिक्षण संस्था, केंद्र सरकार के संस्था, सैन्य अउ अर्धसैनिक बल के संगेसंग समाज कल्याण विभाग डहार ले चलाय जात संस्थान अउ एयरपोर्ट कैंटीन मन म गैस के व्यवस्था बने ढंग ले करे के निरदेस दीन।
मुख्यमंत्री-बैठक
बइठका म एचपीसीएल, बीपीसीएल अउ आईओसीएल के अधिकारी मन ह मुख्यमंत्री ल बतइन कि प्रदेस म जरूरी जिनिस, पेट्रोलियम उत्पाद अउ रसोई गैस पर्याप्त मात्रा म हवय। ओमन बतइन कि गैस सिलेंडर मनके ऑनलाइन बुकिंग बने ढंग ले चलत हे। उज्जवला गैस कनेक्सन बर पैंतालिस दिन अउ सामान्य गैस कनेक्सन बर पच्चीस दिन के बेरा राखे गेहे। एखरे मुताबिक बुकिंग करे जात हे। ओमन यहू बतइन कि पेट्रोलियम पदार्थ के गाड़ी मनके अवई-जवई म कोनो प्रकार के बाधा नइ हवय। प्रदेस म स्थिति सामान्य हवय।
वीडियो कॉन्फ्रेंसिंग के दउरान अधिकारी मन ह बतइन कि प्रदेस म खातू के कोनो प्रकार के कमी नइ हे। मुख्यमंत्री ह निरदेस दीन कि खातू मनके होल्डिंग उपर रोक लगाय जाय अउ रोजेच स्टाक मनके समीक्षा करे जाय। मुख्यमंत्री ह किहीन कि जम्मो किसान मन ल ओखर जरूरत के मुताबिक खातू दे जाय।
बइठका म जानबा दे गीस कि प्रदेस म तीन सौ पैंतीस जघा म छापा मारी करे गीस। जेमा कोनो जघा कालाबाजारी के पुष्टि नइ होय हे। फेर जमाखोरी के सूचना मिले के बाद कार्रवाई के दउरान करीबन चार हजार गैस सिलेंडर मन ल जब्त करे के संगेसंग संतानवे ठिन एफआईआर दर्ज करे गेहे।
मुख्य सचिव विकाससील ह बतइन कि ए बेरा परिस्थिति के सरलग निगरानी करे बर राज्य स्तर म कंट्रोल रूम बनाय गेहे। उपभोक्ता मन घरेलू गैस ले जुड़े आपूर्ति या फेर कालाबाजारी के सूचना एक-आठ-सून्य-सून्य-दो-तीन-तीन-
लोकसभा-माओवाद मुक्त-चर्चा
देस ल माओवाद ले मुक्त करे के लक्ष्य के दिसा म केंद्र सरकार के प्रयास उपर तीस मार्च के लोकसभा म चर्चा होही। संसद के निचला सदन के कार्यसूची के मुताबिक ए बिसय उपर अल्पकालिक चर्चा नियम एक सौ तिरानवे के तहत सुरू करे जाही। एखर सुरूआत शिवसेना सांसद श्रीकांत शिंदे करही। ए दउरान सरकार के रणनीति, सुरक्षा अभियान अउ पुनर्वास नीति मन उपर सदन म बिस्तार ले चर्चा होय के संभावना हे।
जानबा के मुताबिक केंद्रीय गृहमुंत्री अमित शाह ह कतकोन बार ए कही चुके हे कि सरकार के लक्ष्य इकतीस मार्च दू हजार छब्बीस तक देस ल नक्सलवाद ले मुक्त करना हे। इही लक्ष्य ल धियान म राखत केंद्र अउ राज्य सरकार ह मिलके काम करत हे, जेमा सुरक्षा अभियान के संगे माओवादी मनके पुनर्वास अउ मुख्यधारा म सामिल करे उपर बिसेस जोर दे जात हे।
प्रधानमंत्री-मन की बात
प्रधानमंत्री नरेंद्र मोदी ह काली बिहनिया ग्यारा बजे आकाशवाणी ले ‘मन की बात‘ कारीकरम म देस-विदेस के लोगन मनके संग अपन बिचार साझा करही। ए मासिक रेडियो कारीकरम के एहा एक सौ बत्तीसवीं कड़ी होही। कारीकरम के प्रसारण आकाशवाणी अउ दूरदर्सन के पूरा नेटवर्क, एआईआर, न्यूज वेबसाइट अउ न्यूज ऑन एयर मोबाइल ऐप म करे जाही। एखर सोज्झे प्रसारण एआईआर न्यूज, डीडी न्यूज, प्रधानमंत्री कार्यालय अउ सूचना प्रसारण मंत्रालय के यूट्यूब चैनल म घलो करे जाही। हिंदी प्रसारण के तुरते बाद आकाशवाणी ह क्षेत्रीय भाखा मन म घलो कारीकरम के प्रसारण करही।
माओवादी-आत्मसमर्पण
कांकेर जिला म आज तीन झिन माओवादी मन ह पुलिस अधीक्षक के आगु आत्मसमर्पण करे हे। एमा एसीएम राधिका कुंजाम, संदीप कड़ियाम अउ रैनू पद्दा सामिल हे। ए माओवादी मन ह तीन ठिन हथियार घलो सौंपे हे, जेमा दू एसएलआर अउ एक ठिन तीन सौ तीन राइफल सामिल हे।
जिले की चिट्ठी
प्रादेशिक समाचार एकांश, आकाशवाणी रायपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के जम्मो केंद्र एके संघरा रिले करही। ए बखत के अंक म ‘‘महासमुंद‘‘ जिला के गतिविधि के बारे म जानकारी दे जाही।
खेलो इंडिया ट्राइबल गेम्स
छत्तीसगढ़ म चलत प्रथम खेलो इंडिया ट्राइबल गेम्स के चौथा दिन आज तैराकी, वेटलिफ्टिंग, फुटबॉल अउ कुस्ती के मुकाबला होवत हे। आज रइपुर म होय तैराकी प्रतियोगिता म छत्तीसगढ़ के अनुष्का भगत ह पचास मीटर ब्रेस्टस्ट्रोक महिला वर्ग म रजत पदक जीतिन। ए अनुष्का भगत के चौथा रजत पदक हरय। उहें, रईपुर म होय पुरूष मनके अठयासी किलोग्राम भारोत्तोलन प्रतियोगिता म अरूणाचल प्रदेस के रूबा ताडु ह दू सौ चौहत्तर किलोग्राम वजन उठाके स्वर्ण पदक जीतिन। त उहें आंध्रप्रदेस के देवरकोंडा प्रेमसागर ह रजत पदक जीतिन।
अइसने, भारोत्तोलन प्रतियोगिता के सीनियर पुरूष चौरानवे किलोग्राम वर्ग म अरूणाचल प्रदेस के खिलाड़ी ह स्वर्ण पदक जीतिन। उहें, दूसर स्थान आंध्रप्रदेस के रिहीस।
उहें, अरूणाचल प्रदेस के वेटलिफ्टर अनाई वांगसु ह महिला मन के अंठावन किलोग्राम वर्ग म स्वर्ण पदक जीतिन।
अउ अब पेस हे मौसम के हाल…
प्रदेस म काली एक-दू जघा गरज-चमक के संग अंधड़ चले अउ गाज गिरे के संभावना बताय गेहे। मौसम विभाग के मुताबिक एक ठिन द्रोणिका पश्चिम बंगाल ले तमिलनाडु होवत दक्षिण छत्तीसगढ़ तक बने हे। एखर प्रभाव ले बदली बारिस के स्थिति बन सकथे। बरसा के प्रमुख क्षेत्र सरगुजा अउ बस्तर संभाग ले लगे जिला मन सामिल हे।
इही बीच, सरगुजा जिला के गांव चलगली बकनाकला म काली गाज के चपेट म आय ले एक झिन नोनी के मउत होगे।
अउ अब थोरकुन समाचार सार म –
– उच्च शिक्षा संचालनालय ह प्रयोगशाला परिचारक के पद म सीधी भर्ती बर चुने गे चार सौ तीस अभ्यर्थी मन बर कांउसिलिंग के काम एक अउ दू अप्रैल के नवा रईपुर म करे जाही।
– जांजगीर-चांपा जिला के गांव दुरपा म आज दू ठिन फटफटी ह आपस म टकरागे ए टक्कर म दू झिन युवक के मउकच म पराण छूट गे, त उहें, फटफटी म बइठे दू झिन लइका मन ह घायल हो गेहे।
अउ
– इही जिला के शिवरीनारायण नगर पंचायत डहार ले डोंगा चलइया मनके डोंगा अउ मोटरबोट ल सील करे के विरोध म डांगा चलइया मन ह आज तीसर दिन घलो धरना प्रदर्सन करत हे। डोंगा चलइया मन ह नगर पंचायत के सीएमओ उपर मनमानी करे के आरोप लगाय हे।