वित्त मंत्री ह किहीन कि-सरकार ह ए सुनिश्चित करे हे कि पेट्रोल-डीजल अउ विमान टर्बाइन ईंधन के कीमत म बढ़ोत्तरी नइ होही। पश्चिम एशिया म जारी संघर्ष ल चेत म राखत प्रधानमंत्री ह बइठका बलाइन, जेमा ए निर्णय ले गिस कि वैश्विक स्थिति के सेति पेट्रोल-डीजल अउ एटीएफ के कीमत म बढ़ोत्तरी नइ होना चाही।
ऐति, लॉकडाउन के अफवाह ल निराधार बतावत वित्त मंत्री ह लोगन ल भरोसा देवाइन कि कोरोना महामारी के बेरा बने स्थिति जइसन कोनो लॉकडाउन नइ होही।
पेट्रोल-डीजल- मुख्यमंत्री
इही बीच, मुख्यमंत्री विष्णुदेव साय ह केंद्र सरकार के पेट्रोल-डीजल उपर केंद्रीय उत्पाद सुल्क म कटौती के सुवागत करिन हें। अेमन एला ऐतिहासिक अउ जनहितकारी कदम बतावत किहीन कि-ए निरनय ले देस के हर परिवार, किसान , मजदूर अउ मध्यम वर्ग ल बड़का राहत मिलही। वैश्विक संकट के बेरा म घलो केंद्र सरकार ह आम जनता उपर बोझ बाढ़े ल नइ देवत हे, एहा बड़का उदिम हे जउन आमजन ल सोज्झे प्रभावित करही।
केंद्र सरकार ह राज्य मन बर व्यावसायिक गैस सिलेंडर के आवंटन ल बढ़ाके 70 प्रतिसत करे के निरनय लेहे। एमा ले 20 प्रतिसत आवंटन इस्पात, आटोमोबाइल, कपड़ा अउ आने श्रम प्रधान उद्योग मन ल दे जाही। सोसल मीडिया पोस्ट म घोसना करत पेट्रोलियम मंत्री ह किहीन कि-एखर उद्देस्य व्यावसायिक गैस सिलेंडर के आपूर्ति ल सरल बनाना हे। एमा ओ उद्योग मन ल प्राथमिकता दे जाही, जिंखर तिर पाइपलाइन गैस के विकल्प नइये।
प्रधानमंत्री-मुख्यमंत्री बैठक
प्रधानमंत्री नरेंद्र मोदी ह आज सबो राज्य के मुख्यमंत्री मन ले पश्चिम एशिया संघर्ष उपर वीडियो कॉन्फ्रेंस के जरिया ले गोठबात करहीं अउ तियारी के संग योजना मन के समीक्षा करहीं। मिले जानकारी ले बइठका म ‘टीम इंडिया‘ के भावना ले जुड़े परयास मन उपर जोर दे जाही। फेर आचार संहिता के सेति चुनई होवइया राज्य मनके मुख्यमंत्री ए बइठका म सामिल नइ होहीं। एखर ले पहिली प्रधानमंत्री ह संसद के दूनों सदन म पश्चिम एशिया संकट उपर भारत के रूख ल स्पष्ट करत प्रधानमंत्री ह केहे रिहीन कि- सरकार ह पेट्रोल-डीजल, तेल, गैस अउ खाद के आपूर्ति बने ढंग ले करत हे।
पीएससी-परिणाम
छत्तीसगढ़ लोक सेवा आयोग ह बछर दू हजार पच्चीस के प्रारंभिक परीक्षा के परिणाम ल जारी कर देहे। एमा मुख्य परीक्षा बर तीन हजार नौ सौ इक्कीस अभ्यर्थी मन के चयन करे गेहे। आयोग ले मिले जानकारी ले मुख्य परीक्षा सोलह ले उन्नीस मई के बीच आयोजित होही।
रेलवे-पुल निर्माण/स्पेशल ट्रेन
रेल पटरी पार करत बेरा होवइया दुघर्टना ल रोके बर रेल मंत्री ह देसभर म पुल-पुलिया निर्माण के निरदेस देइन हे। रेल मंत्री ह अधिकारी मन ले अवइया पांच-छै बछर म ए कारज ल पूरा करे बर किहीन हे। रेल मंत्री ह यहू किहीन कि पुल-पुलिया के डिजाइन अइसे ढंग ले बनाय जाय, जेखर ले जल भराव जइसन समस्या झन होय।
इही बीच, रेलवे ह गर्मी के दउरान यात्री मन के उपराहा भीड़ के सेति दुरूग ले हरिद्वार के बीच ग्यारा-ग्यारा फेरा बर समर स्पेसल ट्रेन चलाय जाही। ए रेलगाड़ी उन्नीस अप्रैल ले अट्ठाईस जून तक हर इतवार के चलही।
खेलो इंडिया ट्राईबल गेम्स
खेलो इंडिया ट्राईबल गेम्स प्रतियोगिता के आज तीसरइया दिन हे। आज छत्तीसगढ़ के अनुष्का भगत ह महिला वर्ग के पचास मीटर तैराकी के स्पर्धा म रजत अउ निखिल खलखो ह इही स्पर्धा के पुरूष वर्ग म कांस्य पदक जीते हे। उहें, न्यासा पैकरा ह सौ मीटर तैराकी के बटरफ्लाई वर्ग म कांस्य पदक जितिस।
आज फुटबॉल के महिला वर्ग के ग्रुप स्टेज मुकाबला म झारखंड ह असम ल 1 के मुकाबला 9 गोल ले हरा दिस। एक ठन आने मैच म गुजरात ह आंध्रप्रदेस ल सून्य के मुकाबला 25 गोल हरा दिस। एखर अलावा आज रइपुर म वेटलिफ्टिंग अउ हॉकी के मुकाबला घलो होवत हें। उहें, आज ले ही सरगुजा संभाग के अंबिकापुर मुख्यालय म घलो कुस्ती प्रतियोगिता होवत हे।
भारतीय खेल प्राधिकरण के उपनिदेसक मयंक श्रीवास्तव ह बतइन कि खेल कारीकरम के जानकारी सोसल मीडिया म घलो उपलब्ध कराय जावत हे।
रामनवमी
रामनवमी के परब आज छत्तीसगढ़ के संगे जम्मो देसभर म बड़ उछाह के संग मनाय जावत हे। ए मउका म राष्ट्रपति, प्रधानमंत्री अउ छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह घलो रामनवमी के बधई देइन हें।
रामनवमी के मउका म आज प्रदेसभर के राम मंदिर म भगवान श्री राम के पूजा-पाठ करे जावत हे। कतकोन जघा सोभायात्रा घलो निकाले जावत हे। ऐति, राजधानी रइपुर के दूधाधारी मठ म भगवान श्रीराम के दरसन बर बिहनिया ले श्रध्दालु मनके भीड़ उमड़े रिहीस।
इही बीच, रइपुर के महामाया मंदिर के संग आने-आने देवी मंदिर अउ सक्तिपीठ म पूजा-पाठ करे गिस। ए मउका म कतकोन जघा हवन-पूजन, कन्या भोज अउ भंडारा के आयोजन करे गिस। संगेसंग बाजा-गाजा अउ जसगीत के संग जोत-जंवारा के घलो विसरजन करे जावत हे।
साइबर फ्रॉड-आरोपी गिरफ्तार
रइपुर पुलिस ह तीन जघा अवैध कॉल सेंटर खोलके अमेरिका के लोगन ले ठगइया बयालिस झन आरोपी मन ल गिरफ्तार करे हे। पकड़े गे आरोपी गुजरात, उत्तप्रदेस, राजस्थान, बिहार, मेघालय, हरियाणा अउ पंजाब के रहइया बताय जावत हें। आरोपी मनके दू सरगना गुजरात म बइठ के सबो गिरोह के संचालन करत रिहीन। आरोपी मन ठगी के घटना ल अंजाम देय बर चीन के आरोपी मन ले मदद लेवत रिहीन।
मिले जानकारी ले क्राइम ब्रांच अउ साइबर टीम ल गंज थाना इलाका के एक ठन कॉम्पलेक्स म अवैध कॉल सेंटर संचालन के सूचना मिले रिहीस। इही बेरा मउका म छापामार के आरोपी मन ल रंगेहाथ पकड़िन। जांच के बेरा आने-आने अब्बड़ अकन फर्जी दस्तावेज जब्त करे गिस। ऐति, न्यू राजेन्द्र नगर इलाका म घलो पुलिस ह छापामार के कतकोन आरोपी ल गिरफ्तार करे हे।
गांजा-आरोपी गिरफ्तार
महासमुंद जिला म एन्टी नारकोटिक टास्क फोर्स अउ सिंघोड़ा थाना पुलिस ह संयुक्त कार्रवाई करत छै झन अंतर्राज्यीय गांजा तस्कर मन ल गिरफ्तार करिन। इंखर मन ले एक करोड़ बारह लाख रूपिया ले जादा के सवा दू कुंटल गांजा जब्त करे गिस। गिरफ्तार आरोपी मन मध्यप्रदेस अउ उत्तरप्रदेस के निवासी बताय जावत हें। पुलिस ह आरोपी मनके दू ठन गाड़ी अउ छै ठन मोबाइल घलो जब्त कर लेहे।
अउ अब पेस हे मौसम के हाल…
मौसम विभाग के अनुसार अवइया चौबीस घंटा म प्रदेस के कई जिला म थोरकिन बरसा, गरज-चमक अउ अंधड़ चले के संभावना हे। खासतौर ले मध्य अउ दक्षिण छत्तीसगढ़ म बरसा के असर जादा देखे बर मिल सकत हे। मौसम विभाग ह एक-दू जघा गाज अउ करा गिरे के घलो चेतावनी देहे।
इही बीच, राजधानी रइपुर के संग कतकोन जघा आज मंझनिया पानी गिरे के खबर मिले हे। उहें, महासमुंद म करा गिरीस।
अउ अब थोरकुन समाचार सार म –
– राज्य सरकार ह पुलिस विभाग के बड़का अधिकारी आईजी रतनलाल डांगी ल निलंबित कर देहे। ए कार्रवाई उंखर आपत्तिजनक फोटो सोसल मीडिया म बगरे के बाद करे गिस।
अउ
– बिलासपुर एसीबी के टीम ह मुंगेली जिला के अचानकमार टाइगर रिजर्व के सुरही म पदस्थ रेंजर पल्लव नायक अउ डिप्टी रेंजर मनीष श्रीवास्तव ल पचास हजार रूपिया रिस्वत लेवत रंगेहाथ गिरफ्तार करिन।