कांकेर जिला म आज छह माओवादी मन आत्मसमर्पण करीन हे। जिला के पुलिस अधीक्षक निखिल राखेचा ह बतईन कि ए माओवादी मन म राजनांदगांव-कांकेर बॉर्डर डिवीजन के पांच अउ मिलिट्री कंपनी के एक माओवादी सामिल हे। एमन थ्री नॉट थ्री रायफल अउ एसएलआर समेत तीन हथियार पुलिस ल सौंपे हे।
बस्तर रेंज के पुलिस महानिरीक्षक सुंदरराज पी. ह बांचे हुए माओवादी मन ले हिंसा के रद्दा ल छोड़के समाज के मुख्यधारा ले जुड़े के अपील करे हे।
खेलो इंडिया ट्राइबल गेम्स
छत्तीसगढ़ म काली ले पहलइया खेलो इंडिया ट्राइबल गेम्स के सुरूआत होगे हे। रईपुर के साईंस कॉलेज मैदान म राखे गे सुभारंभ कार्यक्रम म मुख्य अतिथि के रूप म केन्द्रीय युवा मामला अउ खेल मंत्री डॉक्टर मनसुख मांडविया ह सामिल होइन। ए मउका म ओमन किहीन कि खेलो इंडिया ट्राइबल गेम्स छत्तीसगढ़ बर एक ऐतिहासिक सुरूआत हे। डॉक्टर मांडविया ह बतईस कि खेलो इंडिया ट्राइबल गेम्स के आयोजन अब हर बछर बस्तर, सरगुजा अउ रायपुर म करे जाही। ओमन किहीन कि खेल प्रतिभा ह बस सहर म नइ हे, फेर जनजातीय, तीर-तखार अउ दूरिहा के इलाका म घलो मौजूद हे।
कार्यक्रम म गोठियावत हुए मुख्यमंत्री विष्णुदेव साय ह किहीन कि राज्य सरकार ह खेल प्रतिभा मन ल आगू बढ़ाय अउ खेल अधोसंरचना ल मजबूत करे बर प्रतिबद्ध हे।
उहें, उपमुख्यमंत्री अउ खेल मंत्री अरूण साव ह किहीन हे कि प्रधानमंत्री नरेन्द्र मोदी के अगुवई म खेल ल नवा दिसा मिलत हे अउ ट्राइबल गेम्स इही दिसा म एक बड़का कदम हे।
तीन अप्रैल तक चलइया ए प्रतियोगिता म एथलेटिक्स, हॉकी, फुटबॉल, तीरंदाजी, कुश्ती, वेटलिफ्टिंग अउ तैराकी जइसन सात खेल स्पर्धा होवत हे। एखर अलावा मलखंभ अउ कबड्डी ल डेमो खेल के रूप म जोड़े गेहे। खेलो इंडिया ट्राइबल गेम्स छत्तीसगढ़ के तीन सहर – रईपुर, जगदलपुर अउ अंबिकापुर म आयोजित करे जावत हे, जेमा देस के करीब तीस राज्य अउ केन्द्रसासित प्रदेस के तीन हजार ले जादा जनजातीय खिलाड़ी अउ अधिकारी मन भाग लेवत हे।
खेलो इंडिया ट्राइबल गेम्स
खेलो इंडिया ट्राइबल गेम्स के दूसरइया दिन आज रईपुर म तैराकी, वेटलिफ्टिंग, हॉकी अउ फुटबॉल के मुकाबला होवत हे। छत्तीसगढ़ अउ पश्चिम बंगाल के बीच आज खेले गे फुटबॉल मैच ड्रा रिहीस। दूनों टीम ह निश्चित बेरा म एक-एक गोल ही कर पईस।
पदक तालिका म कर्नाटक ह पांच स्वर्ण समेत सात पदक के संग पहिली स्थान म हे। उहें, ओडिशा दूसर अउ असम ह तीसरा स्थान म बने हुए हे। छत्तीसगढ़ एक रजत अउ एक कांस्य पदक जीतके पदक तालिका म पांचवां स्थान म हे।
खाद्य सचिव-समीक्षा
खाद्य विभाग के सचिव रीना बाबा साहेब कंगाले ह आज रईपुर म आने-आने ऑयल कंपनी के क्षेत्रीय प्रबंधक मन संग समीक्षा बइठका करीन। बइठका म प्रदेस म एलपीजी के उपलब्धता, वितरण प्रणाली अउ उपभोक्ता संस्था मन ल पहिली गैस आपूर्ति करे के निरदेस दे गीस। बइठका म निरनय ले गीस कि कमर्शियल एलपीजी उपभोक्ता संस्थान मन ल पाछु महीना के कुल खपत के अधिकतम बीस प्रतिशत तक ही गैस सिलेंडर दे जाही। एखर साथ ही सहरी क्षेत्र म पच्चीस दिन अउ गांव-गंवई म पैंतालीस दिन म एलपीजी रिफिल के ऑनलाइन बुकिंग सुविधा उपलब्ध कराय जाय।
उपभोक्ता संरक्षण प्राधिकरण-शुल्क
केन्द्रीय उपभोक्ता संरक्षण प्राधिकरण ह होटल अउ रेस्टोरेंट मन ल निरदेस दीस हे कि ओमन ग्राहक मन ले एलपीजी शुल्क अउ ईंधन लागत वसूली जइसन अतकहा पइसा झन लेवय। केन्द्रीय उपभोक्ता संरक्षण प्राधिकरण ह किहीस हे कि ओ ह देसभर म एखर उपर निगरानी राखे हे अउ एखर उल्लंघन होही त कार्रवाई करे जाही अउ ग्राहक मनके हित बर जरूरी कदम उठाय जाही।
रेलवे-रिफॉर्म एक्सप्रेस
रेल मंत्री अश्विनी वैष्णव ह बतईन हे कि भारतीय रेल ह रिफॉर्म एक्सप्रेस के तहत पांच नवा सुधार के घोसना करे हे। एमा दू माल ढुलाई, एक निर्माण अउ दू यात्री सुविधा ले जुड़े हे। नवा सुधार के मंजूरी के संगेसंग बछर दू हजार छब्बीस बर सुधार के कुल संख्या अब नौ होगे हे।
मंत्रिमंडल-क्षेत्रीय संपर्क योजना
केन्द्रीय मंत्रिमंडल ह ‘‘क्षेत्रीय संपर्क योजना – संशोधित‘‘ यानि ‘‘उड़े देश का आम नागरिक – उड़ान योजना‘‘ ल अवइया दस बछर बर मंजूरी दे देहे। एखर उपर अट्ठाईस हजार आठ सौ चालीस करोड़ रूपिया के लागत आही। सूचना और प्रसारण मंत्री अश्विनी वैष्णव ह काली नई दिल्ली म बतईन कि क्षेत्रीय संपर्क ल बढ़ावा दे बर अभी के बिना उपयोग वाले अब्बड़ अकन हवाई पट्टी म करीबन सौ नवा हवाई अड्डा के निर्माण करे जाही।
मानवाधिकार आयोग-बंदी मौत
राष्ट्रीय मानवाधिकार आयोग ह छत्तीसगढ़ के आने-आने जिला म पाछु चार बछर के दउरान दू सौ पचासी कैदी मनके मउत के मामला ल संज्ञान म लेहे। ए मामला म आयोग ह राज्य के मुख्य सचिव अउ जेल महानिदेशक ल नोटिस जारी करके दू सप्ताह म रिपोर्ट दे बर किहीस हे।
उहें, मानवाधिकार आयोग ह हाल ही म महासमुंद जिला म होय रोप-वे दुर्घटना म दू लोगन के मउत अउ पन्द्रह झन के घायल होय के घटना ल घलो संज्ञान म लीस हे। ए मामला म आयोग ह मुख्य सचिव अउ महासमुंद के पुलिस अधीक्षक ल नोटिस जारी करके दू सप्ताह म रिपोर्ट मांगे हे।
राज्यपाल-स्कूली बच्चे मुलाकात
राज्यपाल रमेन डेका ले आज धमतरी जिला के नगरी विकासखंड के प्रतिभावन स्कूली लइका मन ह भेंट करीन। राज्यपाल ह सबो लइका मन ल पांच-पांच हजार रूपिया प्रोत्साहन रासि देहे के घोसना करीन। संगेसंग ए लइका मनके सफलता म साथ देवइया सिक्षक मन ल घलो सम्मानित करे गीस।
विजय शर्मा-दंतेवाड़ा
उपमुख्यमंत्री विजय शर्मा ह आज दंतेवाड़ा स्थित पुनर्वास केन्द्र के निरीक्षण करीन। ए दउरान ओमन प्रशिक्षण लेवत युवा मन ले गोठबात करके ओमन ल इलेक्ट्रिकल टूल किट अउ वेलकम किट के वितरण करीन। ए मउका म श्री शर्मा ह किहीन कि पुनर्वास नीति के उद्देश्य पुनर्वासित माओवादी मन ल समाज के मुख्यधारा ले जोड़के सम्मानजनक जीवन प्रदान करना हे।
अग्निवीर भर्ती-आवेदन
भारतीय सेना म अग्निवीर के रूप म भर्ती बर अभी ऑनलाइन पंजीयन के प्रक्रिया जारी हे। इच्छुक उम्मीदवार मन एक अप्रैल तक भारतीय सेना के आधिकारिक वेबसाइट म आवेदन कर सकत हे। मुंगेली के जिला रोजगार अधिकारी ह बतईन कि ए दारी के अग्निवीर भर्ती म जनरल, तकनीकी, लिपिक, स्टोरकीपर, ट्रेडमेन के संगेसंग सेना पुलिस, नर्सिंग असिस्टेंट वेट अउ सिपाही फार्मा के पद म भर्ती करे जाही। अधिक जानकारी बर जिला रोजगार कार्यालय ले संपर्क करे जा सकत हे।
रेलवे-जुर्माना
रेलवे ह खाना के गुणवत्ता म गड़बड़ी के सिकायत म ‘‘इंडियन रेलवे कैटरिंग एंड टूरिज्म कारपोर्रेशन यानि आई.आर.सी.टी.सी. उपर दस लाख रूपिया के जुर्माना लगाय हे। उहें, संबंधित वेंडर उपर पचास लाख रूपिया के जुर्माना लगात हुए ओखर अनुबंध ल खतम करे के आदेस देहे।
बिलासपुर-बर्ड फ्लू
बिलासपुर के कोनी स्थित पोल्ट्री फार्म म बर्ड-फ्लू ले पांच हजार कुकरी के मउत के बाद दस किलोमीटर के दायरा म बाईस हजार ले जादा पक्षी अउ पच्चीस हजार अंडा नष्ट करे गेहे। उहें, ऐहतियात बर पच्चीस मार्च ले सात दिन बर कानन पेंडारी चिड़ियाघर ल बंद कर दे गेहे अउ नगर निगम ह कुकरी अउ अंडा के बिक्री उपर रोक घलो लगा देहे।
अउ अब मौसम के हाल..
मौसम विभाग ह अवइया चौबीस घंटा म प्रदेस के कुछेक जघा म हल्का बरसा होय या गरज-चमक के संग छींटा पड़े के संभावना जताय हे। उहें, एक-दू जघा म अंधड़ चले के संग गाज अउ ओला गिरे के चेतावनी घलो दे गेहे। बरसा के क्षेत्र मुख्य रूप ले मध्य छत्तीसगढ़ रइही।
महादेव सट्टा ऐप-संपत्ति कुर्क
प्रवर्तन निदेशालय-ईडी ह महादेव ऑनलाइन सट्टा ऐप के मुख्य प्रमोटर सौरभ चंद्राकर के खिलाफ मनी लॉंड्रिंग मामला म करीबन एक हजार सात सौ करोड़ रूपिया के संपत्ति कुर्कु करे हे। ईडी के रईपुर जोनल कार्यालय ह प्रेस विज्ञप्ति जारी करके बतईन कि सौरभ चंद्राकर के दुबई म अट्ठारह अचल संपत्ति अउ नई दिल्ली म दू संपत्ति ल कुर्क करे गेहे।