छत्तीसगढ़ म आज ले प्रथम खेलो इंडिया ट्रायबल गेम्स के तहत खेल प्रतियोगिता शुरू होगे हे। अब ले कुछ देर बाद रायपुर म केन्द्रीय युवा कार्यक्रम अउ खेल मंत्री डॉक्टर मनसुख मांडविया के ए प्रतियोगिता के औपचारिक सुभारंभ करही। ए मउका म मुख्यमंत्री विष्णुदेव साय, उपमुख्यमंत्री अउ खेल मंत्री अरूण साव, केन्द्रीय राज्यमंत्री तोखन साहू अउ विधानसभा अध्यक्ष डॉक्टर रमन सिंह के अलावा राज्य मंत्रिमंडल के सदस्य, विधायक समेत दूसर गणमान्य नागरिक मौजूद रइही।
तीन अप्रैल तक चलइया ए प्रतियोगिता के तहत एथलेटिक्स, हॉकी, फुटबॉल, तीरंदाजी, कुश्ती, वेटलिफ्टिंग अउ स्वीमिंग के सात खेल स्पर्धा होही। एखर अलावा मलखंभ अउ कबड्डी ल डेमो खेल के रूप म सामिल करे गेहे। खेलो इंडिया ट्रायबल गेम्स छत्तीसगढ़ के तीन सहर – रायपुर, जगदलपुर अउ अंबिकापुर म आयोजित करे जाही। रायपुर म फुटबॉल, हॉकी, तीरंदाजी, स्वीमिंग, वेटलिफ्टिंग अउ कबड्डी के प्रतियोगिता होही। जबकि जगदलपुर म एथलेटिक्स अउ अंबिकापुर म कुश्ती अउ मलखंभ के प्रतियोगिता आयोजित करे जाही। खेलो इंडिया ट्रायबल गेम्स म देस के करीबन तीस राज्य अउ केन्द्रसासित प्रदेस के तीन हजार ले जादा जनजातीय खिलाड़ी अउ अधिकारी भाग लेवत हे।
भूमिहीन कृषि मजदूर
मुख्यमंत्री विष्णुदेव साय ह आज बलौदाबाजार म दीनदयाल उपाध्याय भूमिहीन कृषि मजदूर कल्याण योजना के तहत प्रदेस के चार लाख पंचानवे हजार ले जादा भूमिहीन कृषि मजदूर मनके खाता म चार सौ पंचानवे करोड़ रूपिया ले जादा के राशि अंतरित करीन। एमा आदि परंपरा के संरक्षक माने जाने वाला बाईस हजार ले जादा बैगा अउ गुनिया परिवार सामिल हे। ए मउका म मुख्यमंत्री ह विभागीय स्टॉल मनके अवलोकन करीन। संघरा लाभार्थी मन ल सरकार के आने-आने जन कल्याणकारी योजना के जानकारी दीन। कार्यक्रम ल संबोधित करत श्री साय ह किहीन कि डबल इंजन सरकार के संकल्प परिश्रम के सम्मान, श्रमिक के कल्याण अउ भूमिहीन कृषि मजदूर मनके सशक्तीकरण करना हे।
केन्द्र-स्पष्टीकरण
केन्द्र सरकार ह ओ खबर अउ सोशल मीडिया के जरिया फइलत अफवाह के खंडन करे हे, जेमा दावा करे गे रिहीस कि प्रधानमंत्री उज्जवला योजना- पी.एम.यू.वाई. के तहत एलपीजी कनेक्शन बर रिफिल बुकिंग के समय-सीमा ल संशोधित करके पैंतालीस दिन कर दे गेहे। दावा म यहू केहे गेहे कि गैर पी.एम.यू.वाई. सिंगल बॉटल कनेक्शन बर नवा समय-सीमा पच्चीस दिन अउ डबल बॉटल कनेक्शन बर पैंतीस दिन हे।
पेट्रोलियम अउ प्राकृतिक गैस मंत्रालय ह स्पष्ट करे हे कि अइसे कोनों बदलाव नइ करे गेहे अउ मौजूदा रिफिल बुकिंग के समय-सीमा अपरिवर्तित हे। शहरी क्षेत्र म ए पच्चीस दिन अउ ग्रामीण क्षेत्र म पैंतालीस दिन बने हुए हे, चाहे कोनों भी तरह के कनेक्शन हो। सरकार ह यहू दोहरईन कि देस म पर्याप्त एलपीजी स्टॉक मौजूद हे अउ लोगन मन ल चिंता करे के जरूरत नइ हे। सरकार ह लोगन मन ले अइसे गलत सूचना उपर भरोसा न करके ओला प्रसारित झन करयं अउ अनावश्यक या घबराहट म एलपीजी रिफिल बुकिंग ले बांचे के सलाह देहे।
इही बीच, भारत पेट्रोलियम अउ हिन्दुस्तान पेट्रोलिय ह सोशल मीडिया पोस्ट म केहे हे कि देसभर म ईंधन के कोनों कमी नइ हे। एलपीजी, कच्चा तेल, पेट्रोल, डीजल अउ एविएशन टर्बाइन फ्यूल के पर्याप्त भंडार मौजूद हे अउ आपूर्ति श्रृंखला बिना कोनों रूकावट के सुचारू रूप ले चलत हे।
सुप्रीम कोर्ट-याचिका खारिज
सर्वोच्च न्यायालय ह छत्तीसगढ़ सरकार डहार ले उच्च न्यायालय के आदेस के खिलाफ दायर विशेष अनुमति याचिका ल खारिज कर देहे। बतादन कि राज्य सरकार ह बछर दू हजार इक्कीस म छत्तीसगढ़ लोक सेवा आयोग पीएससी के परीक्षा म चयनित उम्मीदवार मन ल नियुक्ति देके उच्च न्यायालय के आदेस ल सर्वोच्च न्यायालय म चुनौती दे रिहीस। मामला के सुनवाई के बाद सुप्रीम कोर्ट ह बिलासपुर उच्च न्यायालय के पहिली के आदेस ल यथावत राखत चयनित उम्मीदवार मन ल नियुक्ति देके निरदेस दीन हे।
माओवादी आत्मसमर्पण
जगदलपुर म माओवादी संगठन के एक शीर्ष नेता पापा राव समेत अट्ठारह माओवादी मन पुलिस के वरिष्ठ अधिकारी मनके आगू आत्मसमर्पण कर दीन। एमा सात महिला घलो सामिल हे। बताय जात हे कि पापा राव माओवादी संगठन म स्टेट जोनल कमेटी के सदस्य रिहीस अउ एखर उपर पच्चीस लाख रूपिया के इनाम घोषित रिहीस। आत्मसमर्पण के दउरान ए माओवादी मन आठ ठिन एके-फोर्टी सेवन, सेल्फ लोडिंग रायफल, बैरल ग्रेनेड लांचर समेत दूसर हथियार घलो सौंपे हे।
पापा राव अउ ओखर साथी मनके आत्मसमर्पण ल सार्थक कदम बतात मुख्यमंत्री विष्णुदेव साय ह एक घांव अउ दोहरईन कि सरकार ह अवइया इकतीस मार्च तक नक्सलवाद के पूरा उन्मूलन के लक्ष्य निर्धारित करे हे।
उहें, उपमुख्यमंत्री अउ गृहमंत्री विजय शर्मा ह किहीन हे कि पापा राव के आत्मसमर्पण के बाद अब छत्तीसगढ़ के माओवाद प्रभावित क्षेत्र म शीर्ष स्तर के कोनों भी माओवादी नेता नइ बांचे हे।
बस्तर रेंज के पुलिस महानिरीक्षक सुंदरराज पी. ह बांचे माओवादी मन ल घलो समाज के मुख्यधारा म लहुटे के अपील करीन हे।
लोकसभा-रेल अवसंरचना
रायपुर के सांसद बृजमोहन अग्रवाल ह आज लोकसभा म छत्तीसगढ़ म रेल अवसंरचना के विकास के संबंध म सवाल पूछीन। जवाब म रेलमंत्री अश्विनी वैष्णव ह बतईन कि रेल मंत्रालय ह दीर्घकालिक दृष्टिकोण के संग स्टेशन मनके पुनर्विकास बर अमृत भारत स्टेशन योजना सुरू करे हे। ए योजना के तहत स्टेसन म सुधार बर मास्टर प्लॉन तैयार करके ओला लागू करना हे। ओमन बतईन कि अमृत भारत स्टेशन योजना के तहत अब तक एक हजार तीन सौ अड़तीस स्टेशन ल विकास बर चिन्हित करे गेहे। एमा छत्तीसगढ़ के बत्तीस स्टेशन घलो सामिल हे। श्री वैष्णव ह जानकारी दीन कि ए योजना के तहत छत्तीसगढ़ के पांच स्टेसन के काम पूरा हो चुके हे। एमा अंबिकापुर, भानुप्रतापपुर, भिलाई, डोंगरगढ़ अउ उरकुरा स्टेसन सामिल हे।
महासमुंद रोपवे हादसा-मौत
महासमुंद जिला के खल्लारी मंदिर म पाछु बाईस मार्च के होय रोप-वे हादसा म घायल एक अउ मनखे के मउत होगे हे। ए हादसा म मरने वाला मनके संख्या अब दू होगे हे। उहें, पन्द्रह घायल म ले दू के स्थिति अभी भी गंभीर बने हे।
इही बीच, रोप-वे हादसा के जांच बर प्रदेस कांग्रेस कमेटी डहार ले गठित समिति ह घटनास्थल पहुंच के रोप-वे स्टेशन के निरीक्षण करीस। ए दउरान टीम ह उहां मौजूद लोगन मन ले रोप-वे संचालन के संबंध म जानकारी लीस।
ऐति, मुख्यमंत्री विष्णुदेव साय ह रोपवे दुर्घटना म प्रभावित परिवार मन बर सहायता रासि के घोषणा करीन हे। ओमन दिवंगत श्रद्धालु के परिजन मन ल पांच-पांच लाख रूपिया अउ घायल मन ल पचास-पचास हजार रूपिया के सहायता रासि देके बात कहिन हे। मुख्यमंत्री ह कहिन हे कि घटना के जांच करे जात हे अउ दोसी मन उपर कड़ा कार्रवाई करे जाही।
हाईकोर्ट-जग्गी हत्याकांड
सर्वोच्च न्यायालय के निरदेस के बाद छत्तीसगढ़ उच्च न्यायालय ह एनसीपी नेता रामअवतार जग्गी के हत्या के मामला म सुनवाई फेर सुरू कर देहे। मुख्य न्यायाधीश रमेश सिन्हा अउ न्यायाधीश अरविंद कुमार वर्मा के डिवीजन बेंच ह ए मामला म आरोपी अमित जोगी अउ रामअवतार जग्गी के बेटा सतीश जग्गी ल नोटिस जारी करके कोर्ट म उपस्थित होय बर केहे हे।
बतादन कि चार जून दू हजार तीन के एनसीपी नेता रामअवतार जग्गी के गोली मारके हत्या कर दे गे रिहीस। ए मामला म इकतीस अभियुक्त बनाय गे रिहीस। अमित जोगी ल छोड़के अट्ठाईस लोगन मन ल सजा सुनाय गे रिहीस। उहें, इकतीस मई दू हजार सात के रायपुर के विशेष अदालत ह सबूत मनके कमी ल देखत अमित जोगी ल बरी कर दे रिहीस।