प्रधानमंत्री नरेंद्र मोदी ह पश्चिम एशिया क्षेत्र म सांति बहाली बर संवाद अउ कूटनीति के समर्थन करे हे। राज्यसभा म आज पश्चिम एशिया म जारी संघर्ष उपर भारत के रूख स्पष्ट करत श्री मोदी ह किहीन कि भारत ह तनाव कमती करे अउ होर्मुज जलडमरू मध्य ल फेर ले खोले के मुद्दा उठईन हे। प्रधानमंत्री ह कहिन कि पश्चिम एशिया म संघर्ष के बाद ले ओमन खाड़ी देस मनके नेता के संगेसंग ईरान, इजराइल अउ अमरीका के नेता मन ले घलो टेलीफोन म गोठबात करत हे।
माओवादी-आत्मसमर्पण
माआवेदी मनके सीर्ष नेता मन ले एक पापाराव ह आज अपन सत्रह झिन संगी मनके संग बीजापुर पहुंच के पुलिस ल अपन हथियार सौंप देहे। बाद म पुलिस ह ओला अउ ओखर साथी मन ल बीजापुर ले लेके जगदलपुर बर रवाना होगे हे। पापाराव काली जगदलपुर म पुलिस के बड़का अधिकारी मनके आगू औपचारिक रूप ले आत्मसमर्पण करही।
उपमुख्यमंत्री अउ गृहमंत्री विजय शर्मा ह किहीन कि पापाराव के आत्मसमर्पण करना सशस्त्र नक्सलवाद के खात्मा के दिसा म एक बिसेस कदम आय।
एनएचआरसी-छत्तीसगढ़
राष्ट्रीय मानवाधिकार आयोग-एन.एच.आर.सी. ह रायपुर के एक ठिन प्राईवेट अस्पताल म सेप्टिक टैंक के सफाई के दउरान तीन सफाई कर्मचारी मनके मउत के मामला म रायपुर जिला मजिस्ट्रेट अउ वरिष्ठ पुलिस अधीक्षक ल नोटिस जारी करे हे। ए मामला के स्वतः संज्ञान म लेवत एनएचआरसी ह दू हफ्ता के भीतर रिपोर्ट पेस करे अउ जांच के मौजूदा स्थिति बताय बर केहे हे।
खबर के मुताबिक पाछु सत्रह मार्च के रायपुर के एक प्राईवेट अस्पताल म सेप्टिक टैंक के सफाई के दउरान जहरीला गैस के चपेट म आय ले तीन झिन सफाई कर्मचारी के मउत होगे रिहीस।
हिन्दी पेपर-निरस्त
छत्तीसगढ़ माध्यमिक शिक्षा मंडल ह कक्षा बारहवीं हिन्दी विषय के पेपर ल निरस्त कर देहे। ए परीक्षा पाछु चौदह मार्च के होय रिहीस। मंडल ह जानकारी देहे कि परीक्षा समिति के बइठका म जम्मों तथ्य मन उपर गोठबात के बाद ए फइसला ले गीस। अब हिन्दी विषय के परीक्षा दस अप्रैल के फिर से होही। परीक्षा के बेरा बिहनिया नौ बजे ले मंझनिया सवा बारह बजे तक रइही। मंडल ह जम्मों परीक्षार्थी मन ल निर्धारित तारीख म परीक्षा केन्द्र म मौजूद रेहे बर केहे हे। परीक्षा ले जुड़े जानकारी माध्यमिक शिक्षा मंडल के आधिकारिक वेबसाइट म उपलब्ध हवय।
खबर के मुताबिक चौदह मार्च के राखे गे कक्षा बारहवीं के हिन्दी विषय के प्रश्न पत्र सेट-बी के लीक होय के बात आगू आय रिहीस, जेखर जांच करे जावत हे।
भूमिहीन कृषि मजदूर
मुख्यमंत्री विष्णुदेव साय काली बलौदाबाजार म राखे कार्यक्रम म दीनदयाल उपाध्याय भूमिहीन कृषि मजदूर कल्याण योजना के तहत रासि जारी करही। ए योजना के तहत प्रदेस के करीबन पांच लाख भूमिहीन हितग्राही मनके खाता म पांच सौ करोड़ रूपिया डारे जाही। एखर बर राज्य सरकार डहार ले करीबन चार सौ छियानवे करोड़ रूपिया के रासि के प्रावधान करे गेहे। ए सूची म बाईस हजार ले जादा बैगा अउ गुनिया परिवार मन सामिल हे। योजना के तहत सबले जादा रायपुर जिला के तिरपन हजार ले जादा अउ सबले कमती बीजापुर जिला के एक हजार पांच सौ बयालीस भूमिहीन कृषि मजदूर मनके खाता म रासि जारी करे जाही।
खबर के मुताबिक दीनदयाल उपाध्याय भूमिहीन कृषि मजदूर कल्याण योजना के तहत कृषि मजदूर मन ल हर बछर दस हजार रूपिया के वित्तीय मदद उंखर बैंक खाता म जमा करे जाथे।
विश्व क्षय रोग दिवस
आज विश्व क्षय रोग दिवस हरय। ए मउका म छत्तीसगढ़ म आने-आने कार्यक्रम आयोजित करे जावत हे। इही कड़ी म गौरेला-पेण्ड्रा-मरवाही जिला म कलेक्टर लीना कमलेश मंडावी ह सौ दिन के टीबी मुक्त भारत अभियान के तहत जिला स्तरीय कार्यक्रम के सुभारंभ करीन अउ ओमन लोगन मन ल भारत ल टीबी मुक्त बनाय के सपथ देवईन। उहें, मुख्य चिकित्सा अउ स्वास्थ्य अधिकारी डॉक्टर रामेश्वर वर्मा ह बतईन कि मितानिन मन डहार ले घर-घर जाके टीबी मरीज मनके पहिचान करे जावत हे।
क्षय रोग दिवस म आज गौरेला स्थित सामुदायिक स्वास्थ्य केन्द्र म जागरूकता कार्यक्रम के आयोजन करे गीस। ए दउरान लोगन मन ल टीबी के रोकथाम बर जांच अउ उपचार के जानकारी दे गीस। खंड चिकित्सा अधिकारी डॉक्टर एस.के. अर्गल ह लोगन मन ले टीबी के लक्षण दिखे म एखर जांच कराय ेके अपील करीन। ओमन बतईन कि टीबी रोगी मनके पहिचान बर जिला म सघन जांच अभियान चलाय जाही।
खेलो इंडिया ट्राइबल गेम्स
छत्तीसगढ़ म काली ले पहली खेलो इंडिया ट्राइबल गेम्स शुरू होही। उपमुख्यमंत्री अउ खेल मंत्री अरूण साव ह आज रायपुर म पत्रकार मन ले गोठबात करत बतईन कि ए प्रतियोगिता तीन अप्रैल तक चलही। एखर तहत कुल सात खेल के स्पर्धा होही। एमा एथलेटिक्स, हॉकी, फुटबॉल, तीरंदाजी, कुश्ती, वेटलिफ्टिंग अउ स्वीमिंग के स्पर्धा सामिल हे। एखर संगेसंग मलखंभ अउ कबड्डी ल डेमो खेल के रूप म सामिल करे गेहे।
श्री साव ह बतईन कि खेलो इंडिया ट्राइबल गेम्स के सुभारंभ काली रायपुर म राखे गे एक ठिन कार्यक्रम म केन्द्रीय युवा कार्यक्रम अउ खेल मंत्री डॉक्टर मनसुख मांडविया ह करही। ए मउका म मुख्यमंत्री विष्णुदेव साय घलो मौजूद रइही।
खेलो इंडिया ट्राइबल गेम्स छत्तीसगढ़ के तीन सहर – रायपुर, बस्तर अउ सरगुजा म आयोजित करे जाही। रायपुर म फुटबॉल, हॉकी, तीरंदाजी, स्वीमिंग वेटलिफ्टिंग अउ कबड्डी के प्रतियोगिता होही। उहें, बस्तर म एथलेटिक्स अउ अउ सरगुजा म कुश्ती के संग मलखंभ के प्रतियोगिता राखे जाही।
खेलो इंडिया ट्राइबल गेम्स म देस के करीबन तीस राज्य अउ केन्द्रसासित प्रदेस के तीन हजार ले जादा जनजातीय खिलाड़ी अउ अधिकारी मन भाग लीहीं। ए आयोजन के उद्देश्य देस के आदिवासी क्षेत्र के युवा मन ल एक अइसन राष्ट्रीय स्तर के मंच देवाना हे, जिहां उंखर खेल कौशल ल सही पहिचान अउ मउका मिल सकय। श्री साव ह किहीन कि खेलो इंडिया ट्राइबल गेम्स जनजातीय समुदाय ले उभरत खिलाड़ी मन बर सुघ्घर मंच साबित होही। ओमन बतईन कि ए प्रतियोगिता म एक सौ छह स्वर्ण पदक दे जाही, एमा सबले जादा एथलेटिक्स अउ सबले कम तीरंदाजी म दे जाही।
खेलो इंडिया ट्राइबल गेम्स
खेलो इंडिया ट्राइबल गेम्स म भाग ले बर आने-आने राज्य के खिलाड़ी मन छत्तीसगढ़ पहुंचत हे। काली असम ले तैराकी के दस खिलाड़ी अउ तमिलनाडु ले फुटबॉल के सत्रह खिलाड़ी के दल रायपुर पहुंचीन। खेल अउ युवा कल्याण विभाग अउ सांई के अधिकारी मन ह स्वामी विवेकानंद विमानतल म खिलाड़ी मनके स्वागत करीन।
इही बीच, काली पच्चीस मार्च के बिहनिया नौ बजके पन्द्रह मिनट ले खेलो इंडिया ट्राइबल गेम्स म प्रादेशिक समाचार एकांश रायपुर डहार ले तैयार करे गे विशेष कार्यक्रम के प्रसारण करे जाही। ए कार्यक्रम ल छत्तीसगढ़ स्थित आकाशवाणी के जम्मों केन्द्र एके संघरा रिले करही।
सरगुजा ओलंपिक-समापन
अंबिकापुर पीजी कॉलेज म राखे गे सरगुजा ओलंपिक के संभाग स्तरीय प्रतियोगिता काली सिरा गे। तीन दिन के प्रतियोगिता म सरगुजा संभाग के जम्मों जिला के दू हजार ले जादा प्रतिभागी मन भाग लीन। एखर तहत एथलेटिक्स, तीरंदाजी, कुश्ती, कराते अउ रस्साकसी समेत बारह खेल मनके प्रतियोगिता होइस।
समापन समारोह म भारतीय फुटबॉल टीम के पूर्व कप्तान, पद्मश्री अउ अर्जुन अवार्ड ले सम्मानित बाइचुंग भूटिया सामिल होइन। ए मउका म ओमन किहीन कि अवइया बेरा म छत्तीसगढ़ ले घलो खिलाड़ी मन ओलंपिक खेल म देस के नाम रोसन करही। ओमन खिलाड़ी मनके उत्साहवर्धन करत कहिन कि छत्तीसगढ़ सरकार प्रदेस म खेल ल बढ़ावा देवत हे।
समापन समारोह ल कृषि मंत्री रामविचार नेताम, पर्यटन मंत्री राजेश अग्रवाल, खेल अउ युवा कल्याण विभाग के संचालक तनुजा सलाम ह घलो संबोधित करीन।
समारोह के दउरान जशपुर अउ बलरामपुर के महिला खिलाड़ी मनके बीच रस्सी खींच के मुकाबला होइस, जेमा जशपुर के टीम विजेता होइस।