सरकार-एलपीजी
केंद्र सरकार ह राज्य मन ल व्यावसायिक एलपीजी बर बीस प्रतिसत उपराहा आवंटन ल मंजूरी दे देहे। एखर ले कुल आवंटन पचास प्रतिसत हो जाही। एमा पीएनजी के विस्तार बर सुधार के आधार म दस प्रतिसत आवंटन घलो सामिल हे। एमा रेस्टोरेंट, ढाबा, होटल, औद्योगिक कैंटीन, डेयरी, रियायती कैंटीन अउ राज्य या स्थानीय निकाय डहार ले चलत दूसर क्षेत्र ल प्राथमिकता दे जाही। पेट्रोलियम अउ प्राकृतिक गैस मंत्रालय के सचिव, नीरज मित्तल ह सबो राज्य अउ केंद्रशासित प्रदेस के मुख्य सचिव मन ल चिट्ठी भेजके किहीन हे कि ए आवंटन सम्मार ले लागू होही। सबो व्यावसायिक अउ औद्योगिक एलपीजी उपभोक्ता मन ल तेल विपणन कंपनी संग पंजीकरण कराना होही। सरकार ह आस्वासन दे हे कि देस म पेट्रोल, डीजल, एलपीजी के कोनो कमी नइ हे अउ लोगन हड़बड़ी म एखर खरीदी झन करय।
खेलो इंडिया ट्राइबल गेम्स
प्रदेस म पच्चीस मार्च ले सुरू होवइया खेलो इंडिया नेशनल ट्राइबल गेम्स म देसभर के जनजातीय खिलाड़ी मन ह सात ठन खेल के विधा म अपन प्रतिभा दिखाही। ट्राइबल गेम्स म देस के बत्तीस ठन राज्य अउ केंद्रशासित प्रदेस के करीबन तीन हजार खिलाड़ी मन ह भाग लिही। एमा छत्तीसगढ़ के एक सौ चौंसठ खिलाडी मन घलो सामिल हे।
इही बीच, खेलो इंडिया ट्राइबल गेम्स म भाग लेबर खिलाड़ी मन के छत्तीसगढ़ पहुंचे के सिलसिला सुरू हो गेहे। आज अरूणाचल प्रदेस के वेटलिफ्टर मन के चौदह झन सदस्य वाले दल ह रईपुर पहुंचिस। रईपुर के स्वामी विवेकानंद विमानतल म राऊत नाचा दल के रंगारग प्रस्तुति के बीच खेल अउ युवा कल्याण विभाग अउ साई के अधिकारी मन ह खिलाड़ी मन के सुवागत करीन।
खबर के मुताबिक देस म पहिली घांव छत्तीसगढ़ के रईपुर, अंबिकापुर अउ जगदलपुर म खेलो इंडिया ट्राइबल गेम्स के आयोजन करे जावत हे। एमा हॉकी, फुटबॉल, कुश्ती, एथलेटिक्स, तैराकी, तीरंदाजी अउ वेटलिफि्ंटग के प्रतियोगिता होही।
महासमुंद जिला के खल्लारी के देवी मंदिर म आज बिहनिया होय हादसा म एक झन माईलोगिन के मउत होगे। उहें, दूसर सत्रह झन घायल हो गेहे। बताय जावत हे कि ए दुर्घटना रोपवे के तार टुटे ले होय हे। नवरात्रि के सेति प्रदेस के दूसर मंदिर जइसनेच खल्लारी माता मंदिर म घलो बिहनियच ले लोगन के भीड़ देखे जाथे। श्रध्दालु मनके सुविधा बर इंहा रोप-वे चलाय जात हे। आज बिहनिया इही रोपवे म दुर्घटना होगे। घटना के सूचना मिलतेसाठ जिला प्रशासन के टीम ह मउका म पहुंचके बचाव अउ राहत के काम सुरू करीस। घायल मन ल तुरते सुरक्षित बाहर निकाल के इलाज बर बागबाहरा के सामुदायिक स्वास्थ्य केंद्र म भर्ती कराय गीस, जिंहा गंभीर रूप ले घायल चार झन लोगन ल रईपुर भेजे गे हवय।
मुख्यमंत्री विष्णुदेव साय ह ए हादसा म दुख जतावत किहीन हे कि घटना के जांच के बाद दोषी मन उपर कार्रवाई करे जाही। मुख्यमंत्री ह घायल मनके बने इलाज बर अधिकारी मन ल निरदेस दीन हे।
इही बीच, जिला कलेक्टर विनय कुमार लंगेह ह घायल मनके इलाज के संगेच घटना के जांच के निरदेस घलो दीन हे।
मुख्यमंत्री-अवंतीबाई लोधी
मुख्यमंत्री विष्णुदेव साय ह आज कबीरधाम जिला के ग्राम सेमरिया म होवत वीरांगना अवंतीबाई लोधी के बलिदान दिवस कारीकरम म उंखर मूर्ति के अनावरण करीन। ए मउका म मुख्यमंत्री ह सेमरिया म सामूदायिक भवन, मिनी स्टेडियम अउ यज्ञशाला बनाय के घोसना करीन।
समारोह म मुख्यमंत्री ह किहीन कि वीरांगना अवंतीबाई लोधी के जीवन साहस, स्वाभिमान अउ राष्ट्रभक्ति के अमिट मिसाल हे। ओमन ह सीमित संसाधन छोटे सेना के होय के बावजूद अंग्रेज मन के खिलाफ साहस के संग संघर्ष करीन अउ देस बर अपन बलिदान दीन।
‘‘बस्तर हेरिटेज मैराथन‘‘
प्रदेस म खेल ल बढ़ावा देबर अउ बस्तर के सांस्कृतिक विरासत ल राष्ट्रीय मंच दे के उद्देस्य ले आज जगदलपुर म ‘‘बस्तर हेरिटेज मैराथन‘‘ के आयोजन करे गीस। ए मैराथन म देस-विदेस के कतकोन राज्य अउ प्रदेस के नौ हजार आठ सौ ले जादा पंजीकृत धावक मन ह भाग लीन। ए मैराथन जगदलपुर के लालबाग ले सुरू हो के चित्रकोट जलप्रपात तीर सिराही। कारीकरम म मुख्य अतिथि के रूप म पहुंचे वन मंत्री केदार कश्यप ह विजेता मन ल बधई देवत किहीन कि आज हमर बस्तर विकसित भावना के संग सरलग आगू बाढ़त हे।
विश्व गौरेया दिवस
पाछू बीस मार्च के देसभर संघरा प्रदेस म घलो विश्व गौरेया दिवस मनाय गीस। ए मउका म छत्तीसगढ़ राज्य जैव विविधता बोर्ड अउ राज्य वेटलैंड प्राधिकरण के मार्गदर्सन म एक ठन वेबिनार कराय गीस, जेमा विषय बिसेसज्ञ, पर्यावरणविद, पक्षी मित्र अउ आने-आने महाविद्यालय के शिक्षक अउ विद्यार्थी मन भाग लीन। वेबिनार म बिसेसज्ञ मन ह गौरेया के कम होवत संख्या बर चिंता जतइन अउ उंखर मन के संरक्षण के सामूहिक प्रयास उपर जोर दीन।
हिरण मौत-निलंबित
अंबिकापुर के संजय वन वाटिका म अवारा कुकुर मन डहार ले हिरण ल काटे के मामला आगु आय हे। कुकुर मनके हमला ले करीबन पंद्रह झन हिरण के मउत घलो हो गे हवय। वन विभाग डहार ले हिरण मन के अंतिम संस्कार कर दे गे हवय। ए मामला म सरगुजा के मुख्य वन संरक्षक ह कार्रवाई करत वन वाटिका के प्रभारी संघरा तीन झन दूसर सहायक मन ल निलंबित कर दीन हे।
नवभारत साक्षरता कार्यक्रम
नवा राष्ट्रीय शिक्षा नीति म चलत ‘‘उल्लास-नवभारत साक्षरता कारीकरम ‘‘ म बीजापुर जिला के पचयासी झन आत्मसमर्पित माओवादी मन ह ‘बुनियादी साक्षरता‘ परीक्षा म सामिल होइन। अतिरिक्त पुलिस अधीक्षक रविन्द्र कुमार मीणा ह बतइन कि बुनियादी साक्षरता अभियान के माध्यम ले औपचारिक शिक्षा ले छूटे आत्मसमर्पित माओवादी मन ल साक्षर बनाय जावत हे।
ओति, गौरेला-पेण्ड्रा-मरवाही जिला म घलो आज ‘‘उल्लास-नवभारत साक्षरता कारीकरम‘‘ म महापरीक्षा के आयोजन करे गीस। ए परीक्षा म पंद्रह बछर ले जादा उमर के महिला-पुरूष मन भाग लीन।
अउ अब थोरकुन समाचार सार म –
– उपमुख्यमंत्री विजय शर्मा ह काली कवर्धा के कलेक्टर कार्यालय म निर्माण एजेंसी, सीजीएमएससी अउ जिला अस्पताल के अधिकारी के बइठका लेके मेडिकल कालेज भवन निर्माण के प्रगति के समीक्षा करीन। बठइका म ओमन अवइया बछर इकतीस मई तक मेडिकल कालेज भवन निर्माण काम ल पूरा करे के निरदेस दीन।
– माय भारत रईपुर डहार ले शहीद दिवस म काली तेईस मार्च के रईपुर म पदयात्रा के आयोजन करे जाही। ए पदयात्रा तेलीबांधा तालाब मरीन ड्राइव ले सुरू होके शहीद भगत सिंह चौक पहुंचही, जिंहा शहीद मन ल पुष्पमाला अर्पित कर श्रध्दांजलि दे जाही।
अउ
– सक्ती जिला के कटारी ग्राम पंचायत म लोक स्वास्थ्य यांत्रिकी विभाग के तत्वाधान म ‘विश्व जल दिवस‘ के आयोजन करे गीस। ए दउरान जल संरक्षण बर माईलोगिन मन ल सपथ देवाय गीस।