कारीकरम म गोठियात हुए मुख्यमंत्री ह युवा मन ले किहीन कि खेल ले जुड़के अपन प्रतिभा ल निखारव, आत्म विस्वास के साथ आगू बढ़व अउ प्रदेस के नांव देस-दुनिया म रोसन करव। ओमन किहीन कि ए आयोजन के माध्यम ले खेल प्रतिभा मन ल एक बड़का मंच मिले हे।
सरगुजा ओलंपिक के संभाग स्तरीय प्रतियोगिता म ग्यारा ले जादा खेल प्रतियोगिता म दू हजार ले जादा खिलाड़ी मन भाग लेवत हे।
छत्तीसगढ़ उपकर संशोधन विधेयक
छत्तीसगढ़ विधानसभा म काली बजट सत्र के आखिरी दिन छत्तीसगढ़ उपकर संशोधन विधेयक ल ध्वनिमत ले पारित कर दे गीस। ए विधेयक के पारित होय ले अचल संपत्ति के रजिस्ट्री उपर बाजार कीमत के आधार म लगाय जाने वाला सून्य दसमलव छै सून्य प्रतिसत उपकर ह समाप्त हो गेहे। वाणिज्यिक कर मंत्री ओपी चौधरी ह बतइन कि ए निर्णय ले प्रदेस के आम नागरिक, किसनहा, मध्यम वर्गीय परिवार अउ संपत्ति के खरीदी-बिक्री के काम ले जुड़े लोगन ल फायदा मिलही। श्री चौधरी ह किहीन कि ए विधेयक बस एक विधिक संशोधन नइ हे, फेर राज्य सरकार के जनहित, लोक कल्याण अउ कर व्यवस्था म न्यायपूर्ण सुधार के प्रतिबध्दता के सशक्त चिन्हारी हे।
उहें, मुख्यमंत्री विष्णुदेव साय ह किहीन हे कि अचल संपत्ति के रजिस्ट्री उपर लगाय गे उपकर ल खतम करना राज्य सरकार के एक बड़का निर्णय हवय। सरकार के साफ उद्देस्य हे कि आम नागरिक, किसान अउ मध्यम वर्गीय परिवार उपर कोनो प्रकार के अतकहा आर्थिक बोझहा झन पड़य।
गन्ना किसान-राशि
कबीरधाम जिला के राम्हेपुर स्थित भोरमदेव सहकारी शक्कर कारखाना कोति ले गन्ना किसान मन ल करीब छै करोड़ रूपिया के रासि जारी करे गेहे। कारखाना कोति ले अभी तक लगभग साढ़े संतावन करोड़ रूपिया के भुगतान करे जा चुके हे। कारखाना प्रबंधन ह बतइन कि चालू सत्र म दू लाख पचपन हजार मीट्रिक टन गन्ना के पेराई होय हे, जेखर ले तीन लाख नौ हजार कुंटल शक्कर तियार करे जा चुके हे।
‘‘बस्तर हेरिटेज मैराथन‘‘
प्रदेस म खेल मन ल बढ़ावा देबर अउ बस्तर के सांस्कृतिक बिरासत ल राष्ट्रीय मंच म लाय के उद्देस्य ले बाईस मार्च के जगदलपुर म ‘‘बस्तर हेरिटेज मैराथन‘‘ के आयोजन करे जाही। ए मैराथन लालबाग मैदान ले सुरू होके चित्रकोट जलप्रपात मेर सिराही। मैराथन म बयालीस, इक्कीस, दस अउ पांच किलोमीटर जइसन आने-आने श्रेणी राखे गेहे, जेमा देसभर के धावक मन सामिल होहीं। ए मैराथन म बस्तर संभाग के सबो जिला सुकमा, नारायणपुर, बीजापुर, दंतेवाड़ा, बस्तर, कांकेर अउ कोंडागांव ले दू सौ ले जादा पुनर्वासित माओवादी मन घलो भाग लिही। जीतइया प्रतिभागी मन बर पचीस लाख रूपिया तक के इनाम राखे गेहे।
मुख्यमंत्री विष्णुदेव साय ह किहीन कि ए आयोजन ‘रन फॉर नेचर-रन फॉर कल्चर‘ थीम के संग राज्य के चिन्हारी ल नवा ऊंचाई तक ले जाही अउ युवा मन ल खेल के प्रति प्रेरित घलो करही।
आयकर नियम अधिसूचित
केंद्र सरकार ह आयकर नियम अधिसूचित कर देहे। ए नियम मन ह एक अप्रैल ले प्रभावी होही। नवा नियम मनके उद्देस्य अनुपालन ल बढ़ाना अउ नियम के संख्या कम करके टैक्स प्रक्रिया ल सरल बनाना हे। केंद्रीय वित्त मंत्रालय ह किहीस हे कि नवा नियम के तहत कंपनी मन ल लाभांश के भुगतान सिरिफ देस के अंदर ही करना होही।
इही बीच, केंद्रीय वित्त मंत्री निर्मला सीतारमन ह काली नई दिल्ली म आयकर अधिनियम उपर देसव्यापी जागरूकता अभियान के सुरूआत करीन। ए अभियान प्रिंट, रेडियो, टीवी, आउटडोर, डिजिटल अउ सोसल मीडिया म चलही। वित्त मंत्री ह किहीन कि आयकर अधिनियम ले त्रुटि, विवाद अउ अनुपालन लागत कम होही।
पंजीयन कार्यालय
प्रदेसभर के पंजीयन कार्यालय चालू वित्तीय बछर के आखिरी दिन म छुट्टी के दउरान घलो खुले रइही। राज्य शासन ह लोगन के पंजीयन ले जुड़े बूता ल धियान म राखत हुए ए निर्णय लेहे। जारी निरदेस अनुसार प्रदेस के सबो पंजीयन कार्यालय काली बाईस, अट्ठाईस, उनतीस अउ इकतीस मार्च के घलो सामान्य दिन असन खुले रइही। ए दिन मन म दस्तावेज के पंजीयन समेत आने सबो काम होही।
रेलवे-माल परिवहन
दक्षिण पूर्व मध्य रेलवे ह चालू वित्तीय बछर म माल ढुलाई के क्षेत्र म पाछू उन्नीस मार्च के ढाई सौ मीलियन टन फ्रेट लोडिंग के आंकड़ा ल पार करके नवा रिकार्ड बनाय हे। ए उपलब्धि पाछू वित्तीय बछर के तुलना म नौ दिन पहिली हासिल कर ले गेहे। उहें, दक्षिण पूर्व मध्य रेलवे म अधोसंरचना विकास के काम घलो तेजी ले करे जावत हे। बिलासपुर-झारसुगुड़ा के बीच चौथइया रेल लाइन अउ राजनांदगांव-नागपुर के बीच तीसरइया रेल लाइन के काम आखिरी चरण म हे।
एखरे जइसन, बिलासपुर-नागपुर के बीच चौथइया रेल लाइन के काम प्रगति म हे।
डोंगरगढ़-ट्रेन ठहराव
चइत नवरात के मउका म डोंगरगढ़ म आयोजित मां बम्लेश्वरी मेला के दउरान श्रध्दालु मन के भीड़ ल धियान म राखत हुए दक्षिण पूर्व मध्य रेलवे डहार ले अब्बड़ अकन ट्रेन के ठहराव डोंगरगढ़ स्टेसन म दे गेहे। संगेसंग कतकोन ट्रेन के विस्तार घलो करे गेहे। डोंगरगढ़ के तीर-तखार के स्टेसन अउ सहर मन ले अवइया-जवइया भगत मन बर मेमू स्पेशल ट्रेन मन के संचालन करे जात हे। उहें, स्टेसन परिसर म अतिरिक्त टिकट अउ पूछताछ काउंटर, साफ-सफाई, पिये के पानी, प्रकाश व्यवस्था अउ भीड़ ल रोके बर जरूरी प्रबंध करे गेहे। एखर अलावा स्टेसन परिसर म प्राथमिक उपचार केंद्र स्थापित करे गेहे, जिंहा जरूरी दवई, उपकरण अउ एंबुलेंस के व्यवस्था हवय।
महानदी रिवर बोट चैंपिनशिप
धमतरी जिला के रविशंकर जलाशय याने गंगरेल बांध म काली बाईस मार्च के ‘महानदी रिवर बोट चैंपियनशिप‘ के आयोजन करे जाही। ए प्रतियोगिता म धमतरी समेत तीर-तखार के जिला के कुल बावन टीम ह हिस्सा लिही। ए दउरान नाव मन ह एक हजार मीटर के दूरी तय करही। ए मउका म मुख्य अतिथि के रूप म सांसद रूपकुमारी चौधरी मौजूद रइही। ए आयोजन के उद्देस्य गंगरेल बांध ल प्रदेस के प्रमुख पर्यटन स्थल मन म स्थापित करे के संगेसंग जल पर्यटन ल बढ़ावा देना अउ स्थानीय प्रतिभा ल मंच देना हे।
ईद-उल-फितर
ईद-उल-फितर आज छत्तीसगढ़ समेत देसभर म आस्था अउ उल्लास के संग मनाय जावत हे। आज लोगन मन ह ईदगाह अउ मस्जिद मन म नमाज पढ़े के बाद एक-दूसर ल ईद के मुबारकबाद दीन। एखर अलावा घर-घर म घलो नमाज अदा कर मुस्लिम समुदाय के लोगन मन ह सेवइ अउ सीर-खुरमा खाके ईद के खुसी बांटिन।
राष्ट्रपति द्रौपदी मुर्मु, उपराष्ट्रपति सी.पी. राधाकृष्णन, प्रधानमंत्री नरेंद्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह लोगन ल ईद-उल-फितर के सुभकामना दीन हे।
मौसम
प्रदेस के मौसम म आजकल उतरचढ़ के दउर चलत हे। बंगाल के खाड़ी ले आवत नमी के घटे ले अवइया चौबीस घंटा के दउरान मौसम सुक्खा रइही। मौसम विभाग के अनुसार एक पश्चिमी विक्षोभ ह द्रोणिका के रूप म उत्तर हरियाणा ले उत्तरी छत्तीसगढ़ तक बने हुए हे। एखर प्रभाव ले अवइया तीन दिन म प्रदेस के अधिकतम तापमान म पांच डिग्री सेल्सियस तक बढ़ोत्तरी होय के संभावना हे। उहें, चौबीस मार्च ले प्रदेस के कुछेक जघा म बरसा हो सकत हे।
अउ अब थोरकुन समाचार सार म –
– जिला रोजगार अउ स्वरोजगार मागदर्शन केंद्र रईपुर कोति ले तेईस मार्च के प्लेसमेंट कैंप के आयोजन करे जाही।
अउ
– मुंगेली जिला के आने-आने गांव म चलत आंगनबाड़ी केंद्र म सहायिका के खाली पद म भर्ती बर अवइया छै अप्रैल तक ऑनलाइन आवेदन मंगाय गेहे।