एखर पहिली, आज सदन म छत्तीसगढ़ लोक भर्ती अउ व्यावसायिक परीक्षा म अनुचित साधन के रोकथाम विधेयक सर्वसम्मति ले पारित करे गिस। ए विधेयक म नकल माफिया, फजी अभ्यर्थी अउ तकनीकी जरिया ले धोखाधड़ी करइया मनके खिलाफ दंडात्मक कार्रवाई के प्रावधान करे गेहे। संगेसंग दोषी पाय जाय म 3 ले 10 बछर तक के सजा अउ जादा ले जादा एक करोड़ रूपिया तक के जुर्माना के प्रावधान हे। उहें, नकल म लिप्त अभ्यर्थी मन ल तीन बछर तक कोनो घलो भर्ती परीक्षा म बइठन नइ दे जाही।
मुख्यमंत्री विष्णुदेव साय ह विधेयक उपर चर्चा के बेरा किहीन कि-एहा नकल गिरोह मन उपर सख्त कार्रवाही बर बनाय गेहे। संगठित अपराध के स्थिति म आरोपी मनके संपत्ति जब्त करे अउ कुर्की के घलो प्रावधान करे गेहे। संगे इलेक्ट्रानिक जिनिस ले नकल करइया मन उपर घलो सख्ती बरते जाही। मुख्यमंत्री ह किहीन कि ए कानून के दायरा बड़का होही अउ एहा पीएससी, व्यापम, निगम-मंडल संगे सबो भर्ती परीक्षा उपर लागू होही।
विधानसभा समाचार
उहें, सदन म आज वाणिज्यिक कर मंत्री ओपी चौधरी के डहार ले पेस करे गे छत्तीसगढ़ उप कर संशोधन विधेयक ल घलो पारित करे गिस। ए विधेयक के उद्देस्य संपत्ति पंजीयन म लगइया बारह प्रतिसत उपराहा उप कर सुल्क ल खतम करना हे। ए संसोधन ले संपत्ति खरीदइया मन ल बड़का राहत मिलही अउ स्टाम्प सुल्क म कमी आही।
एखर ले पहिली, विधानसभा म काली गृह निर्माण मंडल अधिनियम संसोधन विधेयक ल घलो पारित करे गिस। अब छत्तीसगढ़ गृह निर्माण मंडल के नांव बदलके छत्तीसगढ़ गृह अउ अधोसंरचना विकास मंडल करे गेहे। एखर अलावा सदन म छत्तीसगढ़ नगर के संग ग्राम निवेश संसोधन विधेयक ल घलो ध्वनिमत ले पारित कर दे गिस।
छत्तीसगढ़ धर्म स्वातंत्रय विधेयक
छत्तीसगढ़ विधानसभा म काली छत्तीसगढ़ धर्म स्वातंत्रय विधेयक ल चर्चा के बाद पारित करे गिस। उपमुख्यमंत्री विजय शर्मा ह किहीन कि ए विधेयक म धरम परिवर्तन के प्रक्रिया ल पारदर्सी बनाय बर स्पष्ट प्रावधान करे गेहे। अब धर्म परिवर्तन करइया ल प्राधिकृत अधिकारी के आगू अर्जी लगाय बर पड़ही, एखर बाद निर्धारित बेरा म सूचना सार्वजनिक करे के संग आपत्ति आमंत्रित करे जाही। जांच के बाद ही प्रमाण पत्र जारी करे जाही।
अवैध धर्मांतरण ल रोके बर विधेयक म कड़ा प्रावधान करे गे हे। सामान्य अवैध धर्मांतरण उपर सात ले दस बछर तक कारावास अउ पांच लाख रूपिया तक जुर्माना के प्रावधान हे। उहें, माईलोगन, अनुसूचित जाति, जनजाति अउ नाबालिग के अवैध धर्मांतरण उपर दस ले बीस साल के सजा अउ दस लाख रूपिया तक के जुर्माना होही अउ उहें, सामूहिक अवैध धर्मांतरण उपर आजीवन कारावास अउ कम से कम पच्चीस लाख रूपिया जुर्माना के प्रावधान हे।
एखर उपर मुख्यमंत्री ह किहीन कि नवा विधेयक के लागू होय ले समाज के कमजोर वर्ग ल लालच, दबाव अउ भ्रम फैलाके धर्मांतरण कराय के घटना उपर रोक लगही।
जल जीवन मिशन-एमओयू
मुख्यमंत्री विष्णुदेव साय आज विधानसभा परिसर ले-जल मिशन टू पॉइंट जीरो के तहत केंद्र अउ राज्य के बीच एमओयू कारीकरम म वीडियो कॉन्फ्रेंसिंग के जरिया ले सामिल होइन। जिंहा मुख्यमंत्री अउ केंद्रीय जल सक्ति मंत्री के वर्चुअल मौजूदगी म अधिकारी मन समझौता उपर हस्ताक्षर करिन।
ए मउका म मुख्यमंत्री ह किहीन कि- हर घर जल के लक्ष्य ल चेत म राखत जल जीवन मिशन के तहत ए समझौता ले विकास कारज ल गति मिलही।
खेलो इंडिया नेशनल ट्राइबल गेम्स
प्रदेस म पच्चीस मार्च ले सुरू होवइया ‘खेलो इंडिया नेशनल ट्राइबल‘ गेम्स म देसभर के जनजातीय खिलाड़ी सात ठन खेल म अपन प्रतिभा दिखाहीं। उपमुख्यमंत्री अरूण साव ह बतइन कि सुभारंभ के मउका म केंद्रीय खेल मंत्री मनसुख मांडविया अउ मुख्यमंत्री विष्णुदेव साय बिसेस रूप ले मौजूद रइहीं। ए खेल म देस के बत्तीस राज्य अउ केंद्रशासित प्रदेस के करीबन तीन हजार खिलाड़ी हिस्सा लिहीं।
‘‘बस्तर हेरिटेज मैराथन‘‘
प्रदेस म खेल मन ल बढ़ावा अउ बस्तर के सांस्कृतिक बिरासत ल राष्ट्रीय मंच म लाने के उद्देस्य ले बाईस मार्च के जगदलपुर म ‘‘बस्तर हेरिटेज मैराथन‘‘ के आयोजन करे जाही। ए मैराथन लालबाग मैदान ले सुरू होके चित्रकोट जलप्रपात तक जाही। मैराथन म बयालीस, इक्कीस, दस अउ पांच किलोमीटर जइसन आने-आने श्रेणी राखे गेहे, जेमा देसभर के धावक सामिल होहीं। विजेता प्रतिभागी मन बर पचीस लाख रूपिया तक के इनाम राखे गेहे।
मुख्यमंत्री विष्णुदेव साय ह किहीन कि ए आयोजन ‘रन फॉर नेचर-रन फॉर कल्चर‘ थीम के संग राज्य के चिन्हारी ल नवा ऊंचाई तक ले जाही अउ युवा मन ल खेल के प्रति प्रेरित करही।
चेट्रीचण्ड्र-पर्व
भगवान झूलेलाल के जयंती अउ चेट्रीचंड के परब आज गजब उछाह के संग मनाय जावत हे। ए मउका म प्रदेसभर म आने-आने कारीकरम आयोजित करे जावत हे। उहें, कतकोन जघा शोभायात्रा घलो निकालत हें। ए मउका म मुख्यमंत्री विष्णुदेव साय ह प्रदेसवासी अउ बिसेस रूप ले सिंधी समाज ल ए परब के बधई अउ सुभकामना देइन हें। ए मउका म मुख्यमंत्री ह किहीन कि-चेट्रीचंड सिंधी समाज के परमुख परब आय, जेन न सिरिफ झूलेलाल के जयंती के रूप म भलुक नवा बछर के रूप म घलो बड़ उछाह के संग मनाय जात हे।
बातों-बातों में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों में‘‘ ए दरी छत्तीसगढ़ ल नक्सलवाद समस्या ले मुक्त बनाय बर करे गे उदिम उपर केंद्रित रइही। ए कारीकरम के प्रसारण काली इक्कीस मार्च के आकाशवाणी केंद्र रइपुर डाहर ले एफ.एम. अउ प्रायमरी चैनल म बिहनिया नौ बजे ले करे जाही। जेला छत्तीसगढ़ के जम्मो आकाशवाणी केंद्र एक्के संघरा रिले करहीं।
अफीम खेती
दुरूग अउ बलरामपुर के बाद अब रायगढ़ जिला म घलो अफीम के खेती के मामला आगू आय हे। मिले जानकारी ले तमनार थाना इलाका के आमाघाट गांव म करीबन एक एकड़ म आने फसल के बीच म लुकाके अफीम के खेती करे जावत रिहीस। एखर सूचना मिलतेच पुलिस अउ प्रशासन के टीम ह मउका म पहुंचिस अउ एक झन आरोपी ल गिरफ्तार कर लिस। जांच म पता चलिस की झारखंड के रहवइया मार्सल सांगा ह आमाघाट म रहिके अफीम के खेती करत रिहीस हे, जेला गिरफ्तार कर ले गेहे।
मुख्यमंत्री-अधिकारी मुलाकात
नेशनल डिफेंस कॉलेज के प्रशिक्षु सैन्य अउ सिविल सेवा के पंद्रह सदस्यीय अध्ययन दल ह आज रइपुर म मुख्यमंत्री विष्णुदेव साय ले भेंट करिस। ए बेरा मुख्यमंत्री ह पांच दिन के छत्तीसगढ़ दउरा म आय ए अधिकारी मनके सुवागत करिन। ए बेरा किहीन कि छत्तीसगढ़ के धरती म सघन वन, प्राकृतिक संसाधन, खनिज संपदा, लोक संस्कृति के अमूल्य विरासत अउ नैसर्गिक सौंदर्य के अद्भुत संगम हे। प्रदेस के विकास के सबले बड़े बाधा नक्सलवाद ल केंद्र अउ राज्य सरकार ह मिलके दुरिहा देय हे। ए बेरा अध्ययन दल के अगुवई करइया ‘एयर कमोडोर‘ अजय कुमार चौधरी ह छत्तीसगढ़ प्रवास के अनुभव साझा करत इंहा के भौगोलिक, सांस्कृतिक अउ प्रशासनिक बिसेसता ल गजब संहराइन।