राज्य विधानसभा म आज उपमुख्यमंत्री अउ गृह मंत्री विजय शर्मा ह छत्तीसगढ़ धर्म स्वातंत्र्य विधेयक पेश करीन। नेता प्रतिपक्ष डॉक्टर चरणदास महंत ह ए विधेयक उपर आपत्ति जतात हुए कहिन कि ग्यारह राज्य म अइसन मामला पहिली ले उच्चतम न्यायालय म लंबित हे। अइसे म ए विधेयक उपर चर्चा न करके एला विधानसभा के प्रवर समिति ल सौंप देना चाही।
जवाब म गृह मंत्री विजय शर्मा अउ विधायक अजय चंद्राकर ह कहिन कि सर्वोच्च न्यायालय ह ये नइ केहे हे कि एमा नवा कानून बनाय जाय। राज्य सरकार चाहे त कानून बना सकत हे। ओमन ह कहिन कि विधेयक ल लेके प्रवर समिति ले फीडबैक ले गेहे। इही बीच, आसंदी ह नेता प्रतिपक्ष के आपत्ति ल खारिज कर दीन, जेखर ले नाराज विपक्षी सदस्य मन ह आज के कार्रवाई के बहिष्कार करत हुए सदन ले बहिर्गमन कर दीन।
खबर लिखे जाय तक सदन म छत्तीसगढ़ धर्म स्वातंत्र्य विधेयक उपर चर्चा जारी हे।
विधानसभा समाचार
राज्य विधानसभा म आज एसआईआर म नाम कटे, प्रधानमंत्री ग्राम सड़क योजना म भ्रष्टाचार, राज्य पुलिस बल पदक सम्मान राशि अउ आयुष्मान कार्ड ले इलाज म अनियमितता के संग आने कतकोन मुद्दा गूंजीस।
शून्यकाल म स्थगन प्रस्ताव पेस करत हुए नेता प्रतिपक्ष डॉक्टर चरणदास महंत ह कहिन कि एसआईआर के तहत प्रदेस म उन्नीस लाख तेरह हजार ले जादा लोगन मनके नाम काटे गेहे। ओमन ह एमा चर्चा कराय के मांग करीन। जवाब म भाजपा विधायक अजय चंद्राकर अउ धर्मजीत सिंह ह कहिन कि सदन म एमा चर्चा नइ कराय जा सकय, काबर कि ए राज्य के मुद्दा नइ हे। जेखर बाद सत्तापक्ष अउ विपक्ष म जारी नोंकझोंक के बीच आसंदी ह स्थगन प्रस्ताव ल अस्वीकर कर दीन। एखर ले नाराज विपक्ष ह नाराबाजी करत हुए सदन ले बहिर्गमन कर दीन।
प्रश्नकाल म आज विपक्ष ह प्रधानमंत्री ग्राम सड़क योजना म एक सौ चालीस करोड़ रूपिया के नियम विरूद्ध भुगतान के मामला उठात हुए एखर जांच सीबीआई या विधानसभा के समिति ले कराय के मांग करीन। एमा मंत्री विजय शर्मा ह विभागीय जांच कराय के आश्वासन दीन।
प्रश्नकाल म ही सत्तापक्ष के विधायक रामकुमार टोप्पो ह राज्य पुलिस बल पदक ले सम्मानित होवइया अधिकारी मन ल दे जाने वाला सम्मानि राशि के जानकारी मांगीन। जवाब म गृहमंत्री विजय शर्मा ह कहिन कि सशस्त्र बल वीरता पुरस्कार पवइया जवान अउ अधिकारी मन ल एक घांव म बीस लाख रूपिया के सम्मान राशि दे जाथे। एखर अलावा राज्य सरकार डहार ले घलो ओमन ल जीवनभर बीस हजार रूपिया हर महीना दे जाथे।
विधानसभा समाचार
सदन म कांग्रेस विधायक कुंवर सिंह निषाद ह बालोद के अर्जुंदा स्थित सामुदायिक स्वास्थ्य केन्द्र म आयुष्मान कार्ड के तहत दे जाने वाला प्रोत्साहन राशि म अनियमितता के मामला उठईन। जवाब म स्वास्थ्य मंत्री श्याम बिहारी जायसवाल ह कहिन कि ए मामला म सिकायत के बाद समिति डहार ले जांच कराय गेहे। जांच म कोनों तरह के अनियमितता नइ पाय गेहे। अइसन म एमा कार्रवाई संभव नइ हे।
विधानसभा म आज नगर अउ ग्राम निवेश संशोधन विधेयक अउ छत्तीसगढ़ गृह निर्माण मंडल संशोधन विधेयक ल चर्चा के बाद सर्व-सम्मति ले पारित कर दे गीस।
पिछड़ा वर्ग सलाहकार परिषद-बैठक
प्रदेस म पिछड़ा वर्ग के कल्याण बर अलग ले संचालनालय के गठन करे जाही। ए जानकारी मुख्यमंत्री विष्णुदेव साय के अध्यक्षता म विधानसभा परिसर म होय राज्य पिछड़ा वर्ग सलाहकार परिसर के बइठका म दे गीस। बइठका म नवा हॉस्टल भवन बनाय अउ अन्य पिछड़ा वर्ग के विकास ले जुड़े आने-आने विषय उपर चर्चा करे गीस। मुख्यमंत्री ह कहिन कि राज्य सरकार पिछड़ा वर्ग समाज के विकास बर प्रतिबद्ध हे। ओमन बतईन कि अन्य पिछड़ा वर्ग बर वर्तमान म पचपन विभागीय छात्रावास स्वीकृत हे। हाल ही म पेस करे गे बजट म जशपुर, रायगढ़, मनेन्द्रगढ़-चिरमिरी-भरतपुर, धमतरी अउ रायपुर म आने पिछड़ा वर्ग पोस्ट मैट्रिक छात्रावास स्वीकृत करे गेहे।
रवि मित्तल-पीएम कार्यालय प्रतिनियुक्ति
केन्द्र सरकार ह छत्तीसगढ़ के आईएएस अधिकारी डॉक्टर रवि मित्तल ल प्रधानमंत्री कार्यालय म प्रतिनियुक्ति म उप सचिव के पद म नियुक्त करे हे। डॉक्टर मित्तल बछर दू हजार सोलह छत्तीसगढ़ कैडर के आईएएस अधिकारी हे। ओमन वर्तमान म छत्तीसगढ़ सासन म जनसंपर्क आयुक्त हे।
मुख्यमंत्री-कार्रवाई
मुख्यमंत्री विष्णुदेव साय ह कहिन हे कि राज्य म दबावपूर्वक मानवरहित सेप्टिक टैंक के सफाई करइया व्यक्ति मन उपर कड़ाई ले कार्रवाई करे जाही। ओमन सीवरेज टैंक के सफाई के संबंध म दिसा-निरदेस जारी करत हुए कहिन कि केवल नगर निगम के जरिया ले या पंजीकृत संस्था के तरफ से ही सीवरेज सफाई के काम कराय जाए। संगेसंग सफाई के दउरान सुरक्षा मापदंड के घलो ख्याल रखे जाय। मुख्यमंत्री ह ए बात राज्य स्तरीय अनुश्रवण समिति के बइठका म कहिन। जानबा के मुताबिक रायपुर के एक निजी अस्पताल म सेप्टिक टैंक के सफाई के दउरान तीन मजदूर के मउत होगे रिहीस।
इही बीच, राष्ट्रीय सफाई कर्मचारी आयोग के राष्ट्रीय उपाध्यक्ष हरदीप सिंह गिल ह छत्तीसगढ़ प्रवास के दउरान रायपुर के बीएसयूपी कॉलोनी स्थित मृतक मनके घर पहुंच के उंखर परिवार वाले मन ले मुलाकात करीन। ओमन ह परिवार ल हरसंभव सहयोग के आश्वासन दीन।
खेलो इंडिया ट्राइबल गेम्स
देश म पहली बार होवइया खेलो इंडिया ट्राइबल गेम्स के मेजबानी छत्तीसगढ़ ल मिले हे। एखर तहत रायपुर, जगदलपुर अउ अंबिकापुर म पच्चीस मार्च ले तीन अप्रैल तक आने-आने खेल प्रतियोगिता आयोजित करे जाही। खेलो इंडिया ट्राइबल गेम्स म एथलेटिक्स, फुटबॉल, हॉकी, वेटलिफ्टिंग, तीरंदाजी, तैराकी अउ कुश्ती जइसे सात खेल ल सामिल करे गेहे। उहें, दू ठिन डेमो गेम – मलखंभ अउ कब्डडी घलो ए प्रतियोगिता के हिस्सा होही। खेलो इंडिया ट्राइबल गेम्स म बत्तीस राज्य के करीबन तीन हजार खिलाड़ी, प्रशिक्षक अउ अधिकारी हिस्सा लीहीं।
खेलो इंडिया नेशनल ट्राइबल गेम्स के तैयारी ल लेके उपमुख्यमंत्री, खेल अउ युवा कल्याण मंत्री अरूण साव ह काली वरिष्ठ अधिकारी मनके बइठका लेके समीक्षा करीन। ओमन ह ए प्रतियोगिता म भाग लेवत आने-आने राज्य मन ले अवइया खिलाड़ी मनके रेहे के जगह, गाड़ी अउ खाना संबंधी तैयारी के घलो समीक्षा करीन।
चैत्र नवरात्र/विक्रम संवत
मां दुर्गा के उपासना के परब चैत्र नवरात्र आज ले सुरू होगे हे। बिहनिया ले ही देवी मंदिर अउ शक्तिपीठ मन म दर्सन बर श्रद्धालु मनके भीड़ देखे जावत हे। मंदिर म मनोकामना ज्योति कलश जलाय जावत हे। संगेसंग मंदिर ल बिजली के रोशनी ले सजाय जावत हे। ए मउका म डोंगरगढ़ स्थित मां बम्लेश्वरी मंदिर, रतनपुर स्थित मां महामाया, चंद्रपुर स्थित मां चन्द्रहासिनी अउ दंतेवाड़ा स्थित दंतेश्वरी मंदिर जवइया श्रद्धालु अउ पैदल यात्री मन बर विशेष व्यवस्था करे गेहे।
इही बीच, आज ले भारतीय नवा बछर सुरू होगे हे। एला विक्रम संवत या नव संवत्सर कहे जाथे। ए चैत्र शुक्ल प्रतिपदा ले सुरू होथे। देस के आने-आने भाग मन म नव बछर ल अलग-अलग नाव ले जाने जाथे। हिन्दू नव बछर ल लेके राजधानी रायपुर के संग प्रदेस के कतकोन जिला म आज धार्मिक संगठन ह रैली निकालीन।
मुख्यमंत्री विष्णुदेव साय ह प्रदेसवासी मन ल चैत्र नवरात्रि, हिन्दू नवा बछर अउ गुड़ी पड़वा के बेरा म बधाई अउ सुभकामना दीन।
इही बीच, मुख्यमंत्री ह आज जशपुर जिला के दीपू बगीचा म होय सरहुल महोत्सव म सामिल होइन। ए बेरा म ओमन ह धरती माता, सूर्य देव अउ साल वृक्ष के पूजा करके प्रदेस के सुख-समृद्धि के कामना करीन। कार्यक्रम के दउरान पारंपरिक वेशभूषा म सजे सौ ले जादा माईलोगन अउ युवती मनके टोली ह सरहुल नाचा प्रस्तुत करीन। जानबा के मुताबिक जशपुर म हर बछर हिन्दू नवा बछर के बेरा म सरहुल पूजा के आयोजन करे जाथे। एमा हजारों श्रद्धालु सामिल होथे।
जयंती कश्यप-सम्मान
बस्तर जिला के आड़ावाल ग्राम पंचायत के सरपंच जयंती कश्यप ल यूनिसेफ डहार ले नई दिल्ली म आयोजित कार्यक्रम म केन्द्रीय मंत्री राजीव रंजन सिंह ह सम्मानित करीन। ए सम्मान ओमन ल सशक्त पंचायत नेत्री अभियान के तहत गांव म जल संरक्षण, स्वच्छता अउ गरीब मन ल आवास उपलब्ध कराय के संग आने-आने अच्छा काम बर दे गीस। कार्यक्रम म छत्तीसगढ़ के बारह सरपंच उपस्थित रिहीन।