राज्य विधानसभा म आज घलो एक सौ चालीस आत्मसमर्पित माओवादी मन ह सदन के कार्यवाही देखे बर पहुंचीन। एमा चौव्वन महिला घलो रिहीन। ए माओवादी मन विधानसभा परिसर के अपन भ्रमण के दउरान मुख्यमंत्री विष्णुदेव साय, उपमुख्यमंत्री विजय शर्मा अउ वन मंत्री केदार कश्यप ले घलो भेंट करीन। बाद म पत्रकार मन ले चर्चा करत मुख्यमंत्री ह किहीन कि ए बहुत खुसी के बात हे कि ए आत्मसमर्पित माओवादी समाज के मुख्यधारा ले जुड़े के बाद आज विधानसभा के भ्रमण करे बर आय हे।
विधानसभा समाचार
राज्य विधानसभा म बजट सत्र के दउरान आज स्कूल मनके युक्तियुक्तकरण, जम्बूरी म भ्रष्टाचार, पेड़ के अवैध कटाई समेत बहुत अकन मुद्दा गंूजीस।
आज सदन म सुनील सोनी अउ राजेश मूणत समेत सत्तापक्ष के विधायक मन प्रदेस म स्कूल के युक्तियुक्तकरण के मुद्दा उठईन। ओमन के कहना रिहीस कि युक्तियुक्तकरण के बाद स्कूल के स्थिति खराब हे। सुनील सोनी ह किहीन कि बहुत अकन स्कूल जर्जर हे। एमा स्कूल सिक्षा मंत्री गजेन्द्र यादव ह किहीन कि ओमन एखर परीक्षण कराही। ओमन किहीन कि दस हजार पांच सौ ले जादा साला मनके युक्तियुक्तकरण करे गेहे। एमा ले अभी तक एक सौ छियासठ स्कूल के उपयोग नइ होय हे, जिहां खाली भवन हे, उहां स्मार्ट स्कूल अउ लैब बनाय जाही। चर्चा के दउरान आसंदी ह मंत्री ल अवइया तीस मार्च तक जम्मों स्कूल के व्यवस्था सुनिश्चित करे के निरदेस दीन। इही बीच, विपक्ष ह अतिथि सिक्षक के भर्ती, वेतन अउ नियमितीकरण के मुद्दा घलो उठईन। विपक्ष ह मंत्री के जवाब ले असंतुष्ट होके सरकार उपर वादाखिलाफी के आरोप लगावत सदन ले बहिर्गमन कर दीन।
उहें, आज प्रश्नकाल के दउरान कांग्रेस विधायक राघवेन्द्र सिंह ह बालोद जिला म स्काउट अउ गाईड के जम्बूरी म भ्रष्टाचार के आरोप लगावत विधानसभा के समिति ले जंाच कराय के मांग करीन। एमा स्कूल सिक्षा मंत्री गजेन्द्र यादव ह भ्रष्टाचार के आरोप ल नकारत जांच ले मना कर दीन। मंत्री के जवाब ले असंतुष्ट विपक्ष ह सदन ले बहिर्गमन कर दीन।
विधानसभा समाचार
उहें, भारतीय जनता पार्टी के विधायक विक्रम उसेंडी ह आज एक ध्यानाकर्षण प्रस्ताव के माध्यम ले भानुप्रतापपुर वनमंडल के अंतर्गत कच्छे ओरीडोंगरी गांव म पांच हजार पेड़ के अवैध कटाई के मुद्दा उठईन। ओमन आरोप लगईन कि एक निजी इस्पात संयंत्र ह ए अवैध कटाई करे हे। जवाब म वन मंत्री केदार कश्यप ह बतईन कि ए गांव के आरक्षित वन म लौह अयस्क खनन बर करीबन तैंतीस हजार पेड़ के कटाई के अनुमति दे गे रिहीस। ओमन बतईन कि भौतिक सत्यापन के दउरान करीबन दू हजार आठ सौ पेड़ के रिकॉर्ड नइ मिले हे। विधायक के मांग म मंत्री ह किहीन कि ए मामला के जांच करा के उचित कार्रवाई करे जाही।
आज ले सदन म छत्तीसगढ़ विनियोग विधेयक उपर चर्चा सुरू होगे हे। समाचार लिखे जाय तक सत्तापक्ष अउ विपक्ष के आने-आने सदस्य मन एखर उपर अपन विचार रखे हे।
रीवा-रायपुर हवाई सेवा
रीवा अउ रायपुर के बीच मंगलवार ले हवाई सेवा सुरू होगे हे। हफ्ता म तीन दिन मंगलवार, गुरूवार अउ सनिवार के फ्लाइट चलही। अलाइंस एयर डहार ले जारी समय-सारिणी के अनुसार रीवा ले ए विमान संझा पांच बजके पचास मिनट म रवाना होके संझा करीबन सात बजे रायपुर पहुंचही। उहें, रायपुर ले संझा लगभग साढ़े सात बजे ए रवाना होके रतिहा आठ बजके पचास मिनट म रीवा पहुंचही।
काली रीवा हवाई अड्डा ले ए सेवा के सुभारंभ मध्यप्रदेश के उपमुख्यमंत्री राजेन्द्र शुक्ला ह करीन। ए कार्यक्रम म केन्द्रीय उड्डयन राज्यमंत्री डॉक्टर के.राम मोहन नायडू अउ मध्यप्रदेश के मुख्यमंत्री डॉक्टर मोहन यादव घलो वर्चुअल रूप ले जुड़ीन। उपमुख्यमंत्री श्री शुक्ला पहिली फ्लाइट ले रीवा ले रवाना होके काली रायपुर पहुंचीन।
अपन रायपुर प्रवास के दउरान श्री शुक्ला ह मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ले भेंट करीन। श्री शुक्ला ह किहीन कि रीवा-रायपुर के बीच विमान सेवा शुरू होय ले लोगन मन ल राहत मिलही। ओमन किहीन कि रीवा ले दुरूग के बीच ट्रेन सेवा सुरू करे बर घलो सकारात्मक प्रयास करे जात हे।
नगरीय निकाय-राशि
केन्द्रीय वित्त मंत्रालय ह छत्तीसगढ़ के नगरीय निकाय मन बर लगभग एक सौ पंचानवे करोड़ रूपिया जारी करे हे। ए रासि ले राज्य के एक सौ उनचालीस नगरीय निकाय मन म विकास कार्य करे जाही। ए रासि पन्द्रहवां वित्त आयोग के अंतर्गत जारी करे गेहे।
उपमुख्यमंत्री अउ नगरीय प्रशासन मंत्री अरूण साव ह एखर बर केन्द्रीय वित्त मंत्रालय के आभार जतईन हे। ओमन किहीन कि केन्द्र अउ राज्य सरकार सहर के विकास अउ जनसुविधा विकसित करे बर पर्याप्त वित्तीय संसाधन उपलब्ध करावत हे। श्री साव ह कहिन कि प्राप्त रासि के उपयोग पारदर्सिता अउ गुणवत्ता के संग करे जाही।
दुर्घटना
कोरबा जिला म एक सड़क दुर्घटना म तीन युवक के मउत होगे हे। मिले जानकारी के अनुसार पाली थाना क्षेत्र म कोयला ले भरे एक तेज रफ्तार ट्रक ह मोटर साइकिल ल टक्कर मार दीस। एखर बाद ट्रक अनियंत्रित होके पलट गीस। ए हादसा म मोटर साइकिल सवार तीनों युवक के मउत होगे। ए मन पोटापानी के रहवासी रिहीन अउ दीपका स्थित निजी कंपनी म काम बर जात रिहीन।
घटना के बाद नाराज ग्रामीण मन चक्काजाम कर दीन। प्रशासन कोति ले मृतक के परिजन मन ल मुआवजा के ऐलान के बाद लोगन मन सांत होइन अउ विरोध प्रदर्सन खतम करीन। पुलिस ह ट्रक के चालक ल गिरफ्तार कर लेहे।
उहें, बिलासपुर जिला के रतनपुर थाना क्षेत्र म आज बिहनिया तेज रफ्तार बस के टक्कर ले साइकिल सवार बारह साल के एक स्कूली छात्र के मउत होगे।
ऐति, मुंगेली जिला के लोरमी म चारपहिया वाहन के चपेट म आय ले दुपहिया सवार एक मनखे के मउत होगे।
सीवरेज टैंक-मौत
राजधानी रायपुर के पचपेड़ी नाका स्थित एक निजी अस्पताल म पाछु रतिहा सीवरेज टैंक के सफाई के दउरान तीन मजदूर मनके मउत होगे। मिले जानकारी के अनुसार अस्पताल प्रबंधन डहार ले सीवरेज टैंक के सफाई बर तीन युवक मन ल बलाय गे रिहीस। टैंक के सफाई के दउरान ए युवक मनके जहरीली गैस के संपर्क म आय ले मउत होगे। मृतक तीनों युवक सिमरन सिटी के रहवासी रिहीन। हादसा के बाद अस्पताल परिसर म परिजन अउ स्थानीय लोगन मन अस्पताल प्रबंधन उपर लापरवाही के आरोप लगावत हंगामा करीन। ओमन दोसी मन उपर कड़ा कार्रवाई करे के मांग करीन। अस्पताल प्रबंधन ह किहीस कि मजदूर कॉन्ट्रैक्ट एजेंसी के रिहीन अउ मामला के जांच करे जात हे। प्रबंधन ह प्रभावित परिवार ल हरसंभव सहायता देय के बात किहीन।
नसबंदी कांड-फैसला
बिलासपुर जिला के बहुचर्चित नसंबंदी कांड मामला म जिला न्यायालय ह करीबन ग्यारह साल बाद अपन फैसला सुना देहे। अतिरिक्त जिला न्यायाधीश शैलेष कुमार ह ए मामला म सर्जन डॉक्टर आर.क.े गुप्ता ल दोषी मानत ओमन ल दू साल के सजा सुनाय के संघरा पच्चीस हजार रूपिया के अर्थदंड घलो लगाय हे। उहें, साक्ष्य के अभाव म महावर अउ कविता फार्मा स्युटिकल के जम्मों आरोपी मन ल दोषमुक्त करार देहे।
बतादन कि नवंबर दू हजार चौदह म बिलासपुर जिला के पेंडारी अउ पेंड्रा म सरकारी नसबंदी सिविर लगाय गे रिहीस। ए दउरान सौ ले जादा महिला मनके तबीयत बिगड़े के बाद ओमन ल अलग-अलग अस्पताल म भर्ती कराय गे रिहीस, जेमा पन्द्रह महिला के मउत होगे रिहीस।
चैत्र नवरात्र
काली ले चैत्र नवरात्र परब के सुरूआत होही। ए दउरान मां शक्ति के नौ रूप के अराधना करे जाही। देवी मंदिर म घट स्थापना करके ज्योति कलश घलो जलाय जाही। नवरात्र परब ल लेके दंतेवाड़ा, रतनपुर, अउ डोंगरगढ़ म स्थित शक्तिपीठ के अलावा दूसर देवी मंदिर मन म आकर्षक साज-सज्जा करे गेहे।
रेलवे प्रशासन ह पाछु बछर के जइसे इहू साल नवरात्र के दउरान कुछेक ट्रेन के अस्थाई ठहराव डोंगरगढ़ म देहे।
अउ अब पेस हे मौसम के हाल..
मौसम विभाग ह अवइया चौबीस घंटा के दउरान सरगुजा संभाग समेत प्रदेस के कुछ जिला म अंधड़ के संग करा अउ हल्का बरसा होय के चेतावनी देहे। उहें, अवइया चार दिन के दउरान अधिकतम तापमान म तीन ले पांच डिग्री सेल्सियस के गिरावट आय के संभावना हे।